《唔係啩！真係有個老婆教我追女仔！》: 第九章
Sem 2開學前的一個晚上，我看畢了剛更新的章節。
『Fiona』 P.E.課選擇了社交舞? 不是吧?
於是『我』也跟著選了社交舞，『小惠』也是......
那個『高大衰』是甚麼人? 好像很討人厭，而且看他的樣子，像是想追求小惠似的，我該怎麼辦?
然後『小惠』令『我』受傷了，『Fiona』扶『我』回宿舍，而且還幫『我』揉跌打酒? ！
嘩！真有這麼正點的好康嗎? Fiona幫我揉跌打酒啊！只是想想就已經......
不行不行！我可不能褻瀆了Fiona。
不過『Fiona』發現了『我』跟『小惠』同房，但卻又好像有點醋意似的，『她』已經喜歡了『我』嗎?
這雖然是一個好消息，不過現實中Fiona也是這樣想嗎? 上次給她看到我跟小惠手牽手也好像沒甚麼似的，原故事中她可是躲起來避開了，究竟她現在是怎樣想的?
胡思亂想之間，房門打開，小惠回來了。
我裝作很自然的關掉紙言，打開了別的網頁。
小惠還是看出了端倪﹕「做咩一見我就鬼鬼鼠鼠呀? 又睇AV呀? 」
我沒好氣﹕「無呀，唔信你自己過嚟check吓history喇。」反正她只是以為我瀏覽色情網站，就算知道我在看紙言也會不屑一顧吧。
她翻了翻白眼﹕「你比得我check即係已經delete哂啲history啦。」
不可理喻！這個女人真是不可理喻！
我雖然懶得跟她解釋，但卻有別的事跟她商量﹕「小惠，Fiona sem 2 P.E.係咪揀咗社交舞呀? 」
小惠有點驚訝﹕「你消息都幾靈通喎！我都係知道無耐咋。」
我有點沾沾自喜﹕「呵呵！緊係！」然後我又道﹕「咁我就緊係會揀社交舞啦，你都係㗎啦? 」
她噘噘嘴﹕「鬼叫我要幫你咩，咁緊係啦。」
「咁就得喇！」然後我就將我的計劃告訴她。
她聽完後有點疑惑﹕「有無咁順利呀? Fiona會扶你返嚟都唔出奇，但仲會幫你捽埋跌打酒? 」
「信我啦，一定得嘅！」既然故事是這麽寫，應該就會發生吧。
她繼續以懷疑的眼光看著我，好像我的計劃根本行不通似的。
我又想起另一件事，所以也沒有管她的懷疑眼光。
「你覺得呢，比唔比Fiona知道我同你住同一間房呀? 」
她想了想，道﹕「照睇上次佢見到我哋拖手，又好似無乜特別反應咁，我諗就算佢而家對你有好感，都只係限於朋友之間嘅好感，仲未進展到男女朋友嗰隻。」
嗯......我也有這樣的感覺，怎麼好像跟故事的發展差那麼遠? 就是因為剛開始的時候給Jodi攪局了嗎?
她又道﹕「你而家隔晚都會搵Fiona，係咪? 咁你覺得同佢嘅感覺點呀? 」
「每次同佢講完你都打比我問㗎啦，你都知㗎，咁都要問? 」每次我跟Fiona談完沒多久，小惠都會詢問結果。奇怪的是，她那段時間總是不在房間裏，所以都是致電給我的。
她白了我一眼﹕「我係問你同佢傾偈嗰陣個感覺係點呀。感覺！Feeling！」
我回想一下，道﹕「幾好吖，傾得幾開心呀。」
「嗯...咁呀......」就在此時，有音樂響起。
很愛很愛你 所以願意 捨得讓你 往更多幸福的地方飛去
很愛很愛你 只有讓你 擁有愛情 我才安心
我認得這是小惠的電話鈴聲。
她看了一眼﹕「我出去聽個電話先。」然後拿起電話就往外走。
要接甚麼電話這麽神秘? 之前她接電話都是大大方方的，就算是Michael或呀君找她也是在我面前接聽的。到底是誰呢?
