我去左間 Cafe 打工 , 想溝入面個 Mk 妹女同事: 各位觀眾，四。。。四條煙？！！

我怕文靜見我闖進她的睡房，連忙把那棍棒放好，便悄悄的又竄了出去，
 
「文靜？返黎啦？」我若無其事的問，卻見外邊站著的是阿翔。
 
「竹生？唉 …… 」他說著突然走到我身前，緊緊把我抱住。
 
「你 …… 你 …… 你做咩啊？」我想兩個男子如此在家中擁抱，實在有失體統。
 
「我好傷心啊竹生，」阿翔是個大情大性的人，我也不該拘泥於小節。
 


「做咩啊？你頭先仲好地地架？」我問，仍是不明白他何以性情大變。
 
「我失戀啊！！」他是真的把我當成好朋友了。
 
「失 …… 失戀 …… ？」我聽著一驚，「點解會咁架 …… ？」
 
不過我也從未戀愛過，更遑論是失戀了，這時候怎麼能開解他？
 
「佢對個醫生仲好過對我啊！！」阿翔盡說著些奇怪的話。
 


「你係咪講牛奶妹啊？」我想也沒有別人了。
 
「你知佢個名？」阿翔神色一變，放開了我，
 
然後與我鼻尖相貼，滿臉著緊的眼著我，「佢叫牛奶妹啊？你點知架？
 
頭先入去之前，我就好似聽個姑娘話佢姓牛架啦，
 
但係佢又死都唔肯比我聽佢個名，仲要用兩隻手掩住我隻耳仔，」
 


阿翔說到此處一臉甜蜜，可隨即又變了個憂鬱小生，「雖然姓牛叫奶妹，
 
係奇怪D，但係都幾特別啊，我鍾意與別不同既人啊，」
 
阿翔說，仍是一臉沮喪。
 
「咁又唔一定係姓牛叫奶妹既 …… 」
 
我想好好一個人斷不會起這麼一個名字，「應該係花名黎姐 …… ？
 
我唔知架不過，我都係聽你家姐咁叫咋 …… 」把責任都推到文靜身上去好了。
 
「牛奶妹 …… 牛奶妹 …… 唉 …… 我文天翔有咩比唔上個醫生 …… 」
 
阿翔自言自語著，兩手卻又突然用力搭在我的膊上，「喂，竹生，你講，


 
我有咩比唔上佢 …… ？」
 
「Er …… 」這個問題叫我怎麼回答是好，「咁你都總要比我知道個醫生係咩人啊？」
 
 
 
 
 
「有冇搞錯啊！」阿翔反應很大，「做朋友既，我岩，你要撐我；
 
我唔岩，你更加要撐我，
 
就算我比唔上佢啊，你都要話我好過佢，洗乜問咁多野喎，
 


我再問你，竹生，我有咩比唔上個醫生？！」
 
「咁啊 …… 」那麼我只有說他好啊，「無啊無啊，你好過佢啊，」
 
「係啦，咁就差唔多，」阿翔說著哈哈大笑，「你話啦，
 
一入到去佢就淨係識係度拋書包，扮晒野Show Off，有咩咁好啊？」
 
「係既係既，你岩你岩，」我當阿翔是朋友，實在不該反駁他的話。
 
「喂，你有冇認真聽架？」阿翔又問。
 
「有啊有啊，不過我係諗緊，書包除左拎黎拋之外，都無用啦，
 
真正用得著既野少，唔掛係口邊所有野就等於無學過一樣，」


 
我說，這也是我的心聲。
 
「你都有道理，」阿翔也不是個食古不化的人，「不過啊，佢係拋得乞人憎，
 
以為自己好叻咁嘛，」阿翔說，「仲有啊，你要溝我家姐架，
 
你唔好咁同家姐講添啊，佢聽到會唔鍾意你啦！」阿翔說著又扯到文靜身上去。
 
「又關你家姐事 …… ？」我聽著不解。
 
「係啊，我家姐最憎人讀多兩本書就周圍認叻，佢話學到既野係自己既，
 
唔洗周圍同人講啊，仲有滿口名言金句、好地地講句野都要左引右引，
 


佢就最討厭啦，佢話咁樣太HIGHBROW，係掩飾緊自己無料到喎，」
 
「咁 …… 咁 …… 咁 …… 」這不就正正是說我嗎？！
 
我聽著叫我怎麼不惱，「文靜佢不過係中學畢業 …… 唔明都唔出奇啊！」
 
「下 …… ？」阿翔聽著有點意外，「但係我家姐下年大學畢業啦喎 …… 」
 
 
 
