我去左間 Cafe 打工 , 想溝入面個 Mk 妹女同事: 脫毒第一課。

這次從大廈裡走出來的，是個穿著校服的女孩，
 
正是文靜那個未婚懷孕的友人，她的身邊也同樣伴著一個男人，
 
只見那女的醺醺醉倒，而那男的則扶著她，不時乘機毛手毛腳。
 
「我唔係叫左阿Jude同阿Kay睇住佢咩，有冇搞錯啊，」
 
文靜說罷即氣沖沖的趕了上前頭，拉住那少女。
 


那少女被文靜拉住，才回過神來，微微抬起頭看著她，
 
「文靜 …… ？」她輕聲的問。
 
「你做咩啊？呢個咩人黎架？」文靜情急之下，語氣也重了點。
 
「佢 …… ？」那少女神志迷迷糊糊的，「我都唔知啊 …… 」
 
「走開啦你，」文靜用力把那男子推開，那男子討了個沒趣，
 


笑了一笑，然後聳聳肩便走開了，「你點啊，做咩飲到咁醉啊？」
 
文靜摟著那少女，神色間極是關懷。
 
「乜仲有人會理我，會關心我咩 …… ？」
 
她整個人軟軟的就倒在文靜身上，「我係人地眼中咪又係一個隨便，
 
亂咁同人上床，比人搞大個肚既女仔，無論我做咩，佢地都只會咁諗我，」
 


那女孩說著又開始抽泣著，我看著雖覺一切是她咎由自取，
 
但想她還年輕，實迷途未遠，也算得上是個可憐人。
 
「人地點諗你係人地既事啦，你都 …… 你都唔可以咁唔潔身自愛啊，」文靜說。
 
「一個同一百個，又有咩分別啊，我係人地心目中都係個污糟既女人，」
 
那女孩說得絕望，我卻細味著她的話，
 
想一個人不忠一次，跟不忠一百次，分別確實不大，
 
我對小草也實在不可以太嚴厲。
 
「點會係咁呢，」文靜說，「人地越係睇你唔起，你先越係要爭氣啊，


 
做人唔係為左人地架，係為左自己，有邊個未後生過，未放任過姐，
 
重要係知道自己錯，識得以後對自己好啊，」
 
我聽著有理，中山先生說「知難行易」，知道問題所在才是首要的。
 
「我身邊咩人都無啦，我仲 …… 」那女孩說著一行眼淚已劃過她白滑的臉。
 
「你仲有我啊，係咪？」文靜笑得很溫柔，「再唔係 …… 仲有隻畜牲啊 …… 」
 
文靜說著伸手拉起我的衣領，把我帶到那少女身前。
 
「畜牲？」那少女微微一笑，「咩黎架？」
 


「呢隻野囉，佢係我公司做洗碗架，」文靜看著我，「喂，問你啊，
 
你會唔會對佢好，好似妹咁鍚啊？」
 
「我 …… 我 …… 我 …… 」我想那日她要我冒充小月的男友已是罪過，
 
今日好好的又要我多個妹子，這怎麼了得？
 
「點啊？你唔答我我唔幫你脫毒啦，」文靜笑說，實情是在要脅。
 
「咁 …… 咁多個妹妹點都係好既，」我答，想這女孩總不會如小月般，
 
又惹上些古靈精怪的人物，交了她這個朋友，也算不上壞事。
 
「嗯，你睇，隻畜牲都話會鍚你，會對你好啊，呢個世界只要你肯既話，


 
總有地方適合你啊，」文靜說，「記住，無論發生咩事，都唔好作賤自己，
 
知唔知啊？」文靜說著輕輕在那個女孩的臉上吻了一下。
 
我看著不以為意，只想她剛才的推論也太兒戲了，
 
我不過是被要脅才說要待那女孩好，但轉念又想文靜意在勸她向善，
 
也實在不必介懷太多，慢著 …… 好像有點甚麼不妥 ……
 
 
 
「嗯，」那女孩點了點頭，收起眼淚，然後在文靜的臉上磨蹭了幾下。
 


我看著也不知道她是否從此就會改過，
 
要知道江山易改，一個人的品性卻是極難改變，
 
但想日子長著，只要文靜以後多加管教，一切就自然會好了，
 
可我心裡始終記掛一件事 ……
 
「好啦，我同你返去屋企先啦，我叫阿希煮定野你食，」文靜笑說，
 
然後拖起那少女的手，就要帶著她回家。
 
「阿 …… 阿希 …… ？」我心裡暗嘆，莫非是文靜的男朋友？


是了，那次文靜就說過Café裡只有小月和Jude是單身，
 
可我就不知道她們原來已經同居，唉，其實像文靜這樣美貌的女孩子，
 
有男朋友也是正常不過的事，就不知文靜會否也時常敲他的頭，
 
要是會的話，他這輩子以後的日子可難過了啊。
 
 
 
「係喎，阿Kay同阿Jude呢，我唔係叫佢地睇住你咩，」文靜問那女孩。
 
「佢地 …… ？」那女孩想了一想，「好似同三個好好笑既人走左，」
 
這三人想也只能是千鍾粟、黃金屋，和顏如玉三人，
 
就不知他們與Kay媽和Jude到那裡去。
 
可我心裡記掛的，還有一件更重要的事 ……
 
「喂，畜牲，」文靜喚著我的名字，
 
可隨即見我神色不對，又沒說下去了。「我諗阿Kay食得住個肥仔既，
 
都唔洗擔心佢地，」文靜說。
 
我心想不錯，
 
Kay媽和阿Jude是咖啡店裡最成熟的二人，也實在用不著我們牽掛。
 
「好啦，我同佢返去先啦，」
 
文靜拖著那個小女孩，「你幫我送小月返屋企啦，」她看著我說。
 
「我？」我吃了一驚，想已經是夜半三更，
 
我也實在是累得很了，怎麼還要多走一程？
 
「唔洗啦，小月自己識返屋企，」小月說道。
 
「唔得啊，隻畜牲點可以咁無風度架，」文靜說，「拿，今日教你脫毒第一課，
 
就係 …… 就係唔好怕蝕底！
 
就算自己本身係禽獸畜牲底，都要扮紳士啊，知道未？」
 
「咁 …… 咁都得 …… ？」我說。
 
「唔得？咁以後你唔好要我教囉，」文靜說。
 
「好啦好啦，送就送啦，」我心裡不願，但還是答應了。
 
於是文靜便拖著那個小女孩離去，而我則送小月回家。
 
「係喎，小月你住係邊啊？」我問她。
 
「小月 …… ？小月住離島囉 …… 」她一臉天真的看著我。
 
「離 …… 離島 …… ？！！！」這個玩笑也太大了。
 
「嗯，竹生主人，我地返去碼頭搭船啦，有竹生主人送小月，
 
小月好開心啊，」小月一臉歡喜的說。
 
「咁 …… 咁 …… 咁 …… 」我心裡還在籌謀著脫身之計，
 
小月卻已經拖起我的手，領著我到碼頭走。