《完美犯罪手冊》 - 為了上進而失去一切的故事: 5
我右手扶住個醉左既男仔，左手向馬路方向既的士揮手示意。
過左冇幾耐，一架係遠方既的士好快就收到我既意思，從中線慢慢駛入內線，向我既方向駛過黎。
的士愈駛愈近，頃刻之間，唔知點解…我有種不詳既感覺。
隨住車頭前既燈光愈來愈強烈，呢一刻既我就好似被四方八面既警察包圍住咁。
彷彿聽到有人用大聲公對住我講：「你已經被包圍，立即放開你手上既人質！」一樣。
冇錯…
我而家係犯緊法…
呀唔係，應該係準備犯法。
「車，有乜大不了姐？你平時係街掉垃圾都係犯法架啦！」
「咪係！上網下載MP3夠犯法啦！」
「你搭巴士夠成日比少一兩蚊唔係犯法？」
「室內食煙夠犯法咯！」
冇錯…其實我地每個人都犯緊法，無論係大罪定小錯，犯法就係犯法。
點解我地會驚？因為罪名重？或者啦。
不過更重要一點係我已經返唔到轉頭。
一不做，二不休。
的士駛得愈來愈近，同我既距離就只有大概三十公尺。
忽然間，腦海突然閃過一大堆問題，就好似部的士既速度咁不斷湧出黎。
係喇！
一陣上左的士之後，要去邊好？
呢度係銅鑼灣，我屋企係太子，但無理由貪小便宜去太子架？唔得，一定要去個遠ｄ既地方！
係…
冇錯喇…我應該送佢去一個勁遠既地方，然後我就中途落車。
但又唔可以遠得太誇張，因為沙頭角果啲可能的士司機唔會送咁遠都唔定。
屌，你知香港啲的士司機幾垃圾架啦，又鍾意拒載又唔過海又剩咁，如果我平時都寧願叫uber啦！又平又快，服務又好又舒服。
呀，而家唔係講呢ｄ野既時候住。
的士距離我只有十米，係幾秒之後我就要作出決定！
唉，唔理啦！就送佢去……元朗。
咁我就去…唔可以係太子…一於就…灣仔！
如果你問我點解唔去近自己屋企多少少，既可以慳返啲時間又唔洗自己比錢？
傻既，萬一佢係過海既時候醒左咪死？！
所以唔可以太遠，又唔可以太近，如果唔係的士司機會懷疑。
所以最後個計劃係先從銅鑼灣去灣仔，我落車後再叫的士司機送佢去元朗，因為沿途好多都係高速公路，就算佢想停車都停唔到，再加上我拎埋佢部電話……
仲有，一陣上左車點算？！
無理由係的士當住個司機面前搜佢身架？！
加上…仲有第三者係度，咁明目張膽實會引人懷疑架喎，點算…抑或我回頭是岸算喇？
我望一望果個男仔，仆街，佢仲下意識咁摸住個褲袋…
如果我上左車不斷搜佢身，假如的士司機見到我咁做只有兩個可能性：
第一，以為我係賊。
第二，以為我係gay。
唔洗問我揀邊樣，我兩樣都唔想。
點算、點算、點算…我不停問左自己三次。
不如都係……
『喂哥仔你地仲上唔上車架？！』
呢一句深深咁喚醒左我偽裝既細胞。
冇錯，我係呢一刻開始，我就係呢個男仔既朋友。
「上，唔該你等等司機，我兄弟醉左。」我拍一拍佢塊面：「喂你唔得唔好學人飲啦～」
男仔冇反應。
非常好。
最後確認已經順利搞掂，可以上場。
我推左佢上車後，我亦急住上車，但上車之前用眼角既餘光打量一下四周。
街上冇人。
而家只有三個人。
我、醉左既男仔、的士司機。
『去邊呀？』
「請問過唔過海架？」
『過。』
我咁樣問，就算佢唔過海我都可以講另一個目的地。
例如我可以話去香港仔鴨脷洲，然後叫佢車我去灣仔落車先。
咁樣一樣可以達成目的。
「元朗八鄉呀唔該。」
我假意望住個男仔照顧住佢，用眼角既餘光觀察司機位既倒後鏡。
司機冇望過黎。
Very nice。
『收到。』司機邊講邊踏油門。
「呀，係呢，司機你可唔可以係灣仔放低我先，再送我朋友去元朗？」
『你朋友…』司機望一望倒後鏡：『好似醉左喎。』
「佢係我兄弟黎既，」我鎮定咁笑一笑：「放心啦，我擺低一千蚊，你去到叫醒佢比，麻煩你啦司機！」
『唉，得啦！』
人都係貪心既動物，一聽到錢一定會動搖意志。
唔好話你自己有幾清高，要話既只係個價錢要有幾高。
再者。
我話擺低一千蚊比佢根本只係吹水，有邊個會知道我講大話？
只有我自己。
司機點解信我？因為佢下意識已經認定左我係呢個男仔既兄弟，所以先選擇相信我。
作為兄弟，唔好話一千幾百啦，一萬幾千都係咁幫。
的士司機已經開左車，大概仲有五分鐘左右就到灣仔。
我仲有五分鐘既時間落手。
「喂，拎個銀包黎啦，我比住一千蚊你先，遲啲還比我喇死仔。」
當然呢句表面我係同個男仔講，但其實我係同緊個司機講。
等我下一步既行動可以更加合理化。
講完呢句之後，我就好自然咁伸手去佢褲袋，輕輕咁移開佢隻手，順利咁拎左佢銀包。
