我去左間 Cafe 打工 , 想溝入面個 Mk 妹女同事: 戒指的秘密。

 
「要辭職？！」場內除我以外，眾人聽著都是一驚，
 
我早就從阿翔口中聽過，待得學期再開之時，文靜就不會常常待在咖啡店，
 
加上這陣子與文靜不似舊時般親密，她就是走了，也是與我無關。
 
「點解啊，你同阿Mark講左未啊？
 
你要返學既話，一係轉返做Part time囉，」Kay媽說，


 
想咖啡店人手一直不夠，她自然是不願文靜離開。
 
「係囉，文靜姐姐，你唔好走啦，小月會掛住你啊，」小月哀求。
 
「唔係啊，唔關事啊，
 
係屋企有D事所以我唔可以再做落去啦，」文靜說，「不過就算我唔係度返工，
 
我同小月你都仲係朋友啊，傻妹黎既，」


 
我聽著意外，文靜辭職的原因，會是跟阿翔有關的麼？
 
這麼久不見，不知他又跟牛奶妹怎樣呢？
 
「咁 …… 唯有係咁啦 …… 」Kay媽無可奈何，想她仍是憂心著人手的問題。
 
「人手你唔洗擔心啊，」文靜也明白Kay媽的心思，「我搵返糖果啦，
 
我唔係度做之後，佢會返黎頂我個位，咁就無問題啦？」文靜笑道。


 
「都係姐 …… 」Kay媽說，「你知有好多客都係為左你先黎既，
 
你一走，生意就要跌啦，難得呢一個月叫做有D起色，
 
同埋啊，糖果佢個人行蹤咁神秘，又無黎交帶，點及得你啊？」
 
我倒想見見那個一直只聞其名，未見其人的糖果小姐。
 
「文靜姐姐真係一定要走啊 …… ？」小月似乎很不捨。
 
「係啊，你應該要祝我有個新開始先係嘛，洗乜咁傷心呢？」文靜笑說。
 
「但係小月真係會好掛住，好掛住，好掛住文靜姐姐架，」小月又說。
 


「最多我臨走個日，我地搞個大型既歡送會，好無？」文靜像逗著小女孩。
 
「真既？」小月一聽到是派對，即顯得很高興，「文靜姐姐你唔可以呃小月架，」
 
「嗯，梗係啦，我幾時有呃過你，」文靜說，「我地要好好珍惜最後呢兩個禮拜，
 
你話係咪啊小月？」文靜對小月說著，向我看了一眼，
 
我卻只是裝作沒看見。
 
她見我不理，有點不快，便走了過來，
 
「我唔知點解你唔想同我講野，不過我要走啦，
 
以後無人再成日扑你個頭，無人話你係淫蟲，你 …… 你以後會開心啦 …… 」


 
文靜說著又轉過去，看了看小草，然後淡淡的苦笑一下，
 
「好啦，開工啦，唔好為左我D野咁啦，」
 
文靜續說，「我地呢行流失率本來就高，係我地呢間先咁特別，個個係長工，
 
新人換舊人，其實都好正常啊，好啦，做野啦，」
 
文靜說罷拍拍手，各人便又歸到原位，開始這日的工作，
 
我對文靜的離去沒有太大感覺，反正她還有兩個星期才是真正離開，
 
我比較感興趣的就只有她家中起了甚麼變故，
 


我知文靜是不願多提，我近來跟她關係一般，也自然不便多問，
 
但這秘密，除文靜外，還有一個人會知道。
 
 
 
知道內裡因由的，自然就只有每天伴在文靜身旁，
 
扮著喵喵怪與她一起派傳單的三哥，
 
我正想要上前相詢，卻突然有人在我背上一拍，
 
「竹生啊，我男朋友佢呢 …… 」說話的自然是小草。
 
「嗯？」我裝得耐心的回過頭去，


 
但這兩星期以來，聽著小草不厭其煩的說著她男友，實在已經很厭倦了。
 
「我好開心啊，佢今日送左隻戒指比我，話第時要同我結婚，
 
我諗我真係搵到我要搵既人啦，」她笑得很甜蜜。
 
「係 …… 係咩 …… 恭喜你啊咁 …… 」我說，
 
心裡卻想用不著一個星期，他們就自然會分手了。
 
「你都為我開心啊？」她笑說，「我今次真係覺得自己好愛好愛佢，
 
愛到無左佢唔得啊 …… 」
 
「最緊要係佢對你好姐 …… 」我說，心裡又想她那一次不是說到要生要死？
 
「佢對我好啊，係咁買野比我，佢屋企又有錢既，
 
佢話過幾日帶我去見佢屋企人添啊，以前都無男仔咁對我既，」她笑道。
 
「哦 …… 咁咪好囉 …… 」我答。
 
「你睇下，佢個人好有Taste啊，隻戒指靚唔靚啊？」她說著向我遞來。
 
我對戒指沒有太大的研究，
 
但小草她如此誠懇的跟我分享，我又那有拒絕的理由？
 
「靚喎，」我接過來隨便敷衍幾句，
 
卻察覺戒指中間刻上了幾行字，「咦，佢仲好有心添喎，
 
特登係入面刻左你個名添啊，」我說，盡量跟她攀一點話題。
 
「係咩？佢又無同我講喎，原來佢仲想比驚喜我，」小草仍是笑得很甜，
 
一邊拿過戒指去看裡頭寫了甚麼，「寫左咩呢 …… 睇下先 …… 」
 
我卻無心要聽，想當中都是些肉麻說話，
 
「S …... K …... ? 」小草看著有點楞然，「SK點解啊？我個名都無呢兩個字既 ……
 
喂，你知唔知點解啊？ 」