我去左間 Cafe 打工 , 想溝入面個 Mk 妹女同事: 搞乜我多左個女朋友？

「點解你唔可以同我一齊啊？
 
我對你咁好，我呢半年黎日日都落Café，
 
為既就係可以見你一面姐。你要我比錢，我都有比啦，
 
同你合照一張相要成一百蚊，我每日都影兩張啦已經，
 
唔通咁都唔夠證明我有幾鍾意你咩？」
 


一直抱住小月的那個男子突然力竭聲嘶的說道。
 
「咳咳，係啊，我細佬為左你一日三餐都黎Café食，
 
我勸佢都勸唔住，你睇下佢幾愛你先係，」
 
擋在前頭的其中一個說道。
 
「係囉，我二哥大把女仔追啊，你唔要佢大把人爭住要佢啊，」
 


擋在前頭的另一人又說。
 
「唔得架，阿屋主人，小月真係唔可以同你一齊架，主人對小月好，小月好感激，
 
但係小月 …… 小月襯唔起主人架，阿屋主人你都係放開小月啦，」
 
小月只是哭著求饒，卻沒有掙扎半點。
 
「癩蛤蟆想食天鵝肉，三個都唔照下鏡，」
 


身後的文靜暗笑，小草聽著也不禁莞爾。
 
「係囉係囉，三隻癩蛤蟆啊，一個就肥頭耷耳，一個就方面四眼，
 
另一個就油頭粉面，」我見剛才文靜逗得小草歡喜，便也就加點醬油，照板煮碗。
 
小草聽著果然樂得很，往我全身上下打量一下，然後對著我很甜蜜的笑起來，
 
我看著她歡喜時，自己也都歡喜，
 
可當我回過頭去，卻見文靜在背後冷冷的向我瞥了一眼。
 
 
 
「你都係口裡說不姐係咪？你同我一齊唔洗擔心生活架，我屋企留左層樓比我，


 
私樓黎架。你大可以放心辭工，同我結婚，以後唔洗再拋頭露面啦，」
 
阿屋說道，他的話總是離不開一個「錢」字。
 
「咳咳，係啊，你同我細佬一齊，到時包你日日有好野食，日日有好酒飲，
 
一定養到你肥肥白白，」那個肥頭耷耳的胖子說道，
 
他說話又總離不開飲飲食食，難怪他吃得如此體胖。
 
「係囉，我就話妻妾成群姐，我二哥對你一往情深，你好應該珍惜先係，」
 
那個油頭粉面的說道，他的話似是離不開女人。
 


「唔得啊唔得啊，小月唔可以結婚架，」
 
小月一臉著緊地說，「小月可以每日服侍阿粟主人、阿屋主人，
 
同埋阿玉主人你地三個，小月已經心滿意足啦，實在唔敢再諗更多啦，」
 
小月說到這裡已然哽咽起來，「三位主人，你地若果係鍚小月既時候，
 
就唔好逼小月啦 …… 」
 
小月一副楚楚可憐的模樣，真叫人愛惜，我看著也不禁為之動容。
 
 
 
