【我在IG Shop買了一個流星少女】: 第一章(上)
第一章
「唔好走呀！」
望住紫鈴既背影，我一個箭步走上前，從後捉實左佢既左手。
我深吸一口空氣，然後口都窒埋咁緩緩道出 : 「唔好離開我呀……好無？」
「Cut呀！！！」就係紫鈴準備回頭望向我既時候，台下既導演阿溢突然傳黎呢句震耳欲聾既聲音。
Er……無錯，其實我依家係係學校禮堂到為緊出年開學禮既Drama表演做排練，哈哈……
「咁多位排左咁耐戲都攰架喇，休息下先啦！」阿溢一路對住班演員講，一路向住我行埋黎。
唉，又要俾阿溢插喇……
「加油啊家樹！」紫鈴望住我，甜甜咁笑左一笑。
嗚哇！女神一小笑，兵仔一大步呀！
何紫鈴，同我一樣都係依家Form 5升Form 6，不過佢就係中四先入劇社既。
平時無咩女性緣，又唔多交際既我，雖然低form個陣未見過紫鈴，但其實好早就已經聽過佢個名。
點解？因為佢就係我地級數一數二既女神之一！
當初佢入到黎劇社，由我第一眼見到佢開始，我就已經對呢個女仔超有好感！
雪白既肌膚，160cm高，清澈動人既雙眼，烏黑既馬尾……外表睇起上黎簡直就係一個毫無破綻既女神！
不過紫鈴最正既都唔係呢d，而係佢既性格！
佢愛護小動物啦，體貼溫柔啦，聰明伶俐啦……總之就好吸引啦！
不過……正正亦係因為紫鈴佢太吸引既關係，佢身邊既追求者簡直排到尖沙咀海旁。
試問我呢D毒撚，佢又點會睇得上眼先得架......
所以最後我決心成為紫鈴背後默默支持佢既男人，秉承「我的離開也是愛」呢一個宗旨！
(妖，其實咪即係淆Jer唔敢追人。)
呀，講番依家先。
「嗯！」我望住紫鈴，自信咁點左一下頭。
紫鈴亦都對住我點番一下頭，然後就拎轉頭行開左去休息，得番我一個人企係台上面等待阿溢既行刑。
阿溢，係一個身材中挺，樣貌端好，all back頭，戴住黑色圓框眼鏡既男生。
佢除左係我地劇社既編導之外，亦都係我呢個青春故事中既男配角，即係每套小說中必定要有既個個「好兄弟」。
仲記得當初中一入學既時候，因為我同阿溢被編到同班同桌既關係，所以我同佢好自然咁就傾起計上黎，最後仲做左好朋友添。
話說呢個陣我學校就有一條onjj既規則，要求學生點都要參加一樣課外活動。
「一齊參加劇社啦！」係唔知邊一日上學日既小息個陣，阿溢突然無啦啦捉住我隻手勁熱血咁講 : 「一黎唔洗錢，二黎可以當做一樣課外活動！」
「下？」我仲消化緊阿溢講既野。
「咁我當你應承架喇！」阿溢雙眼發光咁望住我，完全無俾我一個反駁既空間。「果然係我既好兄弟！」
「下......」
就係咁，當時連「史坦尼斯拉夫斯基」都唔知係邊個既我，傻奸奸咁就俾阿溢賣左豬仔，格硬拉左我入學校既劇社。
幾年既時間好快就過去左，我同阿溢因為有共同話題、共同興趣既關係而漸漸成為左好知己。
直到今年，由於我同阿溢都算係劇社老臣子既關係，我地分別被安排做男主角同編導呢兩個重要既職位。
本來已經玩左幾年drama既我，要我做男主角當然係駕輕就熟。
不過……今次呢套「愛情劇」認真難到我……事關......
