【我在IG Shop買了一個流星少女】: 第六章(3 : 長洲畢業旅行篇)
第二朝清晨，我一早就彈左起身，事關......
今日就係旅行既大好日子喇！！！
「嘉琪我出門口喇！」我輕撫著仍然睡在床上的嘉琪。「我聽晚先會番，你自己照顧自己喇。」
「得啦，咪阻住我訓覺......」嘉琪睡眼惺鬆地說。
「嗯，拜拜！」說罷我就昂首闊步踏出門口。
唔知道大家覺唔覺得「清晨」係有一種特別既氣味架呢？
當我走到大街上既時候，那陣鳥語花香的味道隨即一湧而至，使我心靈的煩惱頓時一掃而空。
於是乎我盡情深呼吸了一下，精神更為之一振。
「希望一切順順利利就好！」我仰望天際祈禱著。
去到中環碼頭，阿溢同一部份同學都已經黎左。
「早晨啊屌你！」阿溢大叫道。
「晨早流流就咪撚講粗口啦，破壞晒呢個咁美好既氣氛！」我笑說。
係等齊人既時間裡面，我地坐左係旁邊既凳上休息。
我無聊地四處張望，然後眼睛就注視左係當初同星瑤係碼頭見面既位置上面。
「既然係咁，好啦！我地之間既協議成交！」少女望住我笑了一笑。「多謝你惠顧Meteorlass，買左我呢個流星少女！」
「小姐，呢D係叫做『收留』而唔係『買』囉好無！」我裝作沒好氣咁講，但內心卻有一種異常既跳動。
「又係喎可？Hehe……」少女伸一伸脷。「既然係咁，多謝你同你細妹肯收留我！」
「當識個朋友姐！」我客氣咁講。
呢個時候少女伸左隻手出黎，但又停左停諗左諗，然後就問我 : 「係呢，其實講左咁耐我都未知你叫咩名添。」
「我？」我笑了一笑。「我叫馬家樹。」
「哈哈，你個名又幾好聽喎！」少女都唔知係玩野呀定係真心咁講。
「你好呀家樹！」少女再次伸左隻手出黎，並且與我對望著，莞爾一笑。
「我叫劉星瑤，你叫我做星瑤就得架喇，多多指教！」
我攞出銀包，從中抽出星瑤給我的那一張合照。
相中的星瑤，星眸微嗔，脫俗美麗，把我的雙眼完全給震懾著。
望住那個曾經如此靠近的我倆，久違的內心深處波動忽然又被牽引上水面。
星瑤，妳最近還好嗎？
外國既生活習慣嗎？
有否......掛住我嗎？
我好掛住你。
真架，我好掛你，好掛，好掛......
「家樹？」阿溢突然一句把我從思考中喚醒。「差唔多齊人喇，let's go！」
「喔好！」我立即抖擻起來。
就係咁，我地正式搭船前往長洲。
黎到長洲之後第一站就係先到沙灘集合。
一落船聞到個陣長洲味，使我又再次「多少往事甜在心頭」。
阿溢睇穿左我既思緒，於是乎搭著我膊頭道 : 「喂，一場黎到係想開開心心咁玩架麻，D唔開心既野就暫時放埋一二邊先啦！」
「嗯......」我點了一下頭。
來到沙灘，就已經見到成級既人齊晒係到。
由於依家正值冬天最凍既時間，加上我地身處係海邊，所以每當有風吹埋黎既時候真係當堂凍到打一個冷震。
我望向不遠處，就俾我發現到紫鈴既身影。
眼前既紫鈴，淨係係tee恤外面加穿了一件稍厚的冷衫，根本就唔足以擋到風！
唔得，我要去俾件衫佢！
點知咁岩得咁橋，就係呢個時候紫鈴剛好望過黎，結果我地既線視就接上了。
紫鈴先係碌大對眼望住我，然後就迅速移開，逃離呢個尷尬既交流。
「好啦，既然大家都黎齊喇，咁首先就玩D熱身遊戲先！」此時活動負責既同學道。「我地第一樣要玩既遊戲就係『收賣佬』！」
唉，惟有一陣間先再搵紫鈴啦。
眾所周知，「收賣佬」就係一隻主持話要一樣物品幾多件，然後大家就要鬥快儲齊舉手，最快個隊就贏既GAME。
「大家記住呀，贏左個班係下個遊戲可以有優勢權！」主持說。
聽完呢句之後，大家既鬥志忽然被燃點起上黎。
「一定要贏！」我大叫著。
「好！」眾人和應。
「既然係咁事不宜遲，我地即刻收賣第一樣野！」主持繼續道。「我地要......上身衫40件！」
下？！咁玩法呀大佬？！
「屌，依家十度都唔知有無喎，玩呢d？！」阿溢有d擔心咁講。
我下意識望向紫鈴，發覺佢已經凍到係到摩擦緊雙手。
「數3聲就開始喇！」主持說。
「唔撚係掛？！」阿溢大叫。「唉，死就死啦！」
「三......二......一......開始！」
話音未落，全世界既人就已經開始除起衫上黎！
「屌，你仲唔快d除？想輸呀？！」係我身邊既同班同學催促道。
不過依家既我真係無暇去理會呢隻遊戲。
事關本來已經著得少衫既紫鈴，居然為左隻game除左件冷衫！
結果紫鈴依家企左係到食西北風，個身仲要凍到不停震緊！
於是乎我立即奔跑過去，然後除左件外套蓋在紫鈴背上。
嘩屌，除左件外套真係好撚凍！
紫鈴一feel到有件衫掂佢，就立即好驚訝咁抬頭，然後當望到我既時候，就立即意會到發生咩事。
「玩隻game姐，唔洗攞個身體黎較飛既。」我將外套既手袖係紫鈴胸前撓了一個結。
紫鈴全神貫注地望著我，然後帶點不甘說 : 「你家陣又好好咩？俾左件衫我自己就係到扮大隻！」
「起碼我無你身子咁弱囉好無。」我沒好氣說。「總知一陣你攞番件冷衫之後，都麻煩你乖乖地著埋呢件外套！」
