那年玩社，四位靚女: 二十六

第二日，我就跟住陳天元，去咗附近一個七人足球場，去同足球隊訓練。

足球隊教練吳 sir 似乎同我一見如故，一見到我就同我不斷好興奮咁喺度傾偈。

「你知唔知呀康洛文，有你嘅加入，我哋嘅實力一定會有所提升！」

「唔好咁講啦吳 sir，我盡到我嘅能力，幫到學校贏波就得架喇。」

「好！我好欣賞你嘅態度！天元，學下人哋啦！」





Sky 哥躺著也中槍。

「我哋球隊其實以屯門區嚟講，實力其實都唔錯，就算而家我哋係十六強，晉級機會都唔細。申屠間唔中會出去比賽，一剔盃都有玩過；莫錦佳速度咁快，護波能力又強，大部分同齡對手都 mark 唔住佢。不過講到尾，我哋都係爭咁個可以係中場派牌，做到輸送嘅球員。」

吳 sir 對住我微笑，「而你，就係呢個10號位嘅最佳人選。我已經睇咗好多段 Youtube 嘅精華片喇，你絕對適合我哋球隊嘅打法。」

既然連教練都對我咁有信心，我冇理由唔信自己嘅！

第一次訓練，我已經好快獲得隊友嘅信任。而且，我同莫錦佳自從社足之後，越嚟越合拍，我哋兩個之間開始建立到默契，好多時只要我比一球長傳，佢就會識走位接應，兩三腳就可以穿破防線。





完咗訓練之後，我就去問吳 sir：「之前都唔記得問，我哋下一場學界係幾時？」

「咪就係下個禮拜，我哋對可藝。」

原來下一場比賽咁近，我決定跟住嗰個禮拜，加強訓練強度，希望冇踢半年，狀態唔會跌得太犀利。

「喂豬 今晚去唔去跑下步」

我知嘉瑜都幾鍾意做運動，我估佢都應承。





「ho ar」

結果，係跟住嗰個禮拜，我每晚幫成班同學溫書之後，就即刻食飯，再去練跑練返至少一個鐘。喺嗰陣時，我連 FIFA 同 CSGO 都冇玩，晚晚都有多姿多采嘅生活。

「亞仔，其實你攰唔攰？」有一晚，阿媽突然問我。「你晚晚都咁多嘢做，你頂唔頂得順？」

「阿媽，你想我將啲精力攞去同人打交，定係好似而家咁，又溫書又去下踢波？」

「咁你而家又真係生性咗嘅。至少我唔洗隔個禮拜又去見你嗰個麥 sir。」

講到呢度，我又諗起麥 sir 同我講嘅嘢。我係咪真係要成世困係屯門？

不過，我心意已決，我要留係呢度，證明比嗰班所謂名校仔睇，我哋都好掂！

呢一個信念，令我每一次練波，每一次幫人溫書都充滿力量，為咗自己，為咗其他人，點都要做到成績出嚟！





第二日返學，我即刻問成班同學：「喂，聽日我哋學界比賽，你哋嚟唔嚟睇？」

「嚟！你落場就嚟！」

「咁你嚟硬喇，我肯定正選上場，唔正選都後備落場打返廿分鐘。」

「涼中球王，啪啪啪！」申屠呢啲咪叫識英雄重英雄囉！

經過一個朝頭早嘅努力，有成廿零三十個人會嚟睇。

「我哋要將兆麟場變做我哋涼中嘅主場，好唔好？」