《唔係啩！真係有個老婆教我追女仔！》: 第二十一章
過了幾天，我終於痊癒了。
「全靠你呢幾日照顧我我先好得咁快咋。」我親了Fiona一下。
「咁你點樣獎勵我先? 」
「嗯...錫多你一啖啦。」我又親了她一下。
Fiona噘起嘴﹕「唓！咁咋......」
我本又打算再親她一下，但卻瞥見小惠和Roy正迎面走來。
是小惠，自從生病那天過後，她沒有再跟我說話，就算是在校園內碰見了，她也迴避著我。
小惠看見了我和Fiona，拉著Roy掉頭走了，我本想追上去的，但Fiona拉住了我。
「我諗小惠唔想我哋阻住佢同呀Roy。」
我感到Fiona用力牽著我的手，像是怕我走掉一樣，我頓時想起Jodi跟我說的話。
「Fiona佢係純咋，但唔係蠢㗎。我而家諗吓諗吓就覺得佢已經feel到你同小惠有啲嘢，只係佢無講出口咋！你自己醒醒定定啦！」
Fiona她真的看出了端倪嗎? 她......怕我棄她而去嗎?
同一天傍晚，在房間裏，我抱著頭在苦惱著。
「喂！點呀你? 又煩緊應該揀邊個呀? 」
我猛搔頭皮﹕「係呀..................喂！我都話上次嗰個係假設性問題咯！」媽的！一個不留神我竟然直認不諱了。
樂言懶洋洋道﹕「係喇係喇.....咁你諗到個假設性答案未? 你要揀Fi......F小姐吖? 定係揀另外一個? 」
這時候我也懶得辯駁﹕「如果我諗到就唔駛咁煩啦。」
「巴打，真係為你好先照直講。」他吸了一口氣，道﹕「假設你真係同時鍾意咗兩個女仔，你咁樣真係好撚仆街，拖住一個，又唔捨得放棄另一個，你知唔知對兩個女仔都好撚唔公平㗎！ 其實你點會唔知自己鍾意邊個多啲啫，係你唔想承認，唔想面對咋嘛！我知！有邊個男人唔想左擁右抱啫！但你咁樣一直拖落去，你會傷害哂所有人囉屌你！一係，你就揀定一個，一係，就兩邊都咪撚要，費事累人累物啦！」
他說得面紅耳赤，手握拳頭想要揍我的樣子。
「仆你個街！真係越講越㷫！再對住你呢條撚樣我驚忍唔到手打柒你！我落去搵我條女！」說罷他就拂袖而去。
我呆住當場，沒想到一直嘻皮笑臉的樂言會發這麽大的脾氣，也沒想到我的猶豫不決，會一直傷害著小惠和Fiona......
回家吃過晚飯後，我獨自一人來到了觀塘碼頭，打算吹吹海風散散心，再靜思一下自己該怎麼做。
這個地方，有不少大叔在釣魚，他們或站或坐，閒時跟身旁的同好聊兩句，好不寫意。
他們好像沒有甚麼煩惱，真令人羡慕。
我倚著欄杆觀看著其中一個大叔。那大叔的運氣奇好，每次下餌不到十分鐘就會有一尾小魚上釣，而其他人則要等約半個小時才有動靜。不過這個大叔很奇怪，總是將釣到的魚拋回海裏，雖然我知道這些魚大概都髒得不能吃，但若是我的話也會留著這些戰利品向旁人炫耀吧。
我忍不住問他﹕「大叔，點解你釣咗啲魚又丟返落海? 」
「哈！我剩係享受釣嘅過程啫，釣到，知道成功咗咪算囉，所以咪放返落海比條生路佢行吓囉。」
這個大叔的聲音好像在哪裏聽過，我探頭定睛一看，不禁驚叫出來。
「明叔！」
明叔轉頭望過來，喜道﹕「乜係你呀? 你係......Sam！」
我點點頭，然後坐在他身旁，他道﹕「咁啱呀，你又嚟釣魚呀? 」
我搖搖頭，沒有回答他，只是看著剛上釣，還在不斷掙扎的魚兒。
明叔熟練的將魚兒小心奕奕從魚鈎上拆下來，再將魚兒拋到海裏。
「點呀，你追到個女仔未呀? 」
唉......追到又如何? 我現在比以前更煩惱......
「追唔到? 」
我搖搖頭，道﹕「追到喇，我哋已經一齊咗。」
明叔將魚餌又鈎在魚鈎上，「發」的一聲，魚鈎又飛到遠處漆黑的海面上。
「咁做咩你個樣，仲煩過以前嘅? 」
我重重嘆了一口氣......
「嗯......同小惠妹妹有關嘅? 」
他怎麼會猜到的? ！
我的眼睛瞪得老大，訝異的看著他。
他瞄了我一眼又將視線投到海面上﹕「真係呀? 咁係因為乜嘢? 嗯......係因為你發覺自己鍾意咗佢? 」
這個大叔到底是何方神聖? 我甚麽都沒說他竟然猜到了?
