誰能逼我將就: Ch.26

「前夫？」聽到這個消息的第一個反應，我是驚訝得不懂反應。直到我意會到，太過份的反應會顯得沒有禮貌之後，我才將表情稍稍的緩和過來。 

「係…不過遲啲有機會先講俾你知。」墨似是隱藏兩眼的淚水說，這時我發現了她手背上有一度小傷痕。 

「墨，妳點解整親隻手？」 

「冇…今朝唔小心整到，冇事…」 

墨的神情愈看愈是古怪，我禁不住追問： 





「真係冇事？」 

「你上船先啦，返香港有機會嘅，我再話俾你知。」 

墨把手信塞到我手中，然後把我推走。我邊走邊回頭看她，我們的氣氛竟古怪得有點離愁別緒的感覺。 

「我冇事呀，香港見啦。」墨向我揚手，我看著她手上的傷口，然後慢慢進入登船閘口。 

兩日一夜的澳門之旅，想不到竟然會發生這麼多的事情。 





回到香港，我立刻趕回家，媽坐在廳中，但不見阿爸的蹤影。 

「純，你返嚟喇？」媽走向我，我把她輕輕的抱著。 

「阿爸未返？有冇打過電話俾佢？」 

「打過喇，佢話自己周圍行下，叫我唔使理佢。」 

「佢同阿哥又嘈咩？」





「你阿哥返嚟食飯，你阿嫂拎咗舊底啲相薄出嚟睇，咁睇得兩睇咪問下我以前嘅事囉，點知講起你阿哥細個嘅事，你阿爸又大脾氣搵人鬧喇。 

又話阿哥細個唔讀書，又搵阿權個仔嚟比，你阿哥咪嬲囉，講得兩講又嘈到飯都唔食喇。」 

阿媽邊說，我邊拿起她所說的相薄。這本相薄是我們的童年照，什麼荔園、海洋公園統統都有去過，那時阿爸沒有現在的嚴肅，常常跟我們拍照，說話也很幽默。 

阿媽說，阿爸是個老實人，一直都對她很好。 

由結婚到現在三十多年，阿爸也對阿媽很好，就算平日對我們兩兄弟會擺出嚴父的模樣，但從來不會對媽有任何責罵。 

阿爸的改變，最直接影響的第一個人，便是阿媽。 

「阿媽，我記得呢張相，阿爸返完通宵，冇訓覺就同我地去荔園，中途仲坐車入鬼屋時，唔小心訓著咗。」 

「係，你阿爸做嘢好搏，後生嗰時成日笑。就係唔知點解，你地兩兄弟愈大，佢就好似愈嚟愈擔心你地咁…成日喺我面前話你地邊樣做得唔好會比人笑，邊樣做得唔好要改過… 





你阿爸份人，成日都話做人唔好將就，所有事都要做得有水準，一定要爭氣。」 

「係…佢就係唔將就，搞到全世界都要就佢。」 

「幾十年脾氣，愈老就愈收埋自己。」 

「我有個朋友做社工，我想搵機會俾佢見下阿爸，可能會有幫助。」 

「唉，等你阿爸返咗嚟先算啦。」 

我邊說話時邊翻著照片，突然發現其中一相照片的內裡，竟夾藏著另一張照片。我拉出來一看，發現照片已非常殘舊，照片內有三個人，一個是阿爸，一個是阿媽，還有一個我不認識的男人。 

「媽，點解有張咁嘅相嘅？」 





媽接過來一看，徐徐的說道： 

「呢張相好耐囉，又會放咗喺度。」 

「呢個男人邊個嚟？我好似唔識嘅？」 

「你點會識丫，呢個係我後生時嘅男朋友嚟。」