廢青於中世紀魔法世界的生存法則: 11, 第十一回女主角先登場既故事注定無人會睇

係解剖完隻螯蛛之後我再次上路。

除左基本裝備外，依家我身上仲帶住四隻食剩既螯蛛腳（我用頭先割斷既螯蛛毛綁好掛係腰），同一個疑似椰子殼。
頭先個跌落黎既疑似椰子似乎係因為撞擊而造成一條微細既裂痕，我用匕首打開左個疑似椰子，裡面竟然仲有可以飲既汁液。
除此之外，個疑似椰子殼仲非常之硬，比我地平時見到既椰子殼更加硬。如果唔係頭先咁樣撞一撞搞到有條痕，我單靠一把匕首一定開唔到。
「點樣利用身邊既資源對生還非常重要。」我無忘記到貝爺既教訓，於事我就將左其中一大半拎左黎做頭盔，依家想係世界上生存，識得戴返頭盔最重要。
睇起上黎我既生存非常之樂觀，正當我咁諗既時侯，我既十數米以外又出現左一樣非常麻煩既生物。

野豬，同係香港偶然上新聞既野豬外觀上一模一樣，唯一唔同既係佢既體積，有一隻成年大笨象咁大，嘴邊長出黎既獠牙亦都有象牙咁巨大。
巨牙豚，草食性生物，品性溫純……





「你真係好彩，如果你係中國出世的話，你對牙已經比人拎左黎做裝飾品。」

……但極之討厭其他生物之視線，若果發現將衝向目標，用獠牙驅趕。

而此刻隻野豬視線正正與我視線重疊。
轟呀！
隻野豬係完全無警示既情況之下衝向我，講速度我唔夠佢跑，講力度我又唔夠佢頂，就算想拎電話出黎打999都要等佢開機！
我既唯一選擇係企係樹後面檔住，睇下會唔會咁好彩又有椰子跌落黎責死佢……





而隻野豬跑到我大約五米前面既時侯，荒謬既事情又發生左。
野豬腳下既泥土忽然劇震，令到野豬驚愕不已，數秒後所有泥土漸漸往下沉，成塊地連埋隻豬消失於我眼前。

「潑查……」數秒之後仲有水花聲。
我係確保自己安全既情況之下離遠觀察個坑，坑裡面除左隻野豬既慘叫聲之外，仲有水流涮涮既聲音。
「會唔會太符碌？」我不禁自問。

隻野豬被水流慢慢沖走，學貝爺話齋搵到水源都好重要，於事我立即跟住水流既方向前進。
雖然我見唔到條地下水路，但係我每行一小段路就會伏低係地下用耳仔聽下有無水聲黎確保自己係沿住條地下水路黎行。
一路行左大概兩個鐘，我終於唔使伏係地都聽到水聲，係由前面斷崖下面傳過黎。





我行到去斷崖邊緣既位置時，第一時間望望提默黎判斷時間，睇黎已經係中午時份。
然後我再望望斷崖下面既湖泊，水速已經減慢，而且仲有一塊淺灘。

淺灘旁邊有一塊大細剛好可以比人坐既石頭，而石頭上面正正坐住一位金髮少女。
雖然我無感應魔法既能力，但係眼前既少女既一身裝束極有遊戲中既魔法使既風格。
她衣物以紅白為主調，白色既襯衣披上紅色既短袍，下身係一條紅色既短裙。同樣充滿聖誕氣氛既靴放左係旁邊。

少女一雙雪白既長腿浸係水入面，而佢隨手執起石灘上面既石頭打水漂。
石頭係水面上躍動三四次後沉入湖中。
少女衣著光鮮，同當初我遇見既雪菲兒完全唔同，無任何村姑既感覺。

唔通佢係貴族？點解一個貴族少女會獨自坐係湖邊？我腦裡面已經聯想到幾種裡番先會出現既可能性。
少女再撿起一石，但係佢既姿勢同上一次唔同。





佢往後拉弓，然後一甩手。
「嗖－－－－」「啪－」

石塊於我左耳邊飛過，然後擊中我身後既樹木。
少女所在既位置同我身處既地方至少隔左三十米，而且我身處蕞林入面之餘地勢亦較高，少女既精確射術令我不禁驚嘆。
「邊個？仲有意識既就報上名來。」少女道：「否則下一擊我會確保你失去意識。」

我聽到之後立即舉起雙手從樹叢走至崖邊，以示沒有敵意。
「可唔可以等我落左崖先講？」

「批准。」少女語氣甚為高傲，睇黎佢真實身份同我估計相去不遠。但係越高傲既少女就會陷落得越深，係偉大既沖田總司教我既。
係一番功夫之後我已經成功落崖，然後我雙手維持舉起，慢慢走到少女身邊。

