《唔係啩！真係有個老婆教我追女仔！》: 第六章
我回到房間，馬上查看一下紙言，果然是更新了。
十分鐘後，我看畢更新的章節，不禁思潮起伏。
小惠回來是幫我追Fiona? 老婆幫老公追求另一個女人? 天下間還有比這更荒謬的事情嗎? 而且『她』說是因為要完成『我』的心願而回來幫『我』，這個理由也太牽強了。一個女人就算怎麼愛她的老公，也無法忍受他追求另一個異性吧? 何況還要幫助他? 但若果她是說謊的話? 又怎會知道我的資料? 又怎會知道我今天約了Fiona，還能在我表白前阻止了我? 也難怪故事中的『我』馬上就相信了『她』。
但另一方面，剛才我說要吻她時，她卻緊張得像是要獻出初吻一樣，已經成為人妻了還會這樣羞澀嗎?
如果她說的都是事實，那麼整件事就沒有懸念了，她真的是我老婆，回來是幫我追Fiona的(雖然這一點我是覺得很可疑的)。
但如果她是說謊的話，那麼一大堆的問題就出來了，她到底是誰? 她為甚麼知道我的一切? 她為甚麼要幫我?
可惜故事只更新到『我』剛回房間，『樂言』跟『我』說Kitty有一個美女roommate為止，我也沒有辦法知道得更多。
要問一下羊先生嗎?
嗯......不過若果我是作者的話，這個大概是大結局時才會揭曉吧，現在問了也是白問。
不過問一下也不會少塊肉，於是我就發了個訊息給他。
這個時候，我收到了Fiona的訊息。
「我返到屋企啦，今日我好開心呀！多謝你陪咗我一晚^_^」
噢！給小惠的事煩著，我都差點忘了Fiona。
我馬上回覆了她。
「我都係呀！我啱啱返到hall啦。」
「係呢，Jodi佢無嘢呀嘛? 頭先佢個樣好似唔多妥咁。」
糟了！我完全忘記了Jodi！我應該怎樣跟Fiona解釋才好?
我想了好一會兒，才答道﹕「Jodi佢頭先走得好快，我追都追唔切，我諗佢應該無嘢啩。」我已經盡量婉轉表示我對Jodi不太感興趣，只是當她是普通朋友，希望Fiona能明白吧。
「吓? 咁你而家快啲去搵佢啦！我諗佢可能有啲唔開心，你快啲去關心吓佢啦！」
天啊！看來她不明白啊！難道要我畫公仔畫出腸? 直接道出我喜歡的是你，而不是Jodi嗎?
就在我不知怎樣回覆她的時候，Fiona又發來了訊息。
「我去沖涼瞓覺啦，拜拜~記得搵Jodi呀！」
喂...喂！等等呀！我還沒有跟你約定好下一次啊！
我頽然放下了電話，有點不知要做甚麼的感覺。
要再找Fiona嗎? ......唉......她已經說要休息了，還是下次吧。
嗯......還是先找小惠好了，我現在想先確認她的目的是否真的是幫我追Fiona。
我馬上打電話給她﹕「喂，小惠，你瞓未? 」
「...未呀......」
「我有啲嘢想問你，我而家去你房搵你啦。」我未待她答應，就已經掛上了電話。
文章裏頭說小惠是住在609的。我站在609的門外，正想敲門，房門卻自動打開了。
「咦? 你企喺門口做咩呀? 」開門的竟然是樂言，難怪我也覺得609這麼眼熟，我都忘了Kitty是住在609的。那麼，Kitty跟小惠不正是roommate嗎?
「搵人呀。」我逕自走入房間，Kitty和小惠同時瞪著我。
我向Kitty道﹕「Kitty你可唔可以借間房比我一陣呀，我有啲嘢同佢講。」我指了指小惠。
Kitty有點愕然，但還是道﹕「哦......好...好呀......」
樂言訝道﹕「乜你兩個識㗎? 你哋......」
我將他推了出去，道﹕「有咩等我一陣返上去先講好唔好? 」
樂言將吐到嘴邊的字吞回肚子裏，帶著古怪的表情拉著Kitty離開了。
房門重新關上後，小惠打破沉默﹕「你...點知我住609㗎? 」
糟了！我忘了她沒有告訴我她住在哪間房間！
我眼珠子一轉，想出了一個理由﹕「頭先樂言話我知Kitty嚟咗個新roommate，咁我咪估係你囉。」
小惠點點頭，沒有再說甚麼。
「我想問......嗯......你返嚟嘅目的係......」
她吸了一口氣，道﹕「我返嚟係幫你追Fiona。」
果然如此！
她見我默不作聲，於是問我﹕「你...你唔問我點解嘅? ......」
原因我都知道了，所以我也沒有興趣問下去。
我答道﹕「你一定有原因先會咁做嘅，既然你係我老婆，你點都唔會害我啩? 」雖然到這一刻為止，我對於她是我老婆這個說法還是有點疑問。
她聞言急道﹕「我...我真係嚟幫你㗎！我......」
我示意她冷靜一點﹕「唔駛咁緊張，我信你，我都諗唔到你呃我嘅話會有咩好處。」
她的眼神閃爍了一下，轉眼又回復平常。
我捕捉到了這一瞬間，心裏不禁泛起疑竇。
她真的有甚麼隱瞞著我嗎? 那會是甚麼呢? 難道她的目的不是幫我追Fiona?
