《唔係啩！真係有個老婆教我追女仔！》: 第十章
午飯後，Fiona和Gary要上課的關係，我只好目送他們一起離開。而小惠本來也是要一起去上課的，但因腳傷關係，被Fiona勸服留在宿舍休息。
我揹著小惠回房時跟她道謝﹕「喂，頭先唔該哂你，如果唔係我都唔知點應付Gary。」
「想多謝我好簡單啫，請我食嘢吖。」
「咁你想食咩呀? 」
「榴槤雪糕！」她的語氣聽起來很興奮，我都感到她的眼睛在放光了。
「榴槤雪糕? 邊度有得賣呀? ......」
「唔知呀，總知我要食！」
這個女人真麻煩，喜歡吃的東西也是這麼奇怪的。
「喂！你兩個做咩咁恩愛呀? 行兩步路都要孭住呀? 」剛巧經過呀君的房間，碰到從裏面走出來的樂言。
我沒好氣﹕「你估我好想孭呀? 佢拗柴呀......」
小惠馬上狠狠拍了我的後腦一下﹕「而家係邊個搞到我拗柴㗎? 」
「係......係係...係我唔啱......」我陡然想起我上次扭傷時用過的跌打酒，應該還給樂言了。
「我上次用過嗰枝跌打酒咪還返比你嘅，借嚟用用。」
「喺Michael度，你自己問佢攞啦。」他說罷就離開了。
到鄰房拿過跌打酒後回到房間，我將小惠放下，然後小心奕奕的將她的鞋襪脫下。
只見她的腳踝處殷紅一片，還好不是那麽腫，應該過幾天就會痊癒吧。
小惠噘著嘴﹕「一日至衰都係你啦，諗埋哂啲屎橋。」
我反唇相譏﹕「唔好話係你鈍? 叫你踩傷我反而自己拗柴。」
她嗔怒﹕「你仲話係我鈍！你個衰人剩係識得蝦我！」說著說著她竟然眼泛淚光。
我最怕女人哭了，而且說到底，也是因為我的餿主意她才會受傷的，於是我馬上認錯﹕「係喇係喇，係我唔啱喇。嗱，自己捽吓啦，啲瘀要大力啲捽先會散㗎。」我將手上的跌打酒遞給她。
小惠沒有接過，反而將腿擱在我的膝上，以命令的語氣道﹕「我唔識捽，你幫我捽。」
「吓......」我臉有難色，不是我不願意，只是想到要碰觸她的身體，我就感到渾身不自在。
她的樣子得意洋洋﹕「吓咩吓? 係你搞成我咁㗎，你要負責任呀！」
負甚麼責任? 說得這麽曖昧幹甚麽? 我只是弄傷了你而已......
無奈之下，我唯有認命﹕「負！即刻負！」沒想到到頭來沒能讓Fiona幫我揉跌打酒之餘，還要我服侍這個女人......
揉著揉著，我的額頭給小惠敲了一下﹕「細力啲啦死嘢！痛㗎！」
我壞壞的道﹕「唔大力啲瘀捽唔散㗎！」然後又加重了力度。
「呀！呀！......」她痛得驚叫起來，想將腿縮回去但卻被我牢牢抓住。
她雙手亂打我的頭，哭喊道﹕「嗚.....好痛呀！...衰人！衰人！衰人！」
沒想到她還真的哭出來了，我馬上鬆開了手，但還她仍然哭著的打我。
看見她楚楚可憐，梨花帶雨的樣子，我忍不住將她擁入懷裏，撫著她的頭安慰她﹕「係喇係喇，整痛你對唔住喇，我細力啲啦好唔好? 乖啦，唔好喊啦。」
她在我懷中抽泣了好一會兒，然後突然推開了我﹕「你...你整到我個頭都係跌打酒味啦......」
我這才醒覺剛才不自覺的摟住了她，連忙道歉﹕「Sor...sorry.....我......我細力啲幫你捽好嗎? ......」
只見她的臉漲得通紅的，垂著的頭微微點了點。
這次我輕輕的替她揉著，大家一直都沒有再說話。
糟了！氣氛好像變得有點尷尬，這種感覺真難受啊！快些說點甚麼吧......
