《928快樂》: 2014.09.26｛2｝

「釋放學生！」
「釋放學生！」
「重奪公民廣場！」
「重奪公民廣場！」
踏入凌晨時分，這裡的夜晚沒有絲毫進入寂寥的跡象。
「衝呀！！！」
「落返嚟！我叫你落返嚟！」
「重奪公民廣場⋯⋯」幾十個站在前排的示威者再次爬欄杆衝入公民廣場，大批警察立即從旁湧進，對他們既拉又扯。有好幾個人在我身邊碰肩擦過，弄得我的身軀在人群中不由自主地左右跌撞。我跌倒在地上動彈不得，只能伸出雙手向人求救。混亂之間，有隻厚實的手將我一把拉起。

「有冇事呀小姐？」「擦親少少啫，唔該晒。」




「坐埋一邊唞吓先啦，呢啲嘢交畀我哋大人做！」
說罷，這位中年阿叔就走回人群之中嘗試擋在警察前面。他大概只是誤以為我是學生才會說出一句「交畀我哋大人做」，但這種胸襟，廣闊得產生壓迫感。「許晴！你有冇事呀？」
「隻腳損咗少少囉。」
「不如走啦，你咁攰，又整親。」
還未來得及答阿賢我想多留一會兒，電話就響起了。
「喂？你放工喇？」
「係呀。你喺邊呀？咁嘈嘅？」
「我喺政總呀。」
「真㗎？啲伙記話班人好狼死喎！」
「咩呀？邊班人？」




「鳩衝入去嗰班囉。」

*** *** ***

站在這裡，我想起了三年前，跟子軒去七一遊行的情景。
我們下午兩點鐘到達維園，陽光猛烈地曬著整個球場，遍佈的黑衣人密集得幾乎看不見一塊綠色場地，只見人們臉上滴滴滑落的汗珠，和恍如海市蜃樓般蒸發中的空氣。
「睇怕有排喎。」
「係囉，仲諗住好快起步可以去7仔買水㗎。」
「咁嘅天氣唔飲水好易暈㗎，你飲住我嗰支先啦。」
「哈哈！你男人老狗用Keroppi水樽嘅！」




「幾得意吖。好奇怪咩？」
「都唔夠你第一次約我去街就約去遊行咁怪⋯⋯」
我為自己的衝口而出在內心不斷咒罵自己，出於尷尬，就慌亂地嚥下一口水。不知道子軒是不是察覺到我的慌亂，就在我將水樽塞回他手中時，他順勢牽起我的手。
那次遊行，我們就一直牽著手由維園走到政府總部。

*** *** ***

「喂？阿晴？」
「嗯。」
「你走未呀？」
「而家走喇。」
「我嚟接你。」
「唔使喇。我返到屋企打畀你啦。」子軒考上警察那年，我們就沒有一起去七一遊行了。他說，當警察要維持政治中立，不能參與這種活動。雖然那讓我感到不安，但我寧可相信這是我們一起成長的必經階段，所以我選擇接受這種改變，直至不能。
.
.




.
（待續）