誰能逼我將就: Ch.11

我驚喜的拿著電話在猶豫，最後還是接下電話。 

「喂。」我故作鎮定。 

「喂，阿純呀，我呀阿墨呀。」 

「我知呀，有來電顯示。」鎮定呀鎮定呀戴哲純。 

「我見到你Facebook個status，你唔係咁快就唔踢波退休呀？」墨笑著說，卻換來我在考慮，是否把阿爸退休事上的難題，去請教一下她。 





「其實係我阿爸嘅問題。」其實不用考慮，我覺得有人因為看到我的區區一句廢話便來加以安慰，這世界真溫暖。 

「講唔講得俾我知？我中心都有好多呢類案例，可以交流下喎。」 

就這樣，我便把阿爸退休的事告訴阿墨，當中還包括了英琦的事。我有想過要不要隱瞞，但下一個問題我便想，為什麼要隱瞞？ 

我跟墨其實什麼都不是。 

「世伯都應該只係唔慣退休之後嘅生活，你唔使太擔心。如果你覺得佢唔太肯同外面嘅人接觸，或者你可以帶佢去我中心。我地有好多興趣班同活動，好似你見到我上次教嘅書法班咁。」 





「咁又係呀，有個靚女教，我都去學啦。」 

「喂喂喂，你把口太花我會覺得你係猥瑣佬嚟喎。」 

「講笑咋，哈哈。」 

「我都係講笑咋，哈哈，咁好啦你有需要就同世伯去我度啦。」 

墨聽來快要掛線的一句，讓我吐出不知那來勇氣的一句： 





「墨，今晚有冇時間？不如食飯？」 

墨沒有即時答覆，電話對話像中斷了幾秒似的。 

「其實我係想問多小小關於退休嘅事。」沒有辦法了，總不能讓氣氛太差，所以我隨便地抹上一個看似合理的原因。 

「嗯…我諗緊今晚有冇事要做之嘛，不過應該冇問題，你想去邊度食？」 

「八點，雅蘭等啦好嘛？」 

「好，今晚見。」 

「Yeah!!!!」掛線後，我忍不住舉起手歡呼，然後立即打開衣櫃，找一套我認為得體的衣服。






晚上，我準時八點出現在旺角雅蘭，等待墨期間，英琦卻突然來電。 

我有些心虛，但想起跟她已經幾天沒有通電話，又覺得不能不理她。我準備了一下，然後接過電話。 

「純，你喺邊呀？今日有冇練波？」英琦像若無其事的問。 

「哦…今日唔使。」 

「你喺邊呀咁？出咗去食飯？」 

「我同阿傑去咗中環食飯，妳呢？妳食咗飯未？」 

「我都出咗去呀，不過唔係同你同一區，哈哈。咁好啦，我打嚟睇下你做緊咩咋，我都行街先。」 

「好，再見。」 





剛掛斷，墨已出現在我的眼前，我暗忖時間配得真好。 

「喂，等咗好耐呀？」 

「唔係呀，我地上去食意粉，好嘛？」 

「好。」 

跟墨的第二頓晚餐，亦是我們倆首次的二人約會。說緊張難免有一點，所以我一直用對話來分散心情。


眼前的墨今天有一點不同，她的衣飾從不奢華，就簡簡單單那一種小清新的感覺。沒有故意的貴氣，也沒有多餘的距離感，墨就是一個永遠讓人看得舒舒服服的人。 

「其實呢，當遇到屋企人退休時所出現嘅問題，我地唔應該諗要改變佢地乜嘢。而係諗，我地可以為佢地做啲乜嘢。」墨一直在開解我，但我的雙眼卻看著她手上的一對進食餐具。 





墨吃意粉的方法跟我不同，她是先把叉子將意粉捲起，再放在鐵匙上。整個過程慢條斯理，而在這一間本來就很平民的西餐廳內，你不會覺得她很造作。 

我看著自己手上的鐵叉，像牛魔王打孫悟空一般將意粉撥個七零八落，而且還未知道我的嘴角會不會有醬汁留著沒有抹走。 

「喂，你做咩望住我食意粉？」 

「冇…你咁樣食咪要用好多時間囉。」我忍不住問。 

「都唔會，可能慣咗。」 

我笑笑，把話題又帶走。很快，這一頓晚飯便完結，升降機到達大堂時，我正準備問墨想坐什麼車離開，這時一個熟悉的身影在遠處出現。 

是英琦，她跟朋友在一起，但她已經發現了我。