由於佢個銀包唔算大，我拎佢銀包果時，順勢將佢部手機放係銀包底下。
咁樣，就算司機望到，都只係見到我拎佢銀包比錢佢，完全唔知我拎埋佢部手機。
拎左手機之後，我立即用食指按下音量制既下方。
目的，係為左將部手機較為「靜音」。
非常順利。
我喃喃自語：「丫……個銀包呢……」
我慢慢從後褲袋拎出自己個銀包，打開左之後，遮住男仔個銀包同佢電話。
另一方面右手一路拎錢，左手一路將男仔部電話收埋…
天衣無縫。
我望向前方，當個司機一轉灣，專注係路面情況時，我就拎走哂銀包入面既錢，八達通等等。
身分證當然唔例外，至於果ｄ咩折扣卡乜乜卡物物卡，拎黎都冇用。
然後趁個司機專注係路面時，立即將個銀包放返係佢手。
點解唔收返入佢個褲袋？原因唔洗解釋，都係為左比個司機睇。
營造一個「我剛剛已經將錢放左入去比佢」既假象出黎。
呢個時候，目的已經達成，要做既事就係慢慢等到的士到站。
『嗯……』
！？
弊…！
個男仔郁左一下，好似有返少少知覺咁…！
仆…仆街喇！
我唔可以發出聲音，但…我唔發出聲音又點叫佢停車比我落車呢？！
『司……機……而家去緊邊……』
個男仔冇張開眼，只係迷迷糊糊咁合埋眼下意識問司機。
弊喇！
如果個司機一講個目的地係元朗，佢聽到唔係自己住既地方一定會驚醒叫落車！
到時見到我就水洗都唔清…！
不過…
仲有挽救既機會！
我立即靠近窗口，試圖拉遠同男仔既距離。
再嘗試壓低聲線：「去邊？送緊你返屋企囉。」
『屋企…？嗯……』
男仔聽到後就繼續訓返。
呼……
好彩……
我咁做…應該模擬到「個男仔同司機之間既距離」。
如果我太近講既話，佢一定察覺到我係佢隔離，所以我拉遠少少，再用佢岩岩聽到既聲線，
同佢講係送緊佢返屋企。一方面可以令司機唔洗出聲，另一方面我更肯定二人都相信我講既目的地「元朗」就係屋企。
係呢個時候，司機將車減速，落離合入空波，然後拉一拉hand break，將車停定。
「唔該哂司機，」我打開車門，準備落車：「麻煩你到目的地叫醒佢。」
我不慍不火地甫出車外，絕對唔可以比到一種緊張、可疑既感覺畀司機。
然後踏出車廂，露出一絲笑意…呼吸下呢種自由、且代表成功既新鮮空氣。
啪。
關上車門後，的士往住元朗八鄉呢個目的地絕塵而去。
時間係五點四十五分。
岩岩果十幾分鐘，就好似足球小將將個波帶過半場都用十幾集一樣咁漫長。
當的士去到目的地後，我諗個男仔已經冇錢比。
當然個男仔會知道係自己飲醉左酒而去「報失」，但佢唔會知係比人「偷野」。
而個的士司機，有兩成機會會陪個男仔去埋報警，點解係兩成？因為就算追返，都只係幾百蚊車錢，但就要花佢幾個鐘既休息時間，相信司機捱左成晚已經十分之咁累，所以，佢有八成機會係當自己黑仔，寧願早ｄ返去休息，又或者係叫個男仔打電話叫人黎比錢。
除非佢真係咁戇鳩，犧牲自己休息既時間，犧牲自己搵錢既時間，去追果唔知追唔追得返既幾百蚊。
仲有，要查既話，就算點都唔會查到我。
第一、上車時無任何目擊證人。
第二、我落車既地方係灣仔，搜索範圍只會係銅鑼灣至灣仔。
第三、事發既時間係凌晨，警察都只會係呢個時段查可疑人物，而我，只係一年一次既stock count先會係呢個凌晨時段出現。
第四、唯一見過我既人就只有的士司機，再者，的士司機係凌晨時段，燈光不足下根本睇唔清楚我個樣，唔好話個樣，甚至連高度，著咩衫，咩打扮佢都唔會知。因為呢個時段係通宵更最尾既時段，的士司機既精神已經消耗左好多，集中力都放哂係路面，仲邊會記到我？
第五、相信個男仔要報警都只會諗方法返左屋企先，再等酒醒後先去報，我一陣早少少起身，一早就去先達放左部手機佢，佢奈得我咩何？
最後我望住銀包入面，屬於果個男仔既二千五百蚊，身分證，信用卡，仲有佢既手機…
唔知點解，我有一種莫明既興奮感。
諗起岩岩做既一切，雖然好快時間好短，但就好刺激…
覺得自己好似一個完美既演員一樣…完全冇比人懷疑既地方。
唔通…我天生就係一個賊…？
屌！
我都係一時貪心既姐…肯定唔會再有下次囉…應該…
應該係掛…。
而家都係唔好理咁多，喇喇聲截架的士返屋企先。
搞左成日本身身體已經累到仆街，而家仲花左咁多精神，真係差唔多暈咁制。
其實，我咁做好似好衰咁。
但係呢個世界上無時無刻都有呢種事情發生，每個人一生之中總會遇過幾次。
我唔係要話自己做得正確，我只係犧牲一個陌生人，為自己爭取利益姐。
再講，我話過要從公司落手。
呢個男仔咪當比熱身囉，我唔單止要賺，我仲要搶返Hyuna返黎！