「頭先......係你駛開Jodi㗎? 」其實我是看出了一點端倪，Jodi沒理由放下受傷的小惠不管的。
她點點頭﹕「係呀，如果唔係點令到Fiona扶我返嚟喎。」
說的也是。
「係...係呢，Gary咪同你同班嘅，佢...點㗎? 」
小惠想了想，道﹕「佢呀......正常男仔一個囉，不過我諗佢都幾受女同學歡迎，我見佢同個個女同學都有偈傾。不過都唔出奇吖，佢外在條件都幾好。」
嗚呀！看來我問錯問題了！Jodi是這樣說，連小惠也是這樣說......
大概小惠也看到我的臉色很難看，她安慰道﹕「咁你又唔駛咁灰，我覺得Fiona唔係剩係睇外在嘢嘅女仔囉。」
但我是連內在也輸給他啊！那該怎麼辦?
小惠像是看穿我的想法﹕「唔係識玩吓樂器就係有內涵嘅，星期日你比心機表現吓自己啦。」
真的嗎?
來到了星期天，乘著小惠梳洗的時間，我偷偷檢查一下紙言，可惜甚麼都沒有更新。
難道今天四人行的事沒有在故事中發生? 嗯......故事中『我』是在受傷後跟『Fiona』單獨午飯時約她去濕地公園的，所以小惠和Gary理應沒有出現。看來今天要靠我自己了。
小惠的腳傷雖還沒完全痊癒，但一般走動已經沒有大礙，只是動作慢一點而已。
Fiona扶著小惠﹕「小惠，你隻腳好返哂未呀? 」
小惠將嘴巴貼在Fiona的耳邊，卻以正常的聲線道﹕「差唔多啦，不過我都係扮腳痛，等表哥服侍我。」
我給了她一個老大的白眼﹕「我聽到哂啦，盧家惠。」
Gary語帶雙關﹕「呀Sam你同小惠都幾好感情喎。」
他媽的！你這是甚麼意思? 要讓Fiona誤會我們嗎?
小惠和應道﹕「係呀，我哋由細玩到大，感情好好㗎......」
喂喂喂！你這樣說不是更加令誤會加深嗎?
她續道﹕「......佢呢個呀哥都算係咁啦。」
我聞言連忙補充﹕「係呀！我真係當佢係我親生呀妹，Gary如果你想追小惠嘅話一定要過咗我呢關先。」
Gary給我堵住了嘴巴，他馬上轉移視線﹕「大家都食飽囉呵? 不如行囉。」
走到Gary泊車的地方，Gary率先將副駕的車門打開，向Fiona示意讓她坐。
小惠看見了馬上衝上前，一屁股的坐了進去，並向Gary道﹕「Gary你真係好！你竟然知道我唔坐得後座，仲開埋門比我。我由細到大一坐後座就會頭暈啦。」
Gary吃了個啞巴虧，頓時作聲不得，悻悻然的回到駕駛座。
我打開車門讓Fiona坐進後座，然後坐到她身旁後，馬上笑道﹕「Gary你咁體貼，你真係追小惠嘅話我一定開綠燈比你。」
Gary從倒後鏡中狠狠瞪了我一眼，然後又若無其事的﹕「扣好安全帶喇各位。」
小惠興奮的大叫﹕「出發！」
車子發動沒多久，小惠就呼呼大睡了，看來要她早起真的要了她的命。
我拍了拍Fiona讓她看小惠的睡相，逗得她竊笑連連，然後又拿出電話讓她看我收集的趣文和短片。一路上我和Fiona談笑風生，Gary則成為了我們的柴可夫默默駕車，不難想像他現在的臉色比鑊底還要黑。
快樂的時光過得特別快，我感到車子的引擎關掉，原來已經到了。
我從後捏著小惠的臉頰﹕「喂到啦！仲瞓。」
小惠給我弄醒了，拍開我的手嗔道﹕「做乜搣人塊面呀? 走開走開！」
我們下車後，我笑道﹕「頭先我影低咗你瞓覺流口水個樣，今晚我po上facebook再tag返比你吖。」
小惠聞言漲紅了臉，怒道﹕「唔比呀！快啲delete哂佢！」然後衝過來想搶走我的電話。
我高舉著電話逗她，身材矮小的她伸盡了手也摸不著邊兒。她狼狽的樣子逗得我哈哈大笑。
Fiona笑道﹕「好心你唔好玩小惠啦。」然後向小惠道﹕「你唔好信呀Sam呀，佢頭先根本就無影相。」
小惠聞言怒瞪著我﹕「哼！死八公！」然後就挽著Fiona走開了。
Gary走到我身邊道﹕「睇嚟你同小惠唔止兄妹感情咁簡單喎。」
臭小子！你想說些甚麼?
