一個被MK妹改變既毒撚(修正版)新結局: 雙蒸

我行返屋企，我選擇唔搭升降機而係行樓梯上去，一直諗呀晴一直同我講嘅大劫。
實在係太迷茫喇，我會唔會死...

如果我死左咁屋企人會點啊 呀思點啊 我仲有好多新番未睇 我唔想死。
其他人如果知道自己就死只會諗自己死左之後會點 咩死左之後係咩感覺
依啲想法實在係太自私，可能我以前都會咁諗不過至少依家唔會。
因為...依個世界仲有愛惜我嘅人，我唔想佢地因為我而傷心就算我走，我都要留低我嘅價值令到佢地好過。
可能喇我唔會再諗死左之後會點 死左之後係咩感覺係因為呀杞嘅出現。
不過我見到呀杞做鬼都好可憐，因為就算同最親嘅人一齊都唔可以現形。
就算最親嘅人都唔可以觸摸又或者擁抱，只可以眼白白睇住親人穿過自己嘅身體。




果一種空虛同寂寞就算我未做過鬼，我都明白。

因為毒撚果一種空虛同寂寞同鬼嘅好似又或者一樣。
所以先拎動漫黎填補自己嘅空虛寂寞。
我個腦諗嘅問題就好似係樓梯口果啲垃圾咁堆積住。隨住我一步一步咁上雙腳慢慢疲勞。做人真係唔易而死又難。

可能我真係連死嘅勇氣都無。我無勇氣令到愛我嘅人因為我嘅離開而悲傷。

又或者呀晴一直同我講嘅大劫，其實對我黎講係件小事。





如果只係斷手斷腳就即管放馬過來，我唔怕

我諗返起我老豆有幫我買左一份人壽保險。
我報恩嘅時間可能就到喇。

我好唏噓咁踏入房企，大廳中只有我老豆係到飲酒
屌依家先三點... 扮咩撚野
「老豆 啲女人去哂邊...」

「佢地岩岩一齊出左去買餸煮飯」




好喇 嘅然果兩個女人走左 得我同老豆兩個男人都好

我好認真問我老豆。
「老豆啊... 你係唔係幫我買左一份人壽啊」

我老豆好疑問咁答我
「做咩... 我幫哂你買 同你呀媽買 唔係人壽黎 係綜合保險黎 咩都包哂 做咩啊 問依啲野」

「綜合保險？」

「係啊 綜合保險 有包哂人壽保 醫療保 家居保等等」

都好喇綜合保有咩都有得賠償不過有一樣野一定要問清問楚
「老豆... 如果 自殺 有無得賠....」





我老豆即刻變得好火 怒啤住我
「死仔 你做咩問依啲野」

平時對我好仁慈又玩玩下嘅老豆，我第一次見到佢發火唔知做咩明明依家我連啲MK仔都唔驚，不過我依家竟然係到顫抖... 我仁慈嘅老豆...
「我... 唔想做包袱 我...」

我老豆一野摑落我到打斷我嘅說話

(啪)
「仆街仔 你有勇氣死 做咩無勇氣生存」

啪一聲平時我幾鐘意嘅聲音 不過我呆左 雖然我老豆隻手做野已經做到起左多枕
不過果啲枕無阻隔到佢嘅溫暖，雖然痛但係好溫暖。

我明白到我係佢個仔，所以想我清醒不過唔識表達。





哼 真係 男人之間只有拳頭先可以溝通 不過唔通我打我老豆咩 俾雷劈架...
我只好雙膝跪低係我老豆面前流下我嘅眼淚。我喊係到喘氣。
「老豆... 我... 只怕係時日無多...」

我老豆坐係梳化到舉起杯孖蒸。

「仔 你睇下杯孖蒸 孖蒸係用熱力蒸煮已經發酵嘅米同水出黎嘅合成品 你就好似係我同你呀媽嘅合成品 其他酒嘅酒精濃度大概係三十度左右 不過雙蒸酒更可能達到到四十度或以上 所以我相信我同你呀媽嘅成品 雖然唔係咩出名貴嘅酒 好似茅台 五糧液果啲 不過都唔會輸俾其他平常嘅酒 我相信你一定會渡過到任何野」

雖然我好似有少少聽唔明不過應該都有佢嘅道理，因為佢都係人生經驗比我多。
我抬頭仰望我老豆真係好似個巨人。巨人唔係話佢嘅身型而係佢嘅氣勢。
「明白喇 老豆 我即管試下」

我老豆聽到之後伸出手拉我起身。
「仔 你大過喇 不過你要明白 你根本唔係我嘅包袱 而係我嘅財富 我相信唔只我係咁諗 你老母都應該係咁諗」





我老豆佢用支酒嘅蓋斟左一杯酒俾我
「試下 相信你會明白到依支酒嘅經歷」

我聽完我老豆嘅說話之後唔知係唔係錯覺我竟然飲得出
經過兩次蒸餾令到兩倍嘅香味濃縮係埋一齊

我同我老豆乾杯果一瞬間，我同佢嘅女人回家了