廢青於中世紀魔法世界的生存法則: 12, 揀飲擇食即使係異世界都係一種壞習慣

「你相唔相信命運？」我一直思考如此突兀既問題。

雖然三葉第二次問我個咁既問題我都無回答到佢，但係佢亦都無等我既答案就繼續出發。
眼前既少女充滿住謎團，但係除左意圖殺死我5~6次之外，佢都無對我做過任何有威脅既行為。

雖然單係殺人未遂一點就已經好有威脅。
即使係咁，頭先三葉解釋完之後，我都開始明白一樣野。

無論點都好，佢都殺唔到我，至少佢單靠擲石殺我唔到。
即使係咁，我對佢既了解實在太少，我甚至唔清楚繼續跟住佢行安唔安全。




「三葉小姐，我有問題想問。」

「批准。」三葉無回頭，只自顧繼續向前行。
「請問小姐你係乜野來頭？睇閣下既衣裝同埋非一般既身手，我有理由相信小姐你係貴族……」我不自覺地用上非常卑微既語氣。

「嘛……我既家族係恩基大陸上黎講的確係幾出名既，不過你區區一個異鄉人，講出黎你都未必識。」三葉既語氣非常自信，但係又未去到大小姐果種傲慢。
「哈哈……的確係……」三葉似乎無意隱瞞自己身世，只不過我所識既真係太少，有命返到白石鎮的話一定要好好惡補下。
我又沉默地跟住三葉行左一段時間，為左打破沉默帶來既尷尬，我又再發問。

「三葉小姐，我又有問題想問。」





「批准。」一貫自信既語氣回答。
「請問點解三葉小姐你要去白石鎮既？」其實由頭先開始三葉就好理所當然咁話要去白石鎮，但係完全無解釋過其中既原因。

究竟佢係因為聽到我想去白石鎮先打算帶我去，定係佢本身就想去白石鎮？
「說來話長。」你唔係想用四隻字就敷衍了事下話？

「反正長路漫漫，你慢慢講我咪慢慢聽……」私、気になります！
「的確……唔…………由邊到講起好呢？」三葉停住腳步，右手托住下巴作出思考狀。





「你去過白石鎮未？」
「嘛，我本身就住係白石鎮附近，然後同家人發生左啲事先離家出走。」

離家出走既大小姐，好王道既設定！
「即係你既家族係白石鎮入面既大家族？」雪菲兒無理由會唔講比我知白石鎮入面有咁厲害既貴族。

「唔係，係白石鎮住既只有我同我其中一個呀哥，家族其他成員分別住係世界上唔同地方，一般黎講我地都好少見面。」

對於係香港土生土長既我黎講其實都幾難想像，雖然有個別親戚係大陸到住，但係過時過節既時侯即使我幾唔情願都好，都要見佢地一次。
「你家族成員之間關係好差？」係唔係世界上所有大家族都會好似TVB啲爭產劇咁鬥過你死我活？

「個別，好似今次離家出走咁，我遇到我既四哥，佢都講左好多趣事比我知。」離家出走之後佢係『遇』到佢既四哥，而唔係投靠佢既四哥。
「你離家出走左幾耐？」「都差唔多十年。」

「十年！？」眼前既少女頂到盡都係十八九歲，你八歲九歲就離家出走仲無穿無爛咁生存到咁耐！？




「莫非你係神童？」

「雖然大哥有咁樣形容過我，但都係謙虛啲比較好。」依然係非常有自信既回答，但語氣不帶半點驕傲。
「講到尾，到底你屋企人做左乜野先會令到你離家出走？」

三葉忽然回頭停低，眉頭緊皺。
「果個白痴阿哥！佢竟然落重手打我！」三葉指住自己右邊臉頰。

「嘩！」家庭暴力，可以報警。
出手打人不特止，仲要係打個妹？個妹仲要得八歲？而且仲要打臉？而且唔係刮，係打？而且仲要下重手？
Well，如果對象係我屋企個妹，而且條件又充份的話，我都會毫不猶豫地刮落去。

不過事實上，我先係被拳打腳踢既一方。
三葉一副不忿既表情，再加埋強忍眼淚既樣，同佢一開始建立既強者形象反差甚大。不過講到尾佢只係一個十幾歲既細路女。
「你呀哥係邊？我覺得我需要打佢一身。」我要替天下既妹控同蘿莉控懲罰你呀哥！