「點解我要聽你講？」紫鈴側面望向大海。「你咁緊張我做咩？」
「我……」一時之間我都唔知俾咩反應好。
「恭喜晒B班！」此時主持突然大叫起上黎，並指向紫鈴個班。「你地最快集齊40件上衣，所以可以獲得下隻game既優勢資料，請派人上黎接收！」
「頂，我地差d咋！」我個班既人說。
「如果你唔過黎俾件衫我，或者你地會贏呢。」紫鈴望住我講。
「比起輸贏，我更加著緊既係你會唔會凍親囉。」我按著紫鈴個頭。「你病左既話，我唔會背你番屋企架。」
「車，」紫鈴鼓起腮道。「邊個要你背。」
由於下個game就快開始，所以我都慢慢行番過去。
此時一陣狂風吹過，當中的冷氣就好似刀咁刺左落我身體裡面，使我打了一個大噴嚏。
然後我就覺得成身好重，成個人沾寒沾凍。
「嘩屌，你做咩淨係著住件長袖T通街走？！小心病啊！」阿溢走左過黎。
我拍一拍自己塊面，好讓自己能夠精神d。
「得啦洗擔心我，跳跳虎都打得死幾隻！」我笑說。
「請大家留心聽下黎緊隻game既玩法！」主持講。「如果今次贏左既話，就可以獲得一大袋食物！」
「我地要玩既game就係……running man！」
Fuck……即係蝦我狀態唔好姐……
隨住主持講解完畢，我地就開始往各個checkpoint進發以獲取分數。
係長洲來回奔跑左整個上午之後，團體活動總算完結了。
於是乎我地就來到大排檔食lunch。
可能因為岩先唔少心懾親之後再跑足36小時既關係，我已經累得出晒冷汗，整個人乏力地趴左係枱面。
「後生仔你既牛丸河！」老闆娘放左一碗麵係我面前。
攰到死死下既我，完全無理會到眼前既食物，只顧樁個頭落張枱到睡起覺上黎。
訓訓下，我忽然feel到有人拍我膊頭。
「嗯？」我無力地側頭望向上方。
當我認真望清楚既時候，就發現拍我既人原來係紫鈴！
於是乎我立即坐番直個身，眼甘甘咁望住紫鈴。
「睇你個樣一定係岩先凍親啦。」紫鈴向我遞上兩粒藥丸。「拿，呢到係傷風感冒藥，食左佢個頭就會無咁重架喇。」
「傻啦我邊到有事！」我立即打醒十二分精神道。
「俾你就攞住啦！」紫鈴一句說話狠狠咁車埋黎。
「遵命！」我攤開雙手接實藥丸。「唔……唔該……」
「學人晒帥借衫俾我著呀拿，抵你病既！」紫鈴側面道。「呢個故事教訓你，下次唔好再逞強喇！」
「哈哈……」我苦笑道。「咁我病都好過你病既！」
「我唔覺囉好無！」紫鈴講完之後，臉頰突然變得泛紅。「你病左既話，我會為你而擔心……」
由於紫鈴講得太細聲既關係，所以搞到我乜春都聽唔到。
「下？」我不解道。「你講咩話？」
「妖！」紫鈴拎轉面背向我。「總之照顧好自己先再諗我啦！」
明明我依家係俾紫鈴鬧緊，但唔知點解我竟然覺得好開心。
「知道喇何小姐。」我甜甜一笑。
「啊，記得食完野先好食藥！」紫鈴回頭與我對望著，晶瑩剔透的雙眼使我心跳加速起上黎。「如果咪一陣傷到個胃既話唔關我事啊……傻瓜。」
說罷紫鈴就徐徐走番埋去佢自己個班到。
望住紫鈴既背影，我忽然感受到一種被照顧既感覺。
尤其係明明我地冷戰緊，但紫鈴都仍然如此細心地為我送上溫暖，就令我更加倍感窩心。
於是乎我開始大口大口地吃著河粉，而手中則緊握著兩粒藥丸。
不過藥呢家野真係唔食由是可，一食睡意鎖。
本來食完之後我都無乜事架，仲可以影下團體相咁，點知過多左一陣姐我就完全俾睡意征服左，差d連眼皮都瞪唔開咁制。
好彩係阿溢既扶持之下，我總算頂著頭皮跟成班同學一齊行左去東提攞渡假屋。
事關我地班本來男女就玩得好埋，所以我地都只係租左一個單位，裡面有三間房一個大廳，然後男女就撈亂訓。
一入到屋，我就立即狗衝入去最近門口既一間房，然後大字形伏左係張雙人床上面。
「屌，俾我訓陣先，一陣bbq叫醒我！」我睡眼惺忪道。
「okay！」阿溢說罷就把門關上。
我徐徐把雙眼合上，旋即進入周公online。
我瞪開雙眼，發現自己身處在一個全白色的世界裡面。
我緩緩地走在路上，赫然看見面前不遠處出現了一個身穿白衣的棕曲短髮少女。
當我再靠前一點時，內心隨即頓然一愣。
水汪汪的雙眸，動人的輪廓，白裡透紅的臉蛋……
星瑤……
係星瑤啊！！！
「星瑤！」我拔足向前狂奔。
星瑤聽見聲音之後轉過頭來注視著我。
跑到星瑤的面前，我立即把她收入懷內。
「星瑤……點解你要粒聲唔出就走左去……」我久違的眼淚再次溢出。
星瑤身上的白蘭花香味依舊濃而彌醇。
「家樹，」星瑤雙手抱緊了我的腰，然後抬起頭來一臉感觸道。「……」
雖然星瑤不斷在張口說話，但我卻什麼都聽不到。
「家樹……」
「家樹……」
「家樹！」一把吵耳的男聲將我從夢中弄醒。
我抬起頭一望，原來係阿溢。
「下面起緊爐喇，你快d落黎啦！」阿溢興奮道。
「我訓左幾耐？」我問道。
「兩個鐘掛，差唔多啦！」阿溢說罷就轉身準備離開。「我係下面等你啦！」
阿溢走左之後，我就回想起剛才的情景。
