《唔係啩！真係有個老婆教我追女仔！》: 第十五章
這天我巡例看一下故事有沒有更新，一看之下大驚不已。
「小惠小惠！大鑊啦！」
小惠放下手上的書本，懶洋洋道﹕「咩事呀！」
我大叫﹕「Gary諗住情人節約Fiona呀！」
她瞪大了雙眼﹕「你又知? 」
糟糕！說錯話了！
我連忙道﹕「我意思係如果我係Gary，我都會喺嗰日約Fiona囉！」看畢了第十章，原來『Gary』想在情人節當天約『Fiona』看畫展。
小惠沒有理會我，又繼續看書﹕「咁又點啫，Fiona應該唔會應承啦。」
我急道﹕「咁...唔怕一萬，至怕萬一嘛！不如你約咗佢先，等Gary無機可乘嘛！」我只怕Fiona像『Fiona』一樣，呆呆的不知『Gary』約她那天是情人節而差點答應了。
小惠瞪了我一眼﹕「係啦係啦！怕咗你啦！而家約啦！」說罷她拿起電話飛快地操作。
一會兒後，她將電話丟到一旁﹕「約好啦。」我馬上鬆了一口氣。
轉念一想，我致電給Fiona﹕「喂，Fiona? 」
「嗯? Sam? 」
「無，想問吓你下個星期五得唔得閒，喺香港藝術館有個畫展我想睇，睇吓你有無興趣啫。」我將『Gary』在故事中的對白跟Fiona說一遍。
「咦? 係咩畫展呀? 」聽Fiona的語氣，她果然對這些東西很有興趣。
畫這些東西我真的不懂，所以我只好直說﹕「哈......其實我都唔係好知，我聽人講好似幾好睇，所以想去睇吓啫。」
Fiona笑道﹕「哈...你真係......你等等，我上網查吓先......」
一會兒後，她喜道﹕「好呀好呀！呢個畫展我想睇好耐喇！」
「咁我約定你下星期五上晝十一點好嗎? 」
「好呀！」
我掛上了電話，小惠瞪著我。
「你做咩連情人節之前嗰日都約Fiona呀? 」她的樣子好像有點不高興。
「嗯? 有問題咩? 我諗住連之前嗰日都唔比Gary有機可乘咋。」
「但...但係我哋唔係講好咗你嗰晚唔打電話比Fiona咩，你晏晝仲同佢出街? 而...而且去睇畫展喎，你唔驚你會瞓著咩? 」
是咁的，之前小惠教我每天晚上定時找Fiona(就是那個叫心錨的東西)，情人節那天剛好是計劃的最後一天，於是小惠讓我前一天不要找Fiona，若成功的話Fiona應該會很掛念我。「失蹤」一天後，情人節那晚我突然在她面前出現。至於會發生甚麼事，那就要看我的運數了。
我想了想，道﹕「你都講得啱嘅，我都驚睇睇吓瞓著。」根據故事所說，『我』跟『Fiona』看畫展時的確在魂遊太虛，令『她』心內暗暗埋怨，還說以後找『Gary』陪她看好了，我可不能讓這件事發生。
我心想一不做，二不休，索性做得盡一點﹕「既然係咁，不如我嗰日直接放埋佢飛機啦。」
小惠訝道﹕「你唔驚佢嬲你呀? 」
我笑道﹕「咁有你幫我嘛，你幫我同佢講我屋企有急事走咗囉。」
她噘噘嘴﹕「又拋個波比我......」
「至多嗰晚請你食飯喇。」
她雙眼放光﹕「真嘅? 咁我要食酒店buffet！」
這個臭丫頭！真會獅子開大口！算了算了......
我沒好氣﹕「食啦食啦！食死佢啦！」
轉眼來到了情人節前一天的星期五，即是我約了Fiona看畫展的那天。
上午十時四十五分，我讓小惠打給Fiona。
「喂，Fiona? 小惠呀。」
「.......................」
「係咁嘅，表哥佢今朝收到個電話，跟住就雞咁腳咁走咗去，連電話都唔記得攞。跟住佢啱啱打比我話今日本來約咗你，但佢而家去唔到啦，叫我同你講聲對唔住喎。」
「.......................」
「呢條友佢話無咗個電話就唔記得你個電話號碼，所以先叫我打比你喎。」
「.......................」
「Fiona你而家係咪去緊藝術館呀? 」
「.......................」
「不如我而家嚟陪你睇啦，反正我都有啲興趣。」
「.......................」
「嗯，咁你入場睇住先啦，我到咗打比你，拜拜。」
小惠掛上了電話，跟我道﹕「咁得未呀? 」
「OKOK！Thank you！」
小惠拿起手袋，出門之前提醒我﹕「記得我哋今晚要去酒店食buffet呀，我book咗枱啦！」
她走後，我的電話響了一下，屏幕跳出了一個whatsapp message，是Fiona。
「你今日有咩急事呀? 做咩咁懵連電話都唔...」後面她說些甚麼我沒有打開來看，免得讓她知道我已看了她的訊息。
哈！沒想到她已經開始掛念我，不知道我「失蹤」一天之後，明晚她見到我時會怎麼樣呢?
