不知不覺愛上你: 1. 認識

今日如常開收音機聽迪偉嘅節目.  本來好眼瞓, 但係突然間聽到今晚個女嘉賓把聲好好聽, 所以即刻成個人醒哂.
佢唔只把聲好聽, 講嘢都好有吸引力, 又唔會悶場, 又唔港女, 連迪偉都話佢又靚又吸引.  越聽越覺得好奇怪, 個女仔咁得點會無男朋友呀?  嘩! 普通話同英文都咁流利, 係唔係迪偉搵自己個 friend 上去推高收聽率呀? 

"...點解咁耐都未有人打電話嚟㗎?  留言冇用㗎你要打嚟先得㗎..."  迪偉開始扯火.

最後有七個男仔打電話上去想識佢, 七個都比佢拒絕哂!

如果我有個咁得嘅女朋友就好喇!  點解我遇唔到啲咁得嘅女仔㗎呢?  自從八年前同之前女朋友分手後我都未搵到一個我真心鍾意嘅女仔, 只係有時會去 happy hour 撩吓女仔, 間中會試吓 one night stand, 可能係我未有勇氣真正去再愛另一個人.  我啲朋友經常話唔鍾意都食住先, 但係我始終都未再搵到一個使我有勇氣去愛嘅人.

聽完節目之後, 正準備瞓覺關掉收音機時, 打開咗 Facebook 睇睇有冇特別, 在 News Feed 突然睇到一幅靚女嘅相, 完來係迪偉嘅節目 Facebook page update.  嗰幅相勁多人討論 (比平時起碼多兩倍), 大部分都係啲男仔想認識個靚女.  再仔細睇, 發覺有個女仔答返嗰啲男仔嘅問題.  因為太累, 所以我冇睇哂就關機瞓覺.





嗰晚瞓得好好. 啲人話睇完靚女會瞓得好啲係真嘅!  雖然只係一幅相, 但係已經足夠帶比我一個甜蜜嘅美夢.

這次喺我第一次 "認識" Charlotte.