不知不覺愛上你: 17. 忘記

今日要去旺角開會, 開完會差唔多一點經過朗豪坊就入去搵嘢食.  平時好少嚟旺角, 好彩同事識路先搵到好嘢食.  我之前少咗做 gym, 覺得自己肥咗少少, 要努力操返 fit 啲先得喇.

食完嘢準備返中環 office, 同事話佢老婆叫佢去睇吓啲唔知咩英文教材, 在朗豪坊有得賣, 我心諗唔怪得知話嚟朗豪坊食嘢啦!  又用工作時間做私人嘢, 最憎呢啲人!

佢又話我一定要等埋佢, 等公司唔知佢出咗去做私人嘢, 搞到我要周圍行等佢.

"...上次同你食四川嘢之後肚痛痛到而家...我唔理你下次一定要請我飲酒..." --- Vivian Lam

"...我係唔會請女仔飲酒㗎...你問咗咁多次你悶唔悶㗎?..." 我 whatsapp 覆返佢.





"...我唔信!...你唔想請都搵個好啲嘅藉口啦..." --- Vivian Lam

"...我今晚想食四川嘢, 你嚟唔嚟?..." --- 維他奶

"...Fxxk U..." --- Vivian Lam

最後等咗個幾鐘我同事終於落嚟, 佢話嗰套英文教材好好, 但係要五萬幾六萬, 雖然個 sales 好靚好有說服力, 但係應該唔會買.

我突然諗起啲嘢.  Charlotte 之前好似講過佢公司係賣英語教材, 話要五萬幾六萬, office 又係在朗豪坊, 唔通我同事頭先就係同佢講嘢? 





諗一諗笑一笑, 再諗諗今晚食四川嘢, 冇咩感覺跟住就搭車返公司.  可能我已經開始忘記 Charlotte, 就算去到佢公司附近都唔會特別諗起佢, 可能係, 應該係, 唔知係唔係.

這次喺我第一次 "忘記" Charlotte.