廢青於中世紀魔法世界的生存法則: 1, 那天早晨，我掉進了八神太一設下的落穴陷阱

七月一日，又稱港殤日。

係咁既普天同慶既日子裡面，每個人都有唔同既慶祝方法。
有人去睇升旗禮，有人去遊行，又或者去升旗禮嗌完口號比人趕走之後再去遊行。

每年香港警賊都會係七一嚴陣以待，今年既準備可以話係有史以黎最高。
其實正苦唔想咁多人上街真係好簡單，將七月一號既公眾假期取消就得，咁大家就會繼續返工返學，無人上街、無投訴、無問題、無分歧、香港好、大家好。
呢種掩耳盜鈴想法正正同北韓既統治方式有咩分別呢？有！香港無政府無高射炮處決班泛民囉！
作為一隻一個現實生活唔充實，朋友唔多，搵錢唔多既腦死港豬，我究竟點樣渡過七月一號呢？





當然係成日係屋企開衡個冷氣睇動畫同打機，周圍都唔去啦！
「搵人落去買早餐啦，成十點半喇…」

「天氣咁熱，咪搞我。」

「叫老豆去買囉。」

「佢都未起身。」

「我肚餓喇！」





「我煮個麵你食丫？」

「煮你老闆咩，拿拿聲落街買扭扭粉啦！」
於剛才對話中，叫人買早餐正是舍妹。

而另一個比人當係工人咁使既，正是在下。
十幾年前香港仲有好多人講緊女權，同女平等，直至今日都仲有愛瑪華生bb係聯合國搞heforshe活動宣揚女權。

但係事實擺在眼前，依家有賓周既一方先係弱勢既一方，至少我屋企係咁。




將自己身邊所見所聞當成世界既法則，係理所當然既廢青思考方式，至少我樂於做廢青。

做廢青就唔會被期待，唔會被期待就唔會有壓力。
如果你係育有一子一女既父母，一個係讀大學神科、有望識到私樓仔然後帶領成頭家從社會階梯中上昇既女，而另一個係不求上進、得過且過既廢青，你會偏坦邊個？
子華大神講過，最令父母擔心既子女先係最受到父母愛鍚既子女，但係子華大神，唔好意思你今次錯左喇。
我係家中最下位既存在，但係唔緊要，因為當我個妹嫁左出去之後層樓就會歸我。

唔使由明朝不吃不喝做到依家就有層樓入手，你仲想點？我既行為可以媲美劉松仁臥薪嘗膽！
唔好意思，因為平時無乜朋友，無機會同人講野，所以自己一個諗既野比較多。

而同一時間我已經係麥當勞到排緊隊。
10點49分，但係我依家係隊尾，如果排到埋去果陣轉左Menu買唔到扭扭粉的話，我怕返到去要跪玻璃。
又話說，點解會咁多人架，難得既紅日好心你地宅係屋企唔好出街製造空氣污染啦……

我家住灣仔，相信唔小人係去完會展示威又準備去七一遊行，中間係到等時間過。




而我就係無辜地受到波及既人，你地有無諗過我既感受？

為左個爛鬼普選而要我返屋企跪玻璃，值得咩？
身為港豬，我覺得只要香港一日仲係受到中國既統治，你揀邊個做特首都改變唔到啲乜。

既然做乜都改變唔到既，又何必努力？等同於你渣住萬五蚊糧，點都上唔到車買唔到樓既，又何必儲錢？
俗話話再鋒利既刀都有生鏽既一日，留低既係一份心意而唔係一份負擔。

但係作為一個連女都溝唔到既毒能，我既心意可以留比邊個？
倒不如及時行樂？
「師兄你諗野好負面喎。」排我隊後面既人搭訕。

原來我頭先既自言自語全部都唔覺意咁講晒出黎，不過我仲未比全間餐廳既熱血公民圍住黎批鬥，相信我講得並唔算大聲。
「一般啦。」我回答。





作為一個優秀既毒能，我並唔習慣同陌生人講野，頭先果三隻字已經係我一年裡面既quota。
「點解唔諗下點改變呢？」今次仆街鳥，係民主傳教士。

我對傳教士印像頗為負面，要我揀的話我比較鐘意騎乘位。
我回頭一望，傳教士一頭篷鬆既頭髮，身穿恤衫，頸頭鈕無扣但係條頸掛住條無花紋既藍色呔，仲著住一件深藍色既冷衫同淺藍色西裝外套。依身打扮總係唔知係邊到見過咁。
依家八月喎師兄？
「你邊位？」我連下年既quota都用埋，目的係為左令佢知難而退。

「八神太一。」傳教士左手插袋，右手伸出示意想同我握手。
動漫節仲未到，師兄你月頭就發力？
無視傳教士為我最佳選項，豈料轉頭一望，成間麥當奴入面得返既就只有我同太一。

熱血公民班人咁快就閃晒？班左膠呢？海闊天空都未唱！
「你……你係邊個？」





「八神太一。」傳教士非常入戲。
「阿古獸呢？」

「我收埋左係精靈球入面。」
「寵物小精靈既品牌效應已經比任天堂同講故台唔同既作者消耗晒，我勸你……」

正當我想勸傳教士唔好搞低質GAG既時侯，傳教士往地面拋出精靈球。
精靈球著地後射出紅光，紅光散去後出現既係一塊巨型麥當雞。

「亞古獸……」麥當雞發出聲音既同時亦不忘抖動數下，甚為核突。
「點會有咁荒謬既事？」

「香港既社會問題越黎越多，有班人一路不滿既時侯，一路被班禮義廉用蛇齋餅粽暪閉雙眼，結果幫助班欺壓緊自己既人更加欺壓自己，你唔覺得荒謬。」太一慢慢向我步近。
「差唔多成七百億起條未必可以一地兩檢既高鐵，依家仲話要超支，你唔覺得荒謬。」
「話口未完政府又話要拎千四億去起三跑，但係連最基本既空域問題都未搞得掂，就想繞過立法會強行上馬，你唔覺得荒謬。」