我在房間待到傍晚，一直到了跟小惠吃飯的時間，才施施然出門。
我們約在香港區的某間酒店，七時半我準時到達。
小惠正悄生生的站在大堂等候，只見她身穿一件白色連身短裙，外披米色毛絨外套，然後再加一雙啡色高跟長靴。這身衣服令她更加活潑漂亮，不少路過男仕的眼睛都被她吸引過去了。
我也被她眼前一亮的打扮弄得目定口呆。老實說，雖然我從第一眼就知道小惠是個美女，但她平時在宿舍時都是一副隨隨便便的模樣，穿來穿去都是棉質的家居服。上課時會好一點，但也都只是一般的打扮，那像今天那樣炫目。
我怎麼了? 小惠是個美女沒錯，但這又怎樣? Fiona也是美女啊！而且我喜歡的是Fiona......
我吸了一口氣，慢慢走過去。
小惠發現了我，喜孜孜的跑過來挽著我的手，甜笑道﹕「你嚟咗啦！」
她的頭髮還變了蜜桃色，而且...她還化了個淡妝，她是為了今晚跟我的約會嗎? ......
小惠見我呆望她，拍了我一下道﹕「喂！做咩呀? 我塊面有嘢呀? 」
原來我的視線又不自覺的被她吸引了，我連忙移開目光﹕「無...無呀......你去染髮呀? 今朝都仲係黑色㗎。」
她興高采烈﹕「係呀！靚唔靚呀? 」
我由衷的點點頭﹕「靚...好啱你呀......」不止頭髮，今天小惠整個人也很漂亮。
說起來，她今早出門時並不是這身裝束的，而且也沒有化妝，她是在那裏打扮的?
「夠鐘啦，我哋行囉！」在我還一直呆著的時候，她牽著我的手進場了。
面對著一桌子的甜品，我有點滴汗﹕「唔駛一開始就食甜品呀? 仲要攞到成枱都係......」
「我鍾意呀！」小惠吃了一口蛋糕，露出滿足的表情﹕「唔！好味！」
我想起她剛和Fiona見了面，於是問她﹕「頭先Fiona點呀? 佢有無問起我呀? 」
小惠噘起嘴﹕「剩係掛住Fiona，而家係我同你食飯呀......」
我頓時語窒﹕「sorry......」說的也是，我倒沒有想過她的感受。
小惠白了我一眼，沒好氣道﹕「頭先Fiona有問過我知唔知你去咗邊，我剩係話你係屋企有事，至於係咩事我就唔知啦。跟住佢個樣好似有啲擔心咁......睇展覽時佢都好似唔係好留心，同埋見到佢偷偷打電話，係咪打比你呀? 」
「嗯，係呀。」下午時有兩個未接來電，都是Fiona打來的。
小惠若無其事的繼續吃甜品﹕「咁睇嚟今晚Fiona應該會係咁搵你......你諗住聽日見到Fiona點呀? 」
自從跟Fiona看過日落那天後，我覺得她對我的態度好像和以前有點不同。再加上我今天「失蹤」後Fiona的反應，我覺得她應該是有點著緊我，甚至是喜歡我了。
雖然毒撚最忌有自信，但我還是打算趁著明天的機會跟Fiona表白，而且我也想聽聽小惠的意見，於是我道﹕「我諗住聽日同佢表白。」
「吓? 」小惠像是吃了一驚﹕「但我覺得未係時候喎。」
未是時候? 真的嗎?
「唔係呀，我覺得呢排同Fiona親密咗好多喎。而且佢今日對於我『失蹤』都好似好緊張。」
她急了起來﹕「咁...咁如果我係Fiona，我都會有啲擔心啦，始終係你朋友嘛.......」她頓了頓，又道﹕「......唔...唔怕話埋比你知喇，我有探聽過Fiona口風，佢有講過而家仲未有心理準備拍拖。」
咦? 怎麼她現在說的這個原因，跟故事裏的一樣的? 難道她也認為我會成功才阻止我的?
我盯著她﹕「真係? ......」
她將視線放在滿桌的甜品，道﹕「係呀。」
是我的心理作用嗎? 我總是覺得她是在迴避我的目光。
我淡然道﹕「既然係咁，我聽晚見一見佢就算啦。」雖然我是騙她的。
「比心機慢慢再煲下先啦，而家又唔係淥杯面。」
怎麼我覺得她鬆了一口氣似的，又是我的心理作用嗎?
