我去左間 Cafe 打工 , 想溝入面個 Mk 妹女同事: 你男朋友竟然係。。。係。。。

「S …… K …… ? 」我聽著疑惑，
 
就是想不出SK二字可以是甚麼英文詞組，更與小草拉不上半點關連。
 
「點解會咁既竹生？」小草拿著那隻戒指，不斷的翻看。
 
「應 …… 應該係唔小心刻錯左架姐 …… 」我說著自己也覺得牽強。
 
「但係好地地買戒指，點會有刻錯先得架，何況 ……
 


佢同我講唔平架 …… 」小草說著有點焦慮。
 
「咁 …… 咁又或者可能係你地兩個之間既暗號呢，我外人自然係諗唔明啦，
 
肯定係咁啦，肯定係咁啦，佢想考下你有冇上心啊，」
 
我見小草不樂，便隨便找個原由，想要她開心過來。
 
「你唔好當我傻啦 …… 」小草說著竟然兩眼紅紅，
 


全不像她往時一副瀟灑不在乎的模樣，莫非她這次果然是動了真情？
 
「竹生，佢肯定係有野呃住我架，佢肯定係有野呃住我架，」小草說得很激動。
 
「佢 …… 你 …… 你唔好杞人憂天啦，無事架，無事架，」我安慰。
 
「你唔好當我三歲細路仔啦，」小草淚道，「竹生，不如 ……
 
不如你同我一齊搵出佢咩事，你幫我查下佢係咪有第二個！」
 


「我 …… ？！」我聽著一驚，「我 …… 我 …… 我又唔係偵探，
 
我 …… 我點幫你啊 …… ？」
 
SK …… 可惡的SK …… 你到底是甚麼？！
 
 
 
「你 …… 你總有辦法既 …… 」小草一臉誠懇的看著我，叫我怎麼拒絕？
 
看著她如此醉人的臉龐，此時她就是要我赴湯蹈火，我也是在所不辭了。
 
「不過 …… 我 …… 我又唔識佢 …… 」我確是無能為力。
 
「只要你肯就得啦，」小草激動得捉起我一隻手，


 
我只感她那隻手細滑無比，比文靜的還要柔軟。
 
「我 …… 」我還是不知應對。
 
「我要做野啦，今晚放工你等埋我啦，我地放工再傾丫，」
 
小草臨行前向我眨一眨眼，看得我整個人都神魂顛倒。
 
「哦 …… 好 …… 好啦 ……. 就咁話啦 …… 」我答應了。
 
「嗯，咁今晚見啦，」她笑說。
 
小草走後我仍是在休息室裡閒著，想找三哥問問文靜的事，
 


他卻又已經到下邊派傳單去了，於是也沒放到心頭去，
 
直待這天下班，與小草一起探秘。
 
 
 
我如常的把碗碟洗過，很快便到了下班的時間，
 
這天小草沒有甚麼男友來接她放工，反換了是她在等我，
 
「走得未啊？」她催促。
 
「得啦得啦，我洗完D碗都要擺返好佢啊，」我說，很快便完成過手頭的工作。
 
「我係女仔第一個唔鍾意你啊，」小草笑說，「男仔做洗碗又污糟又無出色，」


 
「咁 …… 」這真叫我啞口無言，她說的是實情。
 
「好心你就正正經經追返個女仔啦，你有冇鍾意既人啊？」她問我。
 
「咁 …… Er …… 有既都 …… 」我喜歡的不就是你嗎？
 
「係咩，邊個啊，講唔講得我知架，我地公司既？」
 
她對情情愛愛之事就是很感興趣。
 
「咁 …… 」我不想掃她興頭，「係 …… 係囉 …… 」
 
「我估下先 …… 」小草笑說，「文靜？唔會啊，佢鍾意女仔既，
 


Jude又唔靚女，我知啦，肯定係小月啦，」
 
「哎呀，唔好問啦 …… 」我若說不是小月時，
 
就只剩下Kay媽和小草，這樣她不就知道了嗎？
 
「哦，」她笑得很狡猾，「即係默認啦，」
 
「你 …… 你當係啦 …… 」我說著小草又已帶了我到上次那間酒吧。


「又 …… 又係呢度？」我驚道。
 
「係啊，我得閒就上黎既，做人唔飲酒，唔通真係飲咖啡咩？」她笑道。
 
「咁 …… 咁 …… 我地唔係要傾你男朋友既事咩 …… 」我問。
 
「係啊，係度傾囉咪，」她笑道，一邊已領回一支存在裡頭的威士忌。
 
「我 …… 我唔係好飲酒既 …… 」我說。
 
「你咁掃興既？」她有點不悅，「你唔陪我飲我搵第二個陪啦，」
 
「好好好，我飲就係，」我想起那次跟千大哥他比酒量，可沒有甚麼好下場，
 
但既是小草要求，我還是閉著呼吸，乾了一大杯。
 
「嗯，算你啦，」小草笑道。
 
「好啦，咁可以講返你男朋友既野啦，」我說，「佢係咩人黎架？」
 
「佢啊 …… ？佢係一個好有錢既人囉 …… 」小草笑道。
 
「咁你點樣無啦啦識個有錢仔架？」我又問，
 
怕又是文靜派來接近小草的男孩。
 
「你理得我姐，我有方法啦，」她說，「不過我都覺得佢怪怪地啦，
 
上次佢帶我上佢屋企，入面乜都無既，都唔似係佢平時住開，
 
我總係覺得佢有野瞞住我，但係呢，我又講唔出係咩喎，
 
直到見埋隻戒指入面，唔知點解寫左第二個人個名，我就更加覺唔妥啦，」
 
小草說著情緒開始激動，便大口乾了一杯，「竹生啊，你要幫我啊，」
 
她說得很可憐。
 
「好好好，咁你想我點幫你啊？我 …… 你帶我去見佢，我幫你問清楚就係啦，」
 
我說，想有甚麼當面對質就好了。
 
「唔得，唔可以咁架，如果一陣佢係清白既，咁我咪誤會左佢，
 
到時佢唔要我，我就好慘啦，」小草看來真的是墮入情網了，
 
但這男人到底又有甚麼吸引力，要她如此死心塌地？
 
「咁你想我點幫你啊？」我又問她。
 
「我 …… 我比佢卡片你 …… 你幫我去同佢混熟啊 …… 」小草哭道。
 
「好啦好啦，」我想當是結交多個朋友就好了，「不如你直接介紹佢比我識，
 
咁樣無咁突兀啊，」我又說。
 
「咁佢一定會起疑心架，」小草說，「男人係蠢，都未至於係無腦，」
 
她不開心起來，喝得更無制約，「拿，呢張係佢卡片啊，你幫我去搵佢啊，」
 
小草說著向我遞來一張卡片 …… 我看著卻吃了一大驚。
 
「Mason Ma …… 馬臣婦科醫生？！！！！」