【現代武俠】每個男人心中都有個武俠夢: 第十三節　飛簷走壁（上）

第十三節 飛簷走壁
 
師父煮了點素菜給我們作早點，吃完在庭園指點毛毛和大食精，我和教主坐在門前的躺椅上，呷著龍井等均均醒來。等著等著就睡了，直到聽到開門聲，是呀星，她揉著眼，睡意惺忪的走出來伸了個懶腰。
 
我：「均均呢？佢醒返未？」
 
星：「我用師父教嘅手法幫佢推咗成朝，去哂啲瘀血，應該冇事嘎啦。佢醒咗嘎啦，之後我攰攰地同佢瞓返咋嘛。咦！師父教緊佢地武功呀？有你地喺度陪師父練武，佢一定好開心。」
 
我：「師父今年幾多歲？點解身手咁好，肌肉仲勁過我地四個夾埋。」
 




星：「師父七十九啦！佢熱愛武術，細個嗰時聽啲長輩講，人人都叫佢武痴，一見到新武功就雙眼發光嘎啦，加上長年住喺深山，過住與世無爭嘅生活，可能因為咁就冇老得咁快。」
 
我：「我都想過呢種生活。」
 
星：「你得咩？你得你啲朋友都唔得啦，你捨得你啲朋友咩？」
 
我：「我都係諗吓啫，邊有可能咁灑脫。」
 
星：「如果你真係隱居，我都可以陪……」這時傳來教主的鼻鼼，威力有如火車經過。我看著呀星笑了笑，然後呷一口龍井，看著他們練武如此起勁，我也坐不定。
 




我邊跑邊叫：「師父，有可以教我旁身的嗎？」師父欣然笑笑：「來來來！」
 
接著我們拳腳交加，熱汗淋漓，練了個上午，師父要我們上山捉雞做午餐，於是一行四人浩浩蕩蕩出發了。
 
臨行前，師父囑咐我們別捉太小的，如果找到雞蛋也不要全拿走，可現實是整個山頭也不聞雞啼，我們的走路聲蓋過了山裏所有動靜，走了十多分鐘仍是毫無收穫。
 
教主：「咁搞法，餓死都未捉到。大食精，你嗌一聲，睇吓附近係咪真係乜嘢都冇。」我們用力捂住雙耳，「吼」的一聲，鳥獸四散，才發現身邊一直隱藏著不少動物。我：「咁就奇怪，點解我地行咗咁耐，乜聲都聽唔到？不如我地試吓除鞋赤腳行，我見啲森林土著都係赤腳。」他們覺得好玩，一起赤腳，果然聲量大減，漸漸也聽得見動物們的鳴叫。我們隨著聲音，發現一隻母雞，我壓低呼吸，用手指示獵物位置，四人默契地散開，在遠處，從四方包圍牠，一聲令下，包圍圈緊縮，母雞向我的方向逃走，頻頻拍翼想從我小龍門中穿過，可惜牠選錯對手，我彎身雙手從胯下追捕，千均一發間食指摸到鳯爪，趁機一下勾住，順勢捉住……「啊！」一聲巨響，我回頭一看，是大食精在慘叫，那雞已逃之夭夭。
 
大食精：「我插到支樹枝。」
 




毛毛：「又係十九你啲屎橋。」
 
教主：「咁都捉唔到隻雞，冇鬼用。」
 
我：「有傷員，咁不如返去先。」他們總愛欺負我。


毛毛和教主扶住大食精，我負責開路，沿途折返，不一會就回到小屋。均均已經醒了，看起來氣息不錯。我：「均均你見點？」均均若無其事地吃飯：「我冇事呀。」頓時放下心頭大石，毛毛見均均沒有大礙，立即甩開大食精，跑過來說：「你而家冇事，我地又成功推咗你落水，係咪可以俾返個電話我地呢，女王大人？」
 
均均：「布袋，自己攞……幾個大男人夾埋蝦我，仲要打傷我，都好意思當自己贏咗。」毛毛紅著臉，拿回電話，教主也跟著拿電話。按了十多分鐘，他們先後把手機放回布袋，想必剛才一定是跟嫂子們暫別，教主：「單對單我地就冇可能夠你打嘎啦，玩過第二樣啦。」均均含著筷子，笑瞇瞇說：「我講吓咋，估唔到你地咁要面，既然係咁，我諗其他嘢玩你地啦。」
 
「你地唔好玩我啦。幫我黐塊膠布都好呀。」大食精可憐兮兮地懇求。