明叔笑道﹕「哈哈！呀Sam你真係好易估，咩都寫哂喺塊面度！咁如果真係咁嘅話，你而家係煩緊唔知揀邊個好，係咪呢? 」
我脫力的往後一躺，背脊碰上緊硬的石屎地。
我仰臥著，頽然道﹕「明叔你都估到哂喇！咁我可以慳返啲口水。」
「Sam，你想唔想知嗰日我同小惠妹妹講過啲咩呀? 」
我聞言霍然坐起，不斷點頭。
明叔徐徐說出當天他和小惠的對話。
「小惠妹妹，我有啲嘢想問吓你，你過一過嚟。」然後我示意Sam先回去。
小惠跟著我稍為離他們遠一點，然後我問她﹕「小惠妹妹，呀Sam話佢只係你表哥，唔係你未來老公。」
小惠看了Sam一眼，然後臉容一黯，道﹕「係呀，我上次亂噏咋。」
她的表情已經出賣了她，就算他倆不是夫妻關係，看小惠的樣子也知道她喜歡Sam吧。
我看了看Sam那邊，他正跟那個女生說話。
也難怪Sam會喜歡那個女生，因為她也相當漂亮。
我問﹕「但係...你唔係鍾意Sam咩? 」
小惠吃了一驚，像是奇怪我為甚麼會知道。
我笑道﹕「其實上次我留意到你望佢嘅眼神，我都估到啦。」
小惠害羞的低下了頭，然後又怯生生的道﹕「你...你唔會話比佢知個呵? 」
我不明白﹕「點解呀? 呀Sam而家都只係追緊嗰個女仔啫，又未同人一齊，點解唔爭吓呀? 我睇好你喎！」
小惠搖搖頭﹕「佢...佢剩係鍾意Fiona，唔會鍾意我......」
我大惑不解﹕「咁我真係唔明喇，咁你仲可以同佢兩個一齊出街嘅? 你望住Sam剩係討好另一個女仔唔會好難受咩? 」
她又搖搖頭﹕「嗰邊另外一個男仔，都係想追Fiona，所以我係嚟幫呀Sam......」她頓了一頓，續道﹕「只要佢開心就好......」
我吃了一驚，這個Sam到底前世做了甚麼好事? 竟然有一個像小惠的女孩子待他這麽好，而他卻不去珍惜。
不過感情這回事那有邏輯可言，可不是付出了就能有收穫的。
我嘆了一口氣﹕「既然你都咁講，咁我呢個閒人都無謂講咁多啦。不如我再去幫你哋影張相啦，你企喺Sam側邊，我專登幫你影一張得你同佢嘅。」我向她眨了眨眼睛。
小惠喜孜孜道﹕「多謝你呀明叔！」然後就拉著我向Sam他們走過去。
「Sam，你點解而家又會鍾意咗小惠嘅? 」
我抱住了頭，苦惱道﹕「我...我都唔知呀......唔知由幾時開始，我會好在乎佢，我會掛住佢，我唔想佢唔開心，我好驚佢突然間有一日會喺我生命裏面消失......」
「咁你唔鍾意你女朋友喇? 」
「唔係呀！我鍾意呀！但係......」
明叔瞅了我一眼﹕「但係咩? 但係你而家又鍾意咗小惠? 唔知點算好? 兩個要哂呢，就無可能㗎喇，一係兩個都唔要囉，咁就唔駛煩。」
「唔得！」我馬上回應。
明叔哈哈一笑﹕「同你講吓笑啫。一係咁啦，交比個天決定啦。」
「天? 」
明叔從口袋裏掏出一個一圓硬幣﹕「公就小惠，字就Fiona，就咁決定。」
吓? 這麼兒戲?
明叔已經將硬幣放在手指頭上......
「等等......」等等啊！我還沒有心理準備啊！......
鏗！
明叔的手指頭一彈，硬幣應聲飛往半空。
不斷翻轉的硬幣在半空閃爍著銀光，我死命的盯著它，想要從它飛翔的軌跡猜測最終的答案。
會是公嗎? 那麽Fiona她......
但若果是字的話? 我和小惠豈不是......
硬幣因為地心吸力，開始從半空往下跌，明叔右手一抄，「啪」的一聲將硬幣拍在左手手背上。
只要他打開右手，我就能知道上天給我的答案了，我緊張得屏住了呼吸。
是公? 還是字?
是小惠? 還是Fiona?
「Sam！」
「吓? 咩呀? 」在這個緊張時刻，明叔突然叫喚我，嚇了我一大跳。
「你自己心裏面，係想公定字呀? 」
我............
腦海裏浮現出Fiona的樣子，但轉眼就給小惠覆蓋過去了......
是...小惠嗎? ......
這個時候，明叔打開了右手............