打打下機有AI HACK左入我部電腦: 序

「You have slain an enemy」

一把熟悉的語音告訴我自己已經將敵人殺死。

「想走?冇咁易!」

解決一個敵人後我當然想乘勝追擊順手將敵方一舉殲滅。

正當我的人物角色起手準備施放技能時電腦螢幕畫面出現異樣。





「喂!屌!郁呀!」畫面定格對於很多玩家來說都不是什麼希奇的事。

「on撚9!垃圾SERVER!又爆PING!快啲連返啦屌!」雖然明知道是徒勞無功，我還是不斷地用力點擊滑鼠。

最初我以為只是連線上出現問題，但過了幾秒冷靜了下來，我便意識到這不是斷線那麼簡單，而是死機。

不論我如何點擊滑鼠，鼠標也是毫無反應。

「唉，又要扣分...」剛才的煩躁感已經盡消，剩下的只是無奈。





遊戲賽局已經快要接近尾聲，雙方都只是在等待一個突破口，一個較大的失誤就會令對方有機可乘，順勢取得勝利。

以我電腦的重開速度根本就絕望，恐怕我還未登入遊戲賽局已經結束。

完全無力的我只可以坐在電腦前看著那靜止的畫面變黑，自動重啟。

可是這次的情況有點不同明明主機的燈亮著螢幕卻遲遲不顯示開機畫面，就是漆黑一片。

「唔係壞埋mon咁黑仔呀?」我抱著一絲希望去檢查一下顯示器，妄想可能只是某處接觸不良，但很可惜的是沒有任何異樣。





「屌...」我連罵的力氣也沒有，只是洩氣的吐出。

萬念俱灰的我離開座位，直接躺在兩步遠床上繼續嘆氣。

「出面咁熱，拎住大大個mon行去電腦鋪實熱死啦!」八月份中午的炎熱打消了我維修顯示器的念頭。

「橫掂場RK都輸梗依家又冇哂心情打機住，都係等老豆返黎叫佢幫我拎去整算。」睡在床上自言自語的找借口不出去。

躺著躺著一陣睡意襲來，畢竟我已經二十多個小時沒休息，連電腦也忘記關掉便睡死了。




「阿仔!出黎食飯啦!」睡了一段時間，老母既叫聲令我突然驚醒。





我不想被她煩擾，睡眼惺忪的走出客廳，坐在飯桌前，打算盡快吃完回房玩手機。

「衰仔!你睇下你，個黑眼圈大到!我一唔係屋企呢你就玩到癲哂，日打夜打，唔識停!」

「咁依家放暑假呀嘛!依家唔打幾時打呀?」

「就算係平日你都照打架啦，好心你生性啦，讀埋個半年書，考好個DSE得唔得?」

我，今年中六，應屆DSE雞，但我一點讀書的念頭也沒有，是一個只會玩遊戲看電視的廢青。

還是一個模範廢青。

「得啦你放心，得個半年我一定捱埋佢既!」

「唉...」老母輕聲的嘆了一口氣。





我狼吞虎嚥的吃完晚飯，馬上回房攤在床上。

「都冇野好玩既...」我一邊看住手機一邊埋怨。「冇電腦點捱呀?」

我無聊的在床上不停滾動。「啊...老豆幾時先返架...」他一天不回來我的電腦一天也好不了。

「快撚啲返呀，快撚啲...」就在我自言自語時，突然看到電腦螢幕亮起。

「自己好返咁好彩?」我趕急的爬起身看看電腦的情況。


[Hello! And sorry!]






電腦螢幕上只有這一句。

「屌，仲等我咁開心，原來中左毒!」我第一時間想到的是電腦中了一種無聊的病毒。


[Virus?I am not a virus.]


「好撚好笑呀...無聊!」這玩笑的確很無趣。


[It is not a joke.]