少女雙腳依然浸於水中，但右手拋玩另一塊石頭，眼神維持警戒。
「名？」





「我叫嘉穎。」

「講大話。」少女一直把玩既石頭從右手中飛出，於我右耳旁邊飛過。
我係白石鎮用左兩個星期既假名竟然被眼前既少女一眼就識穿。

「矣？」少女表現出不惑。
「我無心欺騙你，我本名叫洪滿江，但係此刻我用緊既名的確係嘉穎。」

「真係奇怪既名，本名又好，化名又好。」少女回答。
個名我老母改既，好人好者邊到會改埋晒啲咁既名？
少女稍停數秒後問：「洪滿江，你信唔信命運？」

「下？」由於少女既問題太突兀，我唔知點樣回應。
如是者雙方沉默左十數秒之後，我首先打開話匣子。




「請問你一個女仔點解會係到？」「我無批准你問問題。」「係……係……」

點解我要受一個十幾歲既靚妹氣？
「你係到既原因？」同樣既問題由少女問返我，同時再執起一塊石頭。

此刻我同佢之間既距離只有數米之遙，咁忽然露出咁大既破綻究竟係完全唔將我既威脅放在眼內？定係試探我？相信我無威脅？定抑或佢只係一個入世未深既大小姐所以一時大意？
「我進行緊一個生存測試，需要搵路返白石鎮。」我如實回報，反正欺騙佢佢會感覺到。

「嗖－－－－」石頭又再飛過我耳邊，若果擊中的話我定必頭破血流。
「我無講大話！」「我知，我只係做個測試。」

少女既行為不可理喻，除此之外少女既神情亦都係一臉不惑。
「有趣。」數秒之後少女嘆一口氣並留下兩字回應，從此佢對我警戒亦都放低左。

少女將雙腳從水中抽出，然後抱膝坐於石塊之上。





「三葉。」「矣？」「我既名。」「哦。」

係女人既脾氣真係咁難觸摸定係我眼前既貴族少女特別麻煩？
「你無野想問？」三葉問道。

頭先話要得到批准既係邊個？？？？
「呃……你係到既原因？」

「如你所見，休息同嬉水。」You don’t say?
但係我強忍心中既怒火，眼前依條八婆唔簡單，佢可能感覺到我心理既變化。
「你諗緊乜？」

「無！我只係奇怪你一個女仔就敢黎到咁偏僻既地方好勇敢姐……哈哈……」其實見識過佢強而有力既擲石之後，我都好相信森林入面無野威脅到佢。
「你唔係本地人？」少女完全無視左我既回答然後再問返我轉頭。

「係呀……我最近兩個星期先黎到……」

「矣～講起上黎無比敵最近真係去左白石鎮附近。」
咦？
「你又知係無比敵送我黎？」

「異鄉人進入世界既方法仲有第二個咩？」三葉理所當然地反問。
我明明無同佢提過我異鄉人！
「你點知我係異鄉人？」

「一睇就知，你身上完全無魔法既氣息。」同老野當時既答案一模一樣，但係當時魔法造詣相對無咁高既雪菲兒都只係隱若咁感覺得到，而眼前睇起上黎比雪菲兒更年輕既少女一口就確認我係異鄉人。
此時三葉將雙腿放返入既短靴，然後話：「一路行一路講。」

「去邊？」「白石鎮囉，仲有邊到。」

＊　＊　＊
係三葉帶領之下，我再次走入叢林。

細細個果陣，我老豆老母經常吩咐我細妹唔好跟陌生人走。
對唔住呀，我今日無遵守到你地對細妹既教誨！至於點解我要強調係對我細妹既教晦？因為同樣既說話佢地無同我講過，至於背後既理由實在太負面我唔敢去推測。
「等等。」三葉舉手指意我停低，然後再於地面拾起兩塊小石頭。
然後三葉拉弓將石頭拋出，被同時拋出既兩粒石頭竟然分別往兩個方向飛出，然後擊中兩隻分別隱藏於遠方既怪物。
「你身手真係厲害……」

「我只係隨便拋。」三葉回答完之後繼續前進，睇佢既反應完全唔在意我既稱讚。
「睇你既裝束我本身以為你係魔法師，估唔到你有咁厲害既身手。」

「魔法的確係我既專長，但係附近熊侏比較多，隨便用魔法的話會好唔方便。不過你係異鄉人，唔識都係正常。」
三葉說畢後，兩塊小石分別從我左耳及右耳邊飛過。
「搞乜呀你？」今次我終於忍唔住怒火。

「實驗，其實除左第一下之外，我每次都係瞄準你個頭黎攻擊。」
安已不，眼前既少女多次殺人未遂，我係咪應該第一時間走佬？

「你唔使驚，我示範一次。」示範爆我頭？
佢又拎起一塊石頭，然後指住樹頂上面其中一塊枯葉。

「你望住塊葉，一般黎講，只要我瞄準同埋作出相應既攻擊的話……」
「嗖－－」三葉再次擲出石頭，桔葉應聲落下。
「都一定會命中，但係你……」石頭又從我耳邊飛過，我已經見怪不怪。

「我點樣瞄準都射你唔中。」但係三葉個樣完全唔似失望。
「可能係我今日特別好彩掛，頭先遇見你之前都發生左幾件匪夷所思既幸運事件。」

「吶，洪滿江。」

「叫返我嘉穎得喇……」

「你相唔相信命運？」
聽起上黎既中二又浪漫既對白，從三葉口中講出黎似乎又有另一番含意。