「家樹！」阿溢走到黎我面前，然後一手搭住我膊頭。「做兄弟既，我都廢事好似高高在上咁鬧你。但你岩先d戲真係好唔掂囉！你究竟有無入戲架？！」
「我梗係有入戲啦！」我沒好氣咁同阿溢講。「只係你都知架啦……我都無愛情經驗既，試問你叫我可以點做先得架……所以做起上黎咪『撚戲』囉……」
P.S. 「撚戲」意思 : 格硬做一D情感出黎。極端例子可參考ETV裡面個班唔識做戲既小學雞。
「咁你咪試下當紫鈴真係要離開你喇，然後你好想極力挽留佢囉！」阿溢一路講，就一路笑。「反正……如果你再無d咩行動表示既話，過多半年畢業之後呀紫鈴佢就真係要離開你架啦，係咪先？咪當預習下囉，哈哈！」
「我呢d叫做遠距離守候，你呢d有女既識條鐵！」我串阿溢咁講。「真係唔明點解你呢種7頭都可以有詠琳呢種咁好既女仔做女朋友！」
「你唔恨得咁多架喇，哈哈！」阿溢講。「其實，我都係見你遲遲唔肯行動，怕你後悔，所以先串你，俾d推動力你姐！」
「咪搞我喇，」我嘆左一口氣。「萬一收『好朋友卡』既話，我真係會承受唔起刺激，提早去IFC攞籌！」
「嘩你咪呀，你走左既話邊個幫我做呢套劇！」阿溢講。
「不過認真。」阿溢望住我繼續講 : 「家樹，作為兄弟既我先真心咁講，其實出面個世界好大，要靚過好過紫鈴既女仔多的是啦！所以唔洗因為一個女仔而放棄整個森林架。不如放放膽走出去，重新認識下呢個世界仲好啦！」
「重新認識下呢個世界？」我不解咁問。
「係呀！出去識下人，做下d未做過既事，擴闊下自己既眼光，唔好淨係局限係學校呢到！」阿溢勁有大志咁捉住我講。「話唔定仲可以幫到你去學識點樣做呢套愛情戲添！」
「嗯......重新認識呢個世界......」我腦海中不停反思住剛才阿溢既說話。
「家樹！」阿溢將我從思考中抽番出黎。「你遲下先再諗啦，依家要繼續排戲架喇！唔好再撚戲俾我睇！」
「我盡力啦屌！」我回應。
***
時間一轉，今日既戲已經排完。
由於我學校係觀塘市中心附近，而我同阿溢咁岩都係住觀塘山頂區，所以平時我都會同佢一齊放學番歸。
但有時佢約左女友既話，我就只好自己一個搭巴士了。
執完野之後，我就行左去阿溢隔離 : 「喂，走得未？」
阿溢聽完之後，先係驚訝，然後面露歉意咁望住我講 : 「Hehe......sorry啊，我唔得左同你講，我一陣約左詠琳去睇戲，陪唔到你走......」
「你條友不嬲都有異性無人性架啦！」我扮晒蟹咁串佢。
「Sorry！」阿溢搭住我膊頭講。「最多下次lunch我既！」
「食咩先？」
「M記！」
「屌！」
就係咁，我就戴上耳機，聽住「UP & DOWN」，踏上呢個獨自回家既路程。
上到巴士，我就攞左部手機出黎漫無目的咁loop。
我隨意咁禁左入IG到，點知就俾我見到紫鈴係幾分鐘前upload左一張相！
張相係佢同一個勁靚仔既男仔自拍，caption就係「見有人山長水遠咁由天水圍出黎搵我下午茶，好啦，po下你啦！」
唔撚係掛，連住天水圍咁遠既人都溝紫鈴？！而且仲要咁靚仔，無喇無喇......
唉屌，不過又關我咩事丫！
頹下嬲下咁，終於都番到屋企。
「嘉琪，我番黎喇！」開左門之後，我對住阿妹間房喊道。
突然間，阿妹係佢間房到跑出黎，然後扮晒可愛咁衝埋黎！！！
「馬家樹~~~！」嘉琪撓住我隻手講。
我諗，同我最親密既女仔應該就係呢個細我一年，同我讀同一間中學既阿妹，馬嘉琪。
嘉琪係一個勁男仔性格既女仔黎。頭髮永遠都係無瀏海，求其紮個all back頭就算。
但呢種性格同hea到爆既打扮，都係無阻佢散發出一種「正妹」既氣息。
鬼咩，勁Q靚個樣，勁Q大個波，勁Q長條腿，想唔受歡迎都難啦！
(利申 : 我絕對沒有戀妹。)
所以有時我都覺得幾唔公平架，明明都係同一個老豆老母生，但阿妹就係級花，而我就只係一個大眾臉。
當然啦我又唔會話係下價貨既！175cm高，羽毛球金章，讀書唔差，只係......
