金庸今年出食譜？: 三

我拿拿臨去街市買左兩斤瀨尿蝦同兩打雞蛋。

我抽住兩袋野急急腳走翻屋企，點知有隻「舂瘟雞」唔帶眼睇路一野撞過黎，好彩無撞跌我d雞蛋，正當我想開聲責難，但被佢搶先一步。

「喂，你有無搞錯呀，行路唔帶眼架！」佢大聲夾惡，「撞到人對唔住都無聲！」

「小姐，明明係你撞埋黎我度，應該係你同我道歉。」我亦不甘示弱。

「咩話？我撞你？姐係咁，我而家趕時間就係度同你嘈，你係男人黎，俾翻d風度講句對唔住我地當無數。」





「你都癡線既！係你唔岩但要我講對唔住，你無野下話？」

「你男人老狗道個歉都扭扭擰擰，真係好羞家囖。」條女黑口黑面，「我真係唔費事同你呢d人嘈，曬我時間，係咁先！」

講完佢就急急腳走人，而我細細聲講左句：「正港女！」

「你頭先話我咩話？」佢聽到我話佢，然後翻轉頭過黎算賬。

「我講事實姐。」





「原本我想息事寧人、既往不咎，但而家我改變主意，決定留係度同你講掂單野佢。」佢睜大眼怒睥我。

「好呀！」

就係咁，我地一個爛佬，一個潑婦，響條街度嘈左半粒鐘，仲差d打起上黎，最後要等到警察黎調停先平息件事。

我發誓唔好比我再見到呢條八婆，如果唔係我肯定用寒冰綿掌打到佢落地獄。

翻到屋企我老母已經煮好曬飯，佢問：「你頭先去左邊呀？又話今晚加餸既？」





「唉，唔好提啦，買左d餸留翻聽晚啦。」

翌日。

放左學我立刻翻屋企研製瀨尿蝦球炒雙蛋黃，結果兩打蛋入面全部得一個蛋黃，如是者接下來一個禮拜，我足足買左十幾打蛋十幾斤瀨尿蝦，幾乎洗曬我d僅餘既小小積儲，而且每日放學都仆翻黎炒蛋。

試完又試，終於。

終於！！！俾我買到雙蛋黃既雞蛋，跟住我仔細認真謹慎地逐一將瀨尿蝦既肉挑出黎，加上麵粉搓成球，倒油落鑊，連雞蛋一起炒，數分鐘後一道蝦仁炒蛋正式完成！

我懷著興奮心情打開果本金庸食譜，召喚出韋一笑，然後我大叫一聲：「寒冰綿掌！」

果然，韋一笑巴掌一出，一道藍色掌印順勢飛出，情景極似電視電影出現既特技效果。

「Yeah！」我開心得大嗌，「我得左啦！哈哈！」





食譜上，呢味蝦仁炒蛋既難度係數係5，剛剛好屬中級程度，菜餚越繁複招式越犀利，咁理論上寒冰綿掌應該屬於中等威力。

不過實際上威力去到邊都係要同人打過先知。

只但係貿貿然去邊度搵對手呢？