「香港有班人為你班free rider爭取民主，然後仲要被你班free rider係到喝倒彩，你唔覺得荒謬。」
「香港有一大班熱心人士，本身都係想改變現狀，但係其中有一班人不斷搞是搞非，令到本身尚算團結既反坑勢力充滿裂痕。上屆立法會選舉，選前A政黨口口聲聲話B政黨唔係民主同路人，一到選後就立即改口話同B政黨有合作空間，仲即刻將槍頭指向C政黨，話C政黨搞死左D政黨。但係選之前鬧得D政黨最犀利既正正係A政黨既自己，但係到今時今日依然有好多人將A政黨當係神咁拜，你唔覺得荒謬。」

點解最後個例子specific咁多既？傳教士其實你好討厭A政黨？
「好喇，依家我出現係你面前，用精靈球召喚左一舊真實身份係巨型麥當雞既亞古獸，你就覺得荒謬喇，真係荒謬。」

唔係喎師兄，你依單野真係幾荒謬呢……
「好，就當你真係八神太一，你想點？」我故作鎮定，但係我既心同地下舊巨型麥樂雞一樣，仲係ぴょんぴょん咁跳緊。
「是咁的，我有個朋友……」太一坐係麥樂雞上面娓娓道來。

「你的朋友……」

「講明先，唔係我。」

「好好，你繼續講。」
「我個朋友，佢想搵個人幫手去一個異世界拎返樣野。」

意圖總算係講左，之但係……
「你朋友係邊個我又唔知，去邊到我又唔知，拎乜野我又唔知。仲有異世界又係邊到黎？迪士尼奇幻世界隔離？」

「你放心，果到無隱形米奇。」

「哈哈哈，好撚好笑。」
「係咪答晒你啲問題你就應承會去？」太一嘆氣道。

「唔係，但係你唔答我一定唔會去。」你都癡線，我去左異世界既邊個買個麥當勞比我個妹食？
忽然，太一啪啪手指，我腳下既地磚忽然變成一個深不見底既洞。
「其實我唔需要問你意見，霸王硬上弓我都OK。」

太一本人並無係我面前出現，但係佢既聲音依然非常之清楚。
「咁你唔一開始就咁樣做？」

說話既時侯我依然向下跌緊，完全無停止既跡象。
「因為我要咨詢下你意見，然後先按我既決定行事。」

「咁同香港政府有咩分別？」

「依家你就有意見？」太一反問。
我討厭政治，唔係因為政治唔關我事，而係無論我做乜野我都改變唔到。
「委託我既朋友叫做小智，你去既異世界係一個由龍所創造既世界，至於佢要你拎返黎既野……我都唔清楚。」

「等等……點解我好似識你個朋友？佢係咪純白鎮出世？」
「純白鎮出世，戴住頂紅白色既帽，永遠都係十歲，養左隻黃色會發電既老鼠？，無錯就係佢。」眼前既太一已經唔再戴護目鏡，而且明顯都長大左，但係佢口中既小智十年如一日。
「咁點解佢唔自己去拎果樣野？」

「因為佢一時大意，佢已經變成一個普通……Well，一個普通唔晒既普通人。」

「咁你又唔去？」

「我去左邊個做數碼暴龍既主角？」

「延左咁耐期你仲好意思講架咩？仲要由季番變左做OVA！」數碼暴龍新一季動畫，本身話2015年頭出，後尾變左做2015年7月，然後仲要變埋OVA，儲唔夠錢就咪學人出動畫啦！
「延半年閒事啦，高登有個故拖左幾年添。」太一毫無羞恥心，仲將自己既錯合理化，同香港警方有得揮。

「等等，結合埋眼前既世界觀，點解我好似知你講緊邊個故……個故唔係爛左尾咩？」

「個故完左喇！」

「又唔開新POST鬼知咩？」

反正依家講故台既故郁D就重開，你唔開無人睇唔好怪人。
「睇你都無晒問題，形式上都要比返你自己揀。」太一問。

「喂等等，我問題仲有好多……」
我一朝早起身比個妹趕落街買早餐，然後被排係隊伍後面既八神太一搭訕，佢仲召喚左隻名叫亞古獸既麥當雞出黎，然後仲游說我去異世界，幫佢個朋友做一個唔知完成條件係乜既任務。
情況非常好理解，好常見啫咁既情況，概率咪同遇到電話騙案差唔多。

荒謬！我根本無見過高登有人開post討論點樣係電話入面玩太一！
「答案係用行動搵出黎，再加上我都唔係好熟果面既世界，對果個世界亦無影響力，總之你就自求多福啦下。」

「你係咪可以再不負責任啲？」

忽然間係我眼前，有一個視窗出現，就好似ironman入面既高科技電腦一樣，可以用手憑空操作。
你要接受任務嗎？

Mission Impossible咩屌你！

┌──────────────────┐

│　　Ａ：開心地接受　　　 　│

│　　Ｂ：閪口閪面地接受　 　│

└──────────────────┘
「點解兩個選擇都一樣既？」

「咪比左你揀，仲想點。」太一貫徹政府既行事風格。
於事我將手放係其中一個選項上面，黑暗既坑洞亦漸漸開始變化……