我去左間 Cafe 打工 , 想溝入面個 Mk 妹女同事: 媽啊，我的初吻啊！

「就算你真係小月男朋友，我都唔會信佢鍾意你架啦，肯定係你逼良為娼，
 
我而家就要救佢出苦海！！！」阿屋說得激動。
 
「係啊，肯定係你條人渣啦，飽暖就學人思淫慾，
 
小妹妹都搞，你唔係人黎架你！！」
 
「係囉，你條死淫賊，死龜公，當自己開妓寨？！！」
 


他兩個兄弟，千鍾粟和顏如玉又和應道。
 
「咩逼良為娼？！咩淫慾？！咩龜公妓寨啊？！」
 
我想這些罪狀也太莫名其妙了啊。
 
「小月，你唔係鍾意呢個傻仔架，係咪？係佢逼你架，係咪？」
 
阿屋仍是把小月抱得緊緊的。
 


「小月 …… 小月鍾意竹生主人，鍾意文靜姐姐，
 
鍾意小草姐姐，鍾意Jude姐姐，都鍾意Kay媽媽，」
 
小月一把娃娃音真是叫人聽來舒暢得很，
 
何況她還要說是喜歡我，我聽著真是說不出的受用。
 
「我呢，你唔鍾意我啦？」阿屋一臉著緊地說，「你之前話過鍾意我黃金屋架，
 


你講過唔算數啦？」原來阿屋的全名是黃金屋，倒也是個有趣的名字。
 
 
 