「唔結得婚？！」阿屋反應很大，「點解啊？我禮金一定比足，


 
擺酒都一定擺到最豪華，就算小月你未夠歲數，搵世伯伯母簽張紙就係啦，」
 
「係啦，你要邊間酒樓擺酒既，我千鍾粟都幫你發板，
 
講到飲飲食食我就最在行，你唔洗擔心喎，」
 
原來那個胖子叫做千鍾粟，他除了經常乾咳以外，聲音也是沙啞無比。
 
「係啊，你肯嫁我二哥時，我顏如玉包無人敢黎搶新郎，
 
二哥D狂蜂浪蝶我都幫佢接收晒，」
 
那個油頭粉面的叫做顏如玉，這倒也與他的相貌相配，都是有點女兒態。
 


「我 …… 我真係 …… 」小月只是猛地搖頭。
 
「其實就咁既，」Kay媽突然說道，想要替小月解圍，「你地都可以死左條心啦，」
 
她說著無端捉起我的手，我一時也沒反應過來，「小月之所以話佢唔可以結婚呢，」
 
Kay媽忽爾把我的手舉起來，向著千鍾粟、顏如玉等三人打了個招呼，
 
「係因為佢已經有男朋友啦，」Kay媽說著向我打了個眼色。
 
「我 …… 我 …… ？！！！」
 
我聽著登時嚇了一跳，只感三股惡意的目光同時向我投過來。
 
「係啊，你扮住先啦，趕走左佢地之後重重有賞，」Kay媽在我耳邊呢喃，
 
我只感她吹氣如蘭，氣息中帶著一股女兒的幽香，叫人受用得很。
 
「我 …… 我 …… 我唔得架Kay媽，
 
我 …… 我無用架，我唔識架，我又無跟杜斯托耶夫斯基學過方法演技，
 
我真係做唔黎，仲有啊，我點可以講大話架呢，
 
所謂人無信而不立，人而無信又不知其可也，我唔想做個不忠不信既人啊，」
 
我急得窘了，實在不想牽連進內。
 
「方法演技係史坦尼夫拉斯基，杜斯托耶夫斯基係寫小說架傻仔，」
 
文靜笑道，又在我的頭上打了一下，「仲有啊，Kay媽係小月先會咁叫架，」
 
「咩斯基都好啦 …… 總 …… 總之我係做唔黎啦 …… 」
 
我說，不過想文靜倒也厲害得很。
 
「如果可以既，你幫下小月啦，咁大家都可以早D收工嘛 …… 」
 
說話的是小草，我聽她的聲音語氣，
 
跟我那暗戀多年的女同學倒也有八、九分相像，可她怎麼又要騙我呢？
 
唉，竹生，你也太壞了啊，
 
怎麼可以如此以最壞的惡意去揣測人家好好一個姑娘呢？
 
她說自己不是子欣，自然便不是了，你又何必多去痴想？
 
 
 
「你 …… 你真係想我去 …… ？」我看著小草的臉，一顆心噗通噗通的跳著，
 
只覺中學時的回憶都湧上心頭了。
 
「係啊，我今晚約左朋友去玩啊，」小草說著一邊又看了看鐘。
 
「咁好啦 …… 」我下定決心，想若是小草吩咐下來時，
 
就是赴湯蹈火我也在所不辭，何況只是裝裝小月的男友，倒也不是甚麼苦差。
 
「真係架？唔該你啦咁，」小草對我報以一笑，這真是再沒有更好的鼓勵了。
 
「頭先係度懶有原則，人地小草叫你兩聲就做，無鬼用！」文靜一臉鄙夷的說。
 
我也懶得理她，只想能逗得小草歡喜，我也就歡喜了，
 
於是我挺起胸膛，昂首闊步，就走上前頭，
 
「係啦，我 …… 我就係小月男朋友啦，你 …… 你地好走啦 ……. 」
 
我說起話來始終不是伶牙俐齒，但為了小草，總也得要裝得似模似樣。
 
「你？！！」那三個男子也是一臉狐疑的打量著我。
 
「係！！就係我啦！！」我硬著頭皮的承認了，
 
那知卻惹得他們三人哈哈大笑。
 
「你？哈哈，你有冇錢架？」
 
「喂，小朋友，睇你個樣酒都未夠秤飲喎，」
 
「點只啊，睇佢肯定拖都未拍過，女人手仔都未摸過啦，」
 
他們三人都嘲起來，我聽著只羞得滿臉發紅。
 
「我 …… 我 …… 我 …… 」我想起自己確是沒有萬貫家財，
 
也是滴酒不沾，對女色更是敬而遠之，他們如此一說，可真說得我無以反駁。
 
「你 …… 你 …… 你 …… 哈哈，仲要講野都痴脷筋，」
 
阿屋笑道，「小月你唔係鍾意呢款窮光蛋啊話？」
 
「竹生主人 …… 」小月輕輕喚我的名字，兩眼卻是水汪汪的。
 
我看著小月如此楚楚可憐的模樣，心中大動，登時忘過了剛才的羞辱。
 
 
 
「我 …… 總之我同小月係 …… 我係小月男 …… 」
 
我特意把個「男」字說得小聲一點，「朋友啦！！！」
 
「你點證明啊？」阿屋聽著醋意大起。
 
「係囉係囉，點證明啊？」千鍾粟和顏如玉二人也連聲附和。
 
「我 …… 總之我係啦 …… 」我自知說來沒有半點說服力，可也是無可奈何。
 
「咁你又點證明佢唔係啊？」此時文靜突然說道，幫了我一把，
 
她倒是比我機變，我若證明不到時，他們三人也證明不到甚麼啊。
 
我一臉感激的看著文靜，想從此就與她泯掉過去的恩仇，
 
但她好像沒有這個意思，「我唔係幫你啊，你唔好諗多左啊，淫蟲，死淫蟲！」
 
她說著向我扮了個鬼臉，「我係為左小月好咋，」
 
我微微點了點頭向她示好，想她也是個性子倔強的女孩，一時是勉強不來了。
 
「係啊係啊，你地又點證明我唔係小月男 …… 朋友啊？」我忙對那三人道。