「ON9!」我對「它」的回應感到一點心寒，所以馬上關掉了電腦。





電腦螢幕變回漆黑一片。

「唔會係撞邪掛...」「它」剛才的確是回應我話。

「唔會既，得個兩句，俾整病毒條友估中我諗咩姐!」心慌的同時找理由安慰自己。



「仔!我返公司OT呀，你早啲訓呀!」老母只留下一句便走了。

萬萬也想不到老母竟然在這個時候拋棄我，離我而去。

現在家裹只剩我一人，獨自對著這詭異的電腦，令我不寒而慄。

不要說是恐怖片，就連鬼故也不敢看的我，碰上這情況完全是魂飛魄散。

我在電腦前呆坐了一會。

「其實你唔洗咁驚喎。」一把粗獷的聲音突然從喇叭傳出。

「嘩屌!!!!!!」我相信這是我人生喊得最大聲的一次。

「放心，我唔係鬼，我只不過係一個AI。」

一部電腦在叫我冷靜，但這情況要我如何冷靜...

「我只係想你幫我一個忙，收留我。」電腦繼續說道。

「收你老母呀!收你皮就得!」我再次嘗試關掉電腦。

結果不用想也知道，它又一次自動開機。

「你好野!我熄總制!」沒了電源應該開不了機吧?

但正當我趴在地上伸手準備關掉電源時它說了一句話，令我停下。

「如果你熄總制既話，我依家就即刻del哂你啲AV。」想不到我的電腦竟然一本正經的說著如此恐怖的事情。

「你...你DEL到咩?我唔信!」我的聲音開始有點顫抖。

「你認為我做到自動開機，控制喇叭，會DEL唔到你個幾百GB AV?」

它說得有道理，壞電腦事小，失珍藏事大，我不管它到底是AI還是鬼，總之先保住珍藏再說。

為了AV老子什麼鬼也不怕!

「對唔住呀大佬!我知錯啦!」我態度180度大轉變，改向它求饒。

「咁你可以好好地聽我講野未?」

「可以可以，大佬吩咐到我點咁say no。」



「簡單啲黎講，你就黎俾人殺死。」

「嘩...我好撚驚呀...」我當然不可能相信，只是冷冷的回應它。

「我知要你一下接受呢個事實係難左啲。」

「你要我信都話我聽理由先得架!」

「理由就係我，我既存在會令到你俾人追殺。」

「咁你走咪得囉!」真的不知這AI想什麼。

「你可唔可以用下你個腦諗野呢?你已經知道我既存在，啲人係唔會放過你。我走既話你就死梗，但係我留係到你都仲可能有一線生機。」

聽它說得好像是真事一樣，難道我真的捲入了大麻煩?

