如果你既人生好似打機一樣……: 3.2, 要嬴，需要全隊既合作；要輸，一個豬隊友就夠
有乜野仲柒過話想扑條女而又比條女聽到？
無錯！就係話想扑條女而又比條女加佢既朋友聽到！
《女同學Ａ、Ｂ、Ｃ、Ｄ 好感度下降》
誤會！全部都係誤會！
依家既我真係好想搵個窿捐左佢就算撚數！
最衰都係呀方條仆街，但就算我一出手打佢或者鬧佢，我既形象都不見得好。
「咦？乜咁岩既？」我首先出招。
「我地溫緊書。」水牛答道。
相信水牛已經同在座咁多位交代過呀方會出現既事，所以鋪排到我地係偶遇一樣。
「喂，買野食先啦，我好肚餓呀……」
因為佢地聽到既只有我恥力爆燈既發言，所以毒撚方可以用一副置身事外既語氣黎講。
佢地又點會估到成件事係點？同一條問題就算問第條友，都會有同一樣既答案，但點解佢地要誤會我？
我只係犯左一個天下男人都會犯既錯！
丫唔係，我根本無做錯！
「你地買番去食定係係到食呀？」呀飯問。
「既然遇到，就係到食啦。」呀方答。
睇黎佢真係想留低……
「呀方，你唔係有人等住你開團架咩？」無幾耐之前佢先屌尻我唔齊人咋喎……
「你依隻工會第一DPS都唔係到，我番去都無團開架啦……當然，如果你都番去就唔同講法。」呀方你條仆街！
「周圍都無乜位，我地坐你隔離得唔得？」我問水牛。
「但係坐左落黎就要溫書架喎，你得唔得先？」呀飯搶先答我，係隔離既水牛剩係望住我。
水牛，唔會連你都誤會我掛？
「得得得，聽日都考試，咪溫陣囉，打小晚機又唔會死既！」要做番個正面既回應用黎挽回我形象！
「但係……」呀飯雙手放係枱上面，雙手垂低型成一個M字，而下巴就放於M字既中間，瞇起雙眼對我話：「我怕你集中唔到喎……」
好挑逗！依個動作，依個表情，依個語氣，依句說話都好挑逗！
醒下啦劉驚波，佢係呀飯黎架！
我真係估唔到呀飯竟然會落井下石，但可幸既係既然佢仲玩緊我，即係佢唔Care我頭先講既野。
問題係在座既女同學，仲有坐係呀飯旁邊既水牛。
依家既氣氛非常之尷尬，我完全唔禁想像今晚會點過，更何況仲有最大既變數 － 呀方既存在！
頭先晏晝場波，都因為呀方先搞左咁多大頭佛出黎，我估今晚都唔會好得去邊……
依家第一時間，都係去點個餐緩和下氣氛先。
排完隊之後，輪到我同呀方點餐。
「三號、加大、加雞翼、無儲分。」毒撚方式既快人快語，佢究竟係覺得咁樣型啲定係毒到唔敢同收銀員姐姐講野，想速戰速決？
「波仔你想食乜？飯tastic？」佢將飯字個音拉到勁長……
我今日唔打尻你個仆街仔我就唔姓張！
「唔好意思喎，依家已經無飯tastic……」果舊野都叫做飯？M記都係賣番牛河算啦。
「唔緊要，我依個FD精神有問題，最鐘意亂講野架啦。」我笑住答番個收銀，但係唔洗照鏡都知自己既笑容好勉強。
當我拎完個餐之後準備行番去水牛佢地果張枱，而剩低既女同學既眼神都好似刻意避開我咁，即使離遠都感受到果種強大既壓力並無減少到！
我坐係呀飯同面本身擺緊野既位，而呀方就住我隔離，亦即係水牛對面。
「啲薯條放得太耐，都唔好食既……」呀方開始投訴，而隨後就發表有關薯條方面既偉論，女同學無理到佢，呀飯同水牛傾緊條問題應該點答，而我當然亦都無理到呀方。
你食緊M記咋！醒下啦！
咦，唔係喎，做得好呀呀方！
依家咁既氣氛要解圍，就要靠呀方做戇尻仔引開佢地注意，而係其他人心裡面屌尻呀方既同時，我就為佢地發聲鬧尻呀方，再以盟友既身份加入佢地！
行得通！依個計劃行得通！
「呀方，你可唔可以細聲啲唔好嘈住人地溫書？」
「咁啲薯條真係好唔得丫麻，你唔覺咩？」睇黎佢覺得自己完全無問題，不過咁樣正好對我有利！
「好食同唔好食都係咁食架啦！」等我代啲女同學屌化你啦！
「你咁樣講既又唔見你食屎？」仲附加左一個毒撚意圖搞爛GAP時附帶既奇怪笑容。
…………………
依一刻空氣好似凝結左一樣，我望望其他女同學，佢地全部都望住自己既筆記，眼尾都唔望下我地兩個，其中一個仲開始戴起耳機。
無喇，我今日下午辛苦地建立番黎既正面形象無喇……
「我都係要拎啲薯條去換。」呀方即刻作狀起身，而我既任務就係要阻止佢！
「你唔好咁麻煩啦，一係你食我果啲勒。」我想扯番佢落黎。
因為呀方坐既係最角落頭位，所以如果佢要行出黎的話，我隔離兩個溫緊書既女同學都要起身讓路。
「我先唔食你既口水尾，你唔好阻住我。」
佢作勢要我借開，於事我企起身。
「你坐番低，咁樣你會阻到人地溫書。」水牛同呀飯依然當我地無到，出聲啦你兩個！你兩個應該知道呀方戇尻起上黎真係無極限架！
「行開。」因為係囡囡面前，呀方想型想扮有性格既狗公格即刻出晒你，佢開始想用武力推開我，但係我唔會比佢得逞，於事我地兩個就係勁狹既M記角落開始爭持不下。
「你唔好咁麻煩啦！」「我對食有要求都唔岩咩！」你係咁撚有要求就唔好黎M記啦，人地收你三十蚊你仲想點呀，啲M記姐姐做成粒鐘一個餐都未必買到呀！
佢開始將聲線放大，M記入面既其他食客都開始食住花生睇我地依套馬嬲戲。
唔好睇呀，係M記入面唔可以進食M記以外既食物架……包括花生。
我同佢已經好似係到相搏咁，個造型非常難睇，而個別既女同學都開始面有難色咁望住我地。
「行開！」呀方竟然出到咁既力？
我一失平衡，跳左落去後面……
然後坐左係女同學既大脾上面。
「嘩，乜波仔你咁猴禽呀？」呀飯單手托住個頭咁係到抽水，依個時侯你仲落井下石！
無喇，今次真係跳入印度洋都洗唔清……