如果你既人生好似打機一樣……: 6.2, 有啲野係試左第一次就返唔到轉頭
果晚我既心情非常之好，平時我一比人殺的話一定發晒脾氣拍晒mouse，但係我無論點比人殺，點比人串，又或者呀方點on9，我既回應都只有一句。
「哈哈……係咩？」
平時放假一定打機打到兩三點既呀方都極罕有地十二點過小小就訓，佢話驚見到污穢野；佢訓左，所以我都好快就訓。
之後果日，我就不斷上網，睇下相關同囡囡出街既資料。
我無問到水牛，因為我仲未想比佢知道住。
但係啲文講既野真係差好遠，有人一味標榜要用金錢攻勢，帶條女食最好既野，跟住送埋lv就溝到女。
我只係一個屋邨仔，要玩錢根本無得玩。
就連平時係online game我都要辛苦經營先有番咁上下既裝備，唔知由幾時開始，遊戲世界就好似同現實世界連埋左一齊咁，你現實成功、有錢，你遊戲世界都會。
有啲離題添，見到咁大既矛盾之後，我決定問番啲熟人；大家可能奇怪除左水牛同呀方之外，我仲可以有乜野熟人，但係其實我之前打機識落既fd有唔小都可以交到心。
毒撚唔似mk，唔似其他世界仔咁見人講人話，見鬼講鬼話，再加上隔住個芒你唔識我我唔識你，講起野上黎其實放好多。
「喂，滓滓。」
「點呀撚樣，好日都唔搵我，依家一定係有野想求我啦；有屎就柯有屁就放。」
人際關係其實就好似一條食物鏈咁，大家見我成日恰尻呀方以為我一定係S，其實好多時我同其他人溝通都係比人串番轉頭，然後將積壓落黎既壓力釋放係啲可以比我恰既人到，亦即係呀方。
當你去做老麥或者KFC之類既低下階層，都會無啦啦比啲客發爛渣，其實套用番同樣既邏輯你就會知點解。
「無，你最近點呀？」
「要寫Assignment，新年假完就要交。如果想關心我既話唔該行開，我好嘔心。」
條友大我兩三年，依家已經係大學。更加重要既係佢有女溝，仲要係換女快過換電話果種。
「sor，入正題。我想問下第一次同條女出街應該要注意啲乜。」
「妖你上高登問post問啦！」
聯絡人 滓滓 顯示為離線。你的訊息將在 滓滓 登入時傳送。
我留低offline message，但係都懷住一個好灰既心情準備開po問，但係下一刻佢就覆番我。
「我用緊an災機上msn，好易斷線。頭先講到邊話？」
「你要救我呀滓兄！你要救我出青頭仔既行列呀，我想有女溝，今次去街唔死得！」
「哦，咁咋……」
聯絡人 滓滓 顯示為離線。你的訊息將在 滓滓 登入時傳送。
點解類似既對話模式好似似曾相識咁既？
睇黎我要換一換問問題既方法。
滓滓再次online，然後我睇準機會發問。
「我要條女溝番我轉到，點做？」
「你終於問岩問題，你已經踏出左成功既第一步！」
佢一路同我講左好多，仲加插左一兩段威水史，雖然睇起上黎好假，但係我完全唔敢駁佢；我怕我一駁佢嘴佢又顯示為離線。
「下？要借啲咦為難下條女？」
「係，如果唔係以後佢就會食住你。」咁都得？
「唔好比啲港女head住你，唔係就有排你受！」
「我個對象睇起黎唔似係港女喎……」Sony點睇都唔似係。
「總之有你著數啦！」
「work唔work架?」我依然好懷疑。
「不要問，只要信。」
不管你信不信，反正我就信了。
就算你裝左COD3／BF3，如果你無番張勁小小既卡你都唔洗旨意玩得到。
