《唔係啩！真係有個老婆教我追女仔！》: 第五章
身穿運動套裝，小不點的美女......
我正根據故事中的形容，尋找「老婆」中。
「喂！sorry 呀，遲咗啲，等咗好耐呀？」Fiona歉意道。
我回過神來﹕「哦? 唔係呀，我都係啱啱到啫。」雖然從故事中我知道『Fiona』會稍遲一點，但我還是很早就到了，因為我想觀察一下有沒有類似「我老婆」的女生匿藏在附近，不過到目前為止好像沒有甚麼發現。
我頓了頓，續道﹕「咁我哋而家去邊呀? 」
Fiona笑道﹕「去食飯囉！跟我嚟啦。」然後走在前面。
我亦步亦趨的跟著Fiona，沿途還是東張西望，希望能發現可疑的美女。
走著走著，Fiona突然一臉奇怪的看著我，打趣道﹕「你做咩周圍望呀? 未嚟過又一城呀? 」
「吓? ......哈哈...係呀，大鄉里出城，見到咁多新奇刺激嘅嘢，忍唔住望多兩眼囉。」看來我還是專心一點吧，畢竟今晚是難得的二人約會。
Fiona噗哧一笑﹕「咁就等我帶你呢個鄉下仔去食西餐啦！我哋行快啲啦，喺前面咋。」然後三步并作兩步向前走去。
我們到了一間意式餐廳吃飯。由於我的注意力重新放在Fiona身上，所以我也沒心思留意有沒有可疑的美女了。
然後我順利跟著故事的發展，飯後跟Fiona去看電影，看完後從影院裏走出來，竟然碰見了熟人。
「咦? 嗰個咪Jodi? Hi，Jodi！」Fiona說話之間，已經迎了上去。
咦? Jodi? 她說想看的戲，就是這一套嗎?
Jodi聽到有人叫喚她，馬上轉過身來。她看見我和Fiona，顯得有點愕然。
「Fiona...Sam，你...你哋嚟睇戲呀? ......」Jodi的樣子，好像有點失落。
Fiona答道﹕「係呀，原來你就係想睇呢齣戲呀? 」
咦? Fiona這麼說，她也曾被Jodi邀約嗎?
Jodi瞅了Fiona和我一眼，道﹕「本來我想......嗯...都係無嘢啦，我唔阻你哋啦，拜拜。」說罷就轉身急步離開。
Fiona瞄了我一眼，又看著遠離的Jodi道﹕「Sam，Jodi好似有啲唔妥喎，佢應該都係返hall，不如你陪佢返去啦。」
甚麼? 我還想送你回家啊！
我連忙道﹕「佢...佢應該無事嘅，不如我送咗你返屋企先啦。」
Fiona已經動手推我的背﹕「唔駛啦，我好快就返到屋企，唔駛擔心我喎，你快啲追上去啦！」
等等...Fiona，你不會以為我和她有甚麼吧?
我急道﹕「但...但係......」
Fiona沒有讓我說下去，她道﹕「唔駛但係啦，係咁啦，拜拜。」一聲再會後，她就從商場的側門離開了。
我看了看Fiona的背影，又看著逐漸遠去的Jodi，實在是不知道該怎麼做才好，於是我馬上打電話給樂言求救。
「兄弟救命！」
「點呀? 比Fiona拒絕咗呀? 」
「唔係呀！煩過比佢拒絕！」然後我用三言兩語將剛才的事交代清楚。
他靜默了一會，道﹕「我諗可能Fiona見到Jodi嘅表情，誤會咗你同佢有啲嘢。」
我嚇了一大跳﹕「唔係啩? 咁點算呀? 」
「你而家即刻打比Fiona解釋囉。」
「吓? 解釋? 咁同話佢知我鍾意佢有咩分別呀? 」
「咁都無法㗎，一係你就由得佢一路誤會你同Jodi囉。」
「......................」我不知道該怎麼辦，只能沉默起來。
「横掂而家搞成咁，不如你直程同Fiona示愛啦！」
「而...而家? .......但係我無信心喎......」
「信我啦！你得嘅！」他又道﹕「嗱！你諗吓喎，講咗，機會係五十五十。唔講，機會係零。」
聽完他的意見，我就掛上了電話。
真的現在就跟Fiona說清楚嗎? 五十五十......一半機會......