我按捺不住好奇心，躡手躡腳的走到門旁，將耳朵貼上去看看能不能聽到甚麼。
可惜小惠談話的聲音太小了，我根本甚麼都聽不到。
為防被她發現我偷聽，我聽了一會兒沒有發現就坐回書桌前。
頃刻，她若無其事的回來，又繼續道﹕「咁...我覺得都係唔好比佢知住。」
「你驚佢以為我哋有嘢? 」
「我係驚佢就算以為我哋有嘢，佢自己都無乜嘢。」小惠進一步解釋﹕「我覺得等Fiona對你開始有感覺，先比佢知我同你一齊住，等佢呷吓醋，咁個效果會好好多。」
說的也是，故事中的『Fiona』就是因為懷疑『我』和『小惠』的關係而令到自己胡思亂想，她越是這樣想的話，應該會越喜歡我吧。
「既然係咁，嗰日唔該你執執間房，費事比Fiona睇到你啲嘢啦。」
「係啦係啦......」她的表情是萬般不情願。
P.E.課當天，我跟小惠前後腳前往體育館的活動室，免得給Fiona看見了又以為我們有甚麼。
「咦? 乜你哋都報咗社交舞呀? 咁啱嘅? 」Fiona和小惠正在閒談，我故作驚訝的走過去。
「咦? 係喎，又會咁啱嘅? 」說話的卻不是她倆，而是在我背後出現的Jodi。
這次我是真心驚訝﹕「乜你都報咗呢堂呀? 」
Jodi瞪了我一眼﹕「你個樣唔駛咁驚訝呀? 」
我搔搔頭傻笑﹕「估唔到我哋四個都報埋同一班啫......」
Fiona奇道﹕「你又會揀跳舞嘅，你唔係鐘意打波咩? 因為小惠都揀咗跳舞所以陪佢? 」
我連忙搖手﹕「唔係唔係，我都係啱啱先知小惠都係上呢堂。我見咁難得有得學跳舞，咪試吓囉。」
Jodi撞了我手臂一下，輕聲道﹕「喂，你真係想學跳舞? 」臉上的表情盡是說她不太相信。
就在這時，老師對大家說話﹕「好喇各位，今日係第一堂，大家各自搵一個partner先，嚟緊呢個學期都會同你個partner一齊跳舞㗎啦。」教社交舞的老師是一位中年女士。
我輕聲道﹕「遲啲再同你講。」然後轉頭給了小惠一個眼色。
小惠會意，馬上走過來跟Jodi道﹕「Jodi，你同我一組吖。」Jodi馬上點頭稱善。
我偷偷的瞥了Fiona一眼，正好跟她的目光對上，我立刻裝模作樣道﹕「May I be your partner? 」
Fiona噗嗤一笑﹕「My pleasure！」
分組完畢，同學們兩個兩個的站在一起，老師看了我們一眼，然後向小惠她倆和另外兩個男生道﹕「不如你哋一男一女一組吖，你睇吓其他同學都係咁。」
他們四個環顧四周，發現其他組合全是一男一女的。
然後他們四個人八隻眼互望一下，其中一個高大俊朗的男生向小惠微笑道﹕「咁不如我哋一組啦。」
Jodi的樣子好像有些不滿，但礙於這是老師的命令，她也只好接受。於是小惠就跟這個男生(他就是高大衰? )一組，而Jodi則跟另外一個戴眼鏡的男生一組。
老師開始作出講解，又找了一個女同學出來，播放音樂跟她一起作示範。
老師讓女同學的手搭在自己的肩膊上，然後一手牽著她，一手放在她的後背。
嗯…社交舞真不錯，這樣就能跟Fiona有親密的身體接觸了，待會可不要露出一副急色相，要裝得靦腆一點。
但想深一層，小惠跟那個高大衰豈不是都會這樣子嗎?
我朝小惠他們看過去，他們正一邊留心看著示範，一邊聊天，相處得好像挺愉快的。
其實現在看起來，那個高大衰也只是外型討好一點而已，也沒有甚麼地方「衰」吧？『我』那麼討厭他，是因為小惠的關係嗎? 想起來，『我』明明也是十分喜歡『Fiona』的，但倒是會經常吃『小惠』的醋，是因為小惠的身份是未來老婆? 還是因為已經喜歡了她? 我不知道，連故事中的『我』也弄不清楚這份感情。
羊先生不會最後安排『我』和『小惠』一起吧? 那『Fiona』怎麼辦? 小惠口中所說的未來老公又怎麼辦(雖然我到現在也有點質疑她是我未來老婆的這個身份? )
「Sam? 到我哋跳啦，做咩呆哂呀? 」Fiona拍一拍我手臂，讓我回到了現實。
「哦...哦? 係...係咩? 我諗緊點跳諗到入哂神添......」還是專心點，將心機放在Fiona身上吧。
Fiona笑道﹕「好以好簡單咋喎，要諗到入哂神咁誇張? 」
「咁...我哋開始囉......」我裝作有點害羞的握著她的手，又輕輕用手貼著她的背，開始隨歌起舞。
雖然早有心理準備，但跟她這樣的近距離接觸，還是有點緊張。
可能連Fiona也感到我的心情﹕「你好緊張呀? 你隻手咁熱嘅? 」
確實是有一點，於是我開了個玩笑解窘﹕「乜你拖住個靚仔唔緊張咩? 我而家拖住個靚女就好緊張啦......」
Fiona鬼馬的道﹕「係咩? 咁可能因為我拖緊嗰個唔夠靚仔啩。」
我裝了個鬼臉﹕「我知啦，唔駛提我㗎！」
她給我怪模樣逗得臉上盡是笑意。
啪，音樂驀然停止了，我倆不自覺的停下來，然後老師的聲音傳來﹕「大家都跳得唔錯，而家可以休息一陣先。」
我偷偷看了看我倆牽著的手，Fiona應該沒有留意我正牽著她吧，就裝作不知道好了。
我牽著她回到場邊的長椅坐下，坐下時她卻輕輕甩開了我的手。
Fiona她......嗚......還是慢慢來吧......