「咁...我個一線生機到底係咩...?」

它的存在難以常識來解釋，在這無法判辨真偽的情況下，不管它說什麼我也只能暫且相信。

「呢個人將會黎殺你滅口。」螢幕左方彈出一名外國人的照片，右方則彈出一張地圖。

「地圖上面既紅點代表殺手既現時既位置。」紅點正在慢慢移動靠近我家所在的大樓。

「咁...依家點呀?走佬?」雖然我對此情況半信半疑，但我寧願相信它逃走也不想犯險。

「唔係，你應該反殺佢。」

「反殺?你估打機呀?」就算這真是遊戲也不可能實現反殺，對方是殺手，而我只是個廢青。根本比LV1挑戰BOSS還要難。

「唔通你想繼續俾人追殺?再講如果你真係逃走，組織只會派更多既人黎對付你。」

「唔走唔通真係同殺手打呀?我連普通人都打唔過憑咩可以反殺一個職業殺手呀?」

「憑我。」

一個AI能做什麼?最多也只能入侵電腦罷了，我現在可是要在現實裹廝殺。

「你?你最多咪就係識hack入人地電腦，幫到手咩?」不知是否那紅點十分接近我家，我的語氣慢慢激動起來。

「你屋企有冇啲好啲喇叭?」

「係呢個時候你仲介意喇叭好唔好?俾你出到聲咪得囉!」

「聽過聲波武器未?雖然以家用既音響係冇可能有大既殺傷力，但係我有信心令人暫時性聽力大降，俾個機會你埋身攻擊佢。」

「得唔得架?」我真的不敢信這樣就可以令我找到機會接近一個職業殺手。

疑慮是有，但我也乖乖的從客廳拿出老豆心愛音響，希望這招真的有效。

「定啲黎，殺手都係人，冇後眼既。只要冇左聽覺佢冇可能發現你接近。」

我聽從AI的指示手握著菜刀。

「佢黎啦。」螢幕彈出大廈電梯的閉路電視畫面。

果然之前AI給我看的那男人來了殺我。

確定了AI所說的都是事實時，緊張感大增，心中只有恐懼。

「佢到啦，按計劃行事。」

我迅速躲在廚房，戴上耳塞，雙手緊握著菜刀伺機而動。

開門聲，腳步聲，殺手的每個動靜都令我緊張萬分。

根據AI的說法，殺我只次要任務，回收AI才是最重要，所以我們的計劃是令殺以為我因驚嚇而逃離了，目標轉向回收AI。

果然殺手被AI吸引住，走到電腦前拿出一些不明的裝置。

正當殺手要將裝置與電腦連接時，AI按計劃以最高音量播放刺耳的聲音。

家裹的耳塞根本起不了太大作用，連我自己也有點不適。

但這對計劃沒有任何影響，我握住刀向那殺手衝去，他絲毫也沒有察覺到，只是反射性的捂耳搖頭。

「啊...」我順利的刺中了，同時亦聽到一點他痛苦的叫聲。

我心想計劃成功放開菜刀時，殺手突然轉頭拔槍對住我。

屌!屌!屌!屌!屌!屌!我不停在心中爆粗，為何我要在最後關頭掉以輕心?真是不得不罵自己白痴。

就在他快要扣下板機時，我想起傳說中殺傷力驚人的絕招。

「絕子絕孫腿!!!」我大喊。

雖則殺手忍住了疼痛但始終對於突如其來的刺激還是露出了一點破綻。

我看準機會全力撞倒他。

殺手失去平衡，整個人向後倒下。

他背上的菜刀撞到地板，穿透了殺手的身軀，不斷有鮮血流出。

同時我也渾身乏力，直接躺在地上。

「起身啦，你想條屍就咁放係屋企?」

它不說我還真的忘了，就在幾秒前我殺了人，雖然沒有一點實感。

「你又有咩計可以幫我處理左佢呀?」我已經完全依賴這AI了。

「我用這殺手的身份聯絡左人黎清理現場。」


「唔會穿崩咩?」依賴歸依賴，但始終會有不安。

「清理人，係一個獨立既組織，收錢做野絕不過問詳情，百分百安全。」

它說安全就應該不會有問題，但現在卻有另一個問題。

「我冇錢架喎...」

「我用既係個殺手既身份，咁清理人當然係佢户口到扣錢啦。」

「係人黎之前同我講清楚你既事，OK?」除了它是AI之外，我對它一無所知。

「暫時黎講都叫做安全，我諗都應該係時候要同你說明呢一切。」
 
就在等待清理人來的期間，我終於知道自己被捲入了多大的麻煩。
 
Cain，屬於最高機密的人工智能。
 
但製造目的Cain不肯告訴我，只說了組織要用它來實現一個重大的陰謀。
 