「又發夢？」我疑惑道。「點解d夢好似越黎越真實咁既……」
訓左一陣，個頭已經唔再重了，精神都番番晒黎！
紫鈴呢個傻妹，真係要好好多謝佢先得。
洗完面換過件衫之後，我就落左樓下空地同班frd一齊燒野食。
老老實實，未來仲可以同呢班同學有呢d情景的日子真係賣少見少，所以我地全部人都好enjoy係當中，希望為彼此留下最美好的中學回憶。
燒到十點幾，大家都夠夠地皮，所以就快快手執好野上番客廳玩團體game。
玩到咁上下，突然有個隔離班既同學敲我地門。
「咦？乜夠鐘喇？！」阿溢走去門口問道。
「係呀，直升機坪個到等啦！」說罷個位同學就走左。
「搞咩啊？」我不解咁問道。
「哈哈，問得好！」阿溢一臉興奮望著在座各位道。「大家唔好玩狼人住喇，一齊落去直升機坪個到睇比賽啦！」
「咩比賽？」我再問。
「呢樣仲洗問既，梗係一d夜晚先玩得既比賽！」阿溢奸笑了一下。「我地一於黎個『班際深山夜行比賽』！」
係阿溢既帶領之下，我地班沿著海旁來到了直升機坪的位置。
「屌，真係凍到人都癲......」我摩擦著雙手道。
一眼望落去，其他班的人大部份都黎齊晒。
而紫鈴就企左係佢個班女性朋友之間係到傾緊計。
唔知道我地兩個係咪有自動偵測對方既功能架呢，當我望見紫鈴既時候佢竟然又咁岩望番住我！
於是乎我地又好似今朝咁樣，遠距離互相對望著。
「ble！」紫鈴無啦啦向我伸脷扮鬼臉，然後就拎番轉面繼續同佢班frd講野。
......下下下？？！
「歡迎大家今晚黎到呢到出席我地既比賽！」今朝做主持個個同學又再出黎講野。「事關朝早有老師係到阻住晒，所以我地玩既game相信大家都覺得唔夠盡興既，係咪先！」
屌你啦，我為左你地隻game搞到病左，真係唔方唔盡興喇。
「有見及此，我地活動負責組誠意呈獻黎緊既呢隻game，深山夜行比賽！」主持越講就越high。「我地將會以班黎做單位，每班需派出隊友4個，當中最少要有一個女仔，然後係限時一個鐘頭之內於前面呢個山裡面找尋出5樣我地放入去既物品，最快個隊為之贏！」
「每班要搵既物品都係一樣既，但佢地放既位置就唔一樣！打個比喻，山上面有5把雨傘，分別俾5班各攞一把。」
「但要記住既就係，有d傘會易搵d，有d就會難搵d！所以隊員要做既野就係分工合作，以最快既速度搜尋整個山！」
「如果你地速度慢既話，就意味住搵到物品的難度會越黎越高，輸既機會就越大！」
「至於獎品方面喇喎......就係送多一晚長洲住宿俾勝出個班！」說罷主持就拿出一張白紙。「呢張係兌換券，只要贏左個班去搵老闆娘俾呢張野佢既話，就可以即時換領免費住宿一晚！放心啦大家，我地俾晒錢架喇，絕對無花無假！」
聽完呢個咁豐富既獎品之後，全世界既人都開始燃燒起鬥志上黎。
「咁多位C班既同志！」阿溢雙眼簡直識得噴火。「你覺得我地依家要做既係咩？」
「挑，仲洗問既！」我也不知不覺間激動起上黎。「梗係贏！」
「無錯......」阿溢奸笑著。「我地要贏！」
「我地要贏！」眾人和應道。
望向隔離個幾班，佢地D殺氣都不容忽視。
「睇黎將會係場硬仗呢......」阿溢搭住我膊頭。「兄弟，咱們要一齊上嗎？(由呢句開始都要用普通話讀)」
「不用，你留在這裡安定軍心吧！」我其實係信唔過阿溢既運動能力，事關條友跑勁慢。「萬大事由我來扛就可以了！」
「那就拜託了！」阿溢喊到收唔到聲。「我會給你三個精英，一齊加油吧！(去到呢句完)」
之後阿溢就叫左我地班既三大精英出黎------出名肥既肥A男，出名懶既懶B男，同埋出名姿整唔想出汗既姿C女。
「屌你係咪玩鳩我呀！」我一手撓住阿溢條頸扯埋黎。「俾D咁既上菜我？！」
「我信得過你喎！」阿溢向我舉起手指公單眼道。「try your breast baby！」
......Okay you win！
於是乎我地一行四人就行左出去召集處。
所謂知己知彼百戰百勝，我當然要認清黎緊既隊手！
我徐徐觀望身旁其他班的代表，然後雙眼頓時瞪大！
紫......紫鈴？！
「紫鈴？！」我驚訝道。「你做咩走黎玩呀，你又唔跑得快又唔跑得耐！」
其實我心底裡係想同紫鈴講佢玩d咁危險既比賽我會好擔心，不過唔知點解一講出口就變成咁。
「我地班d女仔話個山好黑唔敢玩喎，但事關最少都要3男1女，所以我咪俾人推左出黎做佈景版囉！」紫鈴拉著筋回答道。
「咁你唔怕黑咩？」我取笑道。「我記得有人上次番屋企個陣怕黑怕到又是跳左上我背脊，而且仲要撓住我條頸唔放！」
「驚架，但無人肯玩麻。」紫鈴望住我。「仲有啊，乜你以為我真係因為呢個原因而撓住你咩，傻瓜！」
「嗯？」我不解道。
「睇黎各班既成員都出晒黎喇！」主持的聲音打斷了我與紫鈴的對話。「既然係咁，我地依家派發搜尋list俾大家！」
我接過一張白紙，上面寫住5樣要搵既野 : 傘一把，足球一個，波鞋一對，燒烤叉一支，敵隊成員一個。
okay，唔係好難姐應該。
咦咪住......
