我去左間 Cafe 打工 , 想溝入面個 Mk 妹女同事: 我以後都唔理你啦！
如此一大早，咖啡店就只有Jude在裡頭。
「今日咁早既？」她笑問。
「我 …… 我都淨係琴日遲左一日到姐，我一向都好早架 …… 」我說。
「Haha，係喎，」她笑得很輕，
一邊在打點店舖的東西，「我諗住你琴日上左文靜屋企，今日又要遲到嘛 …… 」
「我 …… 我 …… 我都係上去坐陣 …… 一早返左自己屋企啦 …… 」
我說，怕Jude誤會我跟文靜有染。
「係咩 …… ？」她看著我一身衣衫，「但係你仲著住琴晚套衫既 …… ？」
「我 …… 」這次當真是百辭莫辯。
「唔緊要喎，我明白啊，後生仔係咁啦，」Jude也不當是一回事。
「唉 …… 」我不禁又搖頭嘆氣，「唔係你諗咁架 …… 」
「我無諗D咩喎，」她笑道，「你會估我諗左去邊啊 …… ？」
「好啦好啦，我講你聽啦，但係你唔好同文靜講返啊 …… 」
我說著便想要將昨夜的事都告訴Jude，讓她替我分憂，給給意見也是好的，
那知我還沒來得及把故事細說從頭，即聽門外傳來「鈴鈴」兩聲。
「咁早就有客人既？」我有點意外，正想要說這麼早沒有女僕駐場，
那知往回一看，卻那裡是甚麼客人？
「二哥，你今日一定要加油，努力追到小月啊！
我地三個黎呢度返工，咁熱都要扮鬼扮馬係係為左咩，你唔好唔記得啊！」
說話的是那個娘娘腔三弟。
「唉 …… 」黃金屋仍是一臉頹喪，「其實鍾意一個人啊，
睇住佢每日開心就夠啦，都唔一定要同佢一齊啊，
好似而家咁，我可以每日望住小月，得閒同佢傾下計，其實都好滿足啦 …… 」
我聽著不以為然，喜歡一個人，真的只要看到她開心就夠了嗎？
那麼小草她開心嗎？若是她以墮落為樂，我看著她又豈能安得下心？
但想小月是個純品的女孩，
黃金屋默默在她身邊守候，其實也總比死纏爛打要好。
「你地都咁早返黎既 …… ？」Jude笑問。
「係啊，Jude姐姐你介紹呢份工比我地，我地點敢偷懶啊，」
三弟說，他對Jude竟然出奇地友善。
「唔講咁多啦，我地入去換衫啦，」大哥又說，
一邊領著兩個兄弟到更衣室。
「Jude，乜佢地份工係你介紹？究竟個晚係酒吧發生左咩事啊？」
這個問題其實也盤踞在我心內已久。
「個晚？」Jude微微一笑，「個晚你地走左之後，佢地認出左阿Kay，
咪過埋黎一齊飲野，跟住個四眼仔就係度發牢騷，
講到無左小月就無左全世界咁，肥仔又鹹鹹濕濕咁望住阿Kay，
我見佢地對我地班女僕咁有興趣，又諗起阿Mark要人，
咪話不如叫佢地上黎做囉，」
「咁跟住我地返到去又唔見左你地既？」我問。
「跟住？」阿Jude想了一想，「跟住佢地三個飲到咁上下，
就話要返去，咁我同阿Kay等緊你、文靜、小月佢地嘛，咪叫佢地走先囉，
但係佢地又鬼咁要面，話點可以丟低兩個女人係度，一定要送我地返屋企，
咁我地等多陣，見你地都未返黎，咪跟住佢地一齊走囉，就係咁啦，」
我聽著心裡明白了大半，然後便和Jude說說笑笑，開始這日的工作。
到了中午時份，文靜回到咖啡店，她似乎沒有發覺我知曉她的秘密，
「喂，我地落去派傳單啦，」她笑著走過來，
拉著我的手，想要我陪她一起下樓。
「我 …… 你 …… 你一個人派得啦 …… 我唔派啦 …… 」我說。
「下？」文靜有點意外。
「嗯，反正我派傳單都無人要既，你一個人去啦，有喵喵怪陪你啊，」我又說。
「但係 …… 但係你唔洗我教你脫毒咩？」文靜笑問。
我看著她那笑容，想起她背地裡做的事，只覺她為人實在虛偽得很。
「唔洗，唔洗啦 ……. 你有心 …… 」我極力克制。
「奇奇怪怪咁今日，唔同你講啦，我自己去，」
文靜笑道，然後帶起假髮，便與扮演著喵喵怪的三弟一起下樓去。
「岩啊，其實都好襯啊，文靜鍾意女仔，三哥佢個人又成個女仔咁，
佢地可能好相處D呢 …… 」我心裡暗想，又繼續待在廚房與阿Jude閒聊著。
正說間，小草也回到咖啡店了，
今早沒有客人，她回來便直走到休息室去了。
我想沒有文靜從旁助我，以後我得要靠自己了，
又想只要誠心待人，人家必會知道自己的好處，
「唔同你傾住啦阿Jude，我入一入去休息室先，」我說，
「嗯，加油，」Jude說得很曖昧，
我也不考其中深義，只管大著膽子，便走到休息室去找小草。
到得裡頭，見小草正在對鏡補妝，也沒理會我。
其實就是我到咖啡店這麼久了，她也從沒主動跟我搭過半句話，
但想女兒家矜持總要有，該要我做主動才是，
「Hi , 早 …… 早晨 …… 」我說。
小草沒有答我，只是繼續梳妝。
「Hi …… 小草 …… 你 …… 你好啊 …… 」我再說一次。
「嗯？你叫我？」她回過頭來，
只見小草她今天塗上了鮮紅色的口紅，
左邊的頭髮撥到耳朵之後，露出一顆吊墜著的耳環，總之就是好看得很。
「係 …… 係啊 …… 」我緊張我一顆心噗通噗通狂跳。
「做咩事啊？」她很愕然。
「無 …… 無 …… 我 …… 我想同你 …… 傾 …… 傾下計姐 …… 」我說。
「同我傾計？咁突然，」她笑了一笑，「好，你想傾咩丫？」
「傾 …… 」其實我也不知道小草喜歡甚麼，
更想不出甚麼共同話題來，我往時跟朋友也盡是說著古典經籍，
但小草說過不喜歡上中文課，這真叫我不知說甚麼是好。
「係啦，我呢，我咪講過你好似我以前一個女同學既 …… 」我忽發其想。
「喂，我想飛左我而家男朋友，你話好唔好啊？」最後還是小草打開話題。