如果你既人生好似打機一樣……: 3.1, 關家姐都要向我甘拜下風

就係我不斷諗野既同時，頭先有大量體力勞動既我已經不知不覺間訓著左。
 
…………………………
 
「喂，衰仔，你校服都唔換訓左係到都有既！」
打開雙眼，見到既係我老母，睇黎佢已經放工番左黎。
 
咦？放工番左黎？
 
「呀媽，依家幾點？」我即刻好緊張咁問。




「六點半囉，你行開，唔好阻住我睇新聞啦。」
 
呀媽，果種是Q旦旦既新聞你就咪鬼睇啦。
 
然後我立即拎起我部Sony Ericsson W910i出黎打比呀方。
「喂，毒撚方你做緊乜？」
「你做乜唔on呀？我地爭你先開到團呀！」佢講緊既係另一隻我同佢都有玩既online game。
 
「你屋企煮左飯未？陣間我地落m記。」
「下……你好小搵我去食野搵得咁急架喎……你呀媽又打緊麻雀？」點解你咁多野問架姐。




 
「佢係到睇緊電視。」
「咁做乜忽然間想食m記呀？」
 
我火滾唔想煩，於事我咁答：「咁我忽然間掛住你想見下你得唔撚得呀？」
佢聽完之後無聲出，之後好含羞答答咁答：「咁……既然你都咁講到囉……咁咪陣間見囉……」
 
「妖！陣間樓下等啦！」
「咁好啦，拜……」我未等佢第二個拜字講出黎既時侯就cut尻佢線。
 




「喂，今晚食乜呀？」睇緊新聞既老母忽然問。
「唔洗煮我飯，我今晚出去。」
 
「下？你出去？」
係我極速沖完涼之後就落左樓下，呀方條毒撚已經著住件死人初音Tee企左係到。
 
「行喇。」
「哦。」
 
平時口水多過浪花既呀方係依程路竟然唔講野，我見佢欲言又止咁樣，於事我直接講。
「有咩想講就出聲啦。」
 
佢呃左好耐，都係講唔出。
 
「你唔好咁撚婆媽得唔得，你係女人咩？」




「拿，你問我架咋！」你真係好煩。
 
「講啦屌！」
「其實波仔你係唔係基架？」
 
…………………
 
「我屌爆你個老母，你呃咁耐就係想問條咁戇尻既問題？」我即刻發老脾咁屌尻佢，而呀方亦都縮埋一舊。
「咁我見你頭先咁講，我咪confirm下先啦，你係基咋，我唔係基架！」佢講依句既同時亦都用雙手掩住佢個屎忽。
 
「我都唔係基囉唔該！」佢已經當左我係基？
「咁你點解釋點解你到依家都無女朋友？」點解會係佢依條終極毒撚問我依個問題？
 
「你自己無女朋友點解仲好意思問我？咁係唔係代表你自己都係基？」佢既邏輯好有問題，好撚有問題。
「乜野無女朋友呀？初音，法國菜，仲有好多好多……佢地全部都係我老婆！」佢講既時侯好驕傲咁演示左佢果件初音Tee。




 
「醒醒吧，這全部都是你的幻想！」
「佢地全部都係我既翅膀，活係我心入面！」
 
我忽然間覺得同佢講都無撚用，所以都係收聲，然後過左一陣呀方再問。
「你真係唔係基？」
 
「唔係呀！」
「你真係鐘意女人？」
 
「我最鐘意女人喇！我晚晚都要睇av打飛機，咁你安樂未？」
「你睇av都可以係睇男人架！」點解忽然間佢可以咁醒？
 
我地已經入左屋邨商場，離M記好近。
 




「呀飯同水牛比你揀一個，你會揀邊個先？」
點解佢會將一個男人同女人拎黎比？
 
「係男人都會揀呀飯啦！」
「哦，你鐘意呀飯！」依種非黑即白既邏輯顯露左佢既智商只有兩個可能性：０，或者係負數。
 
「咁只係代表我性取向正常，何況呀飯咁索，係男人都想同佢扑野啦！」
「嘩，你派咁大頂高帽比我呀？」來自熟悉既聲音。
 
呀飯、水牛，仲有一眾女同學係隔離張台望住我，亦即係頭先我同毒撚方既問題對答已經比人聽到晒。
 
玩撚猿。