剎那間我靈光一閃，想到了一件關鍵的事情。
對了！故事叫做《我老婆教我追女仔》，那麼她真的是來教我追Fiona的。同樣地，她就是我的老婆啊。
但回想起她的言行舉止，的確相當可疑。但若果她不是我未來老婆，那麼又會回到最初的死胡同–她到底是誰? 她為甚麼知道我的一切? 她為甚麼要幫我?
一直想著這問題卻不得要領，直到小惠的聲音驚醒了我﹕「你......諗緊咩呀? ......」
我回過神來，隨口答道﹕「無，我諗緊，一陣我返上去樂言一定問我同你係咩關係，咁我點答呀? 」
她側頭想了想，道﹕「你話......你係我表哥囉。」
「表兄妹? 呢個關係好咩? 」
「咁一係你話事喇。」
「呃......」未來老婆是不能說的，那麼是朋友? 舊同學? 前女友? 親戚? 鄰居? 我腦中飛快地轉著念頭，希望找到一個比較合適的關係。
我想得有點頭昏腦脹，想來想去也不知道用哪一個關係比較好，於是揮揮手道﹕「是旦啦，表兄妹就表兄妹啦，你早啲抖啦，晚安。」
我離開了房間，剛經過lounge時，正好碰到Jodi從裏面走出來。
她嚇了一跳﹕「嘩！嚇死人咩！你又會喺度嘅? 」
唉哎，我這才記起還要解決跟Jodi的事情，不過這件事該怎麼說呢? 她又沒有表示過喜歡我，而且平時跟她相處我也沒有感到甚麼。剛才的事，大概只是Fiona一個人誤會了吧。
「係呀，Fiona話你臉色唔係幾好，咪嚟睇吓你點囉。哈，原來你係想睇頭先齣戲呀? 又會咁啱嘅? 咁下次你唔駛請我睇戲啦，請我食飯得啦！」我故意說起Fiona，看看她有甚麼反應。
「Fiona佢叫你睇吓我點呀? ......」她頓了頓，又道﹕「你...同Fiona拍拖? ......」
我正不知如何婉轉告訴她我正在追求Fiona，這正好是一個機會。
我連忙搖手笑道﹕「哈......唔...唔係呀，我哋普通食飯睇戲啫，雖然我係好想......」
Jodi恍然大悟道﹕「哦~原來你鍾意Fiona......」
我不好意思的搔搔頭﹕「係...係呀......」
她閃過一剎失望的表情，轉眼又笑道﹕「呵~咁我唔請你睇戲食飯嚕，費事比Fiona見到誤會啦。」
我暗嘆一口氣，Fiona已經誤會了。不過現在也好，起碼她知道我想追Fiona。
我笑道﹕「唔緊要呀，但你要幫我喎。」
她不懷好意﹕「呵！咁就睇吓你識唔識做啦！」
我笑罵﹕「明明係你要請我食飯，而家仲調返轉呀? 算算...我聽朝請你落樓下hall can食早餐啦。」
她噘噘嘴道﹕「咁孤寒㗎......一個hall can早餐就想打發我......唉，算啦，好過無，聽朝見啦。」然後就逕自回房去了。
回到房中，樂言馬上走過來抓住我，道﹕「講！你同小惠係咩關係? 」
「得！得！得！我講！我講！放手先唔該。」
他放開了我，與Kitty一起坐在床上瞪著我。
我給他倆看得有點不好意思，忍不住道﹕「望咩啫? 」
樂言不懷好意的笑道﹕「無，我無諗過你呢個宅男會識得小惠呢啲靚女啫。」
甚麼意思? 我不配嗎?