沒吃了多少東西，我已感到很飽了，可能是因為我記掛著明晚見到Fiona要說甚麼吧。
「嗯? 你飽啦? 」
我打了一個飽嗝當作是回答，小惠白了我一眼又繼續吃她的窩夫。
很愛很愛你 所以願意 捨得讓你......
小惠聞聲一手就拿起桌上的電話接聽。
還好我的眼睛比她快，在她拿起電話之前，我瞥見來電者是Roy。
她倒大方的在我面前接聽。
「喂? Roy? 」
「.......................」
「無呀，同表哥食緊飯咋嘛。」
「.......................」
「聽日呀? 聽日我唔得呀。」
「.......................」
「星期一ok呀。嗯，咁星期一見啦，拜拜。」
她放下了電話，發現我正瞪著她。
「望咩啫? 想食呀? 比啖你喇。」她舀了一口雪糕遞到我唇邊﹕「嗱！」
我張大口接過﹕「呀Roy想約你聽日呀? 」
她繼續吃雪糕﹕「係呀。」
我冷冷道﹕「我都話佢想追你㗎啦！」
「唓！約去街啫，就一定係想追我嘅！」
她這個愛理不理的態度，真的令人火大﹕「咁......」
很愛很愛你 所以願意 捨得讓你......
她的電話在我教訓她之前又響起來了。
我瞥見這一次是Jodi，她接聽了電話﹕「喂，Jodi? 」
「.......................」
「聽日? 我約咗Fiona喎，你介唔介意一齊呀? 」
「.......................」
「咁好呀，我同Fiona講聲得啦，聽日見，拜拜。」
她再次下了電話，訕笑道﹕「Jodi啱啱都約我聽日去街喎，睇嚟佢都想追我。」
我給她氣得七竅生煙，正想破口大駡， 她的電話又再一次響起。
很愛很愛你......
這一次她眼明手快的拿起電話，然後道﹕「我去聽個電話先。」然後就離座而去。
我看到了！是那個叫Brian的傢伙！幹嗎接聽這個傢伙的電話要躲起來?
一會兒後，她回到座位又繼續若無其事的吃雪糕。
「邊個打嚟要匿埋聽呀? 」我不經意的問。
小惠眼珠子一轉﹕「無呀，我老公打嚟咋嘛，費事喺你面前講肉麻嘢啦。」
老公? 你老公不是叫Samuel嗎? 何時變了做Brian的?
「老公? 你意思係未來嘅我打比你? 」
「係呀。」她說謊不眨眼睛。
「未來嘅電話咁犀利嘅? 可以打去以前呀? 」
「好出奇咩? 」
「都幾㗎，不如打比你老公等我同佢講兩句囉，我諗自己同自己傾電話都幾得意。」我伸手想拿起她的電話。
她搶先奪走了電話，道﹕「唔得！」
「吓? 點解呀? 」我看你怎樣解釋。
小惠有點結巴﹕「我...我呢個係普通電話咋嘛，邊打到去未來喎，剩係可以收到未來嘅電話咋。」
「哦，原來係咁。」哼！給你蒙混過去了！我一定會查出Brian是誰的。
結賬的時候，女侍應跟我們道﹕「先生小姐，呢幾日係情人節special，我哋會同每枱嘅情侶影一張即影即有嘅相，連埋一個精美相架送比你哋㗎。」
我連忙道﹕「我哋......」
我還沒說完，小惠就很興奮的道﹕「好呀好呀！」然後坐在我的旁邊挽著我的手臂。
小惠的反應，令我馬上將「唔係情侶」吞回肚子裏。
女侍應道﹕「先生，你女朋友真係靚！」
我看了看小惠，的確，她有不下於Fiona的美貌，可是我......
「望鏡頭啦！」小惠用手將我的頭擰向面對著照相機。
啾~
咔喳！
我按著被吻的臉頰，一臉驚訝的看著小惠。
小惠的臉紅得像蘋果﹕「望咩啫！」
女侍應這時候將照片及相框送給小惠，她歡天喜地接過後將照片看了又看，然後放進相框裏。
我還是張大嘴巴看著她，她嗔道﹕「你咪亂諗呀！我將你當住係我老公先咋！」
真的嗎? 我...不太相信......
到我拿起桌面上的賬單，我的嘴巴張得更大。
甚麼? ！這............