「雖然咁講，始終係我做錯野在先。」
「係我個世界體罰已經被捨棄左好耐，如果同樣既事係我個世界發生，你阿哥男童院都有得入。」

「男童院？」我又不嫌其煩咁將男童院解釋一次，三葉都聽得非常之高興。睇黎香港既事係依到可以變成交溝神器。
「講左咁耐，其實大概幾時先到白石鎮？」我問三葉。

「咦？」三葉側側頭後道：「我地係邊呢？」
屌！！！！！！！！！！
你先係帶緊頭果個喎小姐！
當然我唔敢講出聲，我只係單手掩臉咁失控狂笑。

「哈哈哈哈哈哈……………」
＊　＊　＊





原本高掛於天空既提默已經漸漸西入。

「夜晚既叢林係非常之危險，除左氣溫降低同視線變差之外，有好多野獸都會係晚間先出沒……」
「嘉穎先生，你由頭先開始就經常喃喃自語，請問係咪有乜野事？」

「我無事！無事！你比我一個人冷靜下……」全能既貝爺，我應該點算？
由頭先開始，帶頭既位置就由我黎擔當返。

即使係咁，我對自己身處既位置完全無概念，其實同跟住三葉隨便行無乜分別。
「你係唔係唔識路呀？使唔使由我黎帶返？」

「唔使！唔使！」由唔識路既人帶隊？傻的嗎？
但係講到尾其實我都唔識路，只不過自己命運放係自己手上好過放係人地手上。

此謂自己出路自己搵。




還完基本步，依家首要既係搵高地又或者搵河流。

但係估計兩個地球小時之內提默就會落山，搵個安全既地方過夜似乎更加迫切。
「我肚餓喇，你有無食物？」

好彩糧食仲有四隻螯蛛腳，將就啲食的話應該仲捱到今晚。
我將腰間既其中一隻遞比佢，換來既係厭惡既表情。

「雖然我對食物唔選好揀擇，但係……」
超，唔識貨！

我遵從貝爾老師男兒口大食四方既氣魄將原隻螯蛛腳吞落肚。
「……我竟然有種螯蛛腳超級好味既錯覺……」三葉驚嘆道。

你以為人在野係求生節目？錯喇，人在野係美食節目，Level仲高過蔡蘭同肥滔好多！
「得返三隻，手快有手慢無。」

「好啦，咁你比隻我。」哈哈哈，貴族既大小姐又點，一樣要屈服係飢餓既折磨之下。
「係叢林裡面，揀飲擇食並唔係好既習慣。」

三葉從我手中接過螯蛛腳，然後回答：「我覺得係一般既情況下揀飲擇食都唔係好既習慣。」
多嘴，依個時侯你只需要講一聲ありがどう、 お兄ちゃん！
三葉舉起螯蛛腳打量一番，似乎仲係食同唔食既邊緣掙扎。

同樣既掙扎我今朝都有，其實螯蛛腳並唔難食，相反仲幾好味，食落去同蟹好相似，係暖啲同埋未熟。
咦？我係咪係叢林入面生活左半日之後想像力豐富左，做人都樂觀左？我係咪有乜野奇怪既開關打開左？
下一秒，三葉決定了！

佢將螯蛛腳大力甩出去。
「喂！」浪費食物，大徙鬼！

「殊！」三葉舉高右手阻止左想出去執返隻腳既我。
我同三葉係樹後面望住隻螯蛛腳足足五分鐘咁耐，我唔知佢想做乜，但係我每秒都忍耐緊想撲出去既衝動。
「黎喇。」三葉低聲道，手中既石頭亦都準備好。

就係下一秒，一隻巨牙豚走到螯蛛腳旁邊，準備進食。
隻巨牙豚口都未開既時侯，兩塊石頭已經從三葉手中脫出。

石頭啪啪兩聲擊中目標，巨牙豚發出慘叫兩聲後便昏迷。
此時一支法杖憑空出現於三葉掌中。

該法杖以金色及白色為主調，土豪感十足！
杖既頂端仲有一顆又大粒又殘眼寶玉，拎返香港賣的話應該夠錢買幾層私樓收租。
然後三葉慢慢走到昏迷既巨牙豚旁邊，用法杖上既寶玉大力敲擊其頭部數次，場面極度血腥。巨牙豚比粒價值連城（太古城及沙田第一城）既寶玉重擊數次之後，應該已經歸天。

鑽石雖然硬，但係啲闊太比人打劫既時侯應該唔會拎黎做武器自衛，顯然三葉無金錢既概念，寶玉？咪又係武器。
「好彩畜牲唔揀飲擇食。」三葉撿起地上既螯蛛腳拋返比我：「比返你，我都係比較鐘意食豚肉。」

道歉！向頭先想衝出去執返隻腳既我道歉！
一個類似亞視台徽既魔法陣出現係三葉右手手掌之上，而支土豪法杖亦從三葉手中慢慢漂浮至魔法陣之中，然後連同魔法陣一同消失。
「希望唔會引到熊侏既注意。」三葉暗自道。
「你想點處理隻豬？」我打量眼前巨牙豚，雖然比起今朝果隻黎講體積細左一個碼，但係要餵飽兩個人的話肯定綽綽有餘。

「我唔識處理，你幫我劏。」「嘎？」「最多分一半比你。」三葉已經好理所當然咁當我係下人黎使用。
我去到巨牙豚屍體腹部旁邊既位置跪低，然後雙手合十：「感謝瑞亞之惠。」

「係感謝瑞亞之前你更加應該感謝即將比你食既依隻豬同埋將隻豬殺死既我。」咁我殺死螯蛛做餌既功勞呢？
「習俗既野你啲貴族唔識架喇。」白石鎮既習俗係殺死家畜之前都需要感激『生命及傳承之古龍　－　瑞亞』。至於今朝隻螯蛛，我擅自歸類左為怪物，而且咁獵奇既野，除左貝爺既教徒之外應該都無人敢食。
「所謂既習俗其實只係凡人多此一舉既自我心理安慰，反正瑞亞都唔會聽到你既感恩。」

「唔知仲以為你識得真係瑞亞添。」

「嘛～」被我咁樣一講之後，三葉都無再回應。
跟住既問題就係點樣劏豬。