我有點不服氣﹕「超！Fiona仲靚啦！我咪一樣同佢食飯睇戲！」
他搖搖食指﹕「咁你就唔啱啦，我覺得小惠同Fiona各有各靚，各有各好。」
我望向Kitty﹕「Kitty你話吓佢啦，佢而家對第二個女仔評頭品足喎。」
Kitty微笑道﹕「我都覺得佢講得啱喎。」
樂言大喝一聲﹕「喂！咪拉開話題先，你哋究竟係咩關係? 」
我有點心虛﹕「無...無咩關係呀......佢...佢係我表妹咋嘛......」
樂言好像不太相信似的﹕「表妹? 無聽你講過有個咁靚嘅表妹嘅? 」
我沒好氣﹕「我駛唔駛攞埋個族譜出嚟話你知我有幾個三姑同六婆呀? 」
樂言嘻皮笑臉道﹕「咁又唔駛，剩係話我知仲有幾多個好似小惠咁靚嘅表妹表姐呀，堂妹堂姐呀就得喇。」
我沒好氣的看著Kitty﹕「喂！你話吓佢啦！」
Kitty笑了笑沒有理會我。
「係喎，我哋聽朝約咗小惠食早餐，你都一齊呀！」
「吓? 但我頭先約咗Jodi喎......」
樂言奇道﹕「乜你條友真係同Jodi有嘢呀? 」
「咪亂噏啦，我頭先同Jodi講咗我追緊Fiona啦。」
他笑道﹕「咁Jodi佢咪好傷心? 」
我翻了翻白眼﹕「傷你個死人頭，佢根本就無嘢。」
這個時候Kitty問樂言﹕「乜Jodi鍾意呀Sam咩? 」
他聳聳肩﹕「唔知呀，不過考試前有朝我見到佢兩個瞓喺同一張床......」
「喂喂喂！」我來不及叫停他，就這樣讓他說了出來。
Kitty聞言手掩嘴巴，瞪大眼睛的盯著我，一副難以至信的樣子。
我連忙道﹕「你咪聽佢講一半唔講一半先得㗎，我哋嗰晚齋瞓覺，咩都無做過。」我又重覆一遍﹕「真係咩都無做過！」
樂言笑著對Kitty道﹕「我遲啲再重頭講一次你知嗰日我見到啲咩，我嗰日見Jodi個表情，應該係有啲嘢嘅......」
「喂喂喂！咪再亂噏啦。」
他舉起雙手作投降狀，笑道﹕「okok，唔講唔講。咁聽朝叫埋Jodi一齊食咪得囉。」
我無奈點頭，現在唯有如此吧。
睡前我竟然收到羊先生的答覆(之前發了好幾次他都沒有回覆，所以我才十分驚訝他這次回答了我)，不過他的答覆果然是我預料的那樣。
「到底小惠係咪未來返嚟，你睇落去咪知囉，咁心急做乜? 」
翌日早上，我和樂言到了六樓。
「喂，我去搵咗Jodi先，我哋一陣過嚟搵你哋。」我交代一下，就先到Jodi房找她。
咯咯~
房門打開，Jodi精神奕奕的﹕「早晨。」
「嗨，早晨呀，行得未呀? 」
「嗯，行得喇。」她關上了房間，然後跟在我身後。
「樂言佢哋都會一齊食喎，你唔介意嘛? 」
Jodi白了我一眼﹕「我做咩介意呀? 我哋又唔係去撐枱腳。」
說的也是，我幹嗎問這個蠢問題?
