誰能逼我將就: Ch.12

  大件事…」我暗忖，同時想避開英琦的眼光，但她明顯已向我走過來。 

「純。」英琦大叫。 

「咦，妳喺度嘅？」我強裝鎮定，不想掀起任何不愉快的場面。 

「你又話喺中環？」英琦走過來，先打量一下墨的全身，再向我質問。 

「係呀，約咗朋友嚟呢邊嘛。」我基本上是啞口無言，因心虛的感覺重重的壓住嘴巴。 





「佢就係阿傑咩？你又話同阿傑食飯？」我早就知道英琦的性格，她發難是不需看日子的。 

「今晚打電話畀妳先講啦好嘛？」我輕輕擋在墨和英琦的中間，不想這件事再尷尬下去。 

「有咩唔講得？要今晚先講？」英琦繼續往死裡挖，我自己又心裡有鬼，一時間不知道怎樣回應。 

  突然，我的身旁伸出一隻玉手來，是墨的右手。 

「妳好，我叫唐爾墨，呢張係我卡片，係一間社福機構嘅導師，我今晚係同阿純傾公事。」墨說話時不慍不火，跟英琦的野蠻態度成了一個對
  比。 





  墨遞上名片，英琦看看我再看看那名片，氣氛立時變得很尷尬。 

「係呀我傾公事呀，都話今晚返屋企先打電話畀妳講啦。」我接過墨的名片，然後塞到英琦的手上，再說：「妳班朋友等妳，快啲返去，我傾完   今晚再打電話畀妳講。」 

「你今晚最好解釋清楚。」英琦輕聲在我身邊說，然後頭也不回地跟幾位朋友走了。 

  我尷尬的回頭，看著墨說：「對唔住，我女朋友。」 

「估到啦。」墨目無表情的說，我看得出她有點生氣。 





「對唔住，我冇同佢交帶好。」 

「食餐普通飯你都唔交代嘅，咁大個人。」墨一直走一直說。

「對唔住呀，搞到妳喺條街咁樣衰。」我一直跟著墨解釋，不希望她有半點不快，說穿了只是我自己的問題而已。 

「冇問題，下次唔同你食飯之嘛。」 

  墨的回覆似假又真，我頓時緊張的看著她。 

「行啦，做咩呀？講笑咋。」墨拍拍我的手臂對我訕笑，不過這個緩和尷尬氣氛的方法的確不錯。 

  又是一途地下鐵路的車程，剛才英琦那些尷尬事大家都好像已經忘了，沿途還是嘻嘻哈哈的胡鬧著。 





  回家的巴士上，我一直打電話給英琦，但也沒有人接聽。 

「又叫我搵佢，又唔聽電話。」要做的已做了，反正我覺得不是什麼大事。半個小時之後，我終於回到家，屋內卻傳出吵架聲。 

  我打開門，看見阿爸和大哥在爭吵。 

「係呀，而家阿爸老喇，唔知你地後生有錢冇地方用。」阿爸拿著一罐啤酒，向大哥喝罵道。 

「唔係有錢冇地方用，係呢個時代小朋友讀書點都要學返幾樣興趣班，唔係就好易俾人淘汰。」大哥反駁，看來也有點面紅耳熱。 

「爸，大哥。」我開門走到他們面前，但他們沒有理會我。嫂子和阿媽抱著樂兒站在一邊，不敢作聲。 

「你係咪即係話阿爸當年冇學你而家咁，兩歲就幫你報埋啲屎片興趣班，搞到你俾人淘汰要做貨車佬搵食呀？」 

「阿爸你唔好愈講愈野蠻啦，我話樂兒要返興趣班唔可以今晚留嚟度訓一夜之嘛，做咩要拉到咁遠嚟嘈呢？」嫂子上前安慰大哥，大哥氣得坐在   沙發上一臉玄壇。 





「我而家唔理你，你唔俾我見個孫耐啲我咪唔見囉。」阿爸說著同時，又跟上次一樣，打開大門便走了。 

「我真係畀佢激死，野蠻到咁都有？」大哥生氣得要命，嘴裡不斷說著。 

「夜喇，如果樂兒聽日要上興趣班，你地就返屋企先。你個阿爸嗰度我會同佢講，唔好勞氣喇堯你都，同老婆阿女返去先啦。」 

「咁奶奶我地走先喇。」 

「嗯嗯。」 

  大哥一家離開後，只剩下阿媽在廳中收拾碗筷，我立即上前幫忙。 

「媽，阿爸點解又發咁大脾氣？」 





「唉，我都唔知。今朝先話腳痛，睇完醫生返嚟就嬲咗成村人咁，你阿嫂上嚟食飯遲咗十分鐘都畀佢講咗兩句，如果唔係你大佬都唔會咁嬲        啦。」阿媽憂心忡忡的表情，看得我一陣心痛。 

「阿爸退休…之後，係咪好大轉變？」我忍不住問阿媽。 

「佢退休之後，我都冇同佢好好地咁傾過一句說話。」阿媽說完，便轉身走回廚房。 

  看來我跟大哥也猜錯，退休真的不是一件身上多幾千塊就能解決的事情。