我微笑道﹕「我同Fiona都唔止朋友咁簡單呀，頭先你揸車嗰陣睇唔到咩? 」
Gary的臉色瞬間變得很難看，但轉眼又神色如常﹕「放心啦，你唔會贏到我㗎。」
呵！下戰書嗎? 今天我是不會輸給你的！
「嘩！嗰隻雀成身白色，但係個嘴又扁又長，個樣好得意呀！叫咩名呀? 」Fiona指著一只鳥問道。
Gary想找出那些鳥類介紹牌時，我已經充滿自信的回答﹕「呢隻叫黑臉琵鷺，係冬季季候鳥嚟㗎。」
Fiona剛好找到介紹牌，訝道﹕「咦? 係喎！呀Sam你咁犀利一睇就知嘅? 」
我搔搔頭，有點不好意思﹕「哈......之前見過啫......」這當然是昨天努力看資料的結果。
眼見Gary忿忿不平的瞪著我卻又無法反擊，直令我爽到心坎裏去。
我再接再厲，使出了大招﹕「用呢個睇啦，清楚啲呀。」我將準備好的望遠鏡遞給Fiona。
Fiona接過望遠鏡，喜道﹕「估唔到你裝備齊全喎。」然後就用望遠鏡觀雀。
Gary的臉色更加難看，正當我想陪Fiona一起觀鳥之際，小惠一把拉走了我﹕「呀鋒呀鋒！你睇吓嗰隻蝴蝶！好靚呀！係咩品種嚟㗎? 」
我連忙輕聲道﹕「噓！咪話喺其他人面前唔好叫我呀鋒囉！同埋做乜拉走我喎? 我同Fiona睇緊雀呀！」
小惠鼓著腮噘著嘴﹕「你剩係陪你個Fiona得啦！唔駛理我啦? 」
怎麽在這個時候耍性子了? 她又不是不知道今天有Gary在，我得要好好表現自己才成啊。
我急起來﹕「咁...你又唔係唔知.......」
「咦? 你哋講緊咩呀? 」說話的卻是Fiona。
我連忙岔開了話題﹕「小惠話佢想去洗手間喎，Fiona你陪佢去啦。」然後我推了小惠一把。
小惠轉過頭來向我做了個鬼臉，然後又喜孜孜的挽著Fiona﹕「陪我去洗手間洗個面呀，我有啲熱呀。」
我和Gary跟在她倆身後，然後坐在洗手間外椅子上等候。
我有點忍受不了跟情敵默默的坐在一起，於是我道﹕「我都去一去廁所先。」
走進了洗手間，又感到有點便意，便到尿兜處小解。
正當我解放到一半的時候，旁邊的人突然拍了我的肩膊一下﹕「喂！又係你呀? 乜咁啱呀！又嚟拍拖呀? 」
我轉頭一看，竟然是上次在這裏碰到的大叔！
『屌！大叔? 唔撚係咁啱呀? 今次仆街喇！一陣比佢見到小惠咪.......』
想起他待會在Fiona面前稱呼小惠做我的老婆，嚇得我把尿都縮回膀胱裏去了。
我臉色蒼白的回應他﹕「Hi...hi......又...又會咁啱嘅大叔......」
「嘩！你塊面做咩青哂呀? 你無咩事呀嘛? 」
「無...無......」
我拉起褲鍊去洗手，待大叔洗過手後就將他拉走。
還好離開洗手間時Gary並沒有留意到我們，我連忙將大叔拉到他視線看不到的地方。
「後生仔，係咪同老婆夜夜笙歌搞到面青青呀? 不過我都明嘅，你老婆咁靚，不過色字頭上一把刀呀，都係小心身體好......咦? 你老婆呢? 」大叔左顧右盼，看來是想找小惠。
沒想到這個大叔這麽為老不尊的......
