廢青於中世紀魔法世界的生存法則: 6, 大部份作品裡面都有一個同主角爭女既醜角……而我就係果個醜角
於馬車上。
「長老，頭先條龍………？」「『劫』。」老野回答。
「長老都咁講肯定唔會有錯......」似乎隊長都已經估到條龍既身份，佢只係向老野確認一次。
我同各位看倌一樣，完全聽唔明佢地講乜。
我睇動畫果陣都最討厭被強姦式咁塞一堆世界觀，而故事中人仲冷係頭頭是道咁。
「畢竟十年前與其正面交鋒的正是老夫。」又提到十年前，肯定係個大event。但係老野既語氣不似頭先咁沾沾自喜，反而帶住半點憂愁。
「唔好意思，可唔可以唔好扮神秘，解釋下十年前發生既事即係乜事？」
所謂問號係知識及智慧既開端，如是者，歷史堂又開始。
以下為老野歷史雞精班既TL: DR及普通人聽得明既Version。
是咁的，十年前白石鎮發生左次龍禍，而引發龍禍既主角之一，正正係頭先，某程度上令我地逃過一劫既果條龍，亦即係「劫」。
當時「劫」同另一條龍「瞑」之間發生左場戰鬥，而戰場咁岩就係白石鎮附近。
亦即係話，場龍禍並唔係因為龍對人有惡意而造成既攻擊，只係人類被單方面地被波及到。
果場龍禍具體黎講為白石鎮帶來幾多傷害呢？
城牆外幾間房屋被摧毀，一大片樹林被燒光，死左十零個人左右。
老實講，親眼見識過龍既破壞力之後，我本身預期更高既傷害。衰d講句，係香港若果發生左單死十幾人既意外，過幾個月都已經未必個個記得起。
而依宗龍禍，佢地十年之後依然記憶猶新。
當時，長老就身處於最前線，係兩條打到難分難解既龍面前，救左雪菲兒。
死左既果十零個人入面，包括雪菲兒既親人。
個設定夠唔夠膽再老土啲？就算雪菲兒後尾係石頭中拔出一把咖哩棒再統一英格蘭我都唔會意外！
「何解熊侏會發動攻擊？其習性兩位應該非常清楚。」
「當然，於熊侏所居之地施法如斯低級之錯誤，不可能為老身所犯。」
「可能係我。」我自動投案。
＊ ＊ ＊
「雖然我魔法底子一般，但的而且確我於嘉穎身上感受唔到任何魔力。」隊長用見到怪獸一樣既目光望住我，頭先佢望「劫」或者望巨熊既眼神都無依家咁令人討厭。
「相反此裝置尚有一點殘餘魔力……竟然有如斯之物！」老野手掌上面既，正正係我部電話。
「長老以前有聽聞過咁樣既魔法儀器？」
「即使傲嬌如老身，也未曾聽聞。」長老手執其長鬍鬚，係我印像中佢唔似係咁易就承認自己不足既人。
「傲嬌……？」隊長表示疑惑。
「哦，係我家鄉既用語……」我唔想解釋。
「小伙子家鄉真厲害，竟能創造出如斯神器。」老野既眼神就好似雪菲兒初初見到我既眼神一樣，充滿住好奇。
但係一個外表係甘道夫，內裡係千反田bb既呀伯，大家萌唔萌得起？我接受唔到。
相反內裡係甘道夫，外表係千反田就有得傾，我就係咁膚淺，吹咩？
「哈哈，好厲害咩……係我家鄉幾乎人人都手執一部。」
我將事實講左比老野聽，老野聽到之後大感感慨，後道：「若果白石鎮之兵士每人各執一部，如「劫」之流根本不為我輩所懼。」
「係咩？」我個人推薦nokia3310。「但係係我地既世界根本無魔法，更加無好似龍一樣既野威脅住我地既存在。」
係我眼中如此理所當然既說話竟然令到隊長同老野受到好大既衝擊。
「竟然無野威脅到人類既存在……」隊長有所動搖。
「樂土乎？」老野嘆氣。
人類唔係食物鏈最頂端既設定，好多動漫都有，例如進擊的巨人。
以我觀察呢個世界不如巨人既世界咁惡劣，至少巨人既世界唔會比無乜裝備係身既阿伯同少女兩個人自己出城牆外面做研究。
就算唔擔心兩個會比巨人食左都應該擔心個少女會比個阿伯食左。
哎呀，又暴露左我既本性添XD。
「又或者咁樣講，可以威脅到人類既，就只有人類自己。係我地世界所面對既災害，好多都係人類自己搞出黎。你地有龍禍，我地亦都有人禍。」上一秒仲係到FF緊，下一秒就可以講啲咁沉重既話題，我都覺得自己好犀利。
「人禍……」老野笑道：「既新鮮又奢侈之詞彙。」
「係你世界入面，依個裝置究竟係有咩用？」隊長問。
「聽歌？影相？上FACEBOOK？打機？」我帶住電話可以做到乜我一時間數唔晒，但係我好清楚我無左電話就乜都做唔到。
好似我依家咁，想自拍上FB打卡都做唔到。
雖則我個FB根本無人會睇。
「聽歌一詞老身尚懂，後者是…」
「可惜部電話無晒電，如果唔係我都可以示範一下。」我拎返部電話，禁極開關制都無反應。
「電？」老野好奇問。
「哎……連電都無既鄉下世界真係麻煩……行雷係乜你地知喇掛？」
「行雷？」兩人同問。
我估唔到竟然要由行雷開始解釋。
「係天上面有支光柱劈落地面，幾秒之後仲會聽到好大既轟隆聲。」
「哦，『龍譴』。」隊長道。
做乜野又塞個專有名詞姐？
「總之落雷...」
「龍譴。」隊長即刻糾正我。
「落雷。」但係我唔覺自己有講錯。
「龍譴。」
「落雷。」
「龍譴。」
「得喇得喇，係龍譴喇得未？龍譴果陣釋放既能量就大概係電，明未呀？你地有無新既專有名詞要補充呀？」
「換言之，電與魔力乃一物。」老野下既定論。
「龍譴即係係雲層上既龍因憤怒而作出既巨大魔法攻擊。」隊長解說。
乜柒都賴尻啲龍，做你地既學者真係方便。唔夠地方起老人院咩？瀨尻啲龍啦！後生仔無屋住咩？瀨尻啲龍啦！高鐵超資咩？瀨尻啲龍啦！土地問題？瀨尻啲龍啦！
但係我懶得解釋落雷既成因，費事佢地又唔岩聽浪費我口水，情況就同你要係高登解釋自動販賣機其實係通過電磁流量運作而唔係有個人坐左係入面一樣。
「若果魔力是嘉穎口中所述之電......」我將電話平放於手掌中，老野拎起魔杖指住我部電話，然後緊閉雙眼。