那年玩社，四位靚女: 二十五

「文仔，我知道你可以去得更遠，去到最 top 嗰班。不過，如果你真係想休息一下嘅，麥 sir 都會尊重你嘅決定。」

「其實麥 sir，我個底咁花，又可以去到邊到？我入到嚟涼中已經好好彩。」

「又唔係咁講嘅，你真係想嘅話，我同學校嗰邊再傾吓，出多封推薦信，證明你操行有改善又唔算好難，你出聲就得。」

我低頭沉思咗一陣，歎咗一吓氣。

「麥 sir，你比我少少時間我諗吓。」





「好，你諗好嘅話 call 我，或者比個 whatsapp 我都得。記住，麥 sir 唔係迫你，如果你覺得喺到讀係開心嘅話，你唔一定要轉嘅，最重要係你鍾唔鍾意。」

「多謝你，麥 sir。」

「唔洗多謝。同埋，以後你行街撞到我，叫我老麥就得啦，我都唔再係你呀 sir 喇。」

「都係一句姐。」

之後，佢就走咗去對面酒樓飲茶。一個五十幾歲嘅中年人，行步路都輕鬆過人，反而係我呢個十七八歲嘅後生仔，嗰一晚掛住諗佢比我嘅問題，心情似乎變得沉重好多。





我一直好相信老麥所講嘅嘢，我係可以去到更加高嘅成就。我喺中四嗰年，做到XBS足球隊正選，仲做埋學界MVP，當時已經有職業隊邀請我去試腳，甚至做職業足球員。如果唔係年尾冇喇喇比人屈我打交，我估我應該做咗港超聯球員，打緊職業隊。

諗到呢到，我先覺得，原來我仲好鍾意踢波。如果我要係足球上面有發展，咁我問老麥攞返封信，再去報董之英，或者乜嘢國際學校就得，橫掂英文都ok。

但係，係我身邊嘅，係嘉瑜。

我問自己，我真係可以因為踢波而放低佢？

我放唔低佢。但係我真係好想踢波。





於是，我最後諗到個方法：既然兩者都放唔低，why not both?

第二日，我就同足球隊教練報名加入。

「見到你個cv，我估我都唔洗要你試吓腳。」

「咁就好喇。我估我只要操一操，就可以落場㗎喇。」

「好，咁記得聽日嚟訓練。」