「啊 …… ？」我聽著也是一驚。
 
「乜你唔知咩？」阿翔問我，「呢，出面個書櫃D書全部都係佢架 …… 」
 
「唔係 …… 掛 …… ？！」我說著記起那日Jude說過，
 
除了文靜以外，咖啡店就沒有別人中學畢業了，只是沒想過 ……
 
啊，對了，記得那日我被文靜打昏以後，
 
我醒來後便聽她罵我小時不讀書，落得要到咖啡店洗碗，
 
我怎麼沒有想到？這次真是以貌取人了。
 
「我 …… 我係無諗過姐 …… 」我說。
 
「有冇搞錯啊，我家姐咁叻你都唔知，
 
我聽佢講佢當年考咩A Level有四條A架，
 
哈哈，我初初聽仲要為係鋤大D四條煙，後尾先知原來係好勁架，」
 
阿翔笑說。
 
「4 …… 4條A ……? ! 」我聽著心頭大震，
 
我也不過就考了三個，怎麼文靜比我還要厲害？！
 
「但係 …… 無理由架 …… 」我仍是不敢相信，「你家姐日日都係咖啡店，
 
點會 …… 點會 …… ？！」
 
 
 
「家姐佢放緊假嘛，所以咪可以全日都返工囉，」阿翔說，「佢要返學既話，
 
就唔可以成日返去啦，」
 
「即係 …… 」我想離開學日子不遠，
 
見文靜的日子也就不多了，「咁我以後咪 …… 咪唔會成日見到文靜囉 …… ？」
 
不知怎的，單是想想，心裡也覺得酸溜溜的，實在很想每天也有文靜伴在身旁。
 
「計我話啊，唔返先係好啊，」阿翔說，「都唔知去做女僕拋頭露面有咩好，
 
我家姐咁叻，大把工等住佢做啦，都唔知點解要咁 …… 」
 
我也沒聽在耳裡，
 
腦內只是不停想著若是一天回到Café再沒有了文靜的身影會是如何，
 
「唔要啊唔要啊，我要見到文靜啊 …… 」我實在不願這一日到來。
 
 
 
「喂，你有冇聽我講野架？」阿翔問，「我係話啊，
 
我家姐留係間Café根本就係大才小用，委屈左佢，仲要對住隻賤種Mark，」
 
阿翔說著一邊走到房中，躺在床上，兩手枕在後腦。
 
「我留係入面洗碗啊，都係大才小用啊，我都係度啦，點解文靜要走啊，」
 
我實在忍不下去，心裡萬般不願與文靜分開。
 
「我 …… 」阿翔見我反應如此激動，也嚇得楞了一楞，「我都無話佢要唔做，
 
不過係可能一個禮拜返一兩日，又或者淨係返夜晚，無人話佢要走啊，」
 
「唉 …… 」我深深嘆一口氣，躺到阿翔身邊，
 
也學他把雙手墊在後腦之後，「都係姐 …… 點都有感情啊，
 
點都會想成日見到佢啊 …… 」
 
阿翔聽著似乎很有感觸，
 
「係啊，會想成日見到佢，怕就怕係人地唔想見到你呢 …… 」
 
阿翔看來是又想到她的牛奶妹去了，我心裡此時可就只有文靜。
 
「喂，阿翔啊，」我輕輕喚他的名字，
 
「嗯？」
 
「好心你對你家姐好D啦，佢係為左供你去外國讀書先咁努力搵錢啊，
 
你估有得揀佢唔想日日係屋企舒舒服服咩，」
 
我想起文靜的苦心，對她只有更喜愛。
 
那知說罷阿翔竟沒了聲息，似是沒有聽到我的話一般，
 
「喂，阿翔，」我說著往他臉上看了一看，他看來是睡著了。
 
「又會無啦啦訓左都有既 …… 」我心想，隨即見他雙眼微微睜開了一條細縫，
 
可我看著他以後，他又立時閉住。
 
「原來係詐訓 …… 」我心想，也不當場踢破他，
 
他若是有心要裝睡時，就是任我千般方法，也是叫他不醒的了，倒不如由他就是。
 
「好啦好啦，唔嘈你啦，」我說，也閉上眼睛，在阿翔的床上睡了一覺。