《相交的平行線》: 第三話

“It was the best of times, it was the worst of times.”－ A Tale of Two Cities

 
  我同淇淇在文學氣息的包圍中度過這次夜行。想不到，一直都很難跟人溝通的我，在這次夜行當中，倍感輕鬆。能夠想笑就笑，不必諱言。妳好像一隻不忌生人的百靈鳥般說過不停，與我分享著妳的喜悅。跟妳一起不但能認識到妳，更能認識到我自己。但耳邊的燕語鶯聲，愈加令我害怕，這一刻的歡愉，還能有多少刻。
 
夜行過後，今天的所有活動已經完結。所以，大家都回去自己的房間準備。因為，真正的活動，才要開始準備──晚間自由活動。
 
「喂，柒頭，聽講你同淇淇 一齊行番黎喎，突然間咁快手呀？」 高佬話。
 
「只係傾下計姐，你講到得米咁。」
 




「咁你有冇襯黑拖人隻手呀？」 肥仔話
 
「當然冇啦，點夠你利害，一個人 yo兩條女，脫到毒大哂咩。」
 
「喂，陣間我會同呀喬出去傾，你地自己執生啦。」
 
「我都唔聽達哥啦，佢地話沖完涼去大房等，呀單你過唔過去呀？」
 
「我唔啦，睇埋本書就訓啦，我都唔習慣咁多人。」
 




肥仔同高佬就這樣出去了。整個房間成了我獨個的樂園。而我，看著手機上的時間一分一分的過去，再望著眼前這本挪威的森林，裡面跟著我道，「哪裡有人喜歡孤獨，只不過不亂交朋友罷了，那樣只能落得失望」……除了這兩個老死外，我真的沒有朋友了。我喜歡孤獨嗎？我想與肥仔到大房麼？不，我喜歡現在這樣。
 
看著看著，我也忘了時間，手機顯示著00:30，夜已深。但窗外清朗的夜景在我心頭泛起一段又一段的漣漪，總令我記起與淇淇的對話。正當我思春思得要緊，一下下的敲門聲，劃破了這夜的寧靜。
 
「燒春袋呀……契…」
 
「燒咩呀？，你肚餓呀？」淇淇 一臉疑惑的問
 
「噢，唔係呀，想叫隻燒春雞姐。」我被淇淇嘅出現嚇了一嚇。
 




「嘩，你啱啱食唔飽呀，我帶左杯麵呀」 妳笑一笑說道
 
「杯麵正呀。」
 
「點解你會過黎嘅，你唔係應該同佢地玩緊嘅咩？」我地一路行去canteen 一路傾
 
「冇呀，我見佢地玩到癲哂，見你唔係度咪過黎睇下你搵你食杯麵囉，你做咩又自閉呀唔過去呀。」
 
「我都唔係自閉，只不過不太喜歡嘈姐。」
 
「係咪每個睇書嘅人都咁鍾意靜嫁。」
 
「唔靜點睇書呢？」
 
「你又啱。咁睇書之餘都要社交生活嫁嘛。」




 
就因為妳這一句話，我開始學習改變，改變自己的習慣，改變自己的形象，我想變成你喜歡的人。
 
之後，我地回到房間繼續談天說地，我們的對話由莎士比亞到張愛玲、從芥川龍之介到村上春樹、卡夫卡到米蘭昆德拉。除此之外，還有從生活的點滴到政治觀點。
 
「喂，呀單呀，你點解突然間會參加呢個camp，以你嘅性格應該唔會參加嫁喎。」 淇淇的大眼晴眼定定咁望住我問。
 
「其實我俾朋友捉左黎。」
 
「下，咁呀，好慘呀，係咪好高個個？」
 
「係呀，佢叫高佬。」
 
「我知，傳說中嘅籃球隊隊長嘛，我見佢係女童軍隊中都好受歡迎。」
 




我心想著女童軍的情報網有點恐怖，然後道。
 
 「你都係因為佢而黎個Camp？」
 
「當然唔係，我唔鍾意呢一type 嘅，he is not my cup of tea。」
 
「點解呢，唔會覺得呢type男仔好型咩？」
 
「我始終認為內涵緊要啲，須知道“For beauty, wit, high birth, vigour of bone, desert in service, love, friendship, charity, are subjects all to envious and calumniating time.”」
 
「哈哈，Troilus and Cressida。果然女仔都鐘意愛情劇，可惜呢個係一個悲劇。」
 
「其實我想用名言同人傾計好耐，但係啲朋友總係搭不上話，可以同我咁quote既你都係第一個。不過個男仔好似幾鍾意呀喬喎。」
 
「女仔真係咁易sense到呢D嘢咩？」




 
「唔係喎，佢flirt 呀喬做得好明顯囉。但係呀喬佢就真係鍾意體育勁嘅男仔嘛，所以我都冇乜點理佢地。」
 
「噢。」
 
講講下，或者太夜嘅關係，淇淇已經係我面前訓著左。望著妳非常吸引人嘅臉孔，時間已經失去慨念，突然一聲輕響，有人開門。然後我見到高佬拖著呀喬入黎，我即該俾他們一個細聲D嘅手勢。
 