敵隊成員？！
「下？！」我當堂o晒嘴望住主持。「乜撚野敵隊成員呀？！」
「事不宜遲，立即開始！」主持完全無視眾人既不解。
「嗶~~~！」
隨住哨子聲響起，所有參賽者都開始陸續衝入去山裡面。
唔知道大家有無試過係夜晚行過長洲直升機坪對入既深山呢？(即係明愛營個邊)
如果有去過既話，都應該知道個到夜晚只有數盞街橙照明，其餘大部份位置真係可以稱得上為「伸手不見五指」。
老老豆豆，就連我呢種天不怕地不怕既人身處其中都覺得有D怯。
我地加埋20個同學上左山之後不約而同地打開手機電筒係到左照右照。
「個山咁大，點搵啊！」懶B男係到發悶道。「算啦，我唔行喇，你地3個搵啦！」
「咪就係，我已經行到攰喇！」肥A男又加把口埋黎。
屌啊，你地兩條友仔行左幾步咋喎！
「我怕出汗，唔行喇！」姿C女抱怨道。
......家陣幾度呀大佬！北極熊都未話熱啦！
算喇！呢D豬隊友唔要都罷！
「咁你地係到坐下先啦，我搵完就番黎join你地！」我笑裡藏刀說。
「okay！」個三條仆街異口同聲道。
就係咁，我隻身踏上了搜尋物品之路。
一路向前行，不知不覺間我已經遠離左入口既位置，走到了方圓十里都渺無人煙的地方。
我周不時都會聽到隔離班隊員溝通既聲音，但卻見唔到佢地個人，呢種感覺都真係幾無助。
「呢到應該無架喇，下個地方啦！」我又再次聽到敵隊的溝通。「我地分開兩隊搵啦！」
唉，人地就話有得分隊，我呢？
「Lonely lonely christmas ~~~」我開始無聊地口up up咁唱起歌上黎。
行左無幾耐之後，我突然留意到有一把五顏六色既傘放左係小路旁邊！
乎是於我立即左右檢查有無敵隊係附近 (其實我乜春都睇唔到，所以姑且當無啦) ，然後就狗衝左過去。
我將傘拾起，見到上面寫住我校的英文簡寫。
無錯喇……係佢喇！！！
「yes！」我高興地將傘放在背上(類似武士傘咁有條帶)。「順利入手！」
我望一望手機上面既時間，依家大概過左15分鐘。
但如果依照現時進度黎睇，以我一個人既力量真係未必可以搵晒剩低4樣野。
仲有，最後個一樣咩「敵隊成員一個」，
……
都唔知做乜鳩。
時間過得好快，轉眼間就剩下最後二十分鐘。
眼見其他隊伍都已經搵到2至3樣野，但自己手中仍然淨係得個一把傘，使得我整個人都開始灰心起上黎。
「係邊呀係邊呀……」我一手攞住手機照明，一手攞住把遮係到四圍掃。
就係呢個時候，E班既四個同學係我面前不遠處經過。
「假如比我地搵埋對波鞋之後，淨低個個咩『敵人隊員一個』點搞？」負責攞住D物品既隊長問道。
「簡單啦，求其背起一個敵隊成員番去就得啦！」旁邊一個成員提出道。
「洗咩咁煩呀，岩先入黎個陣咪有3個敵隊既人坐左係入口囉！求其R一個出去咪得！」另一個成員說道。
佢地口中個三個人，唔會就係……
「岩呀，一於就揀個個女仔啦，其餘個兩個男既都好肥好重咁款！」第三個成員笑說。
屌，咁擺明就即係我team個三條粉腸啦！
「咁我地快手D搵啦！」隊長一施號令之下，眾人就向我呢個方向跑過黎！
於是乎我立即躲在一棵大樹後，免得一陣俾佢地見到我，然後直接捉我出去win game就唔好啦，到時我一定會俾阿溢指住黎笑柒都似！
等到佢地走遠左之後，我就行番出黎繼續搵，點知行兩步又撞到敵人。
不過今次係我面前既，就只有一個男生。
咦，望真D佢好似係紫鈴個班架喎！
「Hello！」我走左埋去。「做咩得番你一個人既？」
「咁你呢，你又一個人既？」男生笑說道。
「我？唔好提喇，我從來都係一個人，哈哈……」我苦笑道。「其他人呢？」
「唔知啊，我地四個分開左行動！」男生回答說。「事關我地隊差少少就搵齊晒，所以決定分開單獨搵，咁樣效率會比較高！」
下？！唔係掛，咁紫鈴依家咪即係一個人係呢個深山裡面？！
「但紫鈴佢怕黑架喎，你地仲俾佢自己一個人行？」我不安道。
「我地有問過佢啊，但佢再三講話無事叫我地放心，所以我地咪信佢囉！」男生確切道。
「你地分開行動左幾耐？」我問道。
「大概……十分鐘？」
「嗯，好啦唔該晒。」
與男生道別之後，我就拿出手機打俾紫鈴，並且繼續往前行。
「咔嚓------」電話接通了。
「喂，紫鈴？」我心切道。
「打俾我做咩？」紫鈴的語氣就好似係情侶罵交個陣咁。「比緊賽架喎。」
「無，聽你D隊員講你地分開左行動，所以想知下你安唔安全姐。」聽到紫鈴的聲音，我的心都稍為安定下來。「依家你無事就好喇。」
「傻瓜，我邊會有事。」紫鈴帶點溫柔道。「不過呢到又真係黑左D，所以我都唔敢行得太遠……哎？！」