說話之間，我們已經來到了609，我敲了敲門。
開門的是小惠，她看見我後道﹕「早晨表哥。」然後向我身後的Jodi道﹕「你好呀Jodi，我係呀Sam表妹呀，你叫我小惠得喇。」
她竟然連Jodi也知道是誰。
Jodi愣了愣﹕「哦......你好呀，小惠......」她定睛看著小惠，然後道﹕「你...同Kitty係roommate? 」
小惠微笑道﹕「係呀，我而家先轉嚟BU讀。」
這時候樂言突然出現在小惠身後﹕「喂！你哋唔好企喺門口啦，落去一路食一路傾好嗎? 」
於是我們一行五人就到了宿舍飯堂吃早餐。
樂言咬了一口雞蛋，然後不懷好意的看著我﹕「係呢，你又會而家先知小惠轉嚟讀書嘅? 」
「呃......」霎時之間，我也想不到甚麼藉口，只能支吾以對。
坐在我身旁的小惠挽著我的手臂，甜甜笑道﹕「我今次返嚟專登無話比表哥知，等佢有個驚喜嘛！」
樂言意有所指的道﹕「哦~咁睇嚟你哋嘅感情都幾好喎。」
小惠和應道﹕ 「係呀！我哋由細玩到大㗎！到我去外國讀書先幾年無見咋嘛。」
『由細玩到大? 唔係呀? 你玩到咁大? 』我不禁心裏在抱怨。
樂言眼珠子一轉，曖昧的看著我，然後作恍然大悟狀﹕「哦~仲要係青梅竹馬添呀！」他這個曖昧的眼神，令我懷疑他正打著甚麼壞主意。
接著整頓早餐的內容都是圍繞著小惠。就連Jodi和Kitty都對她很感興趣。
他們有說有笑，談笑風生，我倒像局外人一樣的坐在旁邊。不過反正我也沒有興趣加入他們的話題，就逕自拿出電話看一看紙言了。
不看還好，一看就發現不得了！原來樂言打算跟小惠調換房間，難怪他剛才的眼神這麼討厭。
怎辦好呢? 要換嗎? 雖然說同房由一個臭男人變成一個美少女，是我幻想已久的心願，但從文中看來，她跟我同房後就馬上管東管西的，比我媽還煩，還真不想讓她來。而且我已經喜歡Fiona在先，我可不想對不起她啊！老實說，跟一個美女日夜相對，而且她還說是你的老婆，要不產生感情是很難的事。但我轉念一想，若果真的跟小惠同房的話，或許就能發現她來歷的一些蛛絲馬跡，說不定能知道她的真正身份。
嗯......我應該可以把持得住......吧......
早餐過後，我們各自回房。
回到房間後，樂言馬上親暱搭著我的肩膊，壞壞笑道﹕「表哥你就好啦，有個咁索嘅表妹~」尾音還要拉長。
知道他在打甚麼壞主意，於是開門見山道﹕「你個死仔有咩想講呀? 講啦。」
樂言露出一絲驚訝，馬上又滿臉堆笑﹕「真係咩都呃唔到你，係咁嘅，我想同小惠調房......」
我若無其事的看了他一眼，道﹕「如果小惠ok嘅，我都ok。」
他有點驚訝，但又馬上邪笑道﹕「估唔到你咁爽快喎，我仲諗住你實會say no添。唔通......你諗住溝你表妹? 咁都啱嘅，反正你哋由細玩到大，實容易過追Fiona喎！而且小惠咁正，比著我都lur飯應啦！」
我冷冷的道﹕「你唔好誤會，我同小惠一啲嘢都無，我只係唔想比你煩住。我對Fiona係一心一意㗎。」
樂言嘿嘿笑道﹕「聽住先啦，大情聖！」
接著他的電話響起，他拿起一看，臉帶喜色道﹕「小惠都應承咗啦，搞掂！」
之後的一整天，我和樂言將她們的東西搬上搬下，到了傍晚時分我累得要死的攤在床上。我看著天花板，又想起小惠的事。
若她不是我的老婆，怎麼這麼輕易就和樂言調房? 她不怕我會對她做出甚麼嗎? 但若她是我的老婆，昨晚我說要吻她時，她卻緊張成這個樣子。到底要怎樣才能套出小惠的真正身份呢?
咔喳~
就在我胡思亂想之際，小惠打開房門走進來。
我坐起來靜靜的看著她，決定試探一下﹕「你咁就同樂言換房? 你唔驚我會食咗你呀? 」
她叉起腰嗔道﹕「乜我無話你知我會同Fiona同班咩? 如果你對我做啲咩嘅話，我一定會話比Fiona知！」
我冷笑一聲﹕「乜你唔係我老婆咩? 老公食老婆係天經地義喎。」
她漲紅了臉﹕「你...你......你唔係鍾意Fiona咩? 」
我點點頭﹕「係，緊係啦。但係你唔知道男人個身同心可以分開咩? 我個心當然係對Fiona一心一意啦，至於我個身呢......嘿嘿！」言畢我的視線在小惠身上遊走。
她見我的目光不懷好意，而且還嘿嘿淫笑，臉色大變的退到門口。
我見逗得她差不多，於是收起了一副淫賊模樣，懶洋洋道﹕「我同你講吓笑咋，你睇你緊張成咁，真係驚我食咗你呀? 不過話時話，你喺未來都係我老婆啦，要做嘅嘢都應該做過哂啦，你仲驚咩呢? 」說罷我馬上留意著她的反應。
小惠結結巴巴道﹕「你......你...你而家根本就未係我老公，所...所以你唔好掂我呀！」
真的是這樣嗎?
將心比己，若果我回到過去遇到還未成為我老婆的女生，她要碰我的話我才不管那麼多呢！反正她早晚也是我的老婆了。
還是因為男女有別，所以她的想法跟我不同呢?