「噓......大叔，你聽我講先......」
「後生仔，你叫我明叔啦，你叫咩名呀? 」
「Sam......」我急道﹕「唉哎明叔，你聽我講先啦！之前同我一齊嚟嗰個女仔其實唔係我老婆嚟㗎！佢係我表妹咋！」
明叔露出疑惑的神色﹕「唔係你老婆? ......咁佢又咁講? 」
「係......係佢成日都貪得意亂講嘢，你唔好信佢呀！」
「............」他的眼神告訴我他不相信。
我為了取得他的信任，將不想說的都說出來了﹕「其實係咁嘅，今日我同佢同埋另外兩個朋友一齊嚟玩，咁我追緊其中一個女仔，你如果喺個女仔面前話我表妹係我老婆就死緊喇！」
明叔語重深長道﹕「呀Sam，我都後生過，我都明嘅，但係你一腳踏兩船係唔得㗎。雖然你老婆好似對你好惡，但係我睇得出佢好鍾意你㗎，就好似當年我老婆對我咁樣。想當年......」
『頂！仲想乜鬼嘢當年呀? 』
我馬上截住他的青春回憶﹕「我講真㗎！你唔信一陣我叫我表妹同你解釋喇！」
我瞥見小惠和Fiona正好從洗手間走出來，連忙向小惠大喊﹕「小惠！你睇吓我又撞到邊個！」
小惠看見明叔，走過來喜道﹕「咦? 咁啱嘅大叔，你又嚟觀鳥呀? 」
我向小惠介紹﹕「小惠，佢叫明叔呀。」然後又向明叔道﹕「明叔，佢係我表妹，叫小惠。」
明叔看了小惠一眼，又朝不遠處的Fiona看了一眼，然後問我﹕「就係嗰邊嗰個女仔? 」他向Fiona瞄了瞄。
我點點頭，接著他就向小惠道﹕「小惠妹妹，你有啲嘢想問吓你，你過一過嚟。」然後示意我先回去。
我回到Fiona身邊，看著明叔和小惠在說話，只見他倆不時將視線投過來，看得我渾身不自在。
「Sam，嗰位大叔...係你哋朋友? 」Fiona問道。
我也不知道怎麼回答，只能道﹕「算...算係識得啦......」
Gary加了一把口﹕「呀Sam你都幾交遊廣闊喎，嚟到濕地公園都有熟人。你平時係咪都會同班大叔一齊去觀鳥㗎? 」
我沒空理會Gary的冷嘲熱諷，只留意著明叔和小惠的動靜。
只見他們一問一答，明叔時而露出疑惑的神色，時而感到驚訝，又像是明白了甚麼，最後卻搖搖頭，他們到底在說甚麼?