紫鈴突然大叫一聲，搞到我嚇左一跳。
「發生咩事？」我不明白地問道。
「我……」紫鈴的聲線變得抖震起上黎。「我唔知道自己去左邊……」
「下？！唔係掛？！」我驚訝道。「你記唔記得自己岩先點行過黎？」
「因為我好怕黑，所以一路上我都淨係迫自己dup低頭搵野，根本無心去留意d路……」紫鈴非常害怕道。「點算啊家樹……我好驚啊……周圍一盞街燈都無……」
「你冷靜d先，唔會有事架放心。」我安撫紫鈴道。「岩先個入口係山腳，所以你只要沿住落斜既路一直行，再加上聽住海浪聲前行，就應該可以番到出去……」
「唔得呀！」紫鈴突然爆左一句出黎，打斷了我的說話。「唔得呀……我做唔到……前面好黑……我唔夠膽行……」
講下講下，紫鈴既聲音開始變得沙啞起上黎。
「我好驚……」紫鈴飲泣著。「你係邊……家樹……」
「得，你放心，我依家即刻過黎！」我堅定道。
「唔好收線住！」紫鈴說。「陪我傾下計……」
「嗯，無問題。」
就係咁，我一路與紫鈴傾著計，一路拔足向山上狂奔。
長洲呢個山雖然唔算得上係好大，但裡面既分岔路卻多如網狀，再加上深夜時分伸手不見五指，而我又同緊紫鈴傾電話所以無得用電筒既情況之下，要係漆黑之中找尋一個身影真係難上加難。
「跟住我醒左之後就換衫落去bbq……」我上氣不接下氣地說道。
冬天的空氣非常冷，使我每吸一口氣都好似會令到肺部結冰咁。
「我地就係bbq加打邊爐，樓下燒雞翼樓上『圾』菜心！」紫鈴既聲線聽起來都安定了不少。「不過勁好笑囉我地燒燒下個陣……哎？」
「嗯？」我不解道。「燒燒下個陣跟住呢？」
「唔係呀……」我從未聽過紫鈴如此緊張。「我……好似見到……嘩呀！！！」
「發生咩事呀！！！」我驚惶失措說。
「啪！」
一下刺耳的撞擊聲音從紫鈴個邊發出。
「do……do……do……」
然後，就只剩下一段結束通話的聲音。
紫鈴！！！
「你所打既電話號碼暫時未能接通，請你遲D再打過啦……」
「搞咩呀！！！」我的心跳和步伐也從未試過如此急速。「你唔好有事呀……紫鈴……」
繞過分岔口，我跑到去寺廟附近的位置。
就係呢個時候，一個坐左係地上既黑影漸漸出現左係我面前。
當我再走近的時候，我臉上露出了久違的笑容。
係紫鈴……係紫鈴呀！！！
「紫鈴！」我迅時跑過去並且大叫著。
紫鈴聽到之後立即轉過黎望住我，佢雙眼早已經充滿了淚水。
「家樹，小心呀！！！」紫鈴好大聲咁喊道。
「小心？」當我注意力不再全部放係紫鈴身上既時候，我赫然發現了不遠處正有一雙可怕的眼睛係到注視著我。
個隻……係一隻野狗！
「嘩呀！」我當堂嚇得雙腿抖震起上黎，但幸好意志力仍能驅使我走到了紫鈴身邊。
「紫鈴，你無事呀麻！」我企左係紫鈴前面，分隔開佢同不遠處既野狗。
「我無事……」紫鈴害怕得連眼淚也不敢流下。「但部電話就跌爛左……」
望住眼前呢隻野狗，想必頭先紫鈴就係因為見到佢所以先嚇到跌左落地下大叫。
我顫抖地拿起傘當作劍，擺出一個戰鬥態勢。
野狗見到我呢個動作，立即硬直了身體。
刀劍神域我就睇得多，而且個陣仲睇到好興奮添。
但原來當自己真係處身於呢種環境既時候，就會知道呢樣野一d都唔好玩。
係好恐怖。
進攻？防守？定係等隻野狗自己走？
係呢一瞬間，我腦海裡面浮現出好幾個對策。
但係每一個對策，我都無信心可以做到……
點算呀……點算呀！！！
「家樹……」就係呢個時候，紫鈴企左起身，然後依偎在我背上。
呢個動作看似簡單，但卻完全表達出一種信任。
一種，紫鈴對我百分之百的信任。
一股暖意從我背後傳過來，使我整個人不再抖震，頭腦也清醒過來。
「唔會有事架，放心。」我堅定道。
我重新望過去野狗既位置，發現佢都無乜點郁過，只有張牙舞爪咁與我對峙著。
係喇！
我記得之前上網睇過，只要唔好拎轉面跑，望住野狗慢慢移開，等佢覺得我地無危險性，咁就可以走得甩！
「紫鈴！」我將整個計劃同晒紫鈴講。
「我唔得架……我好驚……」紫鈴緊緊扯著我的上衣，雙腿早已經軟了下來。
唔可以再係咁拖落去喇，隻狗唔知幾時會衝過黎！
於是乎我立即半跪個人。
「上黎！」我用命令的語氣道。
紫鈴先係嚇左一嚇，然後迅速跳了上我背上。
當紫鈴挨落黎既時候，我先確切feel到佢依家係幾咁驚。
事關佢除左渾身抖震之外，雙手更緊撓著我條頸，仿佛要把我箍死咁。
「紫鈴，準備好未？」我繼續望住隻狗既動態。
「嗯……！」紫鈴緊閉上了眼睛。
我緩緩把身體退後，野狗隨即向前走了一步。
於是乎我減慢了步伐，用一個蚊蠅的方式逐步移開。