「咦，點解淇淇係度嘅？」呀喬細聲咁問我。
 
「Er……佢過黎搵我傾計。」
 
「你冇對佢做過啲咩呀？」
 
「冇呀冇呀，淨係傾計咋。」
 




「哼，算你啦。」
 
之後佢走過去小心咁拍醒淇淇，等淇淇半睡半醒嘅時候，呀喬佢扶起妳帶著妳翻睡房了。
 
「喂！勁喎。又話睇埋本書訓嘅？點解睇到到淇淇都入埋黎？」
 
「當我準備訓嘅時候，佢突然過黎搵我嫁。」
 
「高章！以被動作主動，真高章！」
 
「痴筋！你仲犀利啦，拖埋人地啦喎。」我道。
 
「哈，我呢啲係林寶黎嫁嘛，賣速度嘅，同你呢啲賣實用嘅本田唔同囉。」
 
 「我何止本田，我仲要係Honda Civic囉。」
 
「Honda Civic 係cheap cheap cheap cheap cheap型嘅量產跑車，我係限量版 Lamborghini Aventador 呀，除左速度之外，仲要帶D蠻力，先自係我嘅標誌。」
 
「想發夢就早啲訓啦。」
 
「肥仔佢地仲未玩完呀？」 我再道
 
「真係唔知佢地呀，本身我同呀喬係出面覺得多蚊同熱，所以諗住番入黎，冇諗到太黑佢仆親，我一扶就拖左啦。」
 
「得啦得啦，速度嘛。知你勁啦煩人。」
 
「哈哈，我實在太開心啦。」
 
「完左個Camp餐飯走唔甩啦。」
 
「哈哈，冇問題冇問題。但係會唔會太快呢？」
 
「你問個毒撚感情問題，你冇病呀？」
 
「哈哈，又係喎。」
 
「但我可以答你，“Love is a flower that lives on the cliff. You can pick up the flower with nothing but your courage and adventurousness. ”」
 
「哈，你呢個朋友真係有趣，咁你同淇淇呢？」
 
「“It was the best of times, it was the worst of times.”」
 
2014年8月2日
 
清晨的陽光照耀著，從窗外映射入房內，喚醒了睡的不太沉穩的我。當我起身，見到只有我同高佬係房裡面訓覺，原來佢冇翻呢呢邊訓 「有冇咁好玩呀？」。
 
於是我叫醒左高佬，梳洗之後我地去食早餐。去到canteen，我們等了一陣，見到一班Walking dead咁樣向住canteen呢邊行過黎，當堂嚇一嚇，差D以為未訓醒。
 
早餐過後，開始今天第一個program，program 期間，我個組除左我同淇淇之外，其他人都精神散煥，看來他們都在把握時間休息，因為下午的活動才是重頭戲── Running man。
 
食完午餐，各人養精蓄銳準備作戰！
 
「先講講個規則先。首先，而家每組有七個人，要搵一個人做王，其他六個去當兵，負責保護王嘅名牌，防止被撕。王嘅名牌被其他隊撕左之後，該隊有名牌嘅隊員可以運送去中立區，咁被撕嘅一組就判全組輸。而兵和王嘅唯一分别係，兵名牌撕左之後，翻去復活點可以即時復活。我們會有紫色衫嘅工作人員巡邏，如果冇名牌而被捉到會即刻處死。復活點同埋個幢building都係中立區，會有黃色衫嘅工作人員看守，中立區係唔可以撕名牌。如果犯規即game over，無得復活。限時1小時，1 小時之內翻唔到中立區亦會輸。記住，有名牌嘅人只可以係最後5分鐘先可以進入中立區，除非手持其他組王嘅名牌。若果有王死左，我地會廣播召集個一組人翻復活點。為了分別你地唔同組，大家著上組顏色嘅龜背。以上係第一場所有規則。」 主持人說道。
 
「XX，就你做王啦」
 
「好呀。」XX答道。
 
「咁揀好王之後，我地可以點進攻？呀單你有咩意見呀？」淇淇問著
 
「我相信佢地一定會揀呀喬同J me 做王，雖然機會率唔係百份百肯定，但係藍組一定會揀女仔做王，因為佢地得兩個男仔，所以好大機會由肥仔貼身保護，而另一個打遊擊，佢地仲一定會將自己嘅名牌撕左先，咁佢地就可以亂黎。而另一組有個高佬係體能王加上呀喬本身係長跑隊，所以最難打。若果可以利用J me個組嘅遊擊去打佢地就最好，咁呀達就可以贏到佢地。而我地兩個人一組，呀達打遊擊。而撕名牌最好就係工作人員視線範圍之內撕，以免被佢地反撲。」我說著。
 
「咁我同大口欣一組啦，而呀年就同Kristine一組，你地兩個自己攪掂佢，咁分組應該係最好嫁啦」 孱仔泰話。
 
然後係準備途中亦同呀達交代左一句埋下陷阱，當然，希望用唔上啦。
 
一場廝殺的遊戲即將上演。