他們好像已經說完了，小惠拉著明叔走過來笑道﹕「明叔話幫我哋影相呀！」
雖然我很想知道他們談話的內容，但看現在的樣子應該沒有問題吧。
明叔幫我們拍了幾張合照，臨別之時，他看了Fiona和小惠各一眼，然後對我欲言又止的﹕「Sam......嗯......都係無嘢啦......」接著他又笑道﹕「估唔到我哋咁有緣，下次再撞到嘅再幫你哋影相啦！拜拜。」
我們跟明叔揮手道別，然後又繼續遊覽。
「喂！頭先你同明叔講咗咩呀? 」我乘著Fiona沒有注意，悄悄問小惠。
「無呀，咪解釋我同你係表兄妹，唔係兩公婆囉。」
「就係咁? 」
「就係咁。」
根據明叔的表情，直覺告訴我不只這麽簡單的，但既然小惠不肯說，我也沒有辦法，唯有就此作罷。
走走逛逛，太陽都差不多下山了。
「都行得差唔多，不如我哋走囉，出返去食完飯都夠鐘入場睇戲啦。」
各人沒有異議，於是我們便離開了濕地公園，駕車回又一城。
回程的時候，小惠還是一坐上前座就呼呼大睡。Fiona也逛得有點累了，車子發動了沒多久，頭一側也入睡了。
不知是否幸運之神眷顧，Fiona沒有將頭側向車門，反而是倒向我。
機會嚟啦！飛雲！
如此良機我當然不會錯過，我馬上坐到中間位置上，將肩膊墊在Fiona的頭下。沒多久後她果然枕在我的肩膊上。
我的一舉一動和飄飄然的樣子當然難逃Gary的監察，我看到他在倒後鏡中怒瞪著我，我忍不住滿臉含春的輕聲道﹕「仲望！小心揸車呀！」
他的表情告訴我他正氣得七竅生煙，正當我沾沾自喜之際，車身突然一個搖擺，將Fiona的頭搖離我的肩膊，並將她搖醒了。
她揉了揉眼，睡眼惺忪道﹕「嗯......到啦? ......」
我連忙道﹕「未呀，你眼瞓就繼續瞓啦，我可以借個膊頭比你枕喎，到咗我會叫醒你啦。」
Fiona微微一笑﹕「唔駛啦Sam，我挨住呢邊瞓得啦。」說罷就將頭枕在車窗上睡著了。
Gary正一臉得意的從倒後鏡看著我，我忍不住向他伸出了中指。
『屌！有香港腳就用愛膚堅啦！』
一路無事，吃過飯後，我們正打算進場。
小惠看見小賣部馬上拉著我大呼小叫﹕「我要食爆谷！」
我沒好氣﹕「啱啱先食完飯，你食得落咩? 」
「你唔知爆谷係擺落第二個胃咩? 」
我沒有理會她，轉問Fiona﹕「Fiona你要唔要食爆谷呀? 」
Fiona搖搖頭﹕「唔駛啦，我睇戲唔慣食嘢。」
小惠將我拽到小賣部﹕「開場啦，快啲買啦！」
無奈之下我唯有買了一桶爆谷給她。
戲票是小惠早前於網上購買的，她取過戲票後分發給我們。
我看著手上的戲票，卻不知道是否坐在Fiona身旁，於是我在小惠耳邊悄悄問﹕「喂！Fiona係咪會同我坐呀? 」
小惠拍一拍心口﹕「我辦事，你放心！」
結果Fiona果然是坐在我的旁邊，但Gary卻是坐在她的另一邊，各人的座位如下﹕
Gary Fiona 我 小惠
我低聲向小惠埋怨﹕「做咩要比Gary都坐喺Fiona隔離呀? 」
她道﹕「我唔想坐Gary隔離，又無理由要Gary坐你隔離，咁咪咁坐囉。」
我想了一想，若果要附合我和小惠的要求，的確只有現在這個位置能滿足。
電影開始後，啪嗒啪嗒的爆谷嘴嚼聲一直從旁邊傳來。
我忍不住在小惠耳邊道﹕「你食爆谷可唔可以食得細聲啲呀? 女仔之家無嚟儀態。」
我感到右臂被狠狠扭了一下，然後就嗅到有一陣甜香的味道，卻是小惠拿了一顆爆谷放在我的鼻孔前。
