(無甜)上天給我的一個玩笑 (新增外傳): (25)

正所謂三個女人一個噓，一個男人ON居居
 
成餐飯我都係呆左係到聽佢地三母女傾計，講下邊到買咩野平呀，邊隻化妝品好用呀…我全部都搭唔上嘴…
 
熱熱鬧鬧咁就食完呢一餐飯…我就返左屋企
 
果然不出我所料…啊軒真係將佢偷影我同啊螢張相放上FACEBOOK，仲有好多人比LIKE同留言…我真係好懷疑佢地係跟蹤我…有乜理由啲時機準成咁…
 
不過我其實沉醉左係張相到，我係到幻想幾時到我可以同啊螢有自己嘅小朋友
 




第二日…
 
班房又要起哄啦…
 
我同啊螢如常返學…一去到小息個陣，班房啲人就起哄啦…突然個個都好好戲劇細胞…
 
我都唔描述啦…太噁心啦
 
就係咁…我日日都好似比呢班痴左線嘅人係我身邊氹氹轉…不過咩都無所謂啦，只要啊螢係我身邊就足夠
 




直到某一日放學之後
 
我同啊螢就去左海邊行下吹下風拍下拖
 
「啊風呀，你記唔記我地同盈盈比人偷影個張相呀?」
 
「緊係記得啦，做咩呀」
 
「如果將來我地都可以帶自己嘅仔女出街玩就好啦」
 




「一定有咁嘅機會嘅傻女」我拍一拍佢個頭「我地拍拖無幾耐你就咁快想同我生細路啦?」我奸笑
 
「哼，邊個話呀」啊螢鼓起塊面「幻想下將來唔得咩」
 
「得，我自己都好想有咁嘅一日」我望向個天
 
「咁就要睇你造化啦，嘻嘻」整個鬼臉後啊螢鬆開我隻手就向前跑
 
「喂你咪走呀」我都起步去追佢
 
跑左一段路後我就抱起左佢
 
「呢世你都走唔甩架啦」
 
「你話呀?」啊螢唔服氣




 
「係架，你而家係我嘅人，我唔會比你走架」我緊扣啊螢隻手「我拖得你手我就唔會放手」
 
我講完呢句之後，啊螢就即刻笑起黎，仲笑得好甜
 
「邊個話我係你嘅人呀?」啊螢都仲係唔服氣「同埋你激少我一陣當幫忙啦」
 
「係係係」我面對住佢「你話點就點啦，老婆大人」
 
「唔準叫老婆，叫到我老哂」
 
「係係係，我嘅皇后」我拖住啊螢係呢條海邊到漫步
 
行下行下就行左去我同啊螢行左去我地上次聖誕節食糖水個間舖頭
 




「不如入去食野啦」啊螢望住餐牌上面嘅糖水
 
「好呀，但你又會唔會揀唔到食咩架」我不忘窒佢
 
「你揀比我咪得囉，老公仔」啊螢捏我一下
 
「兩位食咩呀」一名伙計行埋黎
 
我見到餐牌上有一個叫「甜蜜蜜情侶套餐」
 
「就要呢個套餐啦」我指住牌上
 
「好你等等」
 
啊螢突然拎手機出黎唔知係到睇緊啲咩，仲笑得好開心，好奇嘅我當然係到八卦一下啦




 
「睇緊咩呀你」我係到望佢手機
 
「無，睇緊盈盈啲相啫」佢放平手機同我一齊睇
 
「如果第日生出黎個個係女你話幾好，可以比我扮靚，陪我出街」佢一路講一路沉醉係自己嘅幻想入面「不過到第日到佢大個個陣又要嫁人…而家正係諗下都唔捨得」
 
「傻女黎嘅，佢嫁左人仲有我呀麻」我拍一拍佢
 
「...又岩」佢笑一笑「我唔理架，你頭先話拖得我就唔會放開我架，呢個承諾一世架」
 
「緊係啦，我唔會輕易許下承諾，但一旦許下承諾我就會實行到底」我拍住心口咁講
 
「信住你先啦」啊螢露出佢嘅奸樣
 




「套餐到」野食都拎到黎啦
 
我同啊螢都互相餵大家食糖水，我就好小心咁餵佢食，佢就整我到一口都係糖水…
 
「你整蠱我呀?」我指住面上嘅糖水
 
「唔得咩」佢又伸出佢條脷