我去左間 Cafe 打工 , 想溝入面個 Mk 妹女同事: 月老唔易做。

我回身一看，見背後站著一件龐然大物，正是那個姓千的胖子，
 
「千 …… 千哥哥 …… ？！點解你會係度 …… 唔係唔係 ……
 
點解你會認得我先係啊？！」
 
我想自己如此改頭換面，帶著草帽墨鏡，任他如何眼利，也該看不出來啊。
 
「咳，你梗係唔想我係度啦，你搶完我二弟既小月，而家又得一想二，
 


拖住兩個後生女係度鋸扒，好啊，我聽日同小月講，睇佢會唔會即刻唔要你，」
 
他說罷即暗自得意，哈哈大笑起來。
 
「唉，算啦大哥，小月對佢死心蹋地，算啦算啦，」這是他二弟黃金屋的聲音，
 
其實自從那次在咖啡店一役以後，已見他垂頭喪氣，提不起勁做人，
 
那知如此一見，原來他真的從此一沉不起，
 


唉，他如此一個自信的人，受了這麼大的打擊，又怎能抵受得了，
 
我想著也覺得自己對他不起。
 
正想著，卻聽卡察一聲，墨鏡前強光閃現，我還沒回過神來，卻聽一人說，
 
「唔緊要，我影左佢相做證啦，聽日比小月阿嫂睇就係，
 
況且我地由聽日起 …… 嘻嘻 …… 」此人笑得奸佞。
 


「顏三哥你都係度？」我想此人便是他們的三弟了，
 
他們三人還當真是形影不離呢。
 
「咳，唔同你講咁多啦，我地飲飽食醉，而家就埋單走人，
 
你都食飽D做野飽鬼上路啦聽日，哈哈，不過你識黎呢度識，都算食揀。」
 
千大哥說著用力在我膊上拍了兩下，然後便帶著他兩個弟弟離去了。
 
我心想不錯，千大哥他說過自己於飲食最在行，
 
文靜選了這麼一間高級餐廳，其實就算遇見他們也不為奇。
 
「係喎，阿Kay同阿Jude琴日跟住佢地三個走，唔知最後點呢？」


 
文靜待他們走後才想起來。
 
「佢地無事架啦，」阿翔說，
 
我卻想他怎麼又認識Kay媽和阿Jude啊？「係呢，你覺得我個人點啊，牛奶？」
 
原來他不過是想快快轉過話題。
 
「你個人點我就唔知，」牛奶笑說，「不過我淨係知我頭先聽人地講，
 
話竹生係個花心蘿蔔，哈哈，你曳啦。」
 
不論阿翔說甚麼，牛奶妹還是拉扯到我身上，
 


她說著無心，可阿翔定然會遷怒於我了，唉 ……
 
 
 
 
 
如是阿翔仍是不斷的想與牛奶妹打開話題，
 
但牛奶妹似乎是對我比較有興趣，就是任阿翔說著甚麼，
 
轉過來都變成我與牛奶妹二人的對話。
 
我拙於辭令，又兼阿翔在旁一陣敵意環伺，
 
與牛奶妹說起話來我總是支支吾吾的，


 
但偏偏我越是笨拙，她就越是喜愛，反是逗得她更樂了。
 
阿翔自知兵敗如山倒，顏面無全，
 
說到最後也就只是一言不發，自顧自的吃著。
 
牛奶妹也沒為意他太多，但我和文靜又那有不知道？
 
如是好好的一頓飯，吃得我渾身不自在，
 
只想早早吃過便回家大睡一覺，唉，還是家裡好。
 
好不容易把晚飯吃過，
 


文靜知道弟弟心意，便要他先與牛奶妹回家去，替他爭取一些獨處的時間，
 
就這樣又變成我和文靜二人的約會。
 
 
 