同樣道理，軟件搞掂，就係時侯搞搞硬件。
頭髮我已經剪左，雖然唔係MK果種薩亞人頭，又或者劉謙果種個陰設計到可以檔太陽既頭，但係都叫醒醒目目。
而衫方面，我去左人設毒撚專門店既U記，買左件毒撚制服 － 格仔衫。
啲人話U記啲格仔毒我好唔認同，依家係人著衫唔係衫著人，個人先係主角；如果你係冠希的話，就算你全身U記衫，一樣可以化身為攝影大師，所以各位唔好再自欺欺人。
我對個樣係無乜自信，但係最緊要既只係唔好扣分。
用最低配設玩BF3，只要有技術一樣殺到人片甲不留！
已經年廿九，聽日就係約會既日子。
「波仔，聽日打大型副本喎，你應該會出現架啦？」
「你都戇尻，我有街去。」
「我識既波仔終於番左黎！去邊呀你？」同樣地，我唔想將同桑妮去街件事話比呀方知。
「你話知我丫，總之無你咁毒。」
「唔通你要去搵援交妹填補空虛既心靈？」呀方作假設既邏輯係將所有可能性入面以最差果樣優先。
「同女神去街呀，得未呀？」
「哦，原來玩Call of duty。」屌！
下一刻，傳來msn響聲。
「呀波」係水牛。
「點呀兄弟？」心情比較輕鬆，講野都會好聽啲。
「聽日得唔得閒？」
「你唔係要同屋企人食團年飯架咩？」
「係，但係我同屋企人講起你，佢地話你一個人過年好可憐，所以諗住叫埋你黎一齊食團年飯姐。」
水牛父母都見過我幾次，所以對我都有印像同歡迎。
「唔係幾好既，我依個外人……」更加唔好既係我約左人。
「你都識叫我做兄弟，兄弟仲係外人？」水牛異常地婆媽。
「總之我自己搞得掂架喇，唔洗擔心我。」
「呀波你係咪有約？」
Fuck!水牛你唔好咁醒得唔得？
我觀察左水牛好耐，佢真係好醒，比我醒十幾二十倍…
丫唔係，係一百倍先岩。
佢邏輯能力好勁，唔係因為佢估到TVB啲師奶劇個Ending會點，而係佢經常都估到跟住落黎我想講乜又或者我想做乜咁。依家睇黎佢已經有啲頭緒。
「無，無呀！」
「點解唔黎？」水牛你平時果斷好多架喎！
「都話唔想阻你地共聚天倫。」
「多個人多雙筷姐。」係唔係你呀媽用西瓜刀項住你條頸迫你咁講呀？啲語氣咁伯母feel既？
「如果我黎我就比電話你啦。」出絕招，模凌兩可既答案！
「……好啦。」佢終於放棄。
「行唔行年宵呀咁？」但係又出左另一招。
「如果我悶我就call你地啦。」
「哦。」睇黎伯母已經放低左把西瓜刀。
「有乜都唔好收埋，記住同我講，我地係兄弟。」水牛再補多句。
「ok
水牛係唔係真係估到呢？我果頭先搞喊呀飯依家又約桑妮，比佢知道左佢會有乜反應呢？
Anyway，如果依家先話唔去馬我就背負左所有人既期望，所以我依家就同桑妮約實個時間。
「hi」
「hi
明明都已經約左，但係我地仲係好拘緊。
「聽日幾點？」
「我無所謂。」
滓滓教左我點翻譯女性既用語，我無所謂通常係代表我好有所謂。
「咁你決定啦。」
「六點半得唔得？」
「七點啦都係。」滓滓叫我為偶然要為難下佢，就算係小小野都好。
「無問題，麥當奴等
「好。依個係我電話，搵唔到我你就打比我啦……」
「無問題，到時見
非常之短既對話。
同桑妮約實時間地點係好重要，因為佢無電話，所以我係搵佢唔到。
唔知幾時開始，我地已經唔可以再好似以前，無手提電話咁生活。