我馬上裝作醒悟過來，一臉不好意思的﹕「sor...sorry呀，我...我都唔記得咗......」
Fiona靦腆的笑了笑﹕「無嘢呀。」
我望向小惠，她正和高大衰聊得正歡。而高大衰不知道說了甚麼，小惠笑得臉都紅起來。
才剛認識而已，他們在聊甚麼呢? 小惠竟然笑得這麽開懷。
這時候老師道﹕「好喇，今次我哋試吓換partner，大家各自去搵另一個partner，再練過頭先隻慢三。」
Jodi走過來跟Fiona道﹕「Fiona，同你換partner好嗎? 」
「哦，好呀。」然後她就去找Jodi原來的舞伴。
音樂再次響起，Jodi牽著我就跳了起來。
我雙腿隨著音樂移動，眼光卻尋找著Fiona的身影，她正好端端的跟眼鏡男跳舞。
Jodi訕笑道﹕「做咩呀? 好驚你個Fiona比人 擔走咗呀? 」
我白了她一眼，沒有回答，她又問﹕「都估到你唔係剩係想跳舞咁簡單㗎啦，你同Fiona點呀? 」
「無...無咩點呀，都係咁上下啦......係呢，我有樣嘢想問吓。」我想起她既然是Gary的朋友，應該知道些甚麼吧。
「嗯? 」
「你同Gary好熟㗎? 」
她蠱惑的看著我﹕「有咩想問呀? 」
我有點不好意思﹕「其實你知唔知，佢對Fiona有無意思? 」憑我的直覺，我覺得他是喜歡Fiona的。
她想了想道﹕「唔知呀? 不過要唔要幫你問吓? 」
「唔...唔駛喇，突然問人呢啲嘢好奇怪嘅......」雖然我覺得Gary應該猜到我喜歡Fiona，但我也不想Jodi打草驚蛇。
Jodi沒有再說甚麼，於是我們繼續跳舞。
我開始轉而尋找小惠的蹤影。
她正跟另外一個男生跳舞，也是好端端的沒甚麼事發生。
只聽Jodi又嘲笑我﹕「點呀? 今次驚小惠比人擔走? 」
我馬上移開目光，盯著Jodi﹕「唔係呀，望吓咋嘛。」Jodi說得對，我幹嗎這麽在意小惠? 我又不是喜歡她。
老師的聲音又響起﹕「好，大家再換一次partner。」
這次小惠主動走過來抓住我的手，而我則看到高大衰去了找Fiona做舞伴。
我想起故事中『高大衰』的對白，確是有點擔心，於是跟小惠耳語﹕「我哋跳近啲Fiona佢哋囉。」
小惠瞪了我一眼﹕「跳隻舞啫，唔駛咁擔心呀? 」不過她還是順著我的腳步移近他們。
我看見高大衰也只是正經百八的跳著舞，手還是放在應該放的地方。於是我放下心來，專心的跟小惠跳舞。
「唉哎！」小惠不小心踏到我的腳，輕呼一聲就倒在我懷裏。
小惠緊緊摟住了我的腰，一陣溫柔軟玉在懷，淡淡香氣撲鼻，令我的臉熱燙起來，說話也變得結結巴巴﹕「喂...喂......你無嘢嘛? ......」
「無...無......」小惠低下了頭重新站好。
冷靜過後我想起原訂的計劃，於是我在她耳邊輕聲道﹕「你一陣就好似頭先咁大力踩落嚟啦。」
她有點猶豫﹕「真係踩? 」
我肯定的點頭﹕「係，仲要大大力！」No pain no gain這個道理我還是懂的。
過了一會兒，她道﹕「準備啦。」
我點點頭，然後她就踏在我的腳背上。
我皺了一下眉，痛是有點痛，但卻甚麼事也沒有，我想腳背上連紅印也沒有留下吧。
我小聲道﹕「你大力啲啦，咩事都無呀。」
小惠應了一下，又在我的腳背上踏了一下。
我臉容扭曲了一下，這次是有點感覺了，但離開瘀傷應該還有段距離吧。
我搖頭示意不行，要她再來一遍。
小惠也皺起眉頭，咬一咬牙然後發狠用腳後跟踏下來。
「唉哎！」我倆同時叫了起來，並跌倒地上。
這次確切感到腳背劇痛，但為甚麼小惠也像受傷一樣倒地了?
