千禧港女神探（一）春風化雨殺人事件: 第六話　拜祭同學

第六話　拜祭同學

放學後，在5A班課室門前，葉雨虹突然截住了黎國光。

葉雨虹說：「今個星期六你有無嘢做？」

黎國光登時心跳加速，難道是女神主動邀約自己？

黎國光說：「無呀？有乜嘢事呀？」





葉雨虹說：「星期六係麥劍蘭嘅生日，我想同你一齊去拜祭佢。」

黎國光說：「Tina⋯⋯都係我唔好，間接害死咗佢。」

葉雨虹說：「今年五月尾發生嗰件事係意外，大家都唔想，你唔使咁自責。」

黎國光說：「無錯，嗰件事對佢的確好大打擊，不過都無諗過佢會睇唔開。」

葉雨虹說：「我哋無乜嘢可以為佢做，唯有去拜祭一吓佢。」





黎國光說：「咁使唔使叫埋其他同學一齊去？」

葉雨虹說：「你講Victor佢哋？都係算把啦！」

黎國光說：「咁好啦！星期六上晝8:00小圓邨73號巴士站等。」

星期六大約上午10:00，兩人來到和合石靈灰安置所，去到麥劍蘭的靈灰龕位。

葉雨虹帶備了拜祭用的白菊花，黎國光也帶備了拜祭用的白百合。





豈料靈灰龕位上已經插了一支粉紅色的劍蘭，看樣子是剛插上去不久的。

黎國光說：「拜祭點會用粉紅色劍蘭㗎！好彩唔係鮮紅色，係就大吉利是。」

葉雨虹說：「估唔到仲有人早到過我哋，係邊個咁有心呢？」

黎國光說：「咁Tina有屋企人㗎嘛！」

葉雨虹說：「據我所知，佢係獨女，而且同父母關係唔算太好。」

黎國光說：「咁會唔會係Miss Man呀？就係嗰件事令佢無得喺CFY教落去。」

葉雨虹說：「或者係啦！點都唔會係Victor佢哋囉！」

就在兩人為麥劍蘭清理靈灰龕位和插上鮮花時，有一人前來拜祭，並聽到兩人的對話內容。





黎國光說：「咦？一講曹操，曹操就到。」

葉雨虹說：「Miss Man真係好有心，估唔到離開學校，都仲記得Tina生日。」

文麗卿說：「都係怪我一時疏忽，只留意到眼前實驗枱枱面燒着，無留意到後面發生嘅事。」

葉雨虹說：「當時成班男同學圍住我，妳睇唔到後面都好正常。」

黎國光說：「都係怪我夾得個flask唔實，令到佢係燒緊嗰陣跌落實驗枱枱面，

之後再反彈向妳嗰度。我為咗救妳，一手將個flask向上撥開，就唔知飛咗去邊度。」

文麗卿說：「個flask入面嘅ether倒到成張實驗枱都係，之就枱面就係咁燒。





我見咁大火就即刻整濕條毛巾，撲熄啲火，其實枱面用防火板造，根本唔容易燒着。」

葉雨虹說：「跟住Victor佢哋幾個走埋來，圍住我係咁問我有無事，無留意到有人喺度尖叫。」

黎國光說：「可能Tina本身把聲太沙太沉，就算係尖叫都唔大聲得去邊。」

文麗卿說：「就係咁樣，過咗大約五分鐘之後，大家先至發現個flask飛咗上Tina衫領嗰度。

原本大家做實驗都有着實驗袍同戴眼罩，但係無預到保護頸部同面部。」

葉雨虹說：「就係咁，當然嚇到尖叫嘅Tina，條頸同埋塊面足足燒咗五分鐘。」

黎國光說：「件事係因我而起，我發現佢着火之後，都即刻整濕條毛巾去撲火。」

文麗卿說：「可惜嘅係，佢條項同埋塊已經嚴重燒傷，唯有送佢去醫院急症室。」





葉雨虹說：「經過醫生診斷後，證實係三級燒傷，傷及真皮下脂肪組織同肌肉。」

黎國光說：「一個少女，就因為我輕輕一撥，而變成毀容，需要接受植皮手術。」

文麗卿說：「而我身為4A班化學科老師兼科主任，要對呢件事負上全責。

校方顧念我多年為學校服務，唔忍心毀我前程，批准我自願辭職。」

黎國光說：「咁Miss Man妳依家搵到嘢做未呀？」

文麗卿說：「好彩嗰陣差唔多學期尾，而我又有些少積蓄，都夠捱過暑假。

今年九月去到另一間中學任教，雖然唔係Band 1，但係總好過無得教。」





葉雨虹說：「遲吓學校35週年校慶，Miss Man妳會唔會返來慶祝呀？」

文麗卿說：「或者啦！話曬喺度教咗廿幾年，點都有些少感情。」

黎國光說：「咁到時我哋點樣通知妳呀？」

文麗卿說：「好簡單姐！大家交換電話號碼，到時whatsup再傾。」

兩人與文麗卿交換電話號碼後，就先行離去了。