「小月都鍾意阿屋主人 …… 但係 …… 」小月不擅撒謊，不敢再說下去了。
 
「咁你鍾意我就得啦，」阿屋說著便想要去親小月的嘴。
 
「唔好咁啦，阿屋主人，」小月用力一掙，卻也被阿屋在臉上親了一下。
 
「我咩都比呢隻騎呢怪好，我有咩比唔上佢啊？」
 
阿屋強吻不成，便發起狂來，說著伸手向我一指。
 
「我？」我想自己怎也不是騎呢怪啊，


 
身邊的小草聽著也噗哧一聲的笑了出來，想她定是也覺得此人說話古靈精怪。
 
「係啊，你咩都比呢隻騎呢怪好，」文靜又伺機佔我便宜，「不過呢，
 
小月就係鍾意佢，仲鍾意到心甘命抵，愛到佢要生要死個隻，
 
你唔信？我叫佢證明比你睇！」
 
「點證明啊？」阿屋喝道，「口講無憑，你講咩我都唔會信啊！」
 
「係啊，用口講我夠可以話自己識整瀨尿牛丸啦，」
 
「咪係，我都可以話自己後宮三千，個個夏蕙BB咁樣啦，」
 


他兩個兄弟又有的沒的吵起來。
 
「用口講量你地都唔會信架啦，」文靜說起來信心滿滿的，
 
似是真的想到甚麼妙法，「呢，你頭先想鍚小月個嘴仔，
 
但係佢避開你，係咪有咁既事啊？」
 
「無喎，我本來就係諗住要鍚小月塊面，」黃金屋矢口否認，還真是愛面子。
 
「又好，就當你係想鍚小月塊面，但係都係你主動鍚小月，係咪？」文靜又問。
 
「係啊，咁又點啊，小月係我既人，我鍾意鍚佢就鍚佢，」黃金屋答道。
 
「你鍚小月，係因為你鍾意小月先鍚佢，係咪？」文靜問得我都一頭無緒了。


 
「我自然係鍾意小月，」黃金屋又答。
 
「嗯，你鍾意小月，所以你主動鍚佢，但係小月無主動鍚你，
 
咁咪即係話，佢根本唔鍾意你囉，」文靜說起來頭頭是道，
 
我聽著雖覺中間好像有甚麼不妥，但一時也想不出可以如何反駁。
 
「我 …… 」黃金屋被文靜一說，果真說不出話來，「我鍚唔鍚小月，
 
同呢個騎呢怪係咪小月男朋友有咩關係啊？！！」
 
黃金屋也說得不錯，兩者之間確是沒有甚麼關係。
 


「關係就大啦，」文靜說得繪形繪聲，「小月唔鍾意你，所以唔主動鍚你，
 
但係如果佢主動鍚呢隻騎呢怪既話，」文靜說著伸手往我身上戳了一下，
 
「咁就證明到小月係鍾意呢隻騎呢怪，唔係鍾意你啦！」
 
文靜最後得出這個結論，我聽著覺得有理，
 
但想小月怎麼也不可能吻我，她這番推論是要白費了。
 
「小月連我都唔肯鍚，點會肯鍚呢件矮柒毒！」黃金屋自然也是不相信。
 
我心裡卻想我那裡是甚麼矮柒毒，此人口出狂言，也真是欺人太甚了，
 
我正想要出口討回公道，卻見身邊的小草嫣然一笑，
 
我看著她那嬌態，只覺甚麼稱謂也再不足道了。
 
「無錯啦，點解會肯呢？就係因為呢隻騎呢怪係小月男朋友囉，」文靜續說。
 
「我唔信！我唔信！小月，你唔會架係咪？」
 
黃金屋說著捉起小月猛地搖晃著，似是怎麼也不願相信。
 
「我 …… 」小月仍是支吾以對。
 
「小月乖，你過去鍚隻竹生一啖，個四眼仔就會放左你啦 …… 」
 
文靜對小月說，像是逗著小女孩般，溫文得很。
 
若是她以後對我也是如此語調，
 
其實也會是個不錯的女孩，可當然怎麼也及不上小草。
 
但我還有一事不解，就是她何以把我稱為「隻」呢？
 
這麼聽起來就像是「隻畜牲」一樣，但想文靜也不是有心羞辱我，
 
必是她不擅使用量詞之故，以後有機會我多加糾正就是了。
 
慢著 …… 好像還有一事更不妥 ……
 
文靜說要小月親我？！！！！
 
 
 
「喂，唔係真架嘛？男女授受不親，何況我只係扮住先咋喎，」
 
我想起自己珍貴的初吻還在，要這麼沒來由的送了，我可不願啊。
 
「益左你啦鹹濕仔，」文靜輕聲在我耳邊說道。
 
「我 …… 」我說著看到小月那瓣粉嫩的嬌唇，心裡已然開始拿不定主意了。
 
「最多一陣你出賣完色相，我私人再鍚多你一啖啦，嗯？好冇？」
 
另一把輕柔的女聲又傳到我的耳邊來，我回過頭去，見說話的是Kay媽，
 
想不到她竟是這麼的嫵媚，當真是騷到骨子裡啊，
 
這句話說來實在可以與潘金蓮較個長短，
 
只是若果可以的話，我還是寧願用Kay媽和小月兩個的吻，去換小草一個呢。
 
「好啦，死就死啦，」我在二女力勸之下，終於下定決心。
 
於是我便挺起胸膛，昂然往黃金屋和小月所在之處走去。
 
 
 
千鍾粟和顏如玉二人也沒有阻擋，只是怒目的瞪著我，
 
我只作視而不見，可心裡實在怕得要命。
 
「你唔好埋黎啊，」黃金屋在我走到他身前時喝道。
 
「我 …… 」我手足無措，只懂回過頭去看文靜有何指示。
 
「你個懦夫，你話小月鍾意你嘛，如果佢真係鍾意你既，
 
你怕咩比隻竹生埋去，」文靜使的是激將法無疑。
 
「咩懦夫啊？！」他們三兄弟不約而同的說道，想他們都是一樣的愛面子。
 
「你地三個囉，三個懦夫！！！」文靜有的沒的罵著，
 
但她實與他們三人相距甚遠，可就苦了身入虎穴的我呢，
 
他們若是一個被文靜說得不高興時，我可就成了俎上之肉了啊。
 
「好！！」對著愛面子的人，激將法還真是最靈驗，「你個騎呢怪埋黎。」
 
黃金屋把我叫到身前，「黎啦，我就唔信小月會肯鍚你！！」
 
他對自己仍是滿懷信心。
 
「竹生主人 …… 文靜姐姐 …… 」小月看著我，也不知是否就要吻下。
 
「Suu Hinanchu Ainyan Yukarun Poster !!!! 」
 
文靜像是唸魔法咒語般，突然說著一堆似是而非的英文。
 
我看著一驚，想她不會是被鬼上身吧，這樣以後手尾可長啊，
 
要知道這些陰界的事物，從來都是易請難送，
 
文靜大好一個少女，有此遭劫，當真是不幸。
 
其實打從今早在更衣室裡起，我已覺這間咖啡店陰陰邪邪的，
 
「南無阿彌陀佛，南無阿彌陀佛，」
 
所謂不怕一萬最怕萬一，還是先求個心安好，於是我心裡又開始默唸起經文來，
 
但想文靜變了個西方女巫，也不知佛祖是否真的如此法力無邊。
 
我還在猶豫之際，小月卻突然臉色大變，也似是著了魔的，
 
「真係既？！真係既？！文靜姐姐你唔好呃我啊！」
 
小月收起眼淚，竟爾樂得像個小孩。
 
「文靜姐姐幾時呃過你，」文靜笑道，看起來又不似是撞了邪。
 
「但係 …… 小月 …… 小月未試過同男仔 …… 喎 …… 」小月又說，
 
她們的對話都說得我胡里胡塗了。
 
「你唔洗當隻竹生係男仔架，你當佢係我屋企隻男人得架啦，」文靜笑說。
 
我聽著更是離奇，甚麼文靜屋企「隻」男人，她真該好好學學中文啊。
 
「係喎，我對住文靜姐姐屋企隻男人都係咁，」
 
想不到就連小月對量詞也是一竅不通。
 
那知就在我心裡還籌算著如何替她們惡補一下中文時，
 
小月卻突然伸起手來，輕撫著我兩邊臉頰，
 
然後啜的一聲，就往我唇上吻了下去。
 
我感受著小月的唇香，只覺裡頭帶著點點甜味，那質感更是細滑無比，
 
原來跟女孩子接吻是這樣感覺的，
 
難怪世上每秒鐘也有千萬對情侶在接吻啊，這感覺真是絕妙啊。