豁出去了！死便死吧！
我奮然拿起電話，準備接通Fiona之際，陡然感到身後傳來急促的腳步聲，於是我馬上轉過身去，卻見一個少女以閃電的速度搶去我的電話逃走。
誰? 幹甚麽? 搶劫?
我霍地醒起這個少女就是我的「老婆」，她是乘我打電話給Fiona表白時搶去我的電話的！
Fuck！給剛才的突發事件弄得我心神恍惚，我都已經忘記了「老婆」會出場這件事。
我無奈看著已經一溜煙跑掉的「老婆」，本來事前還自信能在她搶去電話前的一剎抓住她，卻沒料到到最後結果還是一樣。
唉......反正她會在前方等我，我慢慢走過去就是了，只是她已經刪除了Fiona的電話，我已經錯過了跟Fiona解釋的時機......
眼見少女已經逃到了下一層，我垂頭喪氣的朝她逃走的方向緩緩前行，終於來到了自動電梯的上方，一名少女正站在自動電梯的下方，低下頭來回踱步不知道在想甚麼。
身穿運動套裝......對！是她了！
我從自動電梯向下走去，那少女聽到了腳步聲，抬起頭看著我，表情十分複雜。
『嘩屌！靚女！』
雖然我早知道她是一個美女，但看到她的容貌還是讓我感到驚訝。
這麼一個美女竟然是我的老婆? 這些機會難道真是屬於我的?
這時候我已經站在她的跟前，她卻默不作聲，垂下頭將電話還給我。
我接過後，冷靜的注視著她﹕「小姐你係邊個? 你做咩攞咗我電話? 」
少女回避著我的眼神，臉紅紅的道﹕「我...我有苦衷㗎......」
苦衷? 就是因為你是我的老婆嗎?
我沒有作聲，只是以疑惑的眼神盯著她。
她看了我一眼，又結結巴巴道﹕「你...你唔可以同Fiona表白㗎......」
她果然知道我和Fiona的關係！
我追問﹕「點解? 」
「因...因為你會失敗......」
失敗? 為甚麼她會知道? 難道她也像我一樣，能預知一點未來? 她和我一樣在看《我老婆教我追女仔》嗎? 還是她有另外一個故事看?
我有點緊張﹕「點解你會知道我會失敗? 」
少女悄臉一紅，然後咬一咬唇，毅然看著我道﹕「我其實係你老婆！所以我知道！」
我早知道你是我老婆了，但你是我老婆這件事跟知道Fiona會拒絕我這件事有關係嗎?
我見她還想說下去，於是截住了她﹕「等等先！首先我無老婆。就算你真係我老婆，點解你會知道我會同Fiona表白，又會知道我會失敗? 」
少女道﹕「因為我係你未來嘅老婆。我意思係，我係喺未來返嚟嘅，我同未來嘅你係夫妻關係。我返嚟係......」
未來?
她的這句說話，一下子就將我的思緒搞得混亂一團。
「等...等等先......」我感到有點頭昏腦脹，所以用手勢阻止她說下去。
她說從未來回來，坐時光機嗎? 穿越劇? 羊先生他在寫甚麼狗屁故事? 師奶劇嗎? 他知不知道會影響到我的?
等一等，或許她只是騙我的吧，怎麼時光機這麼快就發明出來了?
但......若果她不是我的老婆，又怎會知道我打算跟Fiona表白，又會說我會表白失敗呢?
少女見我默不作聲，問道﹕「你唔信? 」
老實說是很難相信，但若果羊先生的故事真的是這樣寫的話，那麼是真的也說不定。
我想了想，決定考一考她﹕「嗯......如果你真係我老婆，你應該會好清楚我......」
我還沒有說完，她已經搶道﹕「你叫陳洛鋒，英文名叫Samuel，平時朋友都叫你Sam；你今年19歲；生日係10月31日；血型係B+；你左手手臂同左腳腳板底各有一個一蚊大小嘅圓形胎記；你同你爹哋媽咪一齊住喺九龍灣；你有個細你四年嘅細妹同大你四年嘅家姐，你家姐已經搬咗出去住；你中學時係讀男校，預科時你轉咗去一間男女校；預科畢業後嘅暑假你因為踢波令右腳膝頭斷咗韌帶而住咗醫院一個月；你而家喺浸大讀緊account一年級；你有3個同學兼roommate，佢哋分別係樂言，呀君同Michael；而你同樂言係最friend因為你哋係同房；你到而家為止都未拍過拖；而家你追緊一個女仔，佢叫Fiona，同樣係讀浸大，但佢係讀econ............」
「夠...夠喇......停一停先......」她真的很清楚我的一切啊！難道她真的是從未來回來嗎?