我悄悄問她﹕「喂，做咩你踩完我好似你仲痛過我咁嘅? 」
小惠臉色刷白，額上開始冒汗，她捂著了腳丫子，聲音很痛苦﹕「我...踩落去嗰下好似拗柴......」
不是吧? 結果竟然是她傷得比我嚴重?
這時候，其他人都停了下來看著我們，老師也走過來關懷的問道﹕「同學，你哋無事嘛? 」
小惠勉強回答﹕「無...無乜嘢，隻腳拗到有啲痛啫......」
老師看一看手錶﹕「時間都差唔多，呢位同學又受咗傷，我哋今堂就上到呢度啦。」
其他同學陸續散去，只剩下Fiona、Jodi和高大衰圍著我們。
Jodi好像很擔心﹕「小惠你無事嘛? 」
小惠搖搖頭。
高大衰也問小惠﹕「你真係無事? 駛唔駛帶你去睇醫生? 」
小惠回答﹕「唔駛啦，我抖一陣就無事啦，你走先啦。」
高大衰猶豫了一下，最後還是道﹕「咁好啦，你小心啲啦，下堂見，拜拜。」
小惠微笑著揮手﹕「下堂見啦，拜拜Roy。」
原來高大衰叫做Roy。
Roy走了後，Fiona有點擔心道﹕「小惠你點呀? 」
Jodi看了我倆一眼﹕「又會咁唔小心嘅? 」
小惠跟Jodi道﹕「Jodi，你可唔可以扶一扶我去洗手間呀? 」
Jodi和Fiona聞言馬上扶起小惠，小惠卻跟Fiona道﹕「Fiona你同表哥喺度等啦，有Jodi一個扶我就得啦。」
她倆離去後，我和Fiona坐下等候。
小惠留下我倆幹甚麼? 給我機會約Fiona嗎? 但她受傷了，怎麼說我也不能丟下她不管吧，而且Fiona一定不會讓我這樣做的。
Fiona問我﹕「小惠做咩會整親嘅? 」
「哦，佢唔小心踩到我，跟住咪搞成咁囉。」
說起來，我好像也是受傷了的，但現在卻沒感到腳背有多痛。
我脫掉鞋襪檢查一下腳背，也只是紅了一遍，要我裝作不能走路實在是很牽強。
這個時候她們回來了，小惠向我道﹕「表哥過嚟扶一扶我先，Jodi佢有事要走先啦。」
我和Fiona立刻過去扶著小惠，Jodi向小惠道﹕「你自己小心啲啦，我今晚再嚟睇你啦，拜拜。」
Jodi走後，小惠問Fiona﹕「Fiona你可唔可以扶我返去hall呀? 」
Fiona點頭﹕「可以呀，不過其實有呀Sam孭你，你咪唔駛自己行囉。」
我和小惠互望了一眼，小惠的神情顯出了一刻的害羞，但又馬上變臉，向Fiona撒嬌﹕「係佢整親我嘅，我唔要佢孭我。」
Fiona笑道﹕「好，好好。」然後轉頭跟我道﹕「咁呀Sam唔該你幫我哋拎袋吖。」
就是這樣，Fiona攙扶著小惠，我則亦步亦趨的跟著她們。
就在離開體育館的這一小段路程，眼看小惠靠著Fiona顫顫巍巍的走著，臉上不時流露出痛楚的神色，我忍不住道﹕「喂！都係等我孭你啦！」然後半蹲在她的身前。
小惠嗔道﹕「唔駛你呀！走開！」
我沒好氣﹕「唔好以為我好想孭你先得㗎，你行得咁慢，返到hall都天黑啦，我驚Fiona肚餓咋。」
Fiona噗哧一笑﹕「係呀小惠，我真係有啲肚餓，你就比呀Sam孭你啦。」
小惠哼了一聲，我就感到背上多了一個軟綿綿的嬌驅，她的體香也若有若無的刺激著我的嗅覺。
小惠拍了我的後腦一下﹕「喂！行啦！再唔行天黑啦！」
「好好好......」現在當我是甚麼了? 坐騎嗎? 若不是看在你是因為幫我才受傷的，我才不管那麽多呢！
