如果你既人生好似打機一樣……: 1.5, 唔睇說明書然後出事係用家自己既責任

「小智！」我大力拍台，但係係我隻手拍頭張台之前，時間就停頓左，而帶住紅色CAP帽既小智就係班房外面斯斯然咁行入黎。
「點解我剩係學得四招？」我第一時間向小智興師問責。

「你無玩過POKEMON咩?你係得四招架啦，至於點樣分配隨得你。」小智一副理所當然既樣子。
「但係明明套動畫入面，比卡超又識電光火石又識高速移動，仲有十萬伏特，電擊同落雷添喎，仲有好多好多，點計都唔止四招啦？」
「妖，你睇爆旋陀螺，啲Ｄ陀螺仲可以召喚聖獸同毀滅世界添，但係你係啲屋邨玩具鋪出面睇住班細路玩果陣有無見到核子分裂先？」我忽然間覺得佢好有道理。
「喂等等，但係連小智你都出現左，有乜野係無可能？」我剩低既邏輯能力問左依一個問題。

「妖你咪撚咁多爹啦，有四個免費既能力Slot比你你仲想點？」小智開始唔耐煩，把玩手上既精靈球。
「咁即係我只可以記得四樣野？」今次仆街鳥。





「咁又唔係。你覺得頭先呀sir既野好易，只不過係因為依四個Slot既影響。當你用晒四個Slot之後，剩低既野就要用番你本身既能力去記或者學習。」
哦，咁計我始終都係賺左。

當我懷疑消除既一刻，我亦都返回現實，而我亦都係班房中大大力咁拍左張台同高呼小智既名字；所有人包括任sir，呀方同水牛亦都望實我，成班人都開始用鄙視既目光望住我；我下意識望向桑妮，我見到佢既眼神充滿住失望，下一刻佢已經令番轉前面。
「劉驚波，我睇你有D唔舒服咁喎，你落去保健室休息一下。」

任SIR輕描淡寫咁講。
我無作出任何反抗，一黎面對任SIR，唔好諗住反抗，二黎我諗我都需要冷靜下。
入到保健室，今日當值既老師係MISS周。




MISS周前幾年都有教過我，但係佢教我乜野科我已經唔記得。
「呀波你係咪邊到唔舒服？定係想逃課？」

「我唔係唔舒服，只係比呀任SIR叫左我落黎。」我如實回報。
「哦，你比Heaven隔離左。」Heaven，任sir洋名，其實我覺得佢叫做呀Hell仲貼切。

任SIR依D教壇老屎忽，知道係D無心機既學生身上浪費時間係多舊魚，所以佢就創出左依招隔離政策。
相比起罰企，依招可以保住學生既面子，除此之外保健室又真係HEA時間既好地方。
話咁快就過左兩堂，因為依堂中文堂係連堂，所以落堂果陣已經係小息。





我番上課室，呀方又發功。
「你就正啦，拎正牌唔上堂，仲可以去見下MISS周。」

我膠都廢事比佢，而另一邊既水牛講野就有用好多。
「我已經抄低晒D重點，你要的話就黎搵我要。」水牛真係可靠，如果我係囡囡我都想佢做自己條仔。

雖然咁諗可能有小小基，但係有時我都會用依種方法去評價同性朋友。
雖然唔係自己想去保健室，但係去完之後番到黎精神亦都好左好多。

就好似你打機咁，想去旅館補血，真係畫面一黑就搞掂晒。
之後既係英文堂，平時上依堂我一定訓著左，因為個老女人講野完全係無聲調可言，如果你有失眠問題，錄低佢把聲訓之前聽一聽我包你一睡不起。
我悶得濟，所以眼睛開始失去焦點，同時間對話框出現。
對話框將個老女人所講既野全部文字化，我亦都係腦海不斷有「禁Ａ」既諗法去SKIP左D廢話。

可惜佢就好似遊戲入面某D NPC一樣死唔斷氣咁，講極都重有。你明明唔想聽佢講野，但係都焗住聽。




最仆街既係你無得熄機，而當佢講完野果陣，你又會禁錯左個A制再次同佢講野……又黎過。
係我每次禁A既同時，係大對話框上面亦都不斷出現增加睡意值既訊息。
我都唔明白點解後日就考英文，依條老女人講既野都一樣可以咁廢。

亦都係因為我知道做老師係可以做到咁廢，所以我先對任SIR咁敬畏。
既然咁悶，係時侯睇下其他同學做緊乜。

無去到保健室「補血」既毒撚方已經訓到死左咁，假如依一刻有外星人黎襲擊我地學校佢都未必會醒。
水牛雖然無訓到，但係佢情況都係同我差唔多，係到東張西望，有一刻佢仲見到我望緊佢，做左個好無奈既樣。
Sony就依然好似乖乖女咁聽書，視線一直放係黑版或者老女人身上；到底佢係真係咁留心定係唔想同我視線有接觸？