就在我在分析小惠反應的同時，電話響起。
「喂！我而家喺呀君佢哋度，你過一過嚟啦！」樂言的訊息。
「我過一過隔離。」我拋下了這句話，就走到鄰室。
「喂，點呀? 」
「Hey，巴打你就爽啦！有個靚女同你同房！幾多人恨都恨唔到呀！」他最後看向呀君和Michael。
呀君和Michael不約而同的點點頭。
我冷冷的看著他道﹕「點夠你爽呀? 晚晚明正言順同Kitty......嘿！」
樂言竟然有點不好意思﹕「講呢啲......」
呀君問道﹕「樂言，呀Sam個表妹係咪真係咁正呀？」
樂言笑道﹕「唔駛估估吓，我哋而家就過去約佢一陣一齊食飯啦！」
呀君和Michael立刻同意﹕「好好！」兩個小子馬上跟著樂言想走到鄰房。
我馬上伸手攔住，低聲喝道﹕「等等！」
他們三個立時愣住了看著我。
我盯著呀君和Michael，續道﹕「你兩個唔好諗住打佢主意呀。」
呀君無奈的看著我﹕「Samuel哥，樂言話你唔會追你表妹個喎，而且你都追緊個咩Fiona啦......」
在我弄清楚我跟小惠的關係之前，我是不會讓任何人碰她的。
我決絕道﹕「總之食飯做friend可以，亦都只可以做呢啲，其他你哋諗都唔好諗。」
Michael埋怨道﹕「搞錯呀，你自己唔食都唔好阻住兄弟搵食啦。你又唔係佢老豆，點到你管呀? 」
呵！對不起，按小惠的說法，我可是她老公！
不過轉念一想，若小惠真是我的老婆，應該不會這麼容易見異思遷吧。若果不是，我倒也沒有理由妨礙著。我倒要看看小惠怎麼處理要來追求她的人。
想通這一點，我放開了手，笑道﹕「好！我決定唔阻住你哋啦，我就睇吓你哋點追小惠。」
他們見我大開方便之門，馬上魚貫的走進我的房間。
我也尾隨著他們，進房之時，他們已經互相打過招呼了。
呀君還好一點，和小惠還能保持正常的對答，反觀Michael的樣子簡直就像中了降頭一樣，除了呆看著小惠之外，甚麼也沒有做，一直到呀君和樂言將他拉走為止。
待他們走後，我跟小惠說﹕「乜你返嚟，你老公唔擔心㗎咩? 」
「嗯? 擔心咩呀? 」
我指了指鄰房﹕「擔心你比其他人追走囉。」
小惠聞言咭咭嬌笑﹕「佢唔擔心呀。做咩呀? 你好擔心咩? 」然後以一個挑戰的眼神看著我。
幹嗎? 你很希望我擔心你嗎? 我偏偏不如你所願。
我裝作毫不在乎﹕「我無所謂呀，反正你都未係我老婆。」
她臉露慍色﹕「哼！我過去搵佢哋！」說罷就起身離去。
砰！
這麼大力關門幹甚麼? 發怒嗎? 幹嗎發怒? 因為我表示別人追求她也沒所謂嗎? 她到底是來幹甚麼的? 不是來幫我追Fiona嗎? 還是來讓我吃醋的?
我通知了Jodi讓她也跟我們一起吃飯。於是我們一行七人，走到宿舍附近的台式餐廳吃晚飯。整頓晚飯中，呀君和Michael兩個傢伙像左右護法
一樣圍著小惠，又點頭哈腰，又噓寒問暖，逗得小惠嬌笑連連。
小惠不時向我投來一個得意的眼神，像是要故意激怒我似的。我猜到她的用意，雖然心裏也有一點戚戚然，但我卻沒有理會她，反而故意經常跟Jodi耳語，又說一些笑話惹她發笑。
「小惠，你做咩面色咁難睇嘅? 係咪頭先餐飯唔啱食呀? 」回宿舍時，Michael關心起小惠來。
呵！想要我吃醋嗎? 看來吃醋的是你吧！
小惠的聲音隱含著怒氣﹕「唔係呀！」
Michael給嚇得噤若寒蟬，頓時不敢作聲。
但小惠馬上又以撒嬌的語氣道﹕「Sorry呀Michael，我唔係有心發你脾氣㗎，我唔係幾舒服呀......」然後輕輕抓著他的手臂。
Michael馬上色授魂與，大聲表示毫不介意。
我冷眼旁觀，沒有作出任何反應，繼續與Jodi竊竊私語。
我眼角瞥見小惠偷偷看了我幾眼，又馬上回轉向Michael撒嬌。
我們就這樣互相鬥氣的過了一個晚上。