[多甜+少少陰謀+啲啲感情]《你有冇諗過，你用緊嗰間試身室其實係一間炮房》: 007

7.
你十指不沾陽春水，最成功嘅一次入廚經驗，都只係煮咗碗公仔麵，所以你只可以企係Sara隔離幫下手遞下嘢。

Sara就好似識魔法咁，兩隻手係度不停飛舞，一件件平平無奇嘅食材，變成一碟又一碟色香味俱全嘅美食，單係聞下都搞到你食指大動。

「好！食得。」Sara抹一抹額頭上面嘅汗珠。

你將所有菜整齊咁放到飯檯上面，仲好紳士咁幫Sara拉開張櫈。

你開咗部電視，你習慣每次食飯都要用電視汁撈飯，當然你唔會弱智到睇TBB，你只係用部智能電視播下YOUTUBE片，純粹想有啲聲音有啲畫，等間屋唔好咁靜。



「嘩，好好食喎依件魚柳。」你食到成個嘴都油淋淋。

Sara笑到花枝招展，「係咩？」

「估唔到你煮嘢都幾好食。」

「鍾意食未好囉。」

唔知點解你覺得好幸福，覺得咁樣嘅生活或者都唔錯。



「Sara，不如你今晚係度訓啊？反正有位。」

Sara好奸咁笑，「咸濕仔，又想搞我啊？」

「邊係啊！！」你好激動咁講。

Sara扁曬嘴，「乜原來我咁無吸引力？」

「唔係！你好有吸引力！」



「嘿，係咩？今晚我唔係度訓啦，我仲要返去煮飯比阿媽食。」

「哦……好啊。」

Sara望一望錶，「咦，時間差唔多啦喎，我返去先啦。」

「我送你啊。」

「唔駛送啦，你洗埋啲碗佢啦，係咁。」

Sara一枝箭咁衝出去，留低你一個人對住三碟餸。

＊＊＊＊＊＊＊
Sara一個人跑緊返屋企，佢不停望手上面嘅錶，好好彩比佢截到一部的士。



佢返到屋企樓下，係超級市場求其買咗啲餸，就拿拿聲走返去。

「阿女，你返黎啦？」一位年紀老邁嘅老婆婆，坐係輪椅上面講。

「阿媽，我返黎啦。」

Sara走入廚房，駕輕就熟煮咗三碟餸、一個湯。

「係呢……你今日去咗邊啊？」

「無，同個同事去玩啫。」

「哦……男同事啊？」



Sara有少少臉紅，「係啊。」

「係唔係你成日講嗰個同事？」

Sara點頭，「係啊，就係嗰個『救過我』嘅同事啊。」

＊＊＊＊＊＊＊＊＊＊＊＊＊

你洗好曬啲碟，自己一個人坐係床上面望住天花板沉思。

「Sara……睇落去係一個唔錯嘅女仔，點解佢會同老闆搭上呢？」

第二日，公司。

你照舊係度做機械式嘅工作，有時候你會反思，或者係不久嘅將來，你依個職位就可以完完全全比科技產物取代，你嘅存在只係喺度出賣緊廉價嘅勞力，到底你存在有乜嘢價值？



Sara走過黎用膊頭撞一撞你，「喂，今夜上你度啊。」

「上我度？」

佢有少少嬲咁講：「咩喎，你琴日唔係約我嫁咩？」

「係，當然係！」

「咁你放工接我去啦，唔好再走咗去啦。」

「係，門口等。」

Sara行返去佢嗰面執衫，而你就係度一路諗，一路傻笑。



Cindy粒聲唔出係你後面出現，嚇到你成個人彈起。

「嘩，你企係度做乜啊？」

「無，有嘢想搵你幫忙。」