個樣普通左d咁囉。
不過唔知道係咪正正因為阿妹生得好標緻既關係呢？由細到大，我都會希望成為一個錫妹妹既好哥哥，所以凡事最好既我都幾乎俾晒我個妹。
而亦係因為咁，我同阿妹既感情勁好。平時有d咩趣事或者煩惱，我地都會一齊傾，互相分享。
就連我單戀紫鈴呢件事阿妹佢都知得一清二楚架！
不過，阿妹就會成日都串我話 : 「其實我都唔明既，洗咩淨係focus係一個女仔身上呀，出面大把世界啦！」
妖，我又無阿妹你咁好條件，邊有得揀姐！
「搞咩呀你！」我鞋都未除好就已經俾佢撞到坐左落sofa。「你唔係想同我講，你已經用晒爸媽去旅行dum低個舊錢呀下話！？」
「傻啦！個d錢係for我地成個暑假架，我點會第一日就用晒！」嘉琪講。
「咁都好d，我幾驚成個暑假都要捱杯麵呀......」我稍為冷靜番d咁講。「咁你扮晒可愛咁叫我其實係想做d咩？」
「我本身就可愛囉唔洗扮！」嘉琪清一清喉嚨，然後繼續講：「其實......我係有啲事想拜託呀哥你！」
「都估到你啦齊宣王，有事鍾無艷，無事夏迎春！」我講。
「但我知道哥你好錫我，一定會幫我既，係咪先？」嘉琪又再次發動嗲功。
唉，好啦，我輸了。
「你真係呢......」我晒投降咁講。「點啊，你想我做啲咩？」
「好耶！」嘉琪聽到之後勁開心咁講。「事情就係咁既------我呢過兩日就要去參加時裝比賽，咁成套衫基本上搞掂晒，但就仲差緊一條頸鍊先齊裝。我去左好多地方搵，但都無咩心水，所以搞到我勁煩。」
「好彩皇天不負有心人！琴日我終於係一間IG SHOP到搵到條好靚既星星頸鍊，所以我立即約左個店主今晚交收。不過......岩先男朋友突然約我今晚去食野，所以......唔知道哥你可唔可以代我去攞條鍊呢？」
呀你個馬嘉琪呀，即係要我做跑腿啦！
不過算啦，望住個咁可愛既阿妹，又真係好難唔幫佢既……
「咁你就快d俾店主個電話號碼我啦。」講完之後我就遞左部手機俾嘉琪。「你save個聯絡人名做『店主』得架喇。」
「好呀好呀！」嘉琪勁開心咁一路講，一路搵店主個number入俾我。「我錫晒你呀馬家樹！」
save左個電話之後嘉琪好快就換左衫出門口拍拖，而我就因為岩先紫鈴IG單野而無咩心情，所以頹頹地咁番左房開電腦打lol。
不過老實講，打lol呢家野都係同朋友玩會開心d，依家無阿溢陪我打硬係差緊d咁！
「唉！」打左一兩場，我已經無晒心情再玩。
望一望掛係牆上面既鐘，原來不知不覺間已經成5點幾。
「係喎！快快手搵個店主wtsapp約交收時間先！」我突然間醒起。
於是乎我就攞左部手機出黎，然後打開左Wtsapp個聯絡列表。
「睇下先……店主……搵到喇！」
係熒幕入面顯示住既，係一個用勁大粒黃色星星配幾條尾巴做icon既聯絡人，而佢既status就係------
「Meteorlass」。
「嘉琪係咪入錯number俾我呀，正常d IG shop唔係會係自己個status到賣廣告架咩？！」我心諗。
於是乎我就send左段信息俾呢個電話號碼問 : 「請問呢到係咪一間IG shop？」
過左一陣，對面send番信息過黎 : 「係呀！呢到係Meteorlass！」
哈，原來個status就係佢間IG shop個名……
我 : 「你好，我係約左今晚交收星星頸鍊既買家！想同你約番個交收時間！」
Meteorlass : 「咁……不如就7點鐘係長洲碼頭等啦好無？」
「咩……咩話！？長洲碼頭！？」係呢一刻，我諗我個嘴應該O過嫻姨。
我立即回應 : 「事關我就住觀塘既，所以去咁遠就有d唔方便……唔知道可唔可以互相遷就下，更改一下個交收地點呢？」
Meteorlass : 「唔好意思呀，其實我IG個到一早就寫左只有逢星期六先設有市區面交！如果唔怕等七個工作天既話，不妨用郵寄方式交收！」
望住呢段信息，我開始有D後悔自己當初做咩乜都未問清楚就應承左幫嘉琪。
