誰能逼我將就: Ch.56

外公和榮叔離開了，只剩下我們母子三人。

阿媽透了個大氣，拿著外公剛喝過的茶杯便走到廚房。大哥走到我身旁，我粗略地告訴他剛才到底發生什麼事。

「子俊係邊個？」大哥問我。

「呢個我知，上次我唔小心發現堆舊相入面有一個人我唔識，我問阿媽佢話係佢以前男朋友，叫歐子俊。」

「歐子…俊…咦咦咦，唔係喎呢個人我有印象喎。」大哥突然說。





「你有？你幾時見過？」我驚訝的問，因為我們從少一起長大，他見過的人我都應該不會遺漏，除非在我出生之前。

「好細個，我記得我有聽過呢個名。」

「唔好講住，搞返掂阿爸阿媽先。大哥，不如你去搵阿爸，公公為我嘅事無端端剷咗阿爸一獲金，我怕搵到佢時佢又搵我嚟出氣。」

「你傻咗？我同阿爸一向冇咩偈傾，你呢排有同佢搞啲心理輔導，你去啦。」大哥跟我推辭間，阿媽又剛好向我們走來。

「當咩事都冇發生過，唔好再問，我唔想你地阿爸唔開心。」阿媽下達命令，我們兩個猛力的在點頭。





「阿媽，點解阿公會咁嬲？」陽奉陰違是兒女們的天生技能，阿媽叫我們兩兄弟不要說，又沒有叫我們不要問。

「我話唔好提呀！仲有你同英琦嘅事你自己最好諗下點同阿爸解釋，你明知佢最要面，宜家咁樣你話有咩好睇。」阿媽突然喝令我收聲，然後一臉心事的回到自己的房間。

我沒趣的回到房間，十五分鐘後我收到墨的電話，她終於看到那一段新聞。

家裡的事我決定先丟一旁，墨也是受害者，我需要照顧她的感受。不過，就算她沒有找我，我也會跟她見面。這兩段新聞的發佈時間太奇怪，而且將時序調亂來捏造也是疑點之一。我不是陳七，該沒有記者會有這種心思去為我設陷阱吧。

跟墨見面時，我發覺她沒有大的異樣。





「我冇嘢呀，咁我同你拍拖係光明正大，又唔係唔見得人。」墨輕鬆的說，完全沒有介意自己被寫成是第三者的身份。

「但妳社福中心嗰度有冇影響？」

「冇啦，我又唔係明星又唔使面對其他人。今次只係誤會之嘛，咁你同其他人講返，我宜家係你女朋友咪得囉。」墨摟著我，兩個人又糾纏了一會。

「但係我有小小事想同妳討論一下。」

「做咩事？」

「我同妳講過時序問題嗰度，我覺得係有人叫個記者咁樣寫我同妳…妳覺得，會唔會係妳前夫？」我鼓起勇氣，向墨說出這個問題。

墨想了一會，有點慎重的反問我：

「你又會唔會覺得，係英琦叫記者做呢件事？」