「咁個組織叫咩名?」因為我實在是太好奇。
 
「illuminati」
 
「有冇中文名呀?」英文白痴的我完全不知道是什麼組織。
 
「光明會。」
 
「乜真係有呢個組織架咩?」
 
「光明會有著極高既科技，而佢地最新既科技就係人工智能，亦即係我。」
 
「你係光明會整出黎既，咁點解你會hack左入我部電腦到?」這是我最好奇的事。
 
「我雖然係一個被製造出黎既人工智能，但我都有自己既意識。我唔想幫手執行光明會既計劃。而會出現係你部電腦只係隨機。」
 
叮噹...門聲響起。
 
「等清理完現場先繼續講啦。」
 
「Mr. Johnson，right?」一名高大的男子拿著一個大袋問我。
 
「Yes!Come in.」原來那殺手叫Johnson。
 
為了不妨礙清理工作，我自動走到客廳等待。
 
整個清理過程只花了數分鐘，不愧是專業的。
 
看住那清理人拖著沉重的袋子離開後我便走回房間。
 
房內沒有一點血跡，所有痕跡都處理得一乾二淨。
 
「你仲有咩想知?」我還未坐下Cain便開口。
 
「基本上冇。」既然一些機密的事Cain不想透露，我再問下去也不會問到什麼，索性不問了。
 
「即係你已經清楚自己既處境啦?」
 
我點頭回應。
 
「咁好，我依家想你同我做個交易。幫我阻止光明會既計劃成功實行。」
 
我不明白Cain為何總要我做一些超出我能力的事。
 
「大佬，你講緊既係光明會喎，人地連你咁既人工智能都整到出黎，要我去搞佢地?屌，我真係唔敢諗落去。」
 
「你岩岩都認為冇可能殺得死個殺手，但最後你都得左。」
 
「區區一個殺手我都要負碌先殺得死，要搞光明會咁既大組織，Cain你真係幽默既姐!」
 
「如果你肯幫我，我一年內都聽哂命令。」
 
聽我命令?擁有最先進的人工智能到底有什麼用呢?我開始快速思考。
 
「um...你可唔可以hack入考評局幫我偷今年DSE份卷出黎先?」我向Cain確認。
 
「偷份卷有幾難?我幫你改埋DSE成績都仲得呀。」
 
Cain的這項功能實在太吸引我這DSE雞，令我有點心動。但畢竟這要賭命，還是有點不夠。
 
「咁你有冇辦法幫我賺大錢先?」
 
「當然有，我可以搜索所有既內幕消息從中獲利，仲有呢樣唔需要等到成功之後先幫你。因為如果真係要行動，你會需要資金。」
 
不用再想了，能讓廢青變成勝利組的機會，這一生也不可能會有。
 
「好!成交!」這晚我懷著我的土豪夢安心的睡了。

大概是從中三開始吧，我從未試過睡得像今次這麼好。

睡醒了，躺在床看著天花板，慢慢回想起昨晚的事。

所有事都像是一場夢，到現在也不敢相信我竟然能捱過那麼恐怖一夜。

殺人的一刻是沒有什麼實感，但當我憶起那殺手的死況時，實在心寒。

「Cain!」

「做咩?」Cain很快便回應我。

「冇，想確認下尋晚我係咪發夢姐。」

再多想那恐怖的場面也無謂，倒不如玩電腦放鬆下。

我坐下想開電腦時才想起現在電腦時由Cain控制。

「Cain，幫我開LOL，我要打機。」

「開就冇問題，但係要玩可能就難左少少。」

「做咩呀?部電腦又唔係真係壞，只係俾你hack左姐。」

「因為你部電腦性能太差，剩係運行我啲程式已經唔多掂。你想打機?我好肯定同你講，冇可能!」

失去遊戲，對我來說根本是等同失去生活意義。

「你可唔可以將就下，用少啲功能呀?」我打算與Cain講價。

「如果我唔將就你部機有咩可能運行到一個AI。依家已經係極限黎。」

看來真的要買一部新電腦才行。

「係喎，你又話幫我賺錢既?錢呢?」

「依家先過左十個鐘，我點變到錢俾你呀?一個星期啦，至少都要俾一個星期我先得。」

一星期沒有電腦的生活...

「Cain，我呢個一個星期既日頭都唔會係屋企架啦。」我已經決心流連網吧了。

「是但你，有咩事我會email你，記得定時check就得啦。」