我流著冷汗將賬單放在小惠面前，臉色蒼白的問她﹕「小...小惠......個價錢啱唔啱呀? ......」
小惠瞄了一眼，理所當然道﹕「啱呀。」
我小聲的問她﹕「乜...咁貴嘅? ......」
她一邊把玩著那張照片，一邊回答我﹕「咁今日係情人節前夕，酒店係咁上下價錢啦。」
媽的！我竟然忘記了！可惡！嗚............
從酒店回到宿舍的路上，我像給人放血了一樣，臉上一直毫無血色。
小惠將手按在我的額上﹕「你面色做咩咁差呀? 頭先食得太多生蠔? 嗯......你都唔係食咗好多啫，定係其實你唔食得生嘢? 」
我垂頭喪氣的撥開她的手﹕「無得醫㗎，唔駛理我，我無事。」大概我要中了六合彩才會痊癒。
「真係無事? 」她像是很關心我似的。不過說起來，若她真是我老婆，應該很清楚我的經濟狀況才是，而且我能不能吃生蠔她怎會不知道? 從這一點看，她越來越不像我老婆了。
「無呀無呀，就嚟十點半啦，你快啲去沖涼先啦，一陣Fiona打嚟嘅話你仲要聽電話㗎。」
「係啦。」說罷她就去洗澡了。
趁她去洗澡時我打開了紙言，但並沒有任何更新，看來我明晚的行動是完全背離了原故事的情節。原故事中『小惠』約了『Fiona』在情人節當日做朱古力送給『我』，而『我』這個大白痴竟然還沒有察覺『Fiona』的心意，白白就錯過了表白的機會，我明晚可不會這樣笨。不過當然，這一切都要建基於今晚的「心錨」行動能不能成功。
小惠洗完澡走出來，我連忙關掉紙言的視窗。
我用眼角偷瞄了她一下，她好像沒有發現我在幹甚麼。
在她抹著頭髮的水份時，我的電話響起來了，我和小惠同時看過去，果然是Fiona。
現在是十時四十分。
Fiona找我！小惠的計策成功了！
我的嘴角向上揚﹕「佢打嚟啦！」
小惠不屑道﹕「打咗一個啫，咪咁得戚住。」
電話響了一會兒終於掛掉了，但不到五分鍾又再響了。
呵呵！才過了五分鍾就已經第二個了！
我得意的看著小惠，她則噘著嘴的生悶氣。
不久後電話又掛掉了，緊接而來的是whatsapp的音效。
是Fiona嗎? 不過我現在不能確認。
又過了十多分鐘左右，卻是小惠的電話響起來了。
她看了看然後展示給我看，是Fiona。
我頓時很緊張，同時小惠已經接聽了電話，並開了擴音器。
「喂，小惠? Fiona呀。」
「Hello，Fiona，我都正想打比你。」
「嗯? 你搵我咩事呀? 」
「哈！你打比我先嘛，你講先啦。」
「呃......係咁嘅...我...我想問吓呀Sam返咗嚟未呀? 」
「吓? 佢仲未返嚟咩? 」
「佢...佢無打比我呀......我啱啱打過比佢又係無聽電話，whatsapp又無覆，又無online......」
「咁呀......其實我都唔知佢咩事喎，又唔知佢幾時返......」
這時候我在白紙上寫上了﹕「你話會打比呀Sam家姐問問，一陣再打返比佢。」
小惠看見了馬上照稿讀﹕「一係我打比我表姐，即係呀Sam家姐問吓啦，我一陣再話你知啦。」
「嗯...咁好啦......係呢，你搵我咩事呀? 」
「無，想問吓聽日我哋約幾點啫。不過呢個小事啦，我幫你搵咗表哥先啦，而家呢件重要啲嘛，係咪? 」小惠最後的語氣，可真曖昧得要命，再笨也聽得出她的絃外之音吧。
果然，Fiona變得很尷尬﹕「咩...咩喎......我...我都係問吓啫......」
小惠笑道﹕「我問完再打比你啦，拜拜。」
「拜拜......」
Fiona剛才的反應，她是在害羞吧......
待她掛上了電話後，我馬上道﹕「你一陣同Fiona講話呀Sam家姐同你講呀Sam有事返咗大陸啦。」
小惠疑惑﹕「返大陸? 做咩呀? 」
我道﹕「做咩都好啦，我見到Fiona會同佢解釋啦，你話你唔知就得啦。」
「哦。」小惠答應後好像有點鬱鬱寡歡。
「喂！做咩呀? 唔開心呀? 」剛才還好好的，怎麼心情轉得這樣快。
「無呀。」
我湊過去盯著她﹕「真係無? 」
她拿起枕頭一把塞在我的臉上，嗔道﹕「無呀！死開啦！我打電話比Fiona呀！」言畢就鼓著腮氣沖沖的走出房外。