總是覺得有那裏不對勁。想深一層，這些個人資料，若果找私家偵探的話，大概也可以查得出來吧。但我又有甚麼價值讓一個美女調查我呢?
我想不通這一點，但還是決定試一試她，我道﹕「我信你。咁你話你係我老婆，點解你無戴結婚介指嘅? 」
她馬上將手縮到背後，道﹕「我...我平時都唔鍾意戴，唔方便呀嘛。」
不方便嗎? 也說得通。
我又問﹕「我哋係咪已經結咗婚一段時間喇? 」
她點點頭。
既然如此，即是代表......
我突然上前貼近她，雙手放在她的纖腰將她拉近自己，腦袋向著她的臉龐湊過去。
「呀！你做咩呀！」她一邊驚叫一邊伸手推開我。
我還是緊緊的摟著她，想當然道﹕「咁你係我老婆嘛，咁係咪而家老公要錫啖都唔得先? 反正我哋應該咩都做過哂啦。」
少女滿臉通紅，堅拒著我﹕「唔...唔得呀......呢...呢度大庭廣眾...好...好多人望住呀......」
「哦......你怕人望咋? 咁簡單啦。」
我將她拉到附近一處暗角，不是要「打鑊」，而是「壁咚」一下將她逼到牆壁，繼續凝視著她。
她的臉繼續漲得通紅，看了我一眼之後又不敢跟我對視，目光盡是左右游移。
我觀察著她的反應暗笑，嘴裏卻若無其事的道﹕「我要錫落去啦。」
她突然閉上了眼睛，睫毛微微顫動著，臉部肌肉也因為緊張而繃緊起來。
不用那麼緊張吧? 只是吻一下而已，還說已經跟我結了婚一段時間呢！這也未免太欠說服力了吧。
本來我只是想試探她一下，但她這個嬌豔欲滴，欲拒還迎的樣子，而且鼻端還傳來她身上的淡淡幽香，還差點讓我把持不住。
我馬上深呼吸一口氣，放開摟著她的手並向後悄悄遠離，讓自己冷靜下來。
她發現這麼久還沒有甚麼動靜，而且我的手也放開了她，於是她慢慢睜開眼睛。
「你...你又話......」少女露出鬆了一口氣卻又有點失望的神情，手按著胸口微微喘氣。
我笑道﹕「你真係好想我錫你咩? Sorry，我鍾意嗰個係Fiona，唔係你。」
她神色哀傷，幽幽的道﹕「我知道呀......」
老實說我有千百萬個問題想問她，但我很需要獨處來思考一下今晚發生的事，而且我也很想看看羊先生有沒有更新，所以不太想跟她繼續糾纏下去。
於是我道﹕「我本來有好多嘢想問你，但而家好夜啦。我送你返去先啦。你而家住喺邊? 」
「我而家住Hall。」少女回答。
「Hall? 」我驚訝得張大嘴巴。「你意思係宿舍? 大學宿舍? 」
她點頭道﹕「係呀，我都係住周Hall。」
又多了一個迷團了，不過我實在累得不想追問下去，於是道﹕「咁我哋一齊搭小巴返去啦。」
少女點點頭，然後亦步亦趨的跟著我。我們一路無話，直至回到宿舍。
升降機到了六樓，她緩緩步出，我連忙道﹕「喂！你仲未話我知你叫咩名喎。」
她回頭道﹕「我...你叫我小惠啦......」然後她又怯怯的道﹕「我...可唔可以叫你呀鋒呀? ......」
「嗯......可以就可以，但係有其他人嘅話你都係叫返我做Sam啦。」我續道﹕「我聽朝嚟搵你好嗎? 你幾號電話? 」
小惠拿起電話按了幾下，然後我的電話就響起來了。
她果然是知道我的電話號碼的。
「拜拜，聽朝見啦。」說罷她就轉身離開了。