十米……十五米……二十米……
我粗略估算與野狗的距離，而佢都無追上黎既意思，所以相差越來越大。
直到一個地步，我再見唔到野狗的身影和眼睛。
「嗚呀！！！」當危機解除之後，我的害怕感一次過上晒黎，使我驚嚇得用衝鋒21既速度跑落山。
由於我無啦啦喊出聲，所以係我背上閉上雙眼咩都唔知既紫鈴都跟住大叫起上黎。
「嗚呀！！！」
隨著海浪聲越來越大，我終於都望到一眾熟悉的同學身影。
我以僅餘的氣力背著紫鈴跑到直升機坪的位置，而身邊既同學都開始注意到我地，繼而露出一個個驚訝既表情。
「咦，佢地番黎喇喎！」主持大叫著。「睇怕一定係呢位男同學想捉紫鈴win game，然後追到不知時日過呢？」
「你地去左邊呀！」阿溢擔心道。「個比賽完左勁耐你地又唔見人，打極俾你地又無人聽！」
「哧……哧……」我不停喘氣道。「俾我放番低紫鈴先……」
阿溢聽到之後點頭示好，然後徐徐退後兩步。
我回頭望向紫鈴，發現佢仍然緊閉著雙眼，雙手則牢牢抓在我胸口上。
「紫鈴，無事喇，可以落地喇。」我微笑說。
紫鈴聽到之後徐徐張開眼，剛好與我回望的視線接上了。
我地彼此間的臉非常貼近，仿佛向前一伸就可以把嘴唇接上。
唔知點解，呢一刻我既心跳得好快好快，快到令我神暈顛倒。
究竟呢一種……係咩既悸動黎？
紫鈴的臉隨即泛紅起來，接著眼眶的淚水突然一下子全部湧出！！！
「紫……紫鈴？！」我不知所措道。
「嗚哇……嗚……」紫鈴聲淚俱下的把我擁得更緊。
睇黎紫鈴應該係俾頭先的事嚇親，所以心情仲未回復過黎。
於是乎我打左個眼色俾阿溢，而阿溢都好識做咁大叫 : 「佢地無事喇，走喇咁多位，散band！！！」
本來有一班紫鈴既護主犬諗住過黎救駕，不過都一一俾阿溢扯走左。
結果最後就只係剩下我同紫鈴單獨留左係直升機坪。
「嗯……」我試著打開話題。「紫鈴，你好番d未？」
「……」紫鈴一直係到喊並沒有理會我，但整個人卻把我鉗實不放。
唉，惟有等紫鈴喊完之再算啦。
冬天的海邊真係好凍，一路企係到吹風之下我發覺紫鈴都開始凍得抖震起上黎。
為左唔俾紫鈴冷親，我背著她緩緩往市集方向走去。
如果你問我背住紫鈴咁耐d體力用晒未既話，我可以好肯定咁答你，一早用晒。
但如果你問我，背住紫鈴咁耐攰唔攰既話，我可以更加肯定咁答你------
我一秒鐘都未試過覺得攰。
此時此刻，我嗅著紫鈴的牛奶髮香味，承擔著紫鈴的體重，感受著與紫鈴身體接觸的溫暖。
此時此刻，是我自星瑤離開以後，第一次重新找尋到「窩心」的感覺。
直到依家，如果你再問我，究竟我係咪中意紫鈴既話……
哈哈。
晚上的市集商店雖然全都已經關門，但卻有流動小販為靜寂的街道增添一點燈火和味道。
我走到小販車面前，看見上面載著許多形形式式的熟食 :
長洲的大魚蛋，惹味的炸雞脾，各種的燒烤串，仲有我最中意食的煎釀千寶。
岩先跑左起碼成公里路既我，依家望住眼前既美食真係垂涎三尺，個肚都即刻打起鼓上黎。
就係呢個時候，紫鈴仿似亦被香氣所吸引，終於有番d動靜咁徐徐抬起頭黎望向小販車。
我偷偷側視望向紫鈴，發現佢已經喊到成塊面紅晒，但汪汪雙眼卻把她顯得更為迷人。
嗯，真係好靚。
「家樹……」紫鈴的嚎哭聲已經收細成哽咽聲。「好肚餓……」
「咁你想食d咩？」我微笑道。
「嗯……」紫鈴思考了一會兒。「全部。」
「……傻妹。」
結果紫鈴替我從屎忽個褲袋裡拿出銀包 (事關佢無帶) ，然後每樣食物都買左一份。
「多謝幫襯呀小情侶！」小販車老闆娘對著我地笑道。
就係咁，我地轉過頭黎係碼頭個邊既海旁慢慢走回東堤渡假屋。
「家樹，不如放低我啦。」紫鈴在我耳邊輕聲說。「你背左我咁耐都攰架喇。」
雖然紫鈴係咁講，但佢行動上卻絲毫沒有想落地的意思。
「咁又唔見你落地架喎！」我取笑道。
「我！……」紫鈴聽到之後當堂變得吞吞吐吐。「哼！你咁想我落黎既話我咪落囉！」
「唔好唔好！」我立即把紫鈴逗高。「你唔好落黎呀！」
「點~~~解呢？」紫鈴拿著食物撓著我條頸，然後把頭伸前側視著我。
「因為……因為……」這次輪到我口窒窒了。「因為你落左地既話，我就無藉口要你餵我食野！」
紫鈴先係呆了一下，接著就大笑起上黎。
「哈哈！」紫鈴笑得好美麗。「傻瓜！」
紫鈴從膠袋中拿起一串大魚蛋(得一粒個隻)，然後勁大口食左一啖。
「我有得食你無得食，嘻嘻！」紫鈴將串魚蛋放係我眼前左右搖擺。
「搞錯啊，好奸茅！」我不甘道。
「唉好啦好啦，俾你食喇！」紫鈴放左串魚蛋係我口前。「呀~~~」
正當我伸前個頭準備食個下，紫鈴無啦啦攞番開左串魚蛋，然後又自己食左啖！
