千禧港女神探（一）春風化雨殺人事件: 第卅四話　反客為主

第卅四話　反客為主

葉雨晴說：「兇手自稱係Tina嘅守護天使，今次殺人行動明顯係為咗報仇。」

葉雨虹說：「兇手就係掌握咗Kenneth同Jeffery輪姦Tina嘅證據而威脅佢哋殺人？」

葉雨晴說：「無錯，至於證據係乜嘢就唔太清楚。」

葉雨虹說：「至少佢哋確定同兇手決裂，咁Edward就有機會洗脫嫌疑。」





葉雨晴說：「睇來家姐妳都好關心怕醜仔喎！係咪對佢有意思呢？」

葉雨虹說：「妳唔好亂講，我只當佢係好朋友，無打算同佢發展。」

葉雨晴說：「唉！咁就真係襄王有心，神女無夢。」

葉雨虹說：「唔好講呢啲住，如果兇手真係為咗幫Tina報仇，咁令佢毀容嘅人都可能會有危險。」

葉雨晴說：「係咩？原來仲有咁多內情，講來聽吓Tina點樣毀容。」





於是，葉雨虹就將4A班化學實驗室意外那件事告訴葉雨晴。

葉雨晴說：「咁唔怪之得兇手要嫁禍俾妳同Edward啦！」

葉雨虹說：「至於妳個新同學Pluto，就真係唔好彩受到牽連。」

葉雨晴說：「照妳咁講，Miss Man應該都係兇手嘅目標之一。」

葉雨虹說：「理論上係，不過佢已經無喺CFY教書，兇手無機會報仇。」





葉雨晴說：「唔係喎！來緊學校35週年校慶，Miss Man話曬做咗咁多年，話唔定會返來。」

葉雨虹說：「係喎！我一時醒唔起，我要提醒佢有危險，叫佢唔好返來。」

葉雨晴說：「家姐妳想兇手逍遙法外？妳想怕醜仔坐冤獄？」

葉雨虹說：「當然唔想啦！咁我應該點做？」

葉雨晴說：「妳唔單止唔好阻止佢返來，仲要主動邀請佢返來。」

葉雨虹說：「咁咪即係搵Miss Man來做餌引兇手出來？」

葉雨晴說：「無錯，唔用呢個方法引兇手犯錯，就唔夠證據釘死佢。」

葉雨虹說：「萬一Miss Man有危險點算？邊個負責保護佢？」





葉雨晴說：「梗係由我負責，唔好唔記得我係學界泰拳金腰帶。」

葉雨虹說：「我對妳有信心，就咁決定。」

第二天，回到學校，在5A班課室中，班主任布思哲派發35週年校慶的通告。

布思哲說：「來緊星期日，學校禮堂將會舉行35週年校慶暨開放日，到時歡迎家長前來參觀。

除咗喺禮堂會有關於CFY嘅資料，每個學會都會準備攤位，務求吸引高質素嘅學生入讀。」

何四悅說：「唔係掛！CFY話曬都係大埔區Band 1喎！使唔使好似Band 3咁宣傳？」

布思哲說：「妳估大埔區無其他Band 1咩？家長唔一定揀CFY㗎！





更何況香港嘅出生率不斷下跌，就算係Band 1都要居安思危，爭取多啲好學生。」

林嘉慧說：「老師眼中嘅好學生，只不過係讀到書，其他方面才能就不值一提。」

布思哲說：「又未至於，CFY都有參加唔少校際活動，只不過焦點都係學業成績同大學入學率。」

葉雨虹說：「咁我哋係咪都要出席？有無事需要幫手？」

布思哲說：「Rainbow果然係模範生，嗰日理論上只有負責攤位嘅學會幹事需要出席。

不過，參觀嘅家長可能有好多，學校都需要高年班學生幫手招待賓客同維持秩序。」

謝隆恩說：「中六學生要準備考公開試，唔使問高年班係指我哋中五學生。」

布思哲說：「無錯，特別係5A班班會幹事同埋風紀，你哋一向熱心服務大家。」





張宇傑說：「咁到時唔知會唔會有畢業校友返來探吓老師呢？」

布思哲說：「根據過往經驗，都有唔少校友會出席，佢哋出來做嘢之後變化都唔少。」

徐梓俊說：「咁離職老師呢？佢哋又會唔會返來探吓同事呀？」

布思哲說：「呢個機會就比較微，轉咗工作之後，一般都唔會返來。」

葉雨虹說：「咁真係好可惜，有啲老師我都好想見吓，同佢聚吓舊。」

布思哲說：「妳係指邊個老師？例如呢？」

葉雨虹說：「例如舊年因為一次實驗室意外要負責，而要『被辭職』嘅Miss Man。」





布思哲說：「的確係好可惜，我同佢唔熟，唔太清楚佢會唔會返來。」

謝隆恩說：「Rainbow妳人緣咁好，妳想嘅話，總有方法請到佢返來。」

林嘉慧說：「咪就係囉！妳人脈咁廣，話唔定有唔少老師嘅電話。」

何四悅說：「到時又可以同佢吹吓水，影吓相。」

葉雨虹說：「咁呢個重要嘅任務就交俾我啦！」