小惠比想像中的輕，所以我揹起來毫不費勁，很快我們就回到宿舍飯堂。
我將小惠輕輕放在座位上，她就對我們道﹕「你哋去買嘢食啦，表哥你幫我求其買個意粉得啦。」
我和Fiona來到收銀處，卻突然聽到一把我最不想聽到的聲音。
「Hi，Fiona，又會咁啱嘅? 」說話的正是Gary。
我向他打招呼﹕「Hi，Gary，又會咁啱撞到你嘅。」
Gary看了我一眼後又將視線投向Fiona﹕「係呀，食完飯要去新校上堂嘛。係呢，不如一齊食飯吖。」
Fiona道﹕「好呀，我哋坐嗰邊呀。」她指了指小惠的方向。
雖然我萬般不情願，但也沒理由拒絕Gary來同枱吃飯的。
我們三個捧著午餐回去，小惠看見Gary後有點愕然。
「咦? 又會咁啱嘅Gary。」
Gary瞅了小惠的腳丫子一眼﹕「係呀，聽佢哋講你拗柴喎，無事嘛? 」
「有啲痛啫，無乜事。」
原本的計劃，是讓小惠踏傷我，然後借機讓Fiona扶著我回來，可以的話讓她送我回房間再揉跌打酒，之後趁著一起吃飯的時候約她去濕地公園的。不過看現在的情況，不說受傷了的是小惠不是我，而且Gary也在，我沒可能可以約Fiona單獨郊遊吧，還是等晚上打電話再約她好了。
就在我剛剛打消邀約Fiona的念頭，Gary卻道﹕「Fiona，前幾日聽你講好似想去睇新上畫嗰齣文藝片嘅? 我都有興趣喎，不如今個星期日一齊去睇吖。」
沒想到我才決定晚點才發動攻勢，Gary卻已經先發制人。
為甚麼他要在我面前約Fiona呢? 難道他沒想過我會破壞他嗎? 還是他很有自信一定會成功?
我正考慮要不要說也有興趣，然後厚面皮的跟著他們，小惠已經代替我說出口了﹕「咦? 我都想去睇喎！我又去我又去！」
Fiona本來還在考慮中，但她聽到小惠也想去後馬上就答應，然後還問我﹕「Sam，你有無興趣呀? 」
噢！Fiona邀約我！她也想我去嗎?
我立刻答應，然後以一個勝利者的眼神看了Gary一眼，他的眼裏瞬間露出了一秒的敵意。
果然！他是想追Fiona的！
Gary又道﹕「咁不如我哋去睇戲之前，去行吓街先吖......」
小惠沒等他說完，就馬上道﹕「Nonono......街有乜好行喎。」她轉向Fiona道﹕「Fiona，你之前咪話想去濕地公園睇雀嘅? 原來表哥佢都好鍾意去呢啲地方㗎！不如我哋去完濕地公園先再去睇戲囉！」
Fiona變得很雀躍﹕「真㗎? 好呀好呀！原來呀Sam你都鍾意觀鳥㗎? 」
老實說我是有點心虛，不過也只能強充﹕「呀...係呀......有啲興趣咁啦，我每年都會去睇一兩次㗎......」
Gary也不甘示弱，馬上向Fiona放出了必殺技﹕「其實我都好想去觀鳥㗎，咁不如嗰朝我車埋你去吖，我哋可以早啲去到，一路食早餐一路等呀Sam佢哋嘛。」
可惡！我可以怎樣反擊? 難道要說我當天會乘的士然後順路載她一程嗎?
正當我煩惱之際，小惠已經連消帶打的幫我解決了﹕「係喎！Gary你有車喎！咁你嗰朝不如嚟車埋我同表哥啦！咁我就可以瞓晏啲喇！好嘢！」
Fiona馬上附和﹕「好喎！咁不如我哋約埋喺度食早餐先一齊出發啦！」
我眼見Gary的表情變得很無奈，心裏暗暗好笑，這時候他也只能接受吧。