廢青於中世紀魔法世界的生存法則: 79, 有蘭卡特既地方就有花生
「要你久侯。」
番說話係同蘭卡柒講，但係我雙眼集中於係自己既武器之上。
把刀，簡單黎講就係一把偏長偏闊既西瓜刀，完全無特別，但落係浩南哥手上都足以殺生。
問題係我眼前既敵人並唔係東英既四九，所謂一吋長一吋強，蘭卡特把劍既長度係我把武器一倍以上。
「喝－－－」蘭卡特踏步上前搶攻，就同佢上幾次決鬥一樣。
之前三葉講過若果對手係我，呢招足以分勝負。
我不嬲都最聽佢話，佢話我唔掂我就一定唔掂，於事我立即滾開。
「鏘－－」我仲好奇點會有咁響既金屬聲，原來係劍鞘同鞘內既劍碰撞既聲音，蘭卡特無出到鞘。
「咁讓我？」
「刀劍無眼。」
「多謝先。」我無都鐸咁本事，叫佢出盡全力放馬過黎既型棍台詞我無本事講。
但係柒左咁多獲，有機會比你虐菜你都仲留手，就注定左你今日要柒多次既命運。
「Wild hear my call, I am a part of the nature yet the nature is a part of me. Water is my blood, root is my bone and soil is my skin. In the name of Wrathwood, let the wood be my arm!」
我手握埃瘋播出預先儲存好既咒文，然後樹根就從泥土長出，包圍住我隻手同埋部電話，然後形成一個木盾牌。
「你……識魔法？」蘭卡特都幾清楚我既底細，我係異鄉人同埋身上無魔法既野佢統統一清二楚。
「我唔識魔法，但係我用到魔法。」
由於意識到自己既戰鬥能力有幾低，上次見森宿既時侯我求（若果我唔夠人揪隻森之鐲會比人搶走之云云）左佢教我兩招功夫。
呢招就係其中一招，但驟眼睇個盾牌咁肉酸，完全唔似神兵。
莫非我中伏？
「劍……」今次蘭卡特伸出左手，好快又有士兵將自己既佩劍交上。
蘭卡特雙劍型態。
一直以黎佢都係用一劍一盾既方法戰鬥，用雙劍可以話係第一次。
得罪講句，係動漫入面見人地用雙劍好似好型，但係現實中並唔係咁好用。
作為一個行多兩步都嫌攰，打完J當做左運動既廢青，單手拎地拖都已經覺得好吃力，更何況係把金屬劍。
白石軍人用既劍我都拎黎舞過，長度同遮差唔多，本身以為重量都同一把遮差唔多，但係我錯了。
而蘭卡柒就好似十八桐人咁輕輕鬆鬆拎起兩把劍，除左點滿左力量之外我都諗唔到其他解釋。
但另一方面，佢好快，就好似小明咁快！
我尻up左成段野其實現實中相隔一秒都無，蘭卡特口中講出既「劍」言猶於耳，轉眼間……
「地裂閃！」蘭卡特雙手同時垂直揮斬，霸氣十足！
但佢既戰鬥模式同上次完全一樣，都係跳斬→地裂閃……
我舉起木盾檔住，雙劍既劍鞘已陷入木盾之中……
個盾咁流既？連劍鞘都斬得入？
但係另一方面，我隻手完全感受唔到任何衝擊力。
咁樣係咪代表我安全？非也。
大草地既土質已經因為近期多次被蹂躪而變得非常唔穩定，再加上地裂閃本身既效果，結果可想言之。
我趁地面裂開之前揮刀進擊蘭卡特腹部，佢雙劍陷入木盾之中，我睇你點避？
豈料蘭卡特及時將雙劍由鞘中拔出，順勢後退避開我平平無奇既斬擊。
好！
我獲得短暫既安全，但係遠處既蘭卡特只係等待緊地面崩裂然後再追擊，就好似當時打都鐸一樣。
但係我早有準備！
左手上既木盾忽然鬆落跌係地上，然後變成沙土如液體一樣滲入地中。
本來鬆散既泥土都因為忽然長出既樹根而再次變得結實。
因此，我無仆街。
「竟然仲有呢一招，睇黎我唔需要收鞘。」
點解難易度無啦啦又提高左？？
『點算呀森宿大大？』我立即輸入Text message傳送比方丈。
其實頭次戰鬥之中我一直都同佢用msg溝通緊，雖然人地話做正經野要專心唔好玩電話，但若果唔係同佢保持聯絡的話我可能死撚左。
好彩我平時一路打機一路過馬路訓練有素，所以一路同人隻揪一路txt都唔算太吃力。
你唔係以為我會咁叻無啦啦識用新道具下話？
『下一擊中不得。』You don’t say？
「縮土！」與此同時，藤蔓及樹根不斷沿住一條弧型從地面長出，而呢條軌道既起點就係蘭卡特本身所企緊既位置。
『吾已盡力協助，剩下的就靠你自己』
若果蘭卡特真係咁無創意的話……
「Sprite hear my call. To set my enemy on fire!」
我將埃瘋鏡頭瞄準備自己正後方，而鏡頭之中乜野都無。
但係唔會錯！
火球往空地射出，但一秒不夠便已經擊中金屬。
係蘭卡特既雙劍，原本空空如也既位置已經由蘭卡特所取代。
火炎與金屬碰撞之後產生閃燃，稍微阻礙蘭卡特使出下一招既動作……
「獅吼！」
蘭卡特打橫向外劃出被赤紅色劍氣所包圍既雙劍，而劍氣並唔係直線咁簡單，而係好似V型一樣擴散開去，型成兩道火牆。
當然，我已經避開左呢一招，否則我就唔會講得咁輕鬆。
森宿首先用樹根同藤蔓降低蘭卡特縮土既前進速度，三葉講過縮土只係提高身體素質從而做出高眼追唔到既移動，但結論黎講佢都係要用雙腳接近，呢個就係成功拖延時間既原因。
即使係咁，蘭卡特都非常之快，即使慢左依然係肉眼追唔到既高速。
但慢左既少少時間已經足夠改變戰果。
由於觀察過佢上一次既戰鬥，再加上兩個回合蘭卡特既戰鬥方式同之上完全一樣，所以我就確信佢會繞到我身後使出獅吼。
於事我就預判，向空地使出火球術，之後蘭卡特就走入火球既射程範圍再度拖延。
而果一下閃燃就好似閃光彈一樣為我創造左迴避既空檔。
若果唔係森宿幫我拖延時間，我舉起鏡頭既時侯，見到既將會係已經揮緊刀既蘭卡特。
暫時三個回合，雖然蘭卡特明顯處於上風，但我都並唔係單方面地捱打。
四周食緊花生既各位鄉親父老既情緒亦都好似戰況一樣，慢慢燃燒起黎。