「喂啊！！！」我有冤無路訴。「我想食啊！」
「真係想食？」紫鈴笑了一笑。「想食既就乖乖地講我聽，點解咁想背住我！係咪想食我豆腐！」
「梗係唔係啦我岩先咪講左囉！」我裝作沒好氣說。「我想你餵我食野麻！」
「你講左真話我就餵！」紫鈴堅定道。
「真係？」我說。
「嗯！」紫鈴說。
於是乎我站了在原地。
「做咩企左係到？」紫鈴不解道。
「紫鈴，」我將頭抬高望向夜空。「之前好對唔住。」
「嗯？」紫鈴督一督我塊面。「你發燒啊，無啦啦講呢d野既？」
「唔係啊，我真係心想同你講對唔住。」我真心道。「之前你叫我放低星瑤，但我就覺得你好煩，對你發脾氣，真係好對唔住。」
「……」紫鈴沉默了片刻。「傻啦，我其實都無嬲你。」
「咁點解你又對我不瞅不睬既？」我疑問道。
「因為……」紫鈴擁緊了我的頸少許。「因為我唔想你掛住星瑤。」
「……」我的心跳再度加速起來。
「我知道自己咁做好自私。」紫鈴繼續道。「你同星瑤既回憶，邊個都取締唔到，我無權叫你放低，亦都無權叫你忘記。」
「但係……但係……」紫鈴的聲線變得帶點哽咽。「但係我真係好想你緊張我多一d呀！」
「既然係咁，」我說了一句。
說罷我就好似獎門人隻game咁將紫鈴整個人拋左去我前面。
「哇！」紫鈴被我拋了過來之後緊張得整個人攬實左我。
「你做咩啊！」紫鈴裝作責怪的與我對望著。「想跌左我落地下咩！」
在街燈映照之下，紫鈴泛紅的臉更為動人。
「放心，我一定唔會俾你跌落地。」我說。「如果可以既話，我想背住你一直走，直到我再無能力保護你既一日。」
紫鈴的雙眼頓時瞪大起來，眼眶中仿佛藏著一股待發的淚水。
「你……你係到講咩……」紫鈴抿唇道。
「你岩先咪問我，點解我會想背住你既。」我微笑道。
「嗯。」紫鈴害羞的期待著。
「我依家就回答你。」我堅定說。「何紫鈴。」
「因為我愛你。」
此刻紫鈴流著淚的笑容，大概能夠以沉魚落雁一詞作形容。
「喂，」我開始害羞起來。「好似淨係得我講咁，你都俾下表示啦！」
「嗯……」紫鈴莞爾一笑。「係咪想我餵你食野？」
「係啊！」我眼仔碌碌回應道。
「魚蛋就無喇。」紫鈴甜蜜道。「請你食呢樣啦。」
說罷紫鈴擁著我後頸把整個人向前一拉------
我們的嘴唇，互相緊接著。
『令我不普通，變得堅毅無忌，幕後有一個最大原因------』
『因為妳。』
***
呢一晚，我同紫鈴並無番到渡假屋，而係坐左係面對碼頭既一張長凳上面傾計，眺望平靜而安寧的海面。
我地傾番好多以前既野，而我仲將中意左紫鈴好耐呢件事同左佢講。
「你講真架？！」紫鈴驚訝道。
「係啊！」我笑說。
「其實我當初入劇社既時候都有留意你......」紫鈴有點害羞道。「事關每個人都對我獻殷勤，係得你完全無理我。」
er......其實係我唔夠膽姐，哈哈......
「跟住我開始發覺你對人好細心，好善談，好中意貓狗，好有主見，又唔造作......」紫鈴越講臉就越紅。「總之就吸引左我既眼光啦！」
「你講真架？！」我驚訝道。「但你睇落又唔似中意我喎！」
「事關個陣我已經中意左阿彥，所以......」紫鈴苦笑道。「無理由一次過中意兩個人架麻係咪先！」
「嗯......」呢一句說話狠狠插了在我背上。「你又講得岩既，一次過中意兩個人好衰啊可？」
「sorry啊家樹，我唔係有心架！」紫鈴慌忙解釋道。
「傻啦我無野喎！」我回應道。「只係......我諗我都係時候要思考一下呢個問題姐。」
紫鈴看見我如此苦惱，就把頭挨過來我肩膊上。
「其實......」紫鈴帶點憂慮道。「你心裡面仲係咪好掛住星瑤？」
雖然我睇唔到紫鈴講呢句既時候的表情，但我百分百肯定佢係好擔心。
但如果呢一刻我忍瞞事實既話，我諗紫鈴會更加唔開心。
「嗯，係。」我拿起掛在頸前的星形頸咀。「我好掛住，好掛住星瑤。」
「果然係咁。」紫鈴的反應出奇地無我想像中咁崩潰。
「嘩，你咁睇得開既？！」我取笑道。
「睇唔開架！」紫鈴坐直番個人望住我。「但咁樣就證明到你係一個長情既人，我先可以放心交託自己俾你！」
「況且我之前都講過，我唔會迫你，亦都迫唔到你忘記星瑤架麻。」紫鈴繼續說。「因為呢種『猝結束不到氣絕便已安葬』的故事，往往係最令人刻骨銘心。」
「好對唔住......」我慚愧道。「明明你對我咁好，但我個心就收埋第二個人......」
就係呢個時候紫鈴突然伸出雙手按在我臉頰上，令我變成「*3*」咁樣。
「傻瓜黎既！」紫鈴的笑容非常美麗。「呢D野慢慢黎啦，我地大把時間。」