「唔怪之得頭先死妹釘咁嗲啦，原來係苦工黎既！」我暗自臭罵著嘉琪。「最衰佢又趕住要啦，如果咪真係郵寄算！」
思考左一陣，我最後都係決定幫阿妹。
唉，長洲就長洲啦！
我 : 「okay咁就長洲碼頭啦！不過我黎你個到都要d時間，所以8點鐘啦好嗎？」
Meteorlass :「好！咁一陣見！」
我求其換左套衫，然後就著鞋出門口，往著觀塘地鐵站狂奔。
馬嘉琪，你今晚番到黎就知死！
***
經過長達2個鐘頭既車程船程之後 (雖然我中途去左subway買包食)，總算終於都係8點前到左長洲。
我行左出去碼頭隔離個白色帳篷到坐低左，然後就wtsapp店主 : 「我到左喇，依家係白色帳篷下面！」
Meteorlass個邊好快就有回覆 : 「好！我依家出黎！」
收番埋部電話之後，我突然俾圍繞住身邊既海浪聲而吸引左，於是乎慢慢咁行左埋去欄杆個邊。
望左一陣個海面之後，我轉過頭黎望向長洲呢個島。
燈火通明既長洲，與我背後個那個漆黑既大海形成一個強烈既對比，感覺上總有一點說不出既格格不入。
講起上黎……自從以前同屋企人入過黎宿營之外，好似都再無踏足過呢到喇。
個陣我幾歲呢？係咪仲讀緊小六呢？
哈，算啦，唔記得喇。
就係呢個時候，有一個匆忙既身影從大街處入黎帳篷，並且朝著我呢個方向直跑。
「唔好意思呀，等左好耐？」一把好像蓋了糖衣既聲音伴隨著腳步聲靠近。「我就係Meteorlass既店主！」
係呢一刻，我真心開始覺得自己應該要考慮下阿溢同嘉琪既說話。
因為原來世界上靚既女仔，真係大有人在。
事關企係我眼前既，正正就係一個皓齒星眸既少女。
呢個女仔擁有一把棕啡色及肩既曲髮，賦有輪廓既臉上配有一個半月彎既嘴巴，加上一對汪汪眼睛，倍添動人氣質。
「都……都唔係等左好耐姐！」由於我望得太入神既關係，回過神來就只可慌忙咁回應道。「但你點知我就係個個買家既？」
「你wtsapp有icon架麻！」少女笑左一笑。
「又係喎可，哈哈……」我勁尷尬咁講。
「拿，呢個係你要既星星頸鍊！」少女說罷就向我遞上一個小紙袋。
我接過黎打開一睇，就見到裡面有條精緻既頸鍊。
呢條頸鍊係由一d金屬同水晶交疊而成，中間則有一粒夜光既小星星作畫龍點睛之用。
「好靚呀條鍊！」我不禁讚嘆起上黎。「我係出面好似都無見過呢d款！」
「梗係啦，我賣既所有鍊都係自己diy架！」少女回答到。「其實我IG個到一早就寫左架喎！而且……乜你唔係睇過條鍊靚先買架咩？」
「er......事關其實我只係幫細妹交收，所以並無睇過你IG……」我有D唔好意思咁講。
「咁你番到去一定要follow番喇！」少女既聲音真係好好聽。「同埋依家記得check清楚d條鍊喎，因為走左就無得退貨換貨架！」
「嗯，條鍊無問題。」我仔細望過之後就放番入袋。
「咁就好喇！」少女望住我微笑。「多謝你100蚊！」
咩話！？乜原來嘉琪仲未俾錢架！？
唔洗問呀貴，阿妹佢一定係想屈我俾住錢先啦！
你個馬嘉琪真係呢......
「……okay！」我有點無奈咁攞左張100蚊出黎俾個少女。
「咁如果再有d咩想幫襯我買既話，記得同我講喇！我會做番個優惠俾你！」少女講完之後就同我揮手道別。「我走先喇，拜拜！」
「！？」係我未反應得切既時候，少女就已經轉左身急急腳離去。
「byebye……」我望住少女既背影，心中暗自係到講。
係喇！
我立即攞出手機，然後打開IG search，輸入「meteorlass」。
於是乎列表上出現左一個叫「Meteorlass」既用戶，而status就係「出售diy星形飾物~~~」。
禁左入去之後，我見到介紹個到寫住 :
「除星期六可在市區面交外，其餘時間均只可在長洲碼頭面交！如有任何問題，請wtsapp +852 685578xx聯絡流星少女！」
「流星少女？」我內心道。「乜個名咁似d動漫角色既！」
我會心笑了一笑，然後按下follow鍵。
『在有生的瞬間能遇到你。』