我兩手還是拿著文靜和牛奶妹的戰利品，臉上仍是掛著黑黑一副墨鏡，
 
走起路來時笨得像是小月的企鵝步，
 
文靜這次很知趣，一離開餐廳便就繞著我的手，
 
「怕你又周圍中下中下，都係我拖住你行好啦，但係你唔好諗錯隔離啊，」
 
文靜說著我只感一條手臂被甚麼軟綿綿的東西壓著，倒也舒適得很。
 
「唉 …… 我 …… 我 …… 我無心架 …… 」
 
待阿翔和牛奶妹走後，我先向文靜自首。
 
「做咩啊你？咩無心啊？」文靜笑說，「我咪當比你抽下水，
 
多謝你肯去受下我細佬氣，同佢做朋友囉，你以後多D上黎就好啦，」
 
「抽水？」我聽著不解，「唔係啊唔係啊，我係講緊食飯D野啊，
 
頭先牛奶妹淨係同我講野，冷落左阿翔，阿翔佢要嬲死我啦，
 
我真係無心架，」我說。
 
文靜聽著嫣然一笑，
 
「原來你講呢樣，」文靜笑說，「傻既，人地有心唔理佢邊怪得人，」
 
「都係姐，都係我唔好姐 …… 」我很自責。
 
「細路仔總要碰下釘先會大個既，」文靜說。
 
「咁你又岩，經一事，長一智嘛，」我說。
 
「係喎，你趕唔趕住返屋企啊？」文靜問我。
 
「做咩事啊？」我想明日雖要上班，
 
但早上也無甚麼工作，就是晚一點回去也無大礙。
 
「無啊，你陪多我一陣，咁等阿翔同牛奶佢地兩個可以獨處多一陣嘛，」
 
文靜還真會替弟弟設想。
 
「我 …… 唔趕啊 …… 」我答。
 
「好啦，咁我地行下街先啦，」說著文靜又緊緊的繞著我的手，
 
我雖覺她的身體軟綿綿的，想長此與她親近，
 
但無奈手裡拿著滿滿的紙袋，重得我一條胳膊都酸痛，
 
這次真不知道是福是禍。
 
 
 
這夜文靜一直與我逛至半夜才捨得回家去，
 
除了那幾個紙袋比較沉重，我也無怨言，
 
反而樂得與文靜多見幾面，只因阿翔都說開學以後，見文靜的時間就少了。
 
我記得文靜的話，說一個男人該要有風度，就是多晚，也得要送女伴回家，
 
於是我一直送她至家門底下，才敢離去。
 
「喂，你上唔上黎坐多陣啊？」臨別前文靜問我。
 
「唔 …… 唔啦 …… 」我想阿翔再見我定然是要吃醋了。
 
「嗯，咁好啦，」文靜看起來有點失望，「早D返去啦，
 
返到去打個電話比我報平安啊，」
 
「下 …… ？」文靜此言實在叫我大為意外。
 
「唔好諗多啊，無人得閒關心你啊，
 
我係諗緊無我拖住你，你帶住副黑超，會唔會行出馬路比車撞死，
 
等你打個電話黎比我知道要做定帛金比你咋，」
 
文靜的語氣古古怪怪，剛才還好好的，怎麼無端又要咒我死啊。
 
「哦，好啦，」我答，搔搔後腦，「拜拜啦，」然後便轉過頭要走。
 
「喂！」我還沒踏上兩步，文靜又把我叫住。
 
「嗯？」我回過頭問。
 
「你 …… 你有冇諗過唔好追小草啊，」文靜問我，「其實小月都幾好啊，
 
牛奶妹都唔錯啊，都唔一定要同小草一齊姐，」
 
「咁 …… 」我笑一笑，「我都唔知啊 …… 」
 
「算啦，睇你都唔會架啦，走啦，真係拜拜啦，」文靜這夜說話奇奇怪怪的。
 
「哦 …... 咁 …… 拜拜 …… 」這次我怕文靜又要把我叫住，
 
便特意放慢腳步走，可她最終還是沒有把我叫住。
 
回家後睡上一覺，明天又是一個工作天。