「我相信總有一日，我何紫鈴會成為你最愛既女人。」
我相信任何男人聽到紫鈴講呢番說話既時候，都會打從心底感動起上黎。
不過可能我就誇張左D，事關我雙眼早就已經充滿了淚水。
「洗唔洗喊呀！」紫鈴笑說罷便準備從褲袋拿出紙巾。
我看準呢個時機，將紫鈴一擁入懷。
「做...做咩呀你......」紫鈴的頭恰好落在我胸前。
攬左一陣，我將雙手按在紫鈴肩側緩緩推番佢起身。
紫鈴眼眸中流露出溫暖的愛意，然後與我對望著。
「紫鈴，」我稍為緊握著紫鈴雙臂。「係個一日之前，就等我地兩個一齊努力啊，好無？」
「我聽唔明喎！」紫鈴裝傻笑道。「有無得講白D？」
「啊你蝦人架喎！」我裝作小朋友道。
「咁你講唔講先？」紫鈴挑逗說。
就係呢個時候，我把握機會把頭向前一伸。
我倆的嘴唇，再次緊緊接上。
分番開之後，紫鈴一聲不響的臉紅地望著我。
「紫鈴，」靠前一步。「做我女朋友，可以嗎？」
「傻瓜。」紫鈴莞爾一笑。
「梗係可以啦，男朋友 <3」
我們彼此依偎著，觀賞清晨的日出。
日出之後，我同紫鈴不知不覺間都靠著對方睡著了。
當我地回過神來既時候，已經係九點幾。
於是乎我地就拖著手，睡眼惺忪咁行番去渡假屋。
「我到喇。」紫鈴指著左邊一間渡假屋。
「咁快就到喇......」我把雙手放在紫鈴腰間。「我唔捨得喎......」
「好痴纏啊你！」紫鈴甜甜地笑著。
「咁男朋友想見多陣女朋友都係好正常架麻！」我耍嘴皮說道，並且把紫鈴再拉近自己多D。
「其實......」紫鈴用雙手捏住我的臉蛋。「我都好唔捨得你呀，傻瓜 <3 ！」
說罷我地好有共識咁哄前接吻了一下。
紫鈴繼續道 : 「不過我地成身臭B崩，點都要沖涼架麻係咪先！」
的而且確我依家真係成身痴粒粒，哈哈......
「咁又係啊可，」我緩緩放開手說。「唉好啦咁，我番去沖完涼就出黎搵你啦！」
「你同班frd食埋個早餐先搵我都未遲啦，男朋友！」紫鈴笑說。「我上去先喇咁，byebye <3」
望著紫鈴走了上樓梯口，我就轉過頭來往自己間渡假屋走去。
上到去門口禁左九萬幾次門鐘之後，終於有人應我門。
「晨早流流邊撚個啊......」未打開門就已經講晒粗口既係阿溢。
當阿溢開門望到我既時候，即時露出一個奸笑的表情。
「琴晚爽啦，」阿溢扯左我入屋。「快d講黎聽下發生左咩事！」
於是乎我就將琴晚玩game開始去到今朝既事同晒阿溢講。
「家樹......」阿溢聽晒之後非常凝重咁搭住我膊頭。
「乜撚？」我不解道。
「你究竟有咩d魅力？」阿溢勁崩潰咁望住我。「竟然咁都俾你食到兩個美女，呢個係咩世界？！無天理呀！！！」
「屌你，你一個詠琳就夠晒數啦！」我挖苦道。「其他既你唔恨得咁多！」
「挑！」阿溢玩耍地推開了我。
「不過我真係想問你一句，」阿溢突然認真起來。「星瑤同紫鈴，你最愛既係邊個？如果佢地同時出現係你面前，你會揀邊個？」
哈，果然係我兄弟，一諗就諗到呢條令我糾結左好耐既問題。
「如果係咁既話......」我思考了一會，然後將心中最真實既答案講左俾阿溢聽。「如果係咁既話，我會答你------」
「我依家最愛既，係星瑤。」
「但我會選擇既，係紫鈴。」
「因為我知道......」我笑了一笑。「我未來最愛既一定會係紫鈴。」
阿溢若有所思咁點了一下頭，然後拍拍我的肩膊站了起來。
「見到你可以重新走番出黎，我真心替你高興。」阿溢伸出掌頭。「千祈唔好辜負紫鈴對你既心意呀，7頭！」
「知道喇！」
我伸出拳頭，與阿溢擊打了一下。
由於琴晚勝出比賽既唔係我同紫鈴個班，所以當我沖完涼同班frd出左去飲左個早茶之後，我地就番到黎渡假屋執拾物品，然後徐徐背起行李落樓，準備還番間屋俾人。
「估唔到畢業旅行咁快就完左。」回望渡假屋慨嘆道。
「唔快架喇，我地琴晚玩左好多games不知幾爽，係你掛住溝女無番黎咋麻！」阿溢串道。「不過咁，如果你想補番數既話，我地遲下考完dse之後自私約囉！」
「哈哈，又好！」我回應道。
我地走到碼頭的位置，就見到其他班既同學都係到等緊船。
當然啦我同紫鈴一眼就望到對方，然後互相甜甜一笑。
「byebye喇阿溢！」我笑說。「遲下見！」
「得啦屌！」阿溢沒好氣說。「我上船喇，bye！」
於是所有同學幾乎都一次過走晒，剩低既就只有我與紫鈴。
「走定唔走？」紫鈴用一雙觸電的眼睛看著我。
我把左手伸出來，緊握著紫鈴的右手。
「嗯......行多陣先走？」我打趣道。
紫鈴嫣然一笑。
「嗯 <3」
只係我點都估唔到，呢個決定足以影響我呢一生。