我抵受不住誘惑，伸長嘴接過爆谷，卻不小心咬到她的手指了。
還好她沒有驚叫出來，只是又扭了我的手臂一下，但接著又餵了一顆爆谷給我。
我默默接著小惠餵給我的爆谷﹐然後悄悄的嘴嚼著，免得驚動了Fiona。
其實我對於文藝片真的沒有多大興趣，電影放影到一小半我已經忍不住偷偷打了好幾個呵欠，還好Fiona一直聚精會神的看電影，沒有發現我在打瞌睡。
小惠跟我耳語﹕「齣戲都幾好睇吖，好悶咩? 」
我轉過頭以一個無聲的呵欠回答了這個問題。
或許我只對那些荷里活特技大片有興趣吧，這種對白比畫面多的電影真的快讓我睡著了。
小惠白了我一眼，又繼續將視線投到銀幕上。
過了一會，正當我悄悄欣賞著Fiona的側臉時，我感到小惠的手好像在顫抖(她從關了燈開始就抓著我的手臂)，於是我問她﹕「你凍呀? 」
她點點頭。
我從背囊裏拿出外套讓她穿著﹕「凍就出聲啦！喺度私私縮縮！」
她鼓著腮，窸窸窣窣的穿起外套，又繼續抓著我的手臂看電影了。
又過了一會，我留意到Fiona的身體好像也有些顫抖。
Fiona也覺得冷嗎? 但我唯一的外套在小惠身上啊，要問她拿回來嗎? 還是先問問Fiona?
正當我還在糾結之際，Gary已經快我一步將他的外套披在Fiona身上，我還看到Fiona跟他說了聲謝謝！
Damn！給他搶先一步了！可惡！
都是小惠害的！若不是她拿了我的外套，我就能比Gary更早討好Fiona了！
我生著悶氣看著銀幕，電影在播放甚麼我都看不進腦子裏了。
這時候Gary又遞了一瓶飲品給Fiona，Fiona道了謝又接過了。
Fxck！Fiona只說不吃東西，可沒說過不喝東西！我竟然沒想到！真笨！我真笨！
一連兩個討好Fiona的機會都給Gary搶走了，我後悔得想死，就更加沒有留意電影在說甚麼了。
影院的燈光再次亮起來，原來電影已經播影完畢。
我們離場後，Fiona將披在身上的外套還給Gary，Gary卻道﹕「你凍就著住先啦，可以返學先比返我喎。」
Fiona沒有拒絕，直接將外套穿在身上又向Gary道了謝。Gary馬上給我一個勝利的眼神，恨得我牙癢癢的。
接著Fiona興致勃勃的討論劇情﹕「嗯，齣戲都幾好睇喎！我好鍾意最後男主角同女主角講嗰句對白，好感動呀......」
Gary道﹕「我都覺得係，不過我覺得之前一幕男配角同男主角講嗰句嘢好有意思。」
Fiona猛然點頭﹕「係呀係呀！我都覺得係呀！」然後她轉過頭問我﹕「係呢Sam，你覺得套戲點呀? 」
大檸樂！他媽的這套戲是說些甚麼的? 我壓根兒就沒有留心看超過一分鐘，連男女主角還弄不清誰跟誰呢！
我結結巴巴的﹕「幾...幾好睇吖.......我都好鍾意最後男主角同女主角講嗰句對白......」完全不知道劇情的我，現在只能拾人牙慧祈求能敷衍過去。
還好小惠馬上道﹕「我呢，就鐘意個女配角多過女主角喇，個女主角太完美啦，女配角咁多缺點呢啲先似返個正常人嘛。雖然我都覺得齣戲幾好睇，但係劇情有啲唔make sense囉，個男主角邊值得咁多女角鍾意佢呀。」
他們三個繼續興高采烈的討論劇情，我只能在旁邊唯唯諾諾的和應。
直到來到了商場外的一處岔路，Fiona跟我們說﹕「好啦，你哋送到呢度得啦。」
我與Gary同時互望一眼，相信彼此都有送Fiona回家的想法，但因為對方的存在所以都不可能開口，就在我們猶豫之間，小惠已經跟Fiona揮手道別，我們也只好作罷。