廢青於中世紀魔法世界的生存法則: 78, 事不離三

蘭卡特站於火堆旁邊，一輪沉默。

仲以為頭先幫佢熱左身會好小小。
但係我唔怪佢，佢目前既處境唔係一個廿歲出頭既後生仔可以處理到；利申我一定唔得。
「各位弟兄……」

身穿士兵制服既都顯得比較留心，至於一般人方面，普遍係小朋友同後生仔比較留心。
「我明日就會離開白石鎮。」我地全部人都知道。

但係呢個決定背後既動機，我仲未係好明。




情傷？
其實我係唔應該咁留心，老老實實蘭卡柒走唔走對我實在無關痛癢。

但係因為任務在身，我必需留心。
留心搵一個插入既機會。
「係你地眼中我可能係一個出生好、事業得意，樣樣都一帆風順既人。」

乜你唔係咩？你要唔要試下同我交換身份生存？
「事實上我係個失敗者，我離開出生地阿斯咸並唔係為左修練，而係因為我既家族唔需要兩個繼承人。」溫馨提示，阿斯咸係大公國南部既一個郡……喂等等，呢個故事我係咪聽過？
我唔想又聽三個鐘呀，為左各位著想我一定要挺身而出！





係我想起身既時侯，主人命令：「坐定，由佢講。」
「…………」大家睇左個故咁耐應該都好清楚係佢面前我係無發言權。
「剛黎到白石鎮既時侯，我係一個失敗者。」

離開既時侯你都係。
「但係係白石鎮既十幾年，我學左好多野，多謝肯特長老及伯雷主教既指導。」說畢後蘭卡特向兩人鞠躬，平時個鼻生係額頭既蘭卡特對呢兩條老坑零零舍舍有敬意。
「我本來以為生存係理所當然，方舟教既教義只係方便皇族統治既工具。」

好大既狗膽，恃住自己Last day係到亂咁講野……各位打工仔千祈唔好學。




「但係經歷左果場龍禍之後我先知道生命有幾脆弱，當時照顧我既一家幾乎全滅……此後我就開始認真習武。」

「又入你數喎。」我低聲道。

「罪魁禍首有兩個。」推卸責任又係另一種職場上唔要得既行為。

因為他人有過錯並唔會減低你自己既錯失。而係現實上推卸責任一發生最終會變成互揭瘡疤既罵戰。
「我比其他人花費更多時間去練習，比其他人更忠於自己既職守，十四歲既我已經自願參加生存測試……但係係其他人眼中，我只係一個貴族，佢地唔會關心我背後付出左幾多！」

「喂……佢講啲野越黎越侮氣，我可以阻止佢未？」

「比佢講多兩句先啦。」
係任何世界都好，唔識公關技巧真係仲慘過食兩舊屎，若果你待人接物唔好咁串或者都唔會搞到自己咁神憎鬼厭。

而當其他人開始對你有壞印像既時侯，無論你做左幾多好野都會被選擇性忽略，甚至解讀成為壞事。




外向會變做煩膠、內向會變做扮野、勤力會變做搏出位、懶會比人鄙視……

真係講講下我都眼濕濕。
「但係慢慢我既鬥志就係咁既日常之中消減，我慢慢忘記左當初既鬥志，或者係白石鎮安安份份過埋下半世或者都唔錯……」蘭生講到呢到又望左眼菲兒，菲兒此刻認真聽緊。

但係說話背後既心意，佢永遠唔會知道。
「直至最近，果鼓對變強既渴望先慢慢燃燒！」

「結果都係因為你兩兄妹。」

「原來佢真係被虐狂。」少女似乎不感興趣。
「因為我唔夠強，所以先要被人奚落！」蘭卡特越講越激動。

「乜佢真正被奚落既原因唔係自己先撩者賤？」我問。





「一個人就算佢再囂張，若果有相應既能力支持住，其他人亦都無辦法奚落佢，好似我咁。」

三葉即席就示範一下自己可以有幾囂張，果然係一個講得出做得到既人。
「唔夠勁又囂張既解決方法有兩個，一係收埋把口，一係變強。」蘭卡特講完上一句之後停頓左，所以三葉有時間講下佢自己既見解。
「前者係最簡單最易既方法，但係一旦選擇左呢條路，以後一世都要沉默，因為選擇沉默既同時亦意味承認自己係弱者。」三葉回復正座姿勢。
「醉完？」

「後者唔係一條簡單既道路，而且付出並不代表回報……但一旦達到果種境地，所獲得既已經唔單止係囂張既權利咁簡單。」
從佢既說話就睇得出此刻三葉已經清醒無比。
「我要你地後悔！我要你地因為睇唔起我而後悔！我要你地因為今日比我離開而後悔！」

「祝你武運倡隆。」三葉低聲道。

蘭卡特稍稍停頓後，深呼吸鼓起勇氣說道：「我要雪菲兒你因為無選擇到我而後悔！！」
「矣？」菲兒意外地驚叫一聲，失神數秒後慢慢用手掩口。





似乎佢終於意識到自己一直以黎忽略左啲乜野。
之前同菲兒相處咁耐，雖然佢偶然都會提起蘭卡特，但係通常都係同埋其他村入面既人一齊講。

但係係蘭卡特眼中，菲兒係獨一無二既存在。
菲兒你真係一個罪孽深重既女人。

就算此刻你流淚，都已經太遲……
都鐸聞言立即衝出火堆旁邊，而三葉已經預料到呢個情況會發生，剛才一句武運倡隆就已經表達左呢種意思。
我截住都鐸：「菲兒需要你，呢口氣我幫你出。」

係我講左句絕無僅有既型棍台詞之後，都鐸瞬間被我說服（菲兒重要性高於全世界）。
此刻我同蘭卡特各站於火堆兩側。
「雖然今日美其名係你既送別會，但唔係個個都想聽你講咁多野。你知唔知道猛咁講自己既過去、自己既諗法既人我地有咩稱呼？叫做自意識過盛。」
「輪唔到你呢個異鄉人黎教訓我。」





蘭卡特一定係抱住被都鐸屌打既覺悟將頭先番說話講出黎，但係竟然被條廢柴阻止左，似乎出於佢所料。
「念在你當初都算教導過我野外求生技巧，今日臨別秋波我就教返你一樣野。」

「憑你可以教我乜野？」

「自我檢討既重要性。蘭卡特我要同你決鬥。」
「劍。」蘭卡特伸出手，然後其中一名士兵就將自己既佩劍拋過去，正好落於蘭卡特手上。

我就無咁好待遇，亦都無佢咁好身手郁都唔郁就捉得實把劍。
「師兄介唔介意借把劍黎用下？」我要行去另一名士兵到問，佢立即就回絕。

「拎去用。」豈料馬上就有人拔刀相助。
係洛修。
「唔該晒師兄。」

「拜託你。」洛修拍一拍我肩頭之後就走回人群之中。
記憶中洛修使用既武器係長矛，把刀似乎唔係屬於佢。
借完武器之後回到火堆旁邊，蘭卡特已經擺晒Pose等緊我。