(無甜)上天給我的一個玩笑 (新增外傳): (26)

係往後嘅日子，我地兩個沒有好似其他嘅情侶一樣，放假就出去行街睇戲食飯，而係經常一齊出去自修室又或者留係學校溫書溫到夜一夜，呢兩個地方成為我地拍拖相處嘅地方，有時我亦都受到伯母嘅邀請上去啊螢屋企食飯…係其他人眼中可能覺得我地經常唔出去玩，正留係呢兩個地方溫書溫書同溫書，一啲都唔似其他情侶嘅相處方法，但係人地點睇我唔介意，只要我地兩個覺得開心，我地又洗乜介意人地點諗，直到有一日我同屋企人食飯…
 
「喂，衰仔，做咩呢排成日唔返黎食飯呀」老媽啤住我
 
「溫書溫到夜咪食埋先返囉」
 
「我早兩日見到你同個女仔一齊喎」唔係掛咁都見到
 
「同人地一齊溫書呀麻，我有講架喎，你無聽啫…」老媽成日煲劇煲到我同佢講乜都聽唔到
 




「係咪你女朋友黎架」老豆突然奸笑
 
「係…」我如常回答
 
「哈哈哈哈哈哈哈」我老豆突然大笑起黎「我都話我地個仔拍拖架啦，呢一個星期我唔洗洗碗嚕」
 
「死仔做咩收收埋埋唔話比啊媽知呀」我老媽同老豆對賭輸左好嬲…「聽日帶人地上黎食飯介紹下」不過睇佢個樣又好期待我帶啊螢上黎食飯
 
「好呀」
 




就係咁我就要帶啊螢上黎見家長
 
我打電話比啊螢
 
「喂」
 
「喂啊螢呀，我啊爸啊媽想聽日請你過黎食飯呀…你聽晚有無野做呀…」
 
「我聽晚無野做呀，好呀，咁我地係唔係啫係見家長…」啊螢又開始怕醜
 




「哈，係呀，唔洗驚，我係到，我啊爸啊媽無咩野架，我啊媽仲好似好期待你上黎咁，我地聽日去完自修室之後就去買啲飲品上黎啦」
 
「好呀，咁聽日見」
 
「聽日見」
 
就係咁…我帶左啊螢上左黎食飯
 
「媽，我返黎啦」
 
「黎左啦，等我睇過我個衰仔追到個咩女仔返黎」老媽抹住手咁行出黎「嘩，幾靚女喎衰仔」老媽兩眼發光
 
「伯母你好呀，我叫啊螢呀」啊螢點一點頭
 
「叫乜鬼伯母呀，咁生保，跟我個衰仔一樣叫啊媽啦」老媽當正啊螢係我老婆咁




 
「係嘅啊媽」啊螢笑一笑「洗唔洗我入黎幫手呀」
 
「唔洗唔洗，你坐下先啦，好快有得食」老媽越講越興奮…
 
呢個時候老豆都係廁所行左出黎「返黎啦啊仔」
 
「世伯你好，我叫啊螢呀」啊螢又點一點頭
 
「叫咩世伯呀，叫啊爸先岩」老豆同老媽都係一擔擔…
 
「啊爸」啊螢又肯聽佢地講
 
「乖，哈哈」我老豆係到傻笑「叫得真好聽，未來新抱仔」
 




講到呢到，啊螢就面紅啦…
 
「老豆，玩夠啦」我示意老豆唔好再玩佢
 
「邊個同你玩呀，你個死仔好好咁對人呀，唔係我丙你架」
 
「係…」啊螢一黎到，老豆老媽都認定佢係我老婆
 
過左無耐就開飯啦，老媽好熱情咁夾左好多野食比啊螢，而我…食塵就有份…
 
「媽呀，你夾咁多野比佢食，佢食唔哂架」
 
「衰仔收聲」老媽怒啤我，我做錯咩事呀…
 
「你睇下人地咁瘦，係咪你無比飽飯人地食呀」老媽都係一路咁夾野比啊螢食…




 
「啊媽呀，我真係食唔落咁多架，我開始飽啦」啊螢都開始食飽
 
「拿啊女，我話你知呀，如果個衰仔蝦你呢，你記得同我地講，我地會丙佢架」老豆都開始加把口
 
「知道」啊螢望住我「佢對我好好呀，暫時~~~」
 
係呢晚，老媽一直都好熱情咁同啊螢傾計，而啊螢亦都好樂意咁陪佢…而老豆就係到旁聽…而我就變左茶水仔…