千禧港女神探（一）春風化雨殺人事件: 第十三話　揪出疑兇

第十三話　揪出疑兇

趙芷芳說：「可能當時古偉達已經死咗，梗係無應妳。」

江潔梅說：「咁都有道理，照計無理由我鎖門之後佢入到去。」

趙芷芳說：「除咗妳有鎖匙之外仲有無後備鎖匙？」

江潔梅說：「校務處有後備鎖匙，不過都好少用。」





趙芷芳說：「雖然呢種鎖好舊，可能有其他方法開到，但係並未發現有破壞過嘅痕跡。」

江潔梅說：「係呀！我淨係叫誠叔幫手踢開廁格，廁所嘅門鎖應該無爛到。」

趙芷芳說：「兇手可能入去殺完人之後，趕係5:00之前出來。妳諗吓當時有無遇見咩人？」

江潔梅說：「我記得喇！我喺走廊見到一個短頭髮嘅女仔，不過就好生面口。」

趙芷芳說：「好生面口？妳嘅意思係話佢係外來嘅訪客？」





江潔梅說：「梗係唔會，佢着住我哋嘅校服。一定唔會係外人，話唔定係新學生。」

趙芷芳說：「妳係想講佢係中一學生？」

江潔梅說：「雖然我睇得唔太清楚，但係佢點睇都唔似中一，話唔定係插班生。」

趙芷芳說：「唔該曬妳，妳可以先走，跟住有請誠叔。」

江潔梅離開會客室，換區貴誠進來。





區貴誠說：「Madam妳好！我叫區貴誠，係學校嘅校工。有乜嘢可以幫到妳？」

趙芷芳說：「唔使客氣，請你講吓今朝你係點樣發現屍體。」

區貴誠說：「今朝8:00左右，我收到校務處通知，話四樓男廁有廁格反鎖，想我幫手開。」

趙芷芳說：「你去到現場發現乜嘢？」

區貴誠說：「我踢開廁格度門，就見到一個高大嘅男學生嘔白泡，仲喺度屙緊屎。」

趙芷芳說：「你認得出死者係邊個嘛？」

區貴誠說：「好熟口面，肯定係舊學生，不過唔知道佢叫咩名。」

趙芷芳說：「你都係負責四樓嘅清潔工作？」





區貴誠說：「唔係，四樓或以上係由梅姐負責，三樓或以下係由我負責。」

趙芷芳說：「咁琴日下晝5:00前，你有無見到可疑人物或者外人上四樓？」

區貴誠說：「學校又無請外校導師來教課後班，真係唔見有。」

趙芷芳說：「唔該曬你，你可以先走，之後有請蔡Sir。」

區貴誠離開會客室，換蔡智勇進來。

蔡智勇說：「Madam妳有乜嘢要問我呢？」

趙芷芳說：「學校中二或以上，今年有無插班生？」





蔡智勇說：「點解咁問呢？同今次單案有關？」

趙芷芳說：「根據梅姐嘅口供，有一個短髮女學生喺琴日下晝5:00前出現喺四樓走廊。」

蔡智勇說：「當時我都喺四樓，負責監察留堂班。臨落堂之前，的確好似有個女仔話要去廁所。」

趙芷芳說：「咁妳記唔記得係邊個？」

蔡智勇說：「每日留堂嘅學生都唔同，我又未教過佢，要睇返點名紙先至記得。」

趙芷芳說：「呢個女仔好有可能就係兇手，咁我等你去睇點名紙。」

蔡智勇離開會客室，在電腦中翻查昨日的留堂名單，還有學生資料的個人相片。

昨日留堂班的印象浮現，他終於記得那名女學生的相貌，並找到她的姓名，跟着回到會客室。





蔡智勇說：「嗰個女仔係3D班嘅孫葡萄，佢同死者古偉達上個月有些少衝突。」

趙芷芳說：「究竟係乜嘢衝突？呢個會唔會就係殺人動機？」

蔡智勇說：「詳細情形唔太清楚，妳最好自己問佢。我只知道佢嘅好朋友葉雨晴為咗幫佢出頭，

就喺有蓋操場同古偉達打交，跟住仲俾同學將成個過程擺咗上 testtube.com。」

趙芷芳說：「咁結果邊個打贏呀？」

蔡智勇說：「好似係古偉達打贏，不過葉雨晴唔肯認輸，結果體育科朱Sir出面調停。」

趙芷芳說：「咁孫葡萄極有可能為咗報答朋友而殺死古偉達，殺人動機成立。」





蔡智勇說：「不過，佢同葉雨晴琴日罰留堂係臨時決定，而古偉達要去廁所亦只係突發。」

趙芷芳說：「無錯，如果係臨時動殺機，就應該用武器，而唔係毒藥。」

蔡智勇說：「唔可能用武器，孫葡萄親眼見過古偉達有幾好打，用武力殺人根本無把握。」

趙芷芳說：「不過，最好都係問返當時人先至最清楚。你去幫我叫孫葡萄來，我要同佢落口供。」

於是，蔡智勇就離開會室客，去3D班的課室叫孫葡萄來校務處。