廢青於中世紀魔法世界的生存法則: 51, 係爭凳仔既遊戲裡面毒撚永遠都係輸家

「啊啦，兩位年青人今日都好青春。」

剛踏上西門樓閣已經聽到來自伊曼既問侯。
「走。」三葉立即調頭。
由於我係白石鎮既地位無三葉咁高，我必需要巴結權貴，因此我無恥地留左係到同呢個白石學者之首吹陣水。
「伊曼女士請問你係到……」

「伊曼就可以。」

「哦……係既……」睇起上黎佢真係無乜階級觀念，與用鼻窿望住人既蘭卡特好唔如。





「今日劫無出現。」果然係因為呢個原因先係到。
伊曼指住樓閣屋頂，然後話：「平時劫就坐係果到，望向聖堂既方向，若有所思咁；而我就企係呢到觀察佢。」
佢拎左一本素描簿出黎，係都鐸盤坐於樓閣之上既畫像，但尚未完成。

「好可惜仲未完成就發生左件咁既事；就算佢今日出現估計我地都唔可以用同樣既態度去對待佢。」
「等等，之前兩個星期你就一直咁樣係到望住佢畫畫？對方係一條龍喎，會唔會太鬆懈？」城門之上除左樓閣之外就係一個平台，對於位於樓閣之上既劫黎講可謂毫無防備可言，就好似係非洲既原野上企出車外觀察獅子一樣咁危險，伊曼頭盔都唔戴返個好易出事。
「初頭我都好似你一樣咁緊張，始終對方係一條龍。但係慢慢同佢相處……」相處？？呢種字眼真係咁用？？「我覺得佢可能同人一樣，都有思想。佢望向聖堂既眼神並唔係野獸既眼神。」

「發生左琴日單野之後你仲係咁諗？」雖然三葉話劫救左全鎮，但係佢捉走左菲兒都係鐵一般既事實。




「所以我想黎搵答案，但係答案並無出現。」伊曼既視線又放左係空蕩蕩既樓閣頂上。

「你地呢？兩位後生仔又上黎做乜？」佢刻意將聲線放大，然後話：「若果你想加入對話的話，唔使偷聽架喎，我好歡迎你。」
伊曼說畢後，三葉就於樓梯轉角位出現，然後行返上黎。
「監管眷屬係主人既職責，我唔想你對我既眷屬貫輸任何奇怪既思想。」

「呵呵，三葉妹妹真係可愛。」
「Ｗｅｉ……嗚嗚嗚」係我見到亞視魔法陣既同時立即就掩住三葉把口，估唔到咁樣真係可以停止到佢施法。
「既然劫唔係到，再留於此處都無意思，不如一齊去用膳？」





「好！」我即答，呢到無營多比我煮，菲兒又比人捉走左，連WW既各位都忙於搵劫而關門大吉，老老豆豆我本身都唔知今晚果餐要點解決，既然伊曼開到口我無理由唔狗衝。
然後我就一直被某人用不爽既眼神凝視。
「咁你呢？」伊曼問三葉。

「去。」
我地一行三人行落樓梯，我同伊曼都尚算有傾有講，但係三葉散發既不爽氣牆令我非常之唔舒服，唔知呢個癡線婆幾時又會爆。
然後路經軍校門口既時侯，藥引就燃點。

係蘭卡特。
佢本身正要踏出軍校正門，豈料見到我地呢個組合之後立即就回頭走入軍校裡面，與平時佢係下屬面前建立既形象相比，矛盾甚大，可謂非常滑稽。

我從心底為呢位年輕貴族嘆息，因為一個癡線婆而搞到自己霸氣盡失。
而伊曼都唔知係唔係特登，佢見到蘭卡特咁既反應之後竟然仲主動大聲搭話：「喂，蘭卡特，食左晚飯未？」

你唔係好討厭佢架咩？




伊曼既聲線之大連四名守衛聽到後都大皺眉頭，而佢地四人更將視線放於蘭卡特之上，今次呢條友想扮聽唔到都唔得。
蘭卡特死死地氣調返轉頭，然後用貴族既扮晒野語氣話：「伊曼女士晚安，點解你會係呢個鐘數路經軍校？」

