廢青於中世紀魔法世界的生存法則: 82, 腦殘與燈

翌日。
起床既時侯三葉已經唔係自己既房間，由於無佢既魔法幫助，我只可以死死地氣咁行落山去市中心既澡堂梳洗。出門既時侯，只見到都鐸一個人係花園一個比較隱蔽既位置以龍形態曬太陽……你知唔知若果有其他人見到你的話會引起幾大騷動？
但係我無乜興趣同佢講任何野，所以望左一眼之後就繼續上路。

話時話，癡男無同怨女係埋一齊既？咁快就嗌交？
講返沖涼單野，一般民居屋企都無私家既澡堂，雖然親王邸並唔係一般民居，而且的確係有個私家澡堂，但係由於太殘舊所以已經用唔到。
白石鎮裡面既公眾澡堂就只有兩個，一係係市中心，而另一個就係軍校裡面。

其實都非常合理，軍人即使係夏天都要著齊全套裝甲，一定會出到全身臭汗，若果唔提供方便既澡堂的話，除左士氣問題之外衛生問題同樣會衍生。
至於對普羅大眾黎講，即使係夏天都只會一星期沖兩次涼（呢到一星期得五日），聽菲兒講係冬天甚至只會一星期係周休日沖一次。




雖然我唔係一日需要沖三次涼既靜宜，但係屋企無得沖涼係幾唔方便……我打完丁究竟要去邊到洗手？
路經鐵馬河既時侯，有好多塞豆窿係河裡面唔知係玩水定沖涼，若果我恥力夠的話都可以埋佢地堆順便免費沖埋涼。
甚至打埋丁都仲得喎……嘿嘿……
「早安，嘉穎先生。」眼前有一個熟口熟面但係講唔出名既教徒向我打招呼。

「早晨。」呀，記起喇，佢係三葉大爆炸當日同我吹過兩嘴既教徒，讀唔成醫走左去做律師果個呢。
雖然知道佢背景，但係由於同佢實在係唔熟，所以打完招呼之後我就直行直過。

「請留步。」
「乜原來你係搵我？」我回頭一問，仲以為佢只係想打個招呼。





我都知道無人會主動同我打招呼咁好死，果然係有古怪。
「其實係長老同主教大人搵你……」

屌你老母你兩條hehe死老坑係咪暗戀我姐，日日都要見我！
就係咁，我拎住一堆備用既衫褲鞋襪再次進入熟悉無比既審問之間。
「其實你兩位係咪好得閒？」

進入房間之後我未等任何指示就自己坐左係被審問既位置，然後帶有怨氣地拋低呢一句。
「哈哈，嘉穎先生你真係幽默，你過一過黎。」伯雷主教向我招手，於事我毫無防備地走過去，望出窗外面。




好大既一個窿，本來保養工作做得好過香港大球場既大草地已經滿目瘡痍。

「你覺得我地真係咁得閒？」哦，你發脾氣！
「咁兩位做乜唔落去剷下泥？最多我沖完涼黎幫手，我走先。」

即使對住兩位村入面既領導人物，我既語氣都變得非常囂張，都唔知係邊個教壞我。
「坐好。」

老野用嚴肅既口吻命令我，我唯有聽命。
話說，今次應該係咁多次以黎最少人既一次，就只有我地三個。
「伊曼小姐呢？」

「聽說是送蘭卡特上路。」有咩好送？琴晚仲送唔夠？
蘭卡柒咁要面又柒左咁多次，最適合既做法就係比佢靜靜雞自己走。





我就唔同，就算我開口想要人送都無人會黎送我，蘭卡特恨唔到架喇。
「你可記得『芬席柯娜』？」

「記得，你同菲兒既血統。做乜無啦啦提起。」
「老夫尚有許多瑣事處理，我就長話短說。」

長話短說？根據經驗你一開口就起碼三個鐘先放人架喎！
「『芬席柯娜』乃龍之血脈，不過流到老身這一輩早已經不能被歸類為半龍人。」

溫馨提示，一個人要有16份之1或者更多既龍血先會被當為半龍人。
「我又無問你，你做乜無啦啦自爆？」明明佢之前仲好緊張咁問三葉係咪半龍人，原來佢自己都有龍既血脈；順帶一提，三葉的確唔係半龍人，佢係純龍。
「『芬席柯娜』一脈的特點為跟樹木溝通之能力。而你昨晚與蘭卡特交戰所使用的正是芬席柯娜的能力。」

屌係喎，琴晚打得太High完全唔記得左場戰鬥老野都有份睇。





「請容我一問，『芬席柯娜』既起源係咪森宿？」

「你竟然還知道森宿。」

屌，自爆左添。
「呃呃………」點解釋好？

當初遇到森宿既事被三葉輕鬆帶過左，由始至終都無提過佢。
但若果依家被問起的話，好容易就會提到第一次見到森宿果件事；

同森宿決鬥、拎到森之鐲之類既事我點樣解釋？陣間我講錯野分分鐘連三葉既真正身份都爆埋出黎，到時就真係世界末日。
「拿進來吧。」長老忽然大喊，數秒後兩名士兵便將多日不見既『聖器』拎入黎。

以我既記憶，呢舊野既作用係類似測謊機。
你老母，你唔信我？




「可以繼續了。有關森宿而你又知道的都統統道出。」長老表情無乜明顯變化，但係係我眼中佢就好似屌完人老母都毫無表情，恍若屌人老母本來就係佢天職。
「大家好，我係嘉穎。」求其講啲廢話拖下時間先。

藍燈。
咦？？

「這我們都知道，你就為我倆著想，別浪費時間了。」
「係既係既……好對唔住。」

紅燈。
「雖然一直都知道你係個比較無恥既人，但係估唔到你連道歉都唔係真心……」伯雷係適當既時侯吐槽刷下存在感。
「係咁架啦，好出奇呀？」

藍燈。
「肯特，不如直接用刑迫供。」





「好對唔住！兩位大佬我乜都講，放過小弟！」

藍燈。
「你真係呢……」大主教搖頭嘆氣。

「胡鬧完了，快開始。」
「是咁的，當日生存測試時……」藍燈。

「早於生存測試時嗎……」此時老野拎起羽毛筆抄低我所講既野。
其實生存測試都只係上個星期既事，又有幾早呢？

下？生存測試到依家都係過左一個星期咋？真係時日太快，無知的嘉穎依然係咁無知。

「你怎認識森宿？」

屌你老母頭先咪講緊囉，自己截完人講野然後又催催貢，正八公！
「當時我遇到啲麻煩……」

「拳鼠？」我點頭回應。
「然後就遇到森宿。」藍燈。

嘩屌，呢盞燈都幾廢喎，唔怪得當時三葉笑得咁開心。
「然後呢？」中間點樣遇到森宿既事竟然就咁比我帶過左……

「就負負碌碌咁得到佢既庇佑，救菲兒返黎果陣森宿都有幫到手。」藍燈。
「難怪你地可以打倒一條龍……若果有另一條龍幫助的話並唔係無可能……」伯雷恍然大悟。

Between，其實係兩條龍。
「森宿具體來說給予你怎樣的能力？」

「我點知呀，呢家野好隨佢意同睇佢心情，你都知啦，佢脾氣咁臭……」藍燈。
此話一出就全房靜晒。

我有講錯野咩？
「你竟然還跟他直接對話？」

「我遇到佢我唔同佢講野唔通同棵樹講咩？」藍燈。

「……………」
乜料？