[多甜+少少陰謀+啲啲感情]《你有冇諗過，你用緊嗰間試身室其實係一間炮房》: 006

你今日放假唔駛返工，你習慣係任何假期都起碼要訓到晏就三點先醒，係你訓到蒙查查個陣，電話響起，嘈醒咗你。

你用未訓醒嘅聲線講：「喂……邊位啊？」

「係我啊。」Sara講。

「係……係你？點解你有我電話？」

「我入去公司間房度拎你資料黎睇，未搵到你電話囉。」



「咁樣做唔係咁好喎！」

「有咩唔係咁好喎，你搞完我想咁樣就走咗去？」

「唔……唔係。」

佢認真咁講：「十五分鐘後我就會去到你樓下，落黎接我，係咁。」

「喂！喂！」



Sara根本就唔比時間你拒絕就收咗線，你即刻去洗面刷牙，換咗件衫，求其著條牛仔褲踢住拖咁衝落去。

啱啱好比你趕得切十分鐘就落到去，Sara亦都未黎到。

五分鐘後，Sara好準時咁出現。

「咦，幾準時喎你。」Sara笑笑口咁講。

「係……你今日……好靚。」



Sara著咗一件露臍白色短袖衫，露出佢羊脂白玉嘅肌膚，一條低腰牛仔褲，將佢臀部線條盡展，再加埋對紅色平底鞋，休閒得黎又搶眼。

明明係一套好普通嘅配搭，著係Sara身上好似特別唔同。

佢走過黎橋住你隻手，「琴晚收工做咩唔等我？驚我食咗你呀？」

「唔……唔係。」

佢胸前肉球壓係你手臂度，搞到你成塊面都紅曬，下面仲開始有反應。

「哼，咁大膽放我飛機，今日就罰你陪我去玩。」

「哦……好啊。」

你成個人不在狀態，就好似未訓醒咁，到你有返反應嘅時候，已經發覺你哋係樓下間茶餐廳食緊早餐。



「依度嘅蛋治幾好食喎。」佢用水汪汪嘅眼睛望實你講。

你感覺到身體好似觸電咁震咗一震，心跳加速，掌心出汗，用乾涸嘅嘴好艱難咁吐出「係啊」兩個字。

你係腦海入面諗，唔通咁樣就係拍緊拖？唔通佢已經係你女朋友？

食完嘢，埋咗單，佢繼續橋住你隻手。

「係呢，附近有乜嘢玩嫁？」

你身為足不出戶嘅宅男，附近有乜玩識條春咩。

「去嗰間商場，好似有間機鋪。」



「哦，好啊。」

就係咁，你帶住Sara去咗機鋪度玩。

同其他故事一樣，一對情侶去得機鋪，一定會遇到蠱惑仔黎搞你哋，今次亦都唔例外。

「喂，靚女，唔好跟依條毒撚，跟我哋去玩啦。」金毛飛一號個頭哄到埋去Sara塊面度講。

Sara紮馬沉腰，右手一勾捉住金毛飛個衣領，左手一抓就捉住佢隻右手，一個過肩摔將個金毛飛撻咗落地度，其他同伴見到馬上拖走比Sara撻暈咗嘅金毛飛。

「好……好勁啊你。」

Sara有少少面紅，「我細過學過下柔道啫。」

「係呢，你屋企有冇人啊？」Sara問。



「無人啊，阿爸係大陸做嘢，阿媽一早過咗生。」

「對唔住……，咁你係獨生子？」

「嗯。」

「不如我哋去買啲餸，上你屋企煮飯啊，睇你個樣都好耐無食過住家飯啦。」

「煮……煮飯？」

「唔得啊？」

「得，得，得！」



你就帶住佢去咗超級市場度買餸，買好曬材料之後就上咗你屋企。