睇黎對方打算完全無視我同三葉，我更留意到蘭卡特既眼神刻意避開我身後果團高氣壓。
「你知道架，我對上兩個星期都一直係到觀察住劫，頭幾日你都在場。」

「哈，講起上黎又好似真係有咁既事。」你條撚樣又幾好演技，做乜走黎當兵咁浪費？
「唔阻你兩位慢慢傾。」三葉捉住我手臂意圖強行拖走我。

「既然都遇到，不如一齊食個便飯。」
「…………………………」三葉同蘭卡特既思想首次如此同步，因為佢地都諗緊點樣婉拒。

「我相信長老都好想同兩位一齊食飯。」兩位，三葉、我、蘭卡特，被忽略既果位大概係我。
已完，伊曼一拎長老個朵出黎，蘭卡特點都要去。





話說，佢亦都無提過長老會係到，雖然我唔抗拒同佢食飯，因為咁樣意味住唔洗找數。
問題係三葉想唔想埋堆。

若果同伊曼食飯都未算差的話，依家個選項已經變成同伊曼加蘭卡特同檯；相信蘭卡特都好唔想三葉出現。
「請帶路。」三葉低聲道，RIP蘭卡特。

「冇問題。」伊曼愉快回答。
我們一行四人往市中心方向進發，係路經鐵馬河嘅時候我以為伊曼會帶我地上山，畢竟對方都係於白石鎮有頭有面嘅人，住貴族社區一啲都唔出奇。
最終我哋係一條毫不起眼既小巷裏面其中一間毫不起眼既排屋門口停低，伊曼敲敲門，然後裏面就傳來長老嘅應門聲。
唔係掛？長老你係村德高望重竟然住係呢種地方？
「人客的數量好像有點多，這裏地方淺窄，希望各位能屈就一下。」

地方淺窄通常都係謙虛既字眼，啲撚樣幾千尺大屋，有泳池有四五個廁所都夠膽死同你講自己地方淺窄。
但係明顯地長老此言並非出自謙虛，呢到地方真係唔多大，雖然未至於劏房咁得人驚，但係呢到目測頂盡都係得三百尺，同公屋差唔多。
呢三百尺包左一張床，一個書架，一張書檯，一個小廚房，仲有一個只係用布簾隔住既屎坑。





除左書檯上有啲亂之外，其他地方都雜物唔多，尚算整齊。
書桌之上除左數本打開左既書同筆記之外，最顯眼既就係一個相架，係老野同菲兒既合照，相入面既菲兒仲係一隻蘿莉，睇黎我已經有充份既証據向FBI舉報老野……
但係幅相裡面除左佢兩個之外，仲有一男一女，年齡與相入面既老野差唔多。

回頭一睇，原來三葉都望緊同一張相，當佢發現我望緊佢既時侯，佢立即將頭別開。
呢到既大細其實同好多公屋都差唔多，但係於人口密度低咁多既地方黎講，呢到實在唔似係一條村之長所住既地方。

「點解你要住呢啲咁既地方？」應該唔會係交唔起租掛？白石鎮鎮民明明係有房屋配給唔使交租架喎。再唔係你僭建都好丫，我地香港啲高官好興。
「居於山上對我這老骨頭來說負擔太大，出入如此麻煩會使人想長居家中。」

長居家中有咩唔好？深居簡出既浪漫你識條春咩？
呢到仲有張正方型檯，放置於小廚房同我地身處既客廳之間（其實我知呢地方咁細仲算唔算廳，不過套用香港地產商既邏輯都應該算）。
於灶頭之上有一個類似童話故事裡面，巫婆用黎煮魔藥既大鐵釜；伊曼將呢舍大鐵釜搬到去正方型木桌之上，然後再係櫥櫃裡面拎住四套餐具出黎。
過程中老野完全無下過指示，全部都係由伊曼自動波完成。你咁熟呢到既？你成日黎架？你兩個有路？呀伯屌人妻好似係一個幾好既AV題材。




老野你既性取向到底係點？我好混亂呀！
「唉哎……」伊曼忽然間發出做錯野既聲音。

老野既注意力瞬間由蘭卡特（入到屋之後蘭卡特一直撩緊老野吹水，講埋啲無聊話題我都費事提起）轉移至伊曼之上。
無倒瀉野無打爛野，你唉乜？

「得四套餐具……」
長老、伊曼、蘭卡特、三葉、嘉穎。

「……………」
然後我留意到連凳都係得四張。
慣架喇，我慣架喇。

老豆有次抽獎中左海洋公園門卷三張，先唔問點解個抽獎係送三張門卷咁零丁，果次最後係老豆老母帶埋我個妹去。
點解你地唔考慮下買一張飛比我呢？三個免費一個比兒童價，唔係好過份啫？

「我可以唔食。」三葉大天使降臨。

但係講完呢句之後佢就即刻坐左係張木凳之上。
o係我未入o黎之前，見到三葉個大名，心諗，你條撚樣，又想fake 我? 但o係好奇心驅使之下，信撚左佢。屌，結果又比佢出賣左，不過我都諗住比多次機會你個仆街三葉，睇下你做D咩?當我續字續句咁睇清楚後，發覺真係o個D on9 o野，我真係好撚無奈。三葉你幾十歲人，仲做D咁撚on9 ge o野，我好撚鄧你可憐。我同時都要鬧自己，點解我要比機會你條仆街? 我到底信你做乜撚?
然後其餘二人（長老原本已經坐左係凳上面）相繼入席。

我就好似係地鐵玩爭凳仔輸左一樣，戇尻尻咁企左係到望住班後生仔坐左係到以一副